Jagillo 14 - Gooti Toolluro Yogalokwono

Isuraiyolda'ai a'mwo abolo ton mebweyogalo aullajunopo tovinokwono

¹ Toruda'ai a'mwo domokwe pworavuro kuuguudo soukuu'nuudopo tovi yiuwi'nokai Isuraiyolda'ai a'mwo abolo ton wuu'no'mno surakuuto su tollugwoji kumdato juno juno sumaveyokwe iru'mago toga'no adourosopogano.

² Toro dourosuno sumaveyokwe yiuwi'nokai Isuraiyolda'ai a'mwo abolo ton Mooseseke Erooneke todorallu mebweyogalo aro kuudopogano. “Nevu kwako Ijup towai'deyo oo kwako a'mwomaiyo kuu'maiyo akawai'deyo abolowa'jujuko'mno'juki ilaiyokwono.

³ Toro kuvi kuruv Gooti Yawel kwako su tovino anekumokabadopiko to'gwowi buro'nyo kavlo tovino'mdeyo? Nemi ikomago tooro molo tovi romiyanekubweyopi nemoro abolo togai'aro kwoloraiyo togai'aro tobuurai meromokavlapino'mo'mdukono? Nemi su toro tov nonekullumo'no'jokweyo'mo Ijup'no aikomgu avlawa'ji tov ilaiyokwono.” Kuudopogano.

⁴ Toro wuujuno sumaveyokwe kevnokwe ton aro sajunopogano. “Nemi Ijup'no aikomgu nekumokavlawono'mo a'mwo aguto muuduko pwollu amolludapiyano.” Sajunopogano.

⁵ Toro sajunopo tovino tov Mooseseke Erooneke todoral Isuraiyolda'ai a'mwo abolo tonyuro sumdollu toru kwako tovi kwolomuulo'narolorakono.

⁶ Toro wolomuulo'na'dole toga a'mwo domokwe pworal wonyuno sumaleyokwe kalo bwotonyo kwinolorakono. Domokwe su tooral pwol Nuunolluro muugunyo Joosuuwaikono. Pwol Jefuuneyolluro muugunyo Kelepekono. Toro tooral kalo winyuno sumaleyokwe kemi youro ton aroju'nolorakono.

⁷ Toro roju'nyuno sumaleyokwe yiuwi'nokai Isuraiyolda'ai a'mwo abolo tonyu aro kuudolorakono. “Kwako domo'mo kwonomollumwa'juuwo su tov sugudo kuunodorukono.

⁸ Aki toro towai woguulkwako bwotonyagokwe su toru'no Gooti Yawel nemino ilaiyo kwino'ji tov kuvinono nekumokaulawo'ji maranonogano.

⁹ Toro te kevu Gooti Yawellu kisuvolo nuuwipiyo. Aki kwako su tovida'ai a'mwo abolo mwalodupudo tonyuno luko mipinono. A'mwo abolo su ton nemi weya'wo taiyo tooraibusuko tonyu nokwo romiyebuuropiyanonogano. Aki kemoro kuunano gooti toorai nemoro Gooti Yawel uuwolo'mdowodo tool nevuge amwallo. Toro tovino tov kevu kwako su toru'no kuullo'mo tovino luko mipinono.” Kuudolorakono.

¹⁰ Toro kuudolo kuvi kuruv Isuraiyolda'ai a'mwo abolo ton muu'nyubusuko yo'mno Joosuuwaike Kelepeke toorallu sulo togai luvoromiyoso'mo sopogano. Toro yodopure toga Gooti Yawelluro bako bwotonyo tov ilomoropiyo'moneyokwe sel ago tovi muunyu toru pwopiyoduke tovi kwonopogano. Toro wonyuno sumaveyokwe a'mwo su toorallu sulo tokwe maluvoromiyosopogano.

************ Gooti Yawel Isuraiyolda'ai tonyu kuudo kuuteyoka tovinokwono

²⁶ Toruda'ai Gooti Yawel Mooseseke Erooneke todorallu aro kuudokaikono.

²⁷ “Isuraiyolda'ai a'mwo abolo su tonyuro mebweyogalo mujonyudumabodupudo tovi me'no wuu'nodumdonyugono. Toro toonyu a'mwo abolo ma'no ma'no kuumwiyo su tonyuro mebweyogalo kuuno wuu'nugovlaiyo'mo manyunadopiyo.

²⁸ Toro tovino tov kevu a'mwo abolo su tonyu duujulo. “Nuu Gooti Yawel toonyu yiuno nebal'no jokwenyugono. Toro toonyu aro adaikullumono. Nuu kemoro mebweyogalo anyudumapo tovi me'no aikuu'numonyugono. Mebweyogalo su tov arokwono. Nevu kwako a'mwomaiyo kuu'maiyo akaru abolowa'jujuko'mno'juki ilaiyokwono. Mebweyogalo anyudumapo su tovi ikuu'nodum tomgu'aro kuvinono ikubwemonyugono.

²⁹ Toro te kevu abolpi tobuurekulluro kulako ton kwako a'mwomaiyo kuu'maiyo akaru yo'mowopipinogano. Kevu mino mebweyogalo anyudumapo tovino tov kevu 20-pela kworomo tobuullu me'no kuuwolo'nyugopo togaikul kwako muuduko toru'no maulapinogaikikono.

³⁰ Nuu kemi yiunokuudo kuulomekumwallo'mo subuu'yamju adaikullo kwako su toru'no kev togaikulluro puru'monodo kuruv maulawonokwono. Toro kuvi kuruv yiuno Jefuuneyolluro muugunyo Kelepeke'aro Nuunolluro muugunyo Joosuuwaike'aro tooralno'gwowi nokwo kuulabullunorakono.

³¹ Aki yiuwi'nokai Isuraiyolda'ai togaikulluro kwoloraiyo tobuurogai'aro kwako su toru'no mollubworomokaulamonyugono. Toro tobuuraino kevu aro me'no adumapogaikikono. Kwako su toruda'ai a'mwo tooro nomeromokavlapinorogano. Kevnokwe togaikul toro adumapo kuvi kuruv kwoloraiyo su tobuuraino'gwowi nuvnokwe toonyu kwako su toru'no mollubworomokaulamonyugono. Kevu kwako su tovino ilaiyo maikullunadopiko su toru kuulomorumwallumonyugono. Kemoro kwoloraiyo tobuurai kuvinono kuulomorumwallumonyugono.

³² Toro kuvi kuruv kev togaikulno'gwowi bolopi kemoro kulako ton kwako a'mwomaiyo kuu'maiyo akaru uupinogano.” Duujulo.” Gooti Yawel Mooseseke Erooneke todorallu toro kuudokaikono.