Adodolukuu'nosungiko 5 - Gooti Toolluro Yogalokwono

Joonol puukwollikwiyo pweyo agunyugolowosungiko puvi kwonoka tovinokwono

¹ Toruda'ai sia kig tovi sulomwaloka su tool gami anato tokwe puukwollikwiyo aweyogunyugolowosungiko puruv mwora'duke kwononyugono. Puukwollikwiyo aweyogunyugolowosungiko su tovi imgu amgu anakuuto tomge'aro kwa'mgu tomge'aro puukwollo me'no sokwollosungikokwono. Aki puukwollikwiyo aweyogunyugolowosungiko su tovi guureji juguroso'moneyokwe tov gwomalo tokwe 7-pela go'no go'nodo toru guureji aluvomgutowosungikokwono.

² Su toro tovi wonyuno sumoneyokwe aki ensel jurogudo pwol deko guureji moruudoduke toollu kuu'nonyugono. Toro tool guureji aro samuugojokaikono. “Oo ala'mwol puukwollikwiyo aweyogunyugolowosungiko akavuro 7-pela gwomalo amugutowosungiko tonyu nokwo modogaipolodukwopiyowo'ji kuusonoldukono?” Samuugojokaikono.

³ Toro samuugojoka kuvi kuruv puukwollikwiyo aweyogunyugolowosungiko su tovi kuusowo'ji mojagillo'moneyokwe tov a'mwo pwolnodo kwol kuruv nonagutomuugono. Muunyu akai'muuda'aiyorodeyo oo kwako akavida'aiyorodeyo oo kwako tovi dolago tomuuda'aiyorodeyo kworo kuruv puukwollikwiyo aweyogunyugolowosungiko su tovi kuuso'moneyokwe pwol nonagutomuugono.

⁴ Aki puukwollikwiyo aweyogunyugolowosungiko su tovi kuusowo'ji mojagillo'mo tov a'mwo pwolnodo kwollu kuruv ku'nono miyo'mgonomaropekono. Toro tovino tov nuu kumdato guureji adonyugono.

⁵ Toro dodore kuvi kuruv 24-pela a'mwono moduvomwallokwe su tooravuro pwol aro anyudokaikono. “Guu kumdo madubinono. Duu'nono. A'mwo jurogudo pwolluno aro dodupudekono. “Juuda iko tovasuda'ai Laiyonolo,” dodupudekono. Su tool a'mwo aguto kig Devitolluro jukweyago tooraida'ai abokaikono. Aki toro tool gami ikomago toorai me'no kuuwolovokaikono. Toro toolluno tov puukwollikwiyo aweyogunyugolowosungiko su tovuro 7-pela gwomalo tonyu modogaipolodukwopiyowo'ji puukwollikwiyo su tovi nokwo kuusogunyugolowosonekono.” Anyudokaikono.

Joonol Sipsip Muugunyo toollu kwonoka tovinokwono

⁶ Aki nuu Sipsip Muugunyo pwol me'no aromiyosungiko toolbusuko pwollu kwononyugono. Toro tool sia kig toruke'aro aiyokwe aral aral tooro mwalodupudo toruke'aro tonyu akuuto toru adavokaikono. Aki toro da'mduke toollu 24-pela a'mwono moduvomwallokwe tooro aiyowomno amomwodovomaropekono. Aki Sipsip Muugunyo su tool 7-pela koomwo toorogai'aro aki 7-pela sumdo toorogai'aro kurukwekono. 7-pela sumdo su tooro 7-pela kuullo toorobusuko imo'nyokwe Gooti toolluro Kuullo toolluno duuwallo'moneyokweyorogano. Gooti tool gami Kuullo su toollu yiuwi'nokai kwako akavuro go'no go'nodo tomuuno amorapiyokaikono.

⁷ Sipsip Muugunyo adavoka su tool sia kig tovi wobo toru'no abokaikono. Toro bino sumaiyokwe sia kig su toru amwallajuko toolluro anato tovida'ai puukwollikwiyo aweyogunyugolowosungiko tovi amarokaikono.

⁸ Puukwollikwiyo aweyogunyugolowosungiko su tovi malluno sumaiyokwe aiyokwe aral aral toorogai'aro aki 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe gamoro sumdollu tomuu kwolomuulo'naroporogano. Yiuwi'nokai pwolno pwolnodo su tooro gita pun, harpovo, dodupudo togai mworaro'mno aki gool tovida'ai dis sakwollungiko togai'aro amomworaroporogano. Dis su tonyu su'nallajupo ton duko tovi suroudapipi toga wobeya sudokwe juto tov muunyu kai'muuno mokailodawodokwono. Su tov Gooti toolluro a'mwo abolo tonyuro subusu'nyogalo ilodopiyodapudo tovino duuwallo'moneyokweyogano.

⁹ Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.

¹⁰ Aki gumoro womdo sopiyodo tovida'ai a'mwo abolo su ton aguto kig Gooti toolluro mido mollomwalo tovi dolago tomuu kuulomwalodupudogano. Toro ton gamoro pris womdokwe wimo'nodupudogano. Aki toro ton a'mwo abolo punyu kwako akavi mido mollomwalmwalpinogano.” Dato muuduko su tov toro adoporogano.

Sipsip Muugunyo toolluno yovo tovi sulomoropiyapo tovinokwono

¹¹ Aki nuu sumdo wonomolluno sumoneyokwe ensel bwotonyago tooravuro yogaimaguurai tonyu kuu'nonyugono. Ensel su tooro milyan milyan tomgu'arorogano. Aki tausen tausen tomgu'arorogano. Yiuwi'nokai su toorai ku'nono majagilpinorogano. Ensel su tooro sia kig toruke'aro aki aiyokwe aral aral toorogai'aro aki a'mwono moduvomwallokwe toorogai'aro toorai aiyowomno amomwodovomaroporogano.

¹² Toro momwodovoma'no sumaveyokwe dato puruv guureji aro adoporogano. “Sipsip Muugunyo me'no aromiyosopo su toolno yiuwi'nokai tonyu nokwo maronekono. Toro tool mido mollomwalokwe nokwo imo'nonekono. Aki noonyumwonyu sugudo togai'aro pi'mwo kuudo togai'aro jurogudo togai'aro tonyu nokwo maronekono. Aki toro toolluno yiuwi'nokai a'mwo abolo ton nokwo ilomoropimwolapinekono. Aki toro tool yovo aguto nokwo ma'mwalonekono. Aki toro toolluno yogalo sugudo togai dubwemwalpinekono.” Ensel tooro toro adoporogano.

¹³ Su toro tovi wuu'nyuno sumoneyokwe yiuwi'nokai muunyu kai'muuda'ai toorogai'aro kwako akavida'ai toorogai'aro kwako tovi dolago tomuuda'ai toorogai'aro soolwara tovi mwalodupudo toorogai'aro Gooti toolluro yiuwi'nokai sokwollosoka su tooro deko aro dodopure tovi kuu'nonyugono. “Sia kig tovi ilomwalodowodo tooke'aro Sipsip Muugunyo tooke'aro toorallu nevu yogalo sugudo tokwe dubweyowa'ji aki yovo aguto tov yiuwi'nokai toga neya wimwalanorakono. Aki yiuwi'nokai tonyu mido mollomwallo'moneyokwe jurogudo tov kworallu yiunokuudo uuwo'dowodokwono.” Su toro dodopure tovi kuu'nonyugono.

¹⁴ Toro wuu'nyuno sumoneyokwe aiyokwe aral aral tooro aro adoporogano. “Nebalokwono.” Adoporogano. Aiyokwe aral aral tooro toro juno sumaveyokwe 24-pela a'mwono moduvomwallokwe tooro wolomuulo'naro'mno sia kig tovi ilomwalodowodo tooke'aro Sipsip Muugunyo tooke'aro tooralluno sulomoropiyaporogano.