Hibruu 7 - Gooti Toolluro Yogalokwono

Melkisodekolluro pris womdo tov uuwolo'mdowodo tovinokwono

¹ Melkisodekol wagwolago Salem tovida'ai a'mwo aguto kig sumo'nyajukekono. Aki toro tool Gooti Yiuwi'nokai Tonyu Uuwolo'mdowodo toolluro pris womdokwe sumo'nyajukekono. Aiyoga Melkisodekol Eburaiyamollu me'no kuuru'marokaikono. Eburaiyamol a'mwo aguto kig aral aral pworai molo wiyo'no me'no uuwoleno sumaiyokwe aikomgu boduke toollu Melkisodekol kuuru'marokaikono. Toro wuuru'ma'no sumaiyokwe Eburaiyamollu Gooti toolluro yogalo sugudo tokwe aduubweyokaikono.

² Toro duubweno sumaiyokwe Eburaiyamol yiuwi'nokai kuto ivito aikomgu avipolomokaboka tonyu mollu'bworosuno sumaiyokwe atousal amomuudeyosokaikono. Toro te Eburaiyamol kuto ivito atousal amomuudeyosoka su tonyuda'ai puruv Melkisodekollu kwiyokaikono. Melkisodekolluro yovo tovino kavlo puruv arokwono. Aguto kig su tool pasudo idopto'nodo to'no yomjomwekovlaiyokwekono. Aki kavlo puruv wagwolago Salem tovuro aguto kig sumo'nyajukekono. Toro toolluro yovo su tovino aro mollovodo'mwojadodupudekono. Aguto kig su tool sumwoluko kavo wosunyo'moneyokweyolekono.

³ Melkisodekolluro ganumiyago toolluno kuuguudo puruv Gooti toolluro yogalo tovi miyokwollosungikokwono. Aki Melkisodekolluro ganeyago tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro iko tovasuda'ai sawosunopo tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro muudu'no sumo'noka iruko tollugwojuno kuuguudo puruv Gooti toolluro yogalo tovi miyokwollosungikokwono. Aki Melkisodekolluro aboloka tovino kuuguudo puruv Gooti toolluro yogalo tovi miyokwollosungikokwono. Toro te Melkisodekol Gooti toolluro Kwolaiyo toolbusuko sumo'nyajukekono. Aki pris womdo tov yiunokuudo mujumovlaiyo'moneyokwekono.

⁴ Kuudo neya jaullulo. Eburaiyamol Isuraiyolda'ai a'mwo abolo tonyuro kwikeyago aguto kwimo'nyajukekono. Toro tool kuto ivito avipolomokaboka tonyu atousal amollu'bworosoka tovida'ai puruv Melkisodekollu kwiyokaikono. Eburaiyamol a'mwo su toollu toro kwiyoka tov kwollu kwako tomuu'aro suwapiyajukekono. Melkisodekolno'gwowi Eburaiyamollu aguto kwimo'nyajukekono.

⁵ Moosesolluro loowo puruv pris womdokwe tooraino aro dodowodokwono. “A'mwo Livai iko tovasuda'ai bodupudo tooro Isuraiyol tonyuro kuto ivito nuugwiyo tonyuda'ai pun neya ma'mwalpinorogano. Yiuwi'nokai a'mwo abolo kevuge avalo su ton kemoro kuto ivito nuugwiyo atousal amollu'bworosupi tonyuda'ai puru'monodo tov Livai iko tovasuda'ai pris womdokwe su toorai neya wimwalpinogano.” Dodowodokwono. Toro te a'mwo Livai iko tovasuda'ai su tooro kevuge avalo Eburaiyamolluro kwikweyago a'mwo abolo punyuro ato tovida'ai kuto ivito nuugwiyo ton amallajupogano.

⁶ Toro kuvi kuruv Melkisodekolno'gwowi Livai iko tovasuda'ai abokalmaiyo. Toro kwol kuruv a'mwo su tool Eburaiyamolluro kuto ivito atousal amollu'bworosoka tovida'ai puruv amarokaikono. Aki Melkisodekol Eburaiyamollu Gooti toolluro yogalo sugudo pun aduubweyokaikono. Eburaiyamol Gooti toolluro subuu'yamju kwiyajuko tonyu kuvinono amaroka tookono.

⁷ Kuudo neya jaullulo. A'mwo pwol yiuno a'mwo gabovo gami kwako tomuu'aro iwapiyodowo'jure pwollu Gooti toolluro yogalo sugudo tokwe nokwo duubweyonekono. Pasudo su tov kuvi kuunogano. Toro te Eburaiyamol Melkisodekollu kwako tomuu'aro suwapiyajukekono.

⁸ Livai iko tovasuda'ai pris tooro Isuraiyol a'mwo abolo tonyuro kuto ivito atousal mollu'bworosodopure tovida'ai puruv amallajuporogano. Su toro amallajupo tooro kwako akavida'ai kulakokwerogano. Toro tooro mujobolmelabodupudorogano. Toro kuvi kuruv Melkisodekolluno'gwowi, Me'no abolokaikono, tovino Gooti toolluro yogalo tovi miyokwollosungikokwono. Toro tovino tov Melkisodekolluno aro kuudo me'no youroma'dowadekono. Oo aiyo kuuno mujomwekovla'mdowodoldeyo.

⁹ Aki Livai iko tovasuda'ai pris tooro a'mwo abolo tonyuro kuto ivito atousal mollu'bworosodopure tonyuda'ai puvi me'no amallajuporogano. Toro kworo kuruv aiyoga Eburaiyamol kuto ivito atousal amollu'bworosoka tovida'ai puruv Melkisodekollu kwiyokaikono. Toro kwiyoka toga Eburaiyamol gami jukweyago Livai kwolluda'aiyo'mo kuruv Melkisodekollu me'no kwiyokaikono.

¹⁰ Nebalokwono. Su toro toga Livaiyol yere mimo'noduke kuvi kuruv gami jukweyago Eburaiyamolluro kulako nyawosunono tovino'gwowi me'no kwollajukekono. Toro te Eburaiyamol Melkisodekollu wuuru'maro'no kwiyoka toga gamoro jukweyago Livai kwol kuruv Melkisodekollu me'no wuuru'maro'no kwiyoka to'busuko sumo'nokakwono.

Melkisodekolbusuko pris muuduko Jisasol sumdomguda'ai pris toorai uuwolo'mdowodo tovinokwono

¹¹ Pris womdo sajupo tooraino aiyoga Gooti toolluro loowo kwiyoka puruv aro dodowodokwono. “Yiuno a'mwo Livai iko tovasuda'ai yawosunodupudo su toorono pris womdo tov nokwo imwalpinorogano.” Dodowodokwono. Toro kuvi kuruv Livai iko tovasuda'ai su tooravuro pris womdo mujumovla'mdopure tovida'ai a'mwo abolo ton Gooti toolluro sumdo tovi sugudo mimo'nyajupogano. A'mwo abolo su ton sugudo kuvinono sumo'nopujuko'mno'juki nevu lukomguda'ai tonol pris Melkisodekolbusuko pwolluno supto miyowa'jujukonogano. Kuudo neya jaullulo. Gooti tool Eroonolbusuko pris muuduko pwol kwolomonekwopiyabokalmaiyo. Toro kuvi kuruv Gooti tool Melkisodekolbusuko pwolluno'gwowi kwolomonekwopiyabokaikono.

¹² Su tov aro tovinokwono. Gooti tool pris muuduko pwollu yasuwa'no majesonekono. Toro kwol kuruv sumdomgu gavnokweyolluro loowo muuduko puruv neya wosonekono. Toro te loowo muuduko su tov Moosesolluro sumdomguda'ai pris womdo yo'moneyokwe loowo tovuro aiko toru nomaronokwono. Loowo muuduko su tovi'aro Gooti tool uumjunowo'ji pris muuduko pwollu nokwo jesonekono.

¹³ Neya duu'nyulo. Melkisodekolbusuko pris adumo su tool Livai iko tovasuda'ai abokalmaiyo. Toro kuvi kuruv iko go'nodo puvasuda'ai abokaikono. Aki iko go'nodo su tovasuda'ai a'mwo pris womdokwe pworo mimo'nyajuporogano.

¹⁴ Nevu kuudo me'no yau'dowadonogano. Nemi Aguto tool Juuda iko tovasuda'ai abokaikono. Aki Juuda iko su tovasuda'ai pworo pris womdo ipino'moneyokwe tovino Moosesolluro loowo tov ku'nono madodowodokwono.

¹⁵ Toro te Melkisodekolbusuko pris muuduko tool me'no abiyalo'noka tovino kavlo su tov kuu'maiyo toru bomollolupto'nosodowodokwono. Kavlo kuu'maiyo toru bomollolupto'nosodowodo su tov arokwono. Pris muuduko su tool Livai iko tovasuda'ai pris toorai uuwolo'mdowodekono.

¹⁶ Pris muuduko sumo'noka su tool Jisasol kwekono. Toro tool Moosesolluro loowo dodowodo tovi'aro sumo'nokalmaiyo. Loowo su tov aro dodowodokwono. “Yiuno a'mwo Livai iko tovasuda'ai yawosunodupudo toorono to'no pris womdo nokwo imwalpinorogano.” Dodowodokwono. Toro te Jisasol loowo su tovi'aro pris sumo'nokalmaiyo. Toro kuvi kuruv gavnokweyolluro aiyo yiunokuudo mujomwekovla'mdowodo tovuro jurogudo tovi'aro to'gwowi pris sumo'nokaikono.

¹⁷ Su toro tovino Gooti toolluro yogalo puruv aro sakwollungikokwono. “Guu pris Melkisodekolbusuko imo'no'bi pris womdo tov yiunokuudo mujumovla'mwalbinekugono.” Sakwollungikokwono.

¹⁸ Neya duu'nyulo. Sumdomguda'ai pris womdo yo'moneyokwe loowo kinamjodupudo su tov wollainyokwono. Aki loowo su tov jurogudo nonagutokwono. Toro tovino tov Gooti tool sumdomguda'ai loowo su tovi me'no amogulptowosokaikono.

¹⁹ Su tov aro tovinokwono. Moosesolluro loowo su tovi'aro a'mwo pwolnodo kwol kuruv sugudo ku'nono mimo'nodupudorogano. Toro kuvi kuruv aga'no'gwowi Gooti tool puuto sugumaluko muuduko tov me'no soulonekubweyokaikono. Puuto muuduko su tov Moosesolluro loowo tovi kuuwolo'mwallo. Aki puuto muuduko su tovi'aro nevu Gooti toollu wobo toru nokwo kuulluru'maranonogano. Toro te agasuro Gooti toolluro nonekullabwono tovino sogwollo kinodowado su to'gwowi aiyogasuro sogwollo ainyajupo tovi uuwolo'mdowodokwono.

^20-21 Aki kuudo neya jaullulo. Aiyoga Livai iko tovasuda'ai pris tooro subuu'yamju puvi uumjunodupu pris sumo'nyajuporomaiyo. Toro kuvi kuruv Jisasolno'gwowi Gooti toolluro subuu'yamju duuwiyoduke tovida'ai pris sumo'nokaikono. Toro te Gooti tool Jisasollu subuu'yamju aro aduuwiyokaikono. “Nuu Gooti Aguto toonyu nebal'no gudumo'mokwono. Guu pris yiunokuudo imo'nugovla'mwalbinekugono. Aki moro subuu'yamju agudumo su tovi nuu kisuvolo mimwalmonyugono.” Aduuwiyokaikono.

²² Toro aduuwiyoka tovino tov Jisasol Gooti toolluro subuu'yamju muuduko su tovi jurogudo molloda'mdowodekono. Toro te subuu'yamju muuduko su tov sumdomguda'ai subuu'yamju tovi uuwolo'mdowodokwono.

²³ Kuudo neya jaullulo. Livai iko tovasuda'ai pris bwotonyago tooro sumo'nugelabiyajuporogano. Su tov aro tovinokwono. Pris su tooro mujobolmelabodupudorogano. Toro te kemoro pris womdo tov manyu toga mamjo'movlaiyajukokwono. Pris su tooravuro abollajupo su tov kemoro womdo tovi kuumjukullajukokwono.

²⁴ Toro kuvi kuruv Jisasolno'gwowi aiyo yiunokuudo mujomwekovla'mdowodekono. Toro toolluno tov yiuwi'nokai toga pris imo'nugovlavowo'ji gamoro pris womdo tovi yiunokuudo mujumovla'mwalonekono.

²⁵ Toro tovino tov yiuwi'nokai a'mwo abolo Jisasollu'aro Gooti toollu wobo toru kuulluru'mallo'mo kwinpi tonyu kuvinono nuuwiyo'mwojumwalonekono. Toro kwiyo'mwojo'ji tonyu Jisasol kemoro ma'no ma'nodo tovuro kirumwallo tovida'ai yiunokuudo nobomollurolovomokalokwonekono. Aki aiyo yiunokuudo mujomwekovla'mdowodekono. Toro toolluno tov a'mwo abolo su tonyu wiyo'mwojumovla'mwalono'moneyokwe tovino yiuwi'nokai toga Gooti toollu subusu'nyogalo wuudodowodekono.

²⁶ Pris Aguto su tool nemi nekullo'mwojo'moneyokwe pi'mwono kuvinono nekullumo'nyokwekono. Toro tool Gooti gavnokwe toolluro kuunodo wimo'nyokwekono. Aki toro tool ma'no ma'nodomaiyekono. Aki kaiya'no puru'monodo kuruv mamollugolamo'nodowodekono. Aki a'mwo abolo ma'no ma'no yodupudo tonyu manyu tomuu'aro yomwallokwekono. Aki Gooti tool Pris Aguto su toollu gamoro ago muunyu kai'muu me'no sulomorumwallokaikono.

²⁷ Su tool Livai iko tovasuda'ai pris aguto toorobusukolmaiyo. Aiyoga pris aguto tooro Gooti toollu yiuwi'nokai iruko go'no go'nodo toga neya aromiroudapiyajuporogano. Sumdomgu kevnokwe tooravuro ma'no ma'nodo tovino romiroudapiyodupu aki lukomgu a'mwo abolo tonyuro ma'no ma'nodo kunyuno kuruv aromiroudapiyajuporogano. Toro tooro yiuwi'nokai toga tono tono sumelabiyajuporogano. Toro kuvi kuruv nemi Pris Aguto Jisasolno'gwowi yiuwi'nokai iruko go'no go'nodo toga Gooti toollu maromiroudapiyodowodekono. Su tov aro tovinokwono. Jisasol yiuwi'nokai a'mwo abolo ma'no ma'nodokwe tonyuro aiko toru mallo'moneyokwe gavnokwe tool morubwenyuno sumaiyokwe abolokaikono. Toro tool yiuno puru'monodo toga'no aboloka su tovi'aro yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe womdo tov yiuno'no sopiyokaikono.

²⁸ Toro te kuudo neya jaullulo. Pris aguto imo'nyo'moneyokwe Moosesolluro loowo tov kwako akavida'ai a'mwo wollainyo tekwojai ajesajukokwono. Toro kuvi kuruv Gooti toolluro subuu'yamju muuduko su to'gwowi sumdomguda'ai loowo tovuro aiko toru ma'dowodokwono. Aki subuu'yamju muuduko su tov gavnokweyolluro Kwolaiyo toollu Pris Aguto imo'nyo'moneyokwe ajesokakwono. Gooti toolluro Kwolaiyo Pris Aguto sumo'noka su tool nemi nekullo'mwojo'moneyokwe pi'mwogaikono. Toro tool yiunokuudo mujomwekovlaiyo'moneyokwekono.