Jagillo 21 - Gooti Toolluro Yogalokwono

Aiyon sallukwa'jo tovida'ai gabakuto toolbusuko pwollu sokwolluruubidapiyoka tovinokwono

⁴ Toruda'ai Isuraiyolda'ai a'mwo abolo ton muumuudo Hooro toru wuugollu'mo'mno sumaveyokwe kwako Idoom tovi biyoguto'moullo'moneyokwe Soolwara Weyako tovuro wonyo buugo Akaba tomuu'aro aboulapogano. Toro ton boulno sumaveyokwe puukumi'yago su tovino biyolo adou'mwonyopiyopogano.

⁵ Toro ton Gooti Yaweke Mooseseke toorallu mebweyogalo aro kuudopogano. “Kev toorakul nemi Ijupda'ai kwako a'mwomaiyo kuu'maiyo akaru bolpino'moneyokwe anekumokabadokuulo tov buro'nyo kavlo tovino'mdeyo? Kwako anekumokabadokuulo akaru wosamujuko togai'aro wonyo togai'aro nonagutorukono. Aki bret mana kwoda'mollunyo akarai nodowa biyolo anekuu'nadopiyo.” Kuudopogano.

⁶ Mebweyogalo toro wuudodopure tovi Gooti Yawel wuu'nyuno sumaiyokwe gabakuto bulaptokwe pworai amoropiyabokaikono. Toro amoropiyaboka su tooro Isuraiyolda'ai a'mwo abolo tonyu tuko do'mdopure toga bwotonyago ton yiuno'no abollajupogano.

⁷ Bwotonyago ton toro kuuno mujobolmovla'mdupu a'mwo abolo pun Moosesollu abuudopogano. “Nevu guuge'aro Gooti Yaweke'aro toorakullu mebweyogalo adaikullowo tovino kuudo me'no souroma'mwakuuwono. Oo ma'no ma'no me'no aikullowonoldeyo. Kuudo me'no souroma'mwakuuwono. Toro tovino tov Gooti Yawel gabakuto bulaptokwe toorai amodukwopiyoneyokweyo'mo guu subusu'nyogalo neya duudono.” Kuudopogano. Toro kuudopo tovi Moosesol a'mwo abolo tonyu wiyo'mwojo'moneyokwe subusu'nyogalo kuvinono kuudokaikono.

⁸ Toro kuudoka tovi Gooti Yawel wuu'no'no Moosesollu aro kuudokaikono. “Guu gabakuto toolbusuko pwollu yakwollo'bi iko tovi muunyu toru duuruubidapiyono. Toro te yiuwi'nokai a'mwo abolo ton gabakuto tooro tuko do'mdopure su tobuuro iko tovi muunyu toru uuruubina'dowo'jure toollu abwonpi toga mabolpinogano. Toro kubuuro kuruv aiyo nokwo mwalpinobuurogano.” Kuudokaikono.

⁹ Toro kuudoka tovi Moosesol wuu'nyuno sumaiyokwe aiyon sallukwa'jo tovida'ai gabakuto toolbusuko pwollu yakwollo'no iko tovi muunyu toru kuuruubidapiyokaikono. Toro te a'mwo abolo pwolno puru'monodo ton gabakuto tooro tuko do'mdopure toga aiyon sallukwa'jo gabakuto su toollu bwonodopure tov mabolodupu aiyo to'no amwallajupogano.