Adodolukuu'nosungiko 8 - Gooti Toolluro Yogalokwono

Sipsip Muugunyo tool gwomalo naba 7 amugutowopingiko tovi amodogaipolapiyoka tovinokwono

¹ Toruda'ai Sipsip Muugunyo tool puukwollikwiyo tovuro gwomalo naba 7 amugutowopingiko tovi amodogaipolapiyokaikono. Su toro amodogaipolapiyoka toga Gooti toolluro ago muunyu kai'muu yiuno allusai'nyo to'no kworokakwono. Su toro kworoka tov kuujo sumdo hap tomgu'aro kuuwolo'nokakwono.

² Toruda'ai lukomgu aro tovi kwononyugono. 7-pela ensel tooro Gooti toolluro sumdollu toru da'mdopure toorai Gooti tool 7-pela biugel ton kwiyokaikono.

³ Toro kwiyoka toga ensel gabovo pwol wobeya sudo kuunyo'moneyokwe gool tovida'ai dis sakwollungiko puuwa amworarokaikono. Ensel su toollu wobeya sudo kuunyokwe bwotonyago ton me'no kwiyopekono. Wobeya sudo kuunyokwe su togai'aro Gooti toolluro a'mwo abolo tonyuro subusu'nyogalo wuudodupudo togai'aro ton dukwagupto tovi wiroudapiyo'moneyokwe abodavokaikono. Dukwagupto su tov gool tokwe sakwollungiko tov Gooti toolluro sia kig tovi sumdollu toru wo'dowodokwono.

⁴ Ensel tool toro boda'mno sumaiyokwe gamoro ato tokwe wobeya sudo kuunyokwe dis towasi amworarokaikono. Toro mwora'duke tovida'ai wobeya sudo kuunyokwe juto tov Gooti toollomno sulokakwono. Aki Gooti toolluro a'mwo abolo tonyuro subusu'nyogalo wuudodupudo kugai'aro Gooti toollomno aval'no sulapogano.

⁵ Toro ilno sumaveyokwe toga ensel tool dukwagupto tovida'ai dukworoka pun dis tovi aluvirosokaikono. Toro aluvirosoka su tovi momwora'no sumaiyokwe dukworoka ton kwako akavino kwolourotowopiyabokaikono. Su toro kwolourotowopiyaboka toga kuuloulo tov ki'nugolokabino sumaiyokwe molamopto tov mdolopiyodowo aki wunyu wunyu tov sokakwono.

7-pela ensel tooraida'ai 4-pela ensel sumdomda'ai tooro kemi biugel go'no go'nodo tonyu pwo'mi muujudo airapiyopo tovinokwono

⁶ Toruda'ai 7-pela ensel tooro kemi biugel tonyu pwo'mi muujudo kirapiyo'moneyokwe sovrowosunoporogano.

⁷ Toro yovrowosunyuno sumaveyokwe ensel naba wan tool gami biugel tovi pwo'mi muujudo airapiyokaikono. Toro me'no kirapino sumaiyokwe sullumiyo buuruko tokwe'aro dukworoka tokwe'aro mujako tokwe'aro ton kwako akaviyomno kwolmwogapiyabopogano. Toro wolmwogapiyabino sumaveyokwe kwako akav jopolapino'no puruvapuruv to'busuko amdukuu'nokakwono. Su toro amdukuu'noka tovida'ai puruvalluro yiuwi'nokai wo'dupudo ton duko tov mamonopiyokakwono. Toro kuvi kuruv puvuro tomuuda'ai iko toorogai'aro yiuwi'nokai gwo'gwopto togai'aro tonyuno'gwowi duko tov yiunokuudo amonopiyokakwono.

⁸ Toruda'ai aki ensel naba 2 tool gami biugel tovi pwo'mi muujudo airapiyokaikono. Toro kirapino sumaiyokwe muumuudo bwotonyo toolbusuko pwol widuko noduke toollu soolwara tovi abwolmwogapiyokaikono. Su toro bwolmwogapino sumaiyokwe soolwara tov imgu amgu puruvapuruv ajopolapinokakwono. Toro ajopolapinoka tovida'ai puruval tomgu kaiyako mamollounapiyoka kuvi kuruv pumguno'gwowi kaiyako aro amollounapiyokaikono. Soolwara tovuro ajopolapinoka pumgu yiuno mujakuumwiyo to'no sumo'nokakwono.

⁹ Aki su toro sumo'noka tovida'ai soolwara tovi anakuuto tomuuda'ai aiyo mwalodupudo tooro abolopiyoporogano. Aki soolwara tovuro ajopolapinoka su tomuuda'ai sip yomollodopure kworai kuruv kaiyako amollounapiyokakwono.

¹⁰ Toruda'ai aki ensel naba 3 tool gami biugel tovi pwo'mi muujudo airapiyokaikono. Toro me'no kirapino sumaiyokwe sullugabwo aguto kuunodo pwol sulugumdo muunyu kai'muuda'ai gworeko widuko noduke toolbusuko abwolokaikono. Toro bwolno sumaiyokwe wonyo togai'aro wonyo sumdo togai'aro ton puruvapuruv tonbusuko ajopolapinopogano. Toro ajopolapinopo tonyuda'ai puruvallu tomuu sullugabwo aguto kuunodo su tool mabwolarokaikono. Toro kuvi kuruv ajopolapinopo su tovida'ai pumuuno'gwowi sullugabwo aguto kuunodo su tool abwolarokaikono.

¹¹ Sullugabwo aguto kuunodo su toolluno yovo tov Iru'wuullolekono. Toro tool abwolaroka tovida'ai wonyo ton iru'wuullokwe sumo'nopogano. Toro sumo'nopo tonyu a'mwo abolo ton anopogano. Toro nodopure tovida'ai bwotonyago tobuuro yiuno'no abolopogano.

¹² Toruda'ai aki ensel naba 4 tool gami biugel tovi pwo'mi muujudo airapiyokaikono. Toro kirapino sumaiyokwe kuujo tool pworapwol toolbusuko ajopolapinokaikono. Aki lobako tool pworapwol toolbusuko ajopolapinokaikono. Aki sullugabwo kworo kuruv puruvapuruv toorobusuko ajopolapinoporogano. Toro jopolapinyuno sumaveyokwe Gooti tool kuujo toolluro puruvapuruv ajopolapinoko tomuuda'ai puru'monodo tomgu aromiyebuuropiyokaikono. Aki Gooti tool lobako toolluro ajopolapinoka tomuuda'ai puru'monodo tomgu aromiyokaikono. Aki Gooti tool sullugabwo tooravuro puruvapuruv ajopolapinopo tomuuda'ai yiuno puru'monodo tomgu aromiyokaikono. Su toro aromiyoka tooro dugumdo aimwonyopiyopo tovino tov iruko kullugwo kuruv jopolapino'no puruvapuruv to'busuko sumo'nokakwono. Iruko su tollugwojuro puruvapuruv ajopolapinoka tovida'ai puru'monodo tomuu kuujo tool madopiyokaikono. Aki surakuuto kuruv puruvapuruv to'busuko ajopolapinokakwono. Toro ajopolapinoka tovida'ai puru'monodo tomuu lobako tool mawopiyokaikono.

¹³ Toruda'ai nuu sumdo yomuugona'dore toga bwajo bwotonyo pwol plokavla'mduke toollu kwononyugono. Bwajo su toolluro deko tov aro doduke tovi kuu'nonyugono. “Aiyoo, ensel pworapwol kuuno amwakopo tooro kemi biugel ton pwo'mi muujudo kirapipino'mo sadokwovo. Toro tooraino tov yiuwi'nokai a'mwo abolo kwako tovi mwalodupudo tobuurai nerumwallupino'mogakonoo. Tabunyu wuulo bwotonyo tov bwi'mowono'mokwonoo.” Adokaikono.