Loowo 34 - Gooti Toolluro Yogalokwono

Moosesol aboloka tovinokwono

¹ To'no'gwowi Moosesol kwako worato Moowapda'ai wuugollu'movo'no muumuudo Niboo toollu sulokaikono. Toro ilno sumaiyokwe muumuudo Pisiga toollu muunyu toru sulai'movokaikono. Muumuudo Pisiga su tool wagwolago Jerikoo towaida'ai igo'mgu wo'dowodekono. Toro te Moosesol muumuudo su toollu iloda'mduke toga Gooti Yawel yiuwi'nokai kwako tovi kuuduuwallokaikono. Kwako su tov Isuraiyolda'ai a'mwo abolo tonyu wiyo'moneyokweyokwono. Toro towai wuuduuwallo'moneyokwe kwako Giliyatda'ai imuu wagwolago Dan toru'no kuuduuwallokaikono.

² Aki Naftalai toorogai'aro Efreyum toorogai'aro Manaseyol toorogai'aro tooravuro yiuwi'nokai kwako kugai'aro kuuduuwallokaikono. Aki Juuda tooravuro yiuwi'nokai kwako kugai'aro kuuduuwallokaikono. Juudada'ai kwako su tov soolwara buugo Meditoreniyen tovuro aiyowo'mo do'gwapiyo towai'no wo'dowodokwono.

³ Aki Juudada'ai kwako su tovi imomgu kwako Negev tov kurukwe'aro kuuduuwallokaikono. Aki kwako worato purukwe'aro kuuduuwallokaikono. Kwako worato su tovi wagwolago Jerikoo tov wo'dowodorukono. Wagwolago su tovino yovo puruv, Iko det womdokweyoveyorukono. Toro towaida'ai wuuduuwalluno sumaiyokwe yiuno Soowar toru'no kuuduuwallokaikono.

⁴ Toro tonyu me'no wuuduuwalluno sumaiyokwe toga Gooti Yawel Moosesollu kuudokaikono. “Kwako puvino aiyoga Eburaiyameke Aisakeke Jekoopeke toorai subuu'yamju aro aduuwiyajonyugono. “Kwako aguduuwallumi su tov kemi tellukweyago tonyu wimonyugono.” Toro me'no aduuwiyajo kwako su tovi sumdo wonbino'moneyokwe nokwo gwonyapino agujumekugono. Toro kweku kuruv kwako su toru'no ku'nono maulabinekugono.” Kuudokaikono.

⁵ Toro wuujuno sumaiyokwe Gooti Yawelluro womdokwe Moosesol kwako Moowap toru kuuno mwalo'no abolokaikono. Gooti Yawelluro aduuwiyoka su tov kuvinono kwimo'nokaikono.

************

⁹ To'no'gwowi Moosesol Nuunolluro muugunyo Joosuuwallu ato me'no kuubogai'noka toolluno tov Gooti Yawelluro pi'mwo kuudokwe sumo'nyajukekono. Toro toolluro wuudoduke tovi Isuraiyolda'ai a'mwo abolo ton kaduko wiyodupu kuumjunyajupogano. Aki Gooti Yawelluro Moosesollu kuuguudo me'no aduuwiyajuko kugai'aro tonyu kuvinono kuumjunyajupogano.