Efesos 4 - Gooti Toolluro Yogalokwono

Nevu Jisasolluro a'mwo abolo tonol Krais toolluro kulako to'busuko imo'nodowado tovinokwono

¹ Kevu mino kuudo nyanuu'mwakovo. Nuu Aguto toolluro womdo tovi wiyodumdo toonyuno tov wuulo killo'mo ago tovi aulomeranubweyoponyugono. Toro tovi kuule'na'dumdo kwonyu kuruv Aguto toolluro womdo tovino'gwowi kuuno wimovla'mdumdonyugono. Toro te kemoro nyomjomwekovla'mwalpino'moneyokwe tovino mi neya donuu'nyulo. Yiuwi'nokai kuuguudo me'no aikudumo tovino tov kemi guureji aro ikudumo'monyugono. Gooti tool gamoro a'mwo abolo kuunodo wimo'nyo'moneyokwe kemi me'no dekuma'dowodekono. Toro dekuma'dowodo toollu kevu ilaiyo to'no igollo'moneyokwe jomjomwekovlavogaulo.

² Kevnokwe togaikul bwolomoropinapi Jisasolluro a'mwo abolo punyu kwako tomuu'aro neya duuwiyogaulo. Aki toro tonyu kavo duubemwojogaulo. Toro togaikullu a'mwo abolo pun kaiyako saikullugolpi tov kevu sumwoluko su'mno yere nyumo'numwalpiyo. Toro kugaikul kuruv kalo buuropino ikullunodowodo tovino tov a'mwo abolo kaiyako saikullugolpi tonyu ilaiyo to'no domollomarogaulo.

³ Aki toro togaikul gomno gomno nyomuudeyapinmwalpiyo. Toro kugaikul kuruv yiuno puru'mono guro'mwonyo'moneyokwe Gooti tool gamoro Kuullo tool me'no aikullabokaikono. Toro aikullaboka su toollu'aro kevu yiuwi'nokai togaikul sumwoluko aval'no wosunyo'moneyokwe tovino womdo guureji neya domjumovlavogaulo.

⁴ Nevu yiuwi'nokai tonol kulako judo'no judo'nodokwe kunollu kuruv Krais toolluro kulako puru'monodo to'busuko me'no imo'nodowadonogano. Toro tonol Gooti toolluro Kuullo pwolnodo toollu aval'no amarowonogano. Aki toro tonol lukomgu Gooti tooke nyulomwalano tovino sogwollo aval'no kingovla'mdowadonogano. Toro kingovlaiyo'moneyokwe Gooti tool yiuwi'nokai tonollu me'no donekuma'dowodekono.

⁵ Nemi Aguto su tool yiuno pwolnodekono. Aki toro toolluno kuudo uubweyodowado tov yiuno puru'monodokwono. Aki toro toolluno wonyo uuvollunodowado tov yiuno puru'monodokwono.

⁶ Aki Gooti tool yiuno pwolnodekono. Aki nevu yiuwi'nokai a'mwo abolo tonollu Nellunumiyago tool pwolnodekono. Gooti pwolnodo su tool nevu yiuwi'nokai a'mwo abolo tonollu mido aguto mollonekumwalodowodekono. Aki toro tool nemoro akuuto toru mwalodowo yiuwi'nokai pwolno puru'monodo tonolluro poowokalago tonyu kuulonekumwalodowodekono.

⁷ Toro kuvi kuruv Krais toolluro yasuwa'wino sugumaluko nekubweyodowodo tono'gwowi puru'monodo'maiyo. Bwotonyagogano. Toro togai Krais tool gamoro ilaiyo winodowodo tomgu'aro yiuwi'nokai pwolno puru'monodo tonollu yado yasuwa'no nekumwodeyodowodekono.

⁸ Krais toolluro nekullabodowodo su tonyuno Gooti toolluro yogalo puruv aro sakwollungikokwono. “Toro tool a'mwo kisuvolo wiyodopure toorai uuwolovo'no a'mwo abolo bwotonyago tonyu avipolomokabokaikono. Toro pipolomokabino sumaiyokwe mollu'bworo'no muunyu kai'muuno amokailokaikono. Aki toro tool a'mwo abolo wuulo ai'nallajupo tonyu gamoro yasuwa'wino pun kwiyajukekono.” Gooti toolluro yogalo puruv su toro sakwollungikokwono.

⁹ Toro sakwollungiko tovida'ai yogalo pwekwo aro adadopiyo. “Muunyu kai'muuno amokailokaikono.” Adadopiyo. Yogalo su tekwo aro tovino kuu'maiyo toru'no bomollolupto'nosodowodokwono. Krais tool muunyu kai'muuno yere miloduke toga sumdomgu kwako akavuro kuuraibuuso tovi kwollu'nokaikono.

¹⁰ Toro kwollu'noka su tool lukomgu muunyu kai'muuno sulokaikono. Toro tool ilno ilno sumaiyokwe yiuwi'nokai buro'nyo buro'nyomuudeyo kumuu kuruv aiyowomno kuullo'mowopiyowo'ji mido mollomwallo'moneyokwe kuuwolokailokaikono. Su toro tovino bomollolupto'nosodowodokwono.

¹¹ Yogalo su tovino kavlo tov arokwono. Krais tool yiuwi'nokai a'mwo abolo pwolno puru'monodo tonyu gamoro sugudo ton yasuwa'no uumwodeyodowodekono. Sugudo su tonyuda'ai pun arogano. A'mwo pworai kuurotokwe imo'nyo'mo womdo tov wiyodowodekono. Aki pworai Gooti toolluro yogalo tokwe a'mwo abolo tonyu kuurokado moruudomollo'moneyokwe womdo tov wiyodowodekono. Aki pworai gamoro kuuguudo sugudo tokwe a'mwo abolo tonyu modomollo'moneyokwe womdo tov wiyodowodekono. Aki pworai Gooti toolluro a'mwo abolo tonyu moduvomwallo'moneyokwe womdo tov wiyodowodekono. Aki pworai ibwasokwe imo'nyo'mo womdo tov wiyodowodekono.

¹² Womdo judo'no judo'no yodupudo su tonyuno kavlo tov arokwono. Yiuwi'nokai Gooti toolluro a'mwo abolo ton gamoro womdo tovi imwalpino'moneyokwe mollovrowoso'mokwono. Toro mollovrowosodowodo su ton Gooti toolluro womdo tovi supi toga Krais toolluro kulako to'busuko imo'nodowado tonol guureji yogullumwojonekwapiyodopure tovida'ai jurogudo imo'numwalanonogano. Womdo judo'no judo'no tonyuno kavlo tov torokwono.

¹³ Aki nevu yiuwi'nokai Gooti toolluro Kwolaiyo toolluno kuudo uubweyodowado punol judo'no judo'no nyumo'na'jo. Toro kunol kuruv yiuno avalo puru'mono neya imo'numwalanonogano. Aki kwolluno yiuwi'nokai kuudo ton neya youromo'movla'mwalanonogano. Toro tonol Gooti toolluro sumdo tovi a'mwono imo'nyo'moneyokwe jurogudo neya yogullumovla'mwalanonogano. Toro yogullumovlavowa'ji sugudo to'no imo'nodowodo Krais toolbusuko yiuno'no billumo'nopiyanonogano.

¹⁴ Nevu su toro tomgu'aro sogullumovlawa'ji tov kwoloraiyo tobuurobusuko mimo'nanonogano. Aki toro tonol kwoloraiyo tobuuravuro yodupudo to'busuko kubalno aro nyumwala'jo. Ibwasokwe pworo bopi nemi yojelukuulovonekumallo'mo tooro kuuguudo judo pumgu'aro'mdeyo oo kuunano yogalo'mdeyo youkuu'nanekudodopure tonyu kaduko nuuwimwala'jo. Punol kaduko kwiya'ji tov dolo tokwe'aro wonyo tokwe'aro toval boot tovi manyu tomuuno molobemokwodubulo to'busuko kubalno nonekullumo'no'jo.

¹⁵ Toro kunol kuruv yiuno nebaikuuguudo tovino to'no gudupolarowa'ji aki a'mwo abolo pubuuraino kalo buuropino neya anekullunogawono. Nevu su toro somjumovlawa'ji tonol yiuwi'nokai go'no go'nodo tomgu'aro Krais toolbusuko imo'nugelamwalanonogano. Krais su tool nevu gamoro kulako puru'mono imo'nodowado tonollu midekono.

¹⁶ Toro toollu dolago tomuu mwalodowado tonol yiuno ilaiyo to'no guro'mwonyodowadonogano. Aro to'busukokwono. Kulako tovuro yiuwi'nokai suvlatodeyo ton go'no go'nodogano. Toro kunyu kuruv suul wuudowago'mdeyo oo aruu'wago'mdeyo ton yiuwi'nokai su tonyu aval'no momgurowosodowodokwono. Su toro to'busuko kubalno nevu yiuwi'nokai Jisasolluro a'mwo abolo tonollu Krais gavnokwe tool aval'no moguro'mwojanekubweyodowodonogano. Toro tonol kulako yiuno puru'mono imo'nodowadonogano. Toro tonollu Gooti tool womdo go'no go'nodo ton nekubweyodowodekono. Su toro nekubweyodowodo tonyu neya amjumovlavogawano. Nevu yiuwi'nokai pwolno puru'monodo tonol su toro mujumovlavowa'ji imgu amgu kalo buuropino neya inmwalanonogano. Nevu Krais toolluro kulako puru'mono imo'nodowado tonol su toro somjomwekovlawa'ji tov aguto yogullumovlavowa'ji jurogudo imo'numwalanonogano.

Nevu Gooti toolluro kuudo muuduko imo'nanekubweyodowodo togai yomjomwekovla'mwalano tovinokwono

¹⁷ Nuu nemi Aguto toolluro yovo tovida'ai kemi guureji aro dodoluvaikubwemo'monyugono. Kevu a'mwo abolo kwa'mguda'ai tonbusuko nomjumovla'mwalpiyo. A'mwo abolo su ton Aguto toolluno kuudo maiyokwe imo'nugelabodupudogano. Toro tonyuro kuudo kworo kuruv yiuno noo'nookwo to'no yopiyodupudorogano. Su toro yopiyodupudo tovida'ai kevnokwe ton ku'nono mwiyo'mwoju'nupinogano.

¹⁸ Aki a'mwo abolo su tonyuro kuudo you'movla'mdupudo tooro dugumwuulo tomuubusukorogano. Toro tonyuro dogaipo'nyo kuumwiyo imo'nodupudo su tov kevnokwe ton kudo'aiko jugu'nodupudogano. Toro tonyuno tov Gooti toolluro aiyo yiunokuudo mujomwekovlaiyo'moneyokwe tovi manyu kwa'mgu tomuu mwalodupudogano.

¹⁹ Aki toro ton kirovanyuvanyu pasudo toorai yo'moneyokwe wogulo mibwosunodupudogano. Toro tovino tov pasudo su toorai yiunokuudo mujeroungovla'mdupudogano. Toro ton ilaiyo igollunyo'moneyokwe pasudo toorai guureji mujeroungovla'mdupudogano. Aki kevnokwe ton kaiyako igolamo'nyo'moneyokwe kaiya'no pasudo judo'no judo'nodo toorai guureji mujumovla'mdupudogano.

²⁰ Toro kuvi kuruv kevno'gwowi a'mwo kuurotokwe pworavuro yodekubwasodopure tovida'ai Krais toolluno me'no kuu'nopokwono. Krais toolluno kuuguudo su tovida'ai kevu ma'no ma'no pasudo su toorai neya mujeroungovlapino'moneyokwe miyodekubwasajupokwono.

²¹ Kevu Krais toolluno kuu'nopo toga kwollu me'no kuuguro'mwonyopogaikikono. Aki toro togaikul ilaiyo nyomjomwekovlaiyo'moneyokwe nebaikuudo yodekubwasodopure tovi me'no souromaropogaikikono. Nebaikuuguudo su tov Jisasollu tomuu kuula'dowodokwono. Toro tovida'ai kuudo me'no souromaropo tov arokwono.

²² Sumdomgu kevu kuudo uumdo su toorai kuumjungovlaiyajupo toga kemi kaiyako bwotonyo sugolaikumeyajuporogano. Aki kemi kaiyako igolaikumeyo'moneyokwe youkuu'naikudodopure toorai uumjungovlaiyo'mo tov ilaiyo aikullunyajukogaikikono. Toro kuvi kuruv aga'no'gwowi kevu kuudo uumdo su toorai yiunokuudo neya duugollu'movogaulo.

²³ Kevu kuudo uumdo su toorai kuugollu'mopi tov Gooti tool kemoro poowokalago togai kuudo togai tonyu aiyo nokwo imo'naikubweyonekono.

²⁴ Toro te aiyo imo'naikubweyodowo'jure su tovi'aro Gooti gavnokweyolbusuko kemi yokwollaikubweyodowodogaikikono. Toro togaikul gamoro pasudo idopto'nodo tollovai nokwo uumjungovla'mwalpinogaikikono. Aki kevu gavnokweyolluro a'mwo abolo kuunodo wimo'numwalpinogaikikono. Toro tovino tov kevu poowokalago aiyo tokwe'aro kuudo aiyo tokwe'aro tovallu youro to'busuko neya domollosogaulo.

²⁵ Aki puruv kemoro kuunano yogalo pasudo toorai uugollu'movopi aki aiko te nyoukuu'nadumwalpiyo. Nevu yiuwi'nokai tonol Jisasolluro kulako puru'monodo tovida'ai suvlato tonbusuko imo'nodowadonogano. Toro te kemi kulako kuunodo ikullumo'nodupudo Jisasolluro a'mwo abolo togai yiuno nebal'no yogalo to'no neya jajunogaulo.

²⁶ Aki kevu surodo supi tov ma'no ma'no nyumwalpiyo. Kemoro surodo supi su tov ma'no ma'no yo'moneyokwe pasudo tov manyu tomuu nomollubworekumokavlawo'jo. Aki surodo supi su tov dugumdo tov yere maimwonyopiyodowo'jure toga kemoro sumwoluko ton dugoga yere neya domodovomokwolabogaulo.

²⁷ Su tov aro tovinokwono. Kevu Satanyollu kudo'aiko kuusubweyopi kemi kaiyako nyaikullugolo'jokwe tovinokwono.

²⁸ Aki kevu kuuko yodupudo togaikul aga aki aiko te kuuko nyumwalpiyo. Toro kugaikul kuruv womdo neya domjumovlavogaulo. Kevnokwe togaikulluro ato tokwe womdo ilaiyo amjumovlapi tov a'mwo abolo supto yodopure tobuurai ilaiyo nokwo wiyo'mwojumwalpinogaikikono.

²⁹ Aki kemoro mago tonyuda'ai kaiya'no yogalo jugollo'moneyokwe tooro nobolokuumwalpiyo. Toro kugaikul kuruv a'mwo abolo pubuurai jurogudo duuwimwojo'moneyokwe yogalo sugudo to'no neya dodogaulo. Toro dodopure tovi a'mwo abolo kadu'molo supi tobuuravuro sumdo tovi Gooti toolluro yasuwa'wino sugumaluko nekubweyodowodo tovino kuu'maiyo toru'no bomollolupto'nubweyonokwono.

³⁰ Aki neya duu'nyulo. Gooti toolluro Kuullo aikullaboka tool aro tovino jaikubweyo'moneyokweyokwono. Lukomgu Gooti tool kemi ikumokailawo'ji ilaiyo to'no nyulomwalpinogaikikono. Su toro tovino jaikubweyo'moneyokwe Kuullo su tool aikullabokaikono. Toro tovino tov Gooti toolluro Kuullo su toollu kisuvolo wiyopi jul'nyo nuubwemwalpiyo.

³¹ Aki kemoro iru'kuudo toorogai'aro magu'nyo kuudo toorogai'aro surodo'mo kuudo toorogai'aro mebweyogalo toorogai'aro burolyogalo toorogai'aro yiuwi'nokai su toorai manyu tomuu neya dodukwopiyogaulo. Aki buro'nyo buro'nyo ma'no ma'no yo'moneyokwe kuudo kworo kuruv nyau'mwalpiyo.

³² Toro kugaikul kuruv Jisasolluro a'mwo abolo pubuurai yiuno ilaiyo to'no igolopi kemoro poowokalago ton neya duuwiyogaulo. Aki kevnokwe togaikulluda'ai pun kemi kaiyako saikullugolpi tov kemoro ma'no ma'nodo tonyuno kuudo neya jallulo'gwonogaulo. Gooti tool Krais toollu'aro kemoro ma'no ma'nodo tonyu maikudukwopiyo'no aki aiko te kuudo miyou'movla'mdowodekono. Su toro to'busuko kubalno kev kugaikul kuruv kaiyako saikullugolpi tobuuravuro ma'no ma'nodo tonyuno kuudo nyau'mwalpiyo.