Adodolukuu'nosungiko 7 - Gooti Toolluro Yogalokwono

Gooti tool Isuraiyolda'ai 144,000 a'mwo toorai ajenyubworomaroka tovinokwono

¹ Toruda'ai nuu ensel aral aral toorai kwononyugono. Ensel su tooro kwako akavuro deyo aval aval tonyuro go'no go'nodo tomuu davo'mno dolo aval aval tonyu kuumjukuroporogano. Toro uumjuku'dopure tovida'ai dolo su tov kwako tovideyo oo soolwara tovideyo oo yiuwi'nokai iko tooraideyo tomuu dolo nuuwiyo'jokweyo'mo kuumjukuroporogano.

² Aki nuu ensel pwol kuujo tool sulopiyamoka tomuuda'ai boduke toollu kwononyugono. Toro tool Gooti aiyo mwalodowodo toolluro a'mwo abolo tonyu nojeso'mo purukwe amokabokaikono. Toro mokabino sumaiyokwe ensel aral aral tooro kwako tokwe soolwara tokwe tovallu kaiyako igollo'moneyokwe jurogudo kuubweyopo su toorai ensel tool deko guureji aro kuudokaikono.

³ “Kavaiyoo, nevu Gooti toolluro womdokwe tonyuro yomo go'no go'nodo tonyu yere majesa'ji toga kevu kwako tokwe'aro soolwara tokwe'aro iko toorogai'aro tonyu kaiyako yere migolpinono.” Kuudokaikono.

⁴ A'mwo Gooti toolluro nojeso'moneyokwe tovi amaropo tooraino aro dodopure tovi kuu'nonyugono. Yiuwi'nokai Isuraiyolda'ai 12-pela yovodolobunyo tonyuda'ai naba tov 144,000 a'mwo toorai ajesoporogano.

⁵ Su tov Juuda'wolluro yovodolobunyo tovida'ai 12,000 toorai ajesoporogano. Aki Ruubenolluro yovodolobunyo tovida'ai 12,000 toorai ajesoporogano. Aki Gatolluro yovodolobunyo tovida'ai 12,000 toorai ajesoporogano.

⁶ Aki Aserolluro yovodolobunyo tovida'ai 12,000 toorai ajesoporogano. Aki Naftalaiyolluro yovodolobunyo tovida'ai 12,000 toorai ajesoporogano. Aki Manaseyolluro yovodolobunyo tovida'ai 12,000 toorai ajesoporogano.

⁷ Aki Simiyoonolluro yovodolobunyo tovida'ai 12,000 toorai ajesoporogano. Aki Livaiyolluro yovodolobunyo tovida'ai 12,000 toorai ajesoporogano. Aki Isakarolluro yovodolobunyo tovida'ai 12,000 toorai ajesoporogano.

⁸ Aki Sebuulonolluro yovodolobunyo tovida'ai 12,000 toorai ajesoporogano. Aki Joosepolluro yovodolobunyo tovida'ai 12,000 toorai ajesoporogano. Aki Bejamenolluro yovodolobunyo tovida'ai 12,000 toorai ajesoporogano. Su toro toorai ajesoporogano.

A'mwo abolo kwolallo bwotonyago ton i'bwo'no'mno Gooti toollu sulomoropiyapo tovinokwono

⁹ Toruda'ai nuu a'mwo abolo kwolallo bwotonyago i'bwo'nodopure tonyu kwononyugono. Kwolallo su tonyu a'mwo pwolnodo kwol kuruv ku'nono majagilonekono. Toro ton yiuwi'nokai kantri togai'aro yovodolobunyo togai'aro judo'no judo'no kula'nokakwe togai'aro go'no go'no yogaljo tonyuda'ai togai'aro su ton sia kig tovi dolago toruke Sipsip Muugunyo toolluro sumdollu toruke towai abodavopogano. Toro ton youro kumi'yago wiya'jo tousogai yeso'mno kemoro ato tonyu wonoweyo kuuwopto to'busuko togai amworaropogano.

¹⁰ Toro ton deko bwotonyo aro adelowo'naropogano. “Oo sia kig tovi mwalodowodo Gooti su tooke'aro Sipsip Muugunyo tooke'aro tooral nemi ma'no ma'nodo tovuro kirumwallo tovida'ai bomollurolovonekumokalokwodubulorakonoo.” Adelowo'naropogano.

¹¹ Aki sia kig tovi mwalodowodo tooke'aro a'mwono moduvomwallokwe toorogai'aro aiyokwe aral aral toorogai'aro su toorai yiuwi'nokai ensel tooro amomwodovomaroporogano. Toro tooro sia kig tovi dolago tomuu wolomuulo'na'no sumaveyokwe Gooti toollu sulomoropiyaporogano.

¹² Toro tooro aro adoporogano. “Oo nebalokwono. Yiuwi'nokai toga nemi Gooti toollu yogalo sugudo ton duubweyowa'ji yovo aguto neya wiyogawano. Aki pi'mwo kuudokweyoldeyo dowa'ji, Nenoloo, to'no dumwalanekono. Aki toro toolluno ilomodomoropimwolowa'ji aro adogawano. “Oo yiuwi'nokai yo'mo kwino'ji tov kuvinono yodowodoldeyo. Aki toro tool jurogudekono.” Adogawano. Yiuwi'nokai su tonyu nemi Gooti tool yiunokuudo mo'movla'mwalonekono. Nebalokwono.” Adoporogano.

¹³ Toruda'ai 24-pela a'mwono moduvomwallokwe tooraida'ai pwol aro sanuumgojokaikono. “A'mwo abolo youro wiya'jo yesodupudo su ton ala'mwovodeyo? Aki domuuda'aiyodeyo?” Sanuumgojokaikono.

¹⁴ Toro sanuumgojoka toollu nuu aro kuudonyugono. “Mi a'mwo agutoloo, guvnokwe tooku a'mwo abolo su tonyuno kuudo nyau'mwakuno.” Toro kuudo tool aro anyudokaikono. “A'mwo abolo su ton tabunyuwuulo bwotonyo boduke tovida'ai me'no abolopo ton kugano. Su ton kemi youro kumi'yago touso Sipsip Muugunyo toolluro mujako tokwe sal'movopo tovida'ai youro kumi'yago su touso wiya'jo sumo'nopogano.

¹⁵ Toro sopo tovino tov Gooti toolluro sia kig tovi sumdollu toru mwalodupu iruko togake'aro surakuuto togake'aro toga muunyu kai'muuda'ai gami ilomoropiyo'moneyokwe ago tovi anakuuto tomuu womdo kuullodupudogano. Aki sia kig tovi mwalodowodo Gooti su tool a'mwo abolo gavuge amwalpi tonyu ilaiyo to'no yellukuromollomwalmwalonekono.

¹⁶ Toro ton aki aiko te mujuko'mdeyo oo kuuleyaluko'mdeyo tov mwinmwalpinogano. Aki kuujo duko tov kemoro kulako tovi muudonogano.

¹⁷ Su tov aro tovinokwono. Sipsip Muugunyo tool sia kig tovi mwalodowodo su tool a'mwo abolo su tonyu nomoduvomwalmwalonekono. A'mwo sipsip moduvomwalokwe pwol yodowodo to'busuko kubalno a'mwo abolo su tonyu nomoduvomwalmwalonekono. Toro tool a'mwo abolo su tonyu wonyo sumdo tonyomno nomollubworomokavla'mwalonekono. Wonyo sumdo su tonyuda'ai wonyo ilowilovabodupudo ton aiyo yiunokuudo mujomwekovlaiyo'moneyokwe tov wiyodowodogano. Aki Gooti tool kemoro yiuwi'nokai sumdo tonyuda'ai kumdaluko bwolodapudo tonyu nomollouropiyonogano.”