Adodolukuu'nosungiko 4 - Gooti Toolluro Yogalokwono

Gooti toolluro ago muunyu kai'muu sia kig tovi mwalodowodo toolluno ilomoropiyodapudo tovinokwono

¹ Toruda'ai nuu Joononyu sumdo yenomolluno sumoneyokwe aro tovi kwononyugono. Gooti toolluro ago muunyu kai'muu kudo'aiko tov ausodavokakwono. Aki yogaimaguurai sumdomgu me'no kuu'no tov aki aiko te aval'no anyudokakwono. Yogaimaguurai su tov biugel guureji ki'nodowodo to'busuko tovi kuu'nonyugono. Toro te yogaimaguurai su tov aro anyudokakwono. “Guu akawai'no julabono. Toro sulabi tookuji aro tov guduuwallumonyugono. Yiuwi'nokai lukomgu nyumo'nugobupino tonyuno guduuwallumonyugono.” Anyudokakwono.

² Su toro anyudoka kuga'gwo kuuno Gooti toolluro Kuullo tool mi aiyowomno so'movanuwopiyokaikono. Toro te nuu Gooti toolluro ago muunyu kai'muu sia kig puvi kwononyugono. Aki sia kig su tovi a'mwo pwol me'no kwolomwallajuko toollu kwononyugono.

³ Toro sulomwaloka toolluro bako tov sulo tollal lekuropi lekuropi yodubulokwono. Sulo su tollalluno yovo tov pullugwo jaspavokwono. Aki pullugwo kooniliyonovokwono. Aki sia kig su tovi daboomuulo puruv aiyowomno kirogabolosodowodokwono. Daboomuulo su tovuro bako awopiyoka tov ikouljokwono. Ikouljo su tov sulo sugumaluko pullugwobusukokwono. Sulo su tollugwojuno yovo tov emeralovokwono.

⁴ Aki sia kig su tovi 24-pela sia kig pun aiyowomno amomwodovomaropogano. Toro tonyu 24-pela a'mwono moduvomwallokwe pworo sulomwaloporogano. A'mwo su tooro youro wiya'jo kumi'yago tousogai molloso'mno aki aguto kig tooravuro miguto pun gool tovida'ai sakwollungiko togai kemi mido tonyu amollosoporogano.

⁵ Aki sia kig su tovida'ai molamopto tov amdolopiyajukokwono. Aki kuuloulo kuruv ai'nugolokabiyajukokwono. Aki sia kig su tovi sumdollu toru 7-pela gworeko gudupolallo'moneyokwe pun widuko nodupudogano. Gworeko gudupolallo'moneyokwe su ton 7-pela kuullo toorobusuko imo'nyokwe Gooti toolluro Kuullo su toolluno duuwallo'mogano.

⁶ Aki sia kig su tovi sumdollu toru wonyo buugo bwotonyo to'busuko puruv wo'dowodokwono. Wonyo buugo su tov gles to'busuko imo'nodowo gamoro bako tov yiunokuudo kilukuuropiyodowodokwono. Aki sia kig su tovuro yiuwi'nokai deyo aiyowomno toru aiyo mwalodupudo aral aral tooro amomwodovomaroporogano. Yiuwi'nokai aral aral go'no go'nodo su toorai sumdo bwotonyago ton kemoro kulako tovuro sumdollu toruke'aro buulo tomgu'aro tomuu so'mowopingoporogano.

⁷ Toro te aiyo mwalodupudo su tooravuro muudu'nodo tool laiyon toolbusuko kula'nokaikono. Aki lukomguda'ai tool buulmokau kwolo toolbusuko kula'nokaikono. Aki lukomguda'ai tool nevu a'mwo toonolbusuko sumdomagokwekono. Aki aiyowo'mo tool bwajo pwol gami puviyo tov kwiyoku'bworapiyowo'ji plovomollodowodo toolbusukekono.

⁸ Yiuwi'nokai aiyokwe aral aral su tooro 6-pela puviyo go'no go'nodo ton kurukwerogano. Aki toro tooravuro puviyo tonyu imgu amgu sumdo bwotonyago tooro aiyowomno so'mowopingoporogano. Toro tooro iruko togake'aro surakuuto togake'aro yiuwi'nokai toga aro mujodomwekovla'mdupudorogano. “Sugudoloo, Sugudoloo, Sugudoloo, Aguto Gooti su tool Jurogudo Kuunodekono. Toro tool yiuwi'nokai aiyoga amjomwekelabiyajuko su tool aga kuga kuruv kuuno mujomwekovla'mdowodekono. Aki yiuwi'nokai lukomgu kuga kuruv yiunokuudo mujomwekovla'mwalonekono.” Su toro mujodomwekovla'mdupudorogano.

⁹ Aki sia kig su tovi mwalodowodo tool yiunokuudo mujomwekovla'mdowodekono. Toro toolluno aiyokwe aral aral tooro yiuwi'nokai toga yovo aguto wiyo'moneyokwe ilomoropiyodapu aki, “Nenoloo,” to'no wuudodupudorogano. Aral aral tooro su toro yodopure toga

¹⁰ 24-pela a'mwono moduvomwallokwe tooro sia kig tovida'ai yiunokuudo mujomwekovla'mdowodo su toollu wobo toru bwomuulo'naropi kwolluno ilomoropiyodapudorogano. Aki toro tooro kemi mido tovida'ai kig tooravuro miguto ton sia kig sumdollu toru irolubweyopi dato aro domwalodupudorogano.

¹¹ “Oo yiuno nemi Gooti tookuno nokwo'mekugono. Yiuno guvu judo tookuno yovo aguto maro'bi aki judo tookuji kwako tomuu'aro mwalmwalanonogano. Aki toro tookujuno, Jurogudoloo, ilomodomorogwopiyodowadekugono. Su tov aro tovinokwono. Guu yiuwi'nokai noonyumwonyu tonyu sokwollosodekugono. Aki toro tooku yiuwi'nokai tonyu yiuno guvnokwekujuro ilaiyo gujunodowodo tovi'aro sokwollosodogano. Aki yiuwi'nokai sokwollosodo su ton gumi ilaiyo gujunodowodo su tovi'aro kuuno wo'dupudogano.”