Adodolukuu'nosungiko 6 - Gooti Toolluro Yogalokwono

Sipsip Muugunyo tool puukwollikwiyo aweyogunyugolowosungiko tovida'ai gwomalo tonyu amodogaipolodukwopiyoka tovinokwono

¹ Toruda'ai nuu sumdo muugona'dore toga Sipsip Muugunyo tool puukwollikwiyo aweyogunyugolowosungiko tovuro 7-pela gwomalo amugutowopingiko su tonyuda'ai muudu'nodo tovi modogaipolodukwopiyo'no ausokaikono. Toro kuusuno sumaiyokwe aiyokwe aral aral tooraida'ai pwol guureji aro adokaikono. “Dobonoo!” Toro adoka su toolluro yogaimaguurai tov kuuloulo to'busuko ai'nokakwono.

² Toro juno sumaiyokwe nuu sumdo yomuugona'no sumoneyokwe hoos wiya'jo pwollu kwononyugono. A'mwo hoos su toollu mokavla'mdowodo tool irogudo puul mwora'dowodekono. Aki toro toolluro mido tovi a'mwo aguto kig tooravuro miguto tov subweyopekono. Su tool molo tonyu me'no uuwolo'mdowodekono. Aki toro tool molo tonyu kuuno uuwoleyo'moneyokwe gami hoos toollu muunyu toru ilomwalno sumaiyokwe avlavokaikono. Toro pla'mduke toollu kwononyugono.

³ Aki Sipsip Muugunyo tool puukwollikwiyo aweyogunyugolowosungiko tovida'ai gwomalo naba 2 amugutowosungiko tovi amodogaipolodukwopiyokaikono. Toro amodogaipolodukwopiyoka toga aiyokwe aral aral tooraida'ai naba 2 tool aro adokaikono. “Dobonoo!” Adokaikono.

⁴ Toro juno sumaiyokwe hoos pwol abiyalo'nokaikono. Hoos su tool muja'jekono. Aki hoos su toolluro mokavlaptokwe toollu Gooti tool jurogudo kwiyokaikono. Jurogudo su tov yiuwi'nokai kwako akavida'ai a'mwo abolo ton kavo nomwalpiyokwe kaiyako mollugolameyo'moneyokwe kwiyokaikono. Jurogudo su tovi wuuduuwallo'moneyokwe tov a'mwo hoos mokavlaptokwe toollu molo'mo kwallu'mopto jurogudo puul kwiyopekono. Toro te gamoro jurogudo su tokwe wiyodowo'jure tovida'ai yiuwi'nokai tomuuda'ai a'mwo tooro molo ingovlapinorogano. Toro ingovlavopi bwotonyago tooro imgu amgu nyoromi'napinorogano.

⁵ Aki Sipsip Muugunyo tool gwomalo naba 3 amugutowopingiko tovi amodogaipolapiyoka toga aiyokwe aral aral tooraida'ai naba 3 tool aro adokaikono. “Dobonoo!” Adokaikono. Toro juno sumaiyokwe nuu yomuugona'dore toga hoos muullujo pwollu kwononyugono. A'mwo hoos su toollu mokavlaptokwe tool gamoro ato tokwe skelo puruv amworarokaikono.

⁶ Aki aiyokwe aral aral tooraida'ai pwolluro yogaimaguurai puruv aro adokakwono. “Guu plavo'bi wit womdo togai'aro bali womdo togai'aro tonyu kaiyako domollounapiyono. Su toro amollounapibi tovida'ai wosamujuko biyomallo'moneyokwe nuugwiyo tov bwotonyo ilawonokwono. A'mwo abolo ton wit yiuno wan kiloo to'no biyomallo'moneyokwe tov iruko pullugwojuro yiuwi'nokai womnuugwiyo tokwe biyomapinokwono. Aki nuugwiyo bwotonyo su tokwe bali yiuno 3 kiloo to'no biyomapinokwono. Toro kuvi kuruv guu a'mwo abolo tonyuro oolip iko toorogai'aro wain ikulsulo womdo togai'aro tonyuno'gwowi kaiyako mamollounapibinono.” Adokakwono.

⁷ Aki Sipsip Muugunyo tool gwomalo naba 4 amugutowopingiko tovi amodogaipolodukwopiyoka toga aiyokwe aral aral tooraida'ai naba 4 tool aro adokaikono. “Dobonoo!” Adokaikono.

⁸ Toro juno sumaiyokwe nuu muugonarono hoos kaikwa'jo pwollu kwononyugono. A'mwo hoos su toollu mokavlaptokwe toolluno yovo tov Bolnodolekono. Aki kwollu kuumjunoka pwolluno yovo tov A'mwo Buusolekono. A'mwo Buusolo adoka su tov a'mwo abolo me'no bolodupudo tonyuro mwalodupudo toru'nokwono. Toro toorallu Gooti tool womdo tov aro kwiyokarakono. Yiuwi'nokai kwako akavida'ai a'mwo abolo amwalpi tonyu aval aval momuudeyosubullunorakono. Su toro amomuudeyosubullu tonyuda'ai puruvi noromiyoso'moneyokweyogano. A'mwo abolo noromiyoso'mo su tonyu aro tomgu'aro yoromiyosubullunorakono. Muugo togai'aro muju'wuulo togai'aro nobolluwuulo togai'aro ibesa'aiyo kuulludaiyo tooro dovonopiyodopure togai'aro yiuwi'nokai su togai yoromiyosubullunorakono.

⁹ Aki Sipsip Muugunyo tool puukwollikwiyo tovida'ai gwomalo naba 5 amugutowopingiko tovi amodogaipolodukwopiyoka toga nuu Gooti toollu romiroudapiyo'moneyokwe dukwagupto puvi kwononyugono. Aki dukwagupto su tovi dolago tomuu a'mwo abolo pubuuravuro kuullo tonyu kwononyugono. A'mwo abolo su tobuuro sumdomgu Gooti toolluro yogalo tovi porugwo'mo'naro'mno Jisasolluno kuuguudo tov kuu'maiyo toru dodoluwosodopure tobuurai a'mwo pworo aromiyosoporogano.

¹⁰ Toro aromiyosopo tobuuravuro kuullo ton Aguto toollu deko guureji aro kuudopogano. “Oo Aguto Jurogudo Kuunodo tooku yiuno sugudo to'nodekugono. Aki nebal'nodekugono. Toro tooku kwako akavida'ai a'mwo abolo pun nemi aromiyanekubweyopo toga nemoro mujako me'no abwoloka tovino tov guu a'mwo abolo su tonyu adoga kooti yogalo wiyo'bi mido ma'binekudukono?” Kuudopogano.

¹¹ Toro wuujuno sumaveyokwe yiuwi'nokai pwolno puru'monodo su tonyu Gooti tool youro kumi'yago wiya'jo touso kwiyokaikono. Toro wino sumaiyokwe aro kuudokaikono. “Kevu iruko pwekwo kuuno mwalopi kevuge avalo pubuuro Jisasollu womdo kuuno kwimwakovo. Su toro kwimwakopo tobuuraino kevu sogwollo denyulo. A'mwo abolo Jisasollu womdo kuuno kwimwakopo su tobuurai kemi aromiyaikubweyopo to'busuko kubalno aval'no me'no aromiyosupi toga nuu kemoro mujako abwoloka tovino mido noma'monyugono.” Kuudokaikono.

¹² Aki Sipsip Muugunyo tool naba 6 gwomalo amugutowosungiko tovi amodogaipolodukwopiyoka toga nuu sumdo amuugonaronyugono. Sipsip Muugunyo su tool me'no modogaipolodukwopino sumaiyokwe wunyu wunyu bwotonyo puruv sokakwono. Toro ino sumaiyokwe kuujo tool dugumdo kimwonyopiyo'no youro dugubunyo to'busuko sumo'nokaikono. Aki lobako tool mujako bwola'dowodo to'busuko kubalno mujakuumwiyo to'no sumo'nokaikono.

¹³ Aki sullugabwo tooro sulugumdo tomuuda'ai kwako akavi abwolomwekwoporogano. Dolo bwotonyo puruv iko fik toollu mourokurumwogapiyodowo'jure toga gamoro ikulsulo ton bwolomwekwodupudo to'busuko kubalno sullugabwo tooro aval'no abwolomwekwoporogano.

¹⁴ Toro me'no bwolomwekwino sumaveyokwe sulugumdo tov sounopiyokakwono. Alabiyo tovi mowologutowosodupudo to'busuko kubalno Gooti tool sulugumdo tovi amowologutowosokaikono. Aki yiuwi'nokai muumuudo toorogai'aro aku'momdo togai'aro tonyu kemi wo'dupudo tomuuda'ai amodukwopiyokagano.

¹⁵ Su toro toga kwako akavuro a'mwo aguto kig toorogai'aro a'mwo mollurogudo toorogai'aro a'mwo aguto kuunodo toorogai'aro a'mwo abolo kuto ivito bwotonyagokwe togai'aro a'mwo abolo jurogudokwe togai'aro a'mwo abolo ki'nato womdo yodupudo togai'aro aki a'mwo abolo ki'nato womdo tovida'ai me'no birolo'nugolokwodupudo togai'aro yiuwi'nokai pwolno puru'monodo su ton muumuudo tooravuro sumago tomge'aro aki sulo bwotonyokwe tomge'aro tomuu yiulo apuu'naropogano.

¹⁶ Yiulo apuu'naropo su ton muumuudo toorogai'aro sulo toorogai'aro toorai deko guureji aro kuudopogano. “Sia kig tovi ilomwalodowodo tooke'aro nemino surodo wuunodowodo Sipsip Muugunyo tooke'aro tooral nemi nonekwonbullokwe kevu neya dobu'duvolonekumallulo.

¹⁷ Aro tovinokwono. Su tooralluro surodo wuunyo'moneyokwe iruko aguto tollugwo me'no abai'mopso. Toro te kirumwallo'mo sadokuulo su tovi a'mwo pwolnodo kwol kuruv ilaiyo ku'nono miyomjomwekovlawonekono.” Kuudopogano.