Adodolukuu'nosungiko 9 - Gooti Toolluro Yogalokwono

Ensel naba 5 tool gamoro biugel tovi pwo'mi muujudo airapiyoka tovinokwono

¹ Toruda'ai naba 5 ensel tool gami biugel tovi pwo'mi muujudo airapiyokaikono. Toro kirapino sumaiyokwe ensel ma'no ma'no kuumwiyo pwollu kwononyugono. Toro tool sullugabwo pwolbusuko sulugumdo tovi muunyu kai'muuda'ai kwako tovi abwolarokaikono. Toro toollu ki puruv kwiyopekono. Ki su tov kuuraibuuso daneyajokwe tovi kudo'aiko kuuso'moneyokweyokwono.

² Toro tool ki tovi malluno sumaiyokwe kuuraibuuso daneyajokwe tovi kudo'aiko ausosokaikono. Toro ausoka toga kwapuuto su tomuuda'ai juto bwotonyo puruv abilokakwono. Juto su tov sul'juto to'busuko bwotonyo abilokakwono. Toro bilno sumaiyokwe kuujo tooke'aro sullugabwo togai'aro tonyu uumjuku'duke tovida'ai dugumdo aimwonyopiyopogano.

³ Toro kimwonyopino sumaiyokwe aki juto su tovi anakuuto tomuuda'ai tomabore'bore bwotonyago kuunodo tooro lokabino sumaveyokwe kwako akavi aiyowomno so'mowopiyoporogano. Tomabore'bore su tooravuro tuko pol'mowosodopure tov jurogudo kuunodokwono. Tuko su tov akullo tooravuro to'busukokwono.

⁴ Gooti tool tomabore'bore su toorai aro aduumjukurokaikono. “Kevu kwako akavi bila'dupudo gwo'gwoptodeyo oo mekwakodeyo oo ikorodeyo tonyu kaiyako mamollounapipinorekikono. Toro kuvi kuruv a'mwo abolo Gooti toolluro nojeso'moneyokwe tov kemoro yomo tovi nonaguto tonyuno'gwowi kaiyako nokwo igolpinorekikono.

⁵ Toro igolopi kuvi kuruv a'mwo abolo su tonyu yiuno'no maromiyosupinono. Yiuno danyu'nyuwuulo to'no nokwo uubwemwalpinorekikono.” Gooti tool toro aduumjukurokaikono. Toro te danyu'nyuwuulo uubweyodopure su tovida'ai lobako tov atobuul ibwosungovla'mwalpinogano. Aki danyu'nyuwuulo su tov akullo tooravuro tuko pol'mowosodupudo tovida'ai danyu'nyuwuulo ibwosungovla'mdupudo to'busukokwono.

⁶ Toro te a'mwo abolo ton danyu'nyuwuulo su toro tovi ibwosungovla'mno ibwosungovla'mno yopi dupinogano. “Oo neya abolmo.” Toro dopi kun kuruv ku'nono mabolpinogano. Aki danyu'nyuwuulo su tovi iworaiku'nyo'moneyokwe bolnodo tovi ku'nono miyo'mgonomapinogano.

⁷ Tomabore'bore su tooro aro to'busuko sumo'noporogano. Hoos pworo molo mollo'moneyokwe me'no amollovrowosungiko toorobusuko imo'nodopure toorai kwononyugono. Tomabore'bore su tooro kemi mido tonyu muunyu toru a'mwo aguto kig tooravuro gool miguto yesodupudo to'busuko pun sesoporogano. Aki kemoro sumdomago ton a'mwo tooravuro sumdomago tonbusuko kurukwerogano.

⁸ Aki kemoro midoto tov abolo tonyuro midoto kumi'yago to'busuko kurukwerogano. Aki kemoro mago tollovo laiyon tooravuro mago tonbusuko kurukwerogano.

⁹ Aki kemoro kupolmdo toru aiyon tokwe sakwollungiko molo'mo youro jurogudo ton sesoporogano. Kemoro puviyo tonyuro deko tov bwotonyokwono. Deko su tov hoos tooro karis bwotonyago tonyu molo wiyo'moneyokwe tomuuno kano kano me'nomokavla'mdupudo tooravuro deko ki'nodupudo to'busukokwono.

¹⁰ Aki kemoro suwiyo tonyu akullo tooravuro suwiyo to'busuko lodo kurukweyogano. Lodo su tokwe a'mwo abolo tonyu lobako atobuul tobuullu kaiyako igolpinorogano.

¹¹ Toro tooravuro aguto kig tool kuuraibuuso daneyajokwe tomuuda'ai mido mollomwalokwe ensel tookono. Su toolluno yovo tov Hibruu yogaljo tovida'ai Abadoonolekono. Aki Grik yogaljo tovida'ai Apooliyoonolekono. Yiuwi'nokai yovo su tovalluno kavlo tov arokwono. Kaiyako Mollounapiyokweyolekono.

¹² Tabunyu wuulo bwotonyo muudu'nodo tov me'no abawigiyo. Toro kuvi kuruv neya duu'nyulo. Tabunyu wuulo yere mabai'mo'mwakulo puruvalno'gwowi bwotonyo kuunodovakono. Toro toval wobo toga nobai'mo'bullunovakono.

¹³ Toruda'ai ensel naba 6 tool gami biugel tovi pwo'mi muujudo airapiyokaikono. Toro kirapino sumaiyokwe yogaimaguurai puruv romiroudapiyo'moneyokwe dukwagupto tovuro bullo aval aval tomuuda'ai doduke kuu'nonyugono. Dukwagupto su tov gool tokwe sakwollungiko tov Gooti toolluro mwalodowodo sumdollu toru wo'dowodokwono.

¹⁴ Su toro tomuuda'ai yogaimaguurai tov ensel biugel mwora'dowodo naba 6 toollu aro kuudokakwono. “Guu ensel aral aral Wonyo Yiufretisovuro wolo tomuu wuulo ki'na'dupudo toorai jurolowapiyono.” Kuudokakwono.

¹⁵ Ensel aral aral su toorai yere mirolowapiyoduke toga Gooti tool yiuwi'nokai a'mwo abolo kwako akavi mwalodupudo tonyu puruvapuruv tomgu'aro amojopolmwallokaikono. Toro amojopolmwalloka tonyuda'ai puvi romiyoso'moneyokwe ensel aral aral su toorai me'no amollovrowosokarogano. Toro te Gooti tool ensel aral aral su toorai nyurolowapiyo'moneyokwe toga me'no abai'movokakwono. Nyurolowapiyo'mo tovuro kuujo sumdo tokwe'aro iruko tokwe'aro lobako tooke'aro kworomo tokwe'aro Gooti toolluro nyurolowapiyo'mo kuunodo su toga me'no abai'movokakwono. Toro abai'movoka toga ensel aral aral su tooro a'mwo abolo bwotonyago tobuurai romiyoso'moneyokwe Gooti tool kuvinono amollurolowapiyokaikono.

¹⁶ A'mwo mollurogudo hoos toorai ilomwalodupudo su tooraino naba ajagilopo tov aro tovi kuu'nonyugono. 200 milyan mollurogudo toorogano. Kuu'nonyugono.

¹⁷ Moro wojo to'busuko su tovi a'mwo mollurogudo toorogai'aro hoos toorogai'aro su toorai aro kwononyugono. Mollurogudo su tooravuro molo'mo youro jurogudo touso du'wiyo to'busuko muja'jo tokwe'aro gwagwajo tokwe'aro suvo'jo tokwe'aro tousogai kemi kupolmdo toru yesodupudorogano. Aki hoos tooravuro mido ton laiyon tooravuro mido tonbusuko imo'nodopure kwononyugono. Aki widuko tokwe'aro juto tokwe'aro dukworokakwe salfa sulo tokwe'aro ton hoos su tooravuro mago tonyuda'ai lokabodupudogano.

¹⁸ Toro te widuko tokwe'aro juto tokwe'aro dukworokakwe salfa sulo tokwe'aro su ton kaiyako igolodopure tovida'ai tabunyu bwotonyo tov sumo'nokakwono. Tabunyu su toro imo'noduke tovida'ai yiuwi'nokai a'mwo abolo kwako akavi mwalodupudo ton puruvapuruv tonbusuko jopolapinodopure tonyuda'ai puru'monodo tovi mwalodupudo ton abolopiyopogano.

¹⁹ Hoos su tooravuro mago tonyuda'ai lokabodupudo su ton a'mwo abolo tobuurai romiyoso'moneyokwe jurogudo kurukweyogano. Aki kemoro suwiyo kun kuruv gabakuto bulaptokwe tooravuro mido to'busuko kurukweyogano. Toro ton a'mwo abolo tobuurai tuko doval'mo'mdupu kaiyako igolosodupudorogano.

²⁰ Tabunyu bwotonyo su tov toro imo'noduke toga a'mwo abolo pun mabolopogano. Toro mabolopo su ton kevnokwenyuro kuunano gooti sokwolludapingiko toorai buulo muugunyumopiyopogano. Aki kuullo ma'no ma'nodo tooraino ilomoropiyodapudo tov mimwogapiyopogano. Toro ton kuunano gooti tooro gool togai'aro silva togai'aro aiyon sallukwa'jo togai'aro sulo togai'aro iko togai'aro tonyuda'ai sokwolludapingiko su toorai kuuno sulomoropimovlaiyajupogano. Toro kuvi kuruv kuunano gooti sokwolludapingiko su toorono'gwowi sumdo ku'nono mwonpinorogano. Aki kaduko ku'nono muu'nupinorogano. Aki kado ku'nono mavlapinorogano. A'mwo abolo mabolopo ton kemi kuunano gooti su toorai kuuno sulomoropimovlaiyajupogano.

²¹ Aki a'mwo abolo su ton kaiya'no pasudo aro toorai buulo muugunyumopiyajupogano. A'mwo abolo punyu romiyosodupudo'mdeyo oo bulapto yodupudo'mdeyo oo kwonyalo yodupudo'mdeyo oo kuuko yodupudo'mdeyo kemi kaiya'no pasudo su toorai yomjomwekovla'mdupudo ton mimwogapiyajupogano. Kemi pasudo su toorai kuuno kuumjungovlaiyajupogano.