Adodolukuu'nosungiko 22 - Gooti Toolluro Yogalokwono

Aiyo yiunokuudo mujomwekovlaiyo'moneyokwe wonyo tokwe'aro iko tooke'aro tovallunokwono

¹ Toruda'ai ensel tool wonyo bwotonyo puvi anyuduuwallokaikono. Wonyo su tovi a'mwo abolo anpi tonyu aiyo yiunokuudo mujomwekovlaiyo'moneyokwe wiyodowodokwono. Aki toro tov gles to'busuko lekuropiyodowodokwono. Wonyo su tov Gooti tooke'aro Sipsip Muugunyo tooke'aro tooralluro sia kig mwalodubulo tomuuda'ai lokabodowodokwono.

² Toro lokabodowo wagwolago su tovuro puuto aguto tovi akuuto toru'aro lokwodowodokwono. Aki iko aiyo yiunokuudo mujomwekovlaiyo'moneyokwe tool wonyo su tovi imgu amgu da'mdowodekono. Iko su tool yiuwi'nokai 12-pela lobako tobuullu sulo ki'nodowodekono. Aki toro toolluro ikoulo touso marasin to'busukokwono. Ikoulo su touso a'mwo abolo kantri go'no go'nodo tomuuda'ai mwalodupudo tonyu ikulodupudogano.

³ Gooti tooke'aro Sipsip Muugunyo tooke'aro tooralluro sia kig tov wagwolago su tovi akuuto tomuu wo'mwalonokwono. Toro tovino tov noonyumwonyu anakuuto tomuuda'ai tonyu Gooti tool kaiyako migolmwalonekono. Aki toro tomuu Gooti toolluro womdokwe ton gami ilomoropimwolapinekono.

⁴ Gooti toolluro womdokwe su ton gamoro sumdomago tovi nomuugona'mwalpinogano. Aki gamino yovo tov kemoro yomo tonyu puukwollo sokwollubwengiko togai momjomwekovla'mwalpinogano.

⁵ Yiuwi'nokai toga wagwolago su tovi surakuuto tov maimwonyugovla'mwalonokwono. Aki gworeko tovuro bako tokwe'aro kuujo toolluro bako tokwe'aro tovalluno supto mimwalonorukono. Su tov aro tovinokwono. Gooti tool yiuwi'nokai wagwolago su tovi aulomwalpi tonyu bako pwopimovla'mwalonekono. Aki wagwolago su tovi Gooti toolluro womdokwe ton kuulomwalopi aguto kig mido mollomwalokwe womdo tov yiunokuudo mujumovla'mwalpinogano.

Krais tool wobo toga nobwono tovinokwono

⁶ Toruda'ai ensel tool aro anyudokaikono. “Yiuwi'nokai yogalo kuu'numado su ton nebal'nodogano. Toro tonyu a'mwo abolo ton kuudo uubweyo'moneyokweyogano. Gooti Aguto tool gamoro proofet toorai moduko'bworapiyokwekono. Gooti su tool gami a'mwo abolo womdokwe tonyu noonyumwonyu pun wobo toga nobai'mowono su tonyuno wuujo'moneyokwe gamoro ensel pwollu me'no amorapiyokaikono.” Anyudokaikono.

⁷ Toruda'ai Jisasol aro adokaikono. “Kevu neya duu'nyulo. Nuu wobo toga nobumonyugono. Toro te a'mwo abolo pun buukiyo akavuro proofet yogalo sokwollosungiko akanyu kuumjunpi su ton kemi poowokalago togai ilaiyo ibwosunpinogano.” Adokaikono.

⁸ Nuvnokwe Joononyu yiuwi'nokai yogalo nyudoduke tonyu me'no kuu'nonyugono. Aki yiuwi'nokai nyuduuwalloduke kunyu kuruv me'no kwononyugono. Su toro toga nuu ensel anyuduuwalloka su toollu ilomoropiyo'moneyokwe gamoro suvlo dolago tomuu kwolomuulo'naronyugono.

⁹ Toro kuvi kuruv ensel su tool aro anyudokaikono. “Guu mino milomonuwopiyabinono. Nuu kwonyu kuruv guvubusuko Gooti toolluro womdokwe pwekwonyugono. Guvuge avalo proofet toorogai'aro aki yiuwi'nokai a'mwo abolo buukiyo akavida'ai kuuguudo wo'dupudo tonyu uumjunyokwe togai'aro yiuwi'nokai su togaikulbusuko nuu Gooti toolluro womdokwe tekwonyugono. Toro kuvi kuruv Gooti toolluno'gwowi guu neya julomoropiyogawono.” Anyudokaikono.

¹⁰ Aki ensel tool aro anyudokaikono. “Proofet yogalo akavuro kuvinono nobai'mowono'mo tov wobo togakono. Toro tovino tov guu buukiyo akavida'ai proofet yogalo wo'dowodo su tonyu yiulo mamopuurosumwalbinokwono.

¹¹ Wobo toga yogalo su ton kuvinono nobai'mowonokwono. Toro tovino tov a'mwo pwol ma'no ma'no kiroungovlaiyokwe su tool kuuno airoungovlavogawono. Aki a'mwo pwol kaiyako igolamo'nyokwe su tool kuuno igolamo'nogawono. Aki a'mwo pwol Gooti toolluro sumdo tovi sugupasudo mujumovlaiyokwe su tool kuuno amjumovlavogawono. Aki a'mwo pwol Gooti gavnokwe toolluro kuunodo wimo'nyokwe su tool kuuno wimo'nugovlavogawono.” Ensel tool toro anyudokaikono.

¹² Jisasol aro adokaikono. “Neya duu'nyulo. Nuu wobo toga nobumonyugono. Toro abumi toga yiuwi'nokai a'mwo abolo tonyuro pasudo mujumovla'mdupudo tovino mubiyo tov mokabo'mi nuuwimonyugono.

¹³ Nuu Muudu'nodo Kuunodolenyugono. Aki nuu Aiyowo'mo Kuunodolenyugono. Aki toro toonyu sumdomgu wanodumdolenyugono. Aki aiyowo'mo bodumdolenyugono. Toro te yiuwi'nokai muuduko imo'nyo'moneyokwe ton nuu kwonyuda'ai imo'nodupudogano. Aki yiuwi'nokai aiyowo'mo nyumwogapiyo'moneyokwe ton nuu kwonyuda'ai imo'nodupudogano.” Jisasol toro adokaikono.

¹⁴ Toro te a'mwo abolo pun kemoro youro kumi'yago touso wonyo tovi yal'mo'mdupudo su ton kemi poowokalago togai ilaiyo bwotonyo ibwosunpinogano. Toro ton wagwolago tovi noullo tovi'aro kuulapi iko aiyo yiunokuudo mujomwekovlaiyo'moneyokwe toolluro ikulsulo ton nokwo kuulomuudanupinogano.

¹⁵ Toro kuvi kuruv a'mwo abolo puno'gwowi wagwolago su tovi kwa'mgu tomuu mwalpinogano. A'mwo abolo jul pasudo yodupudo togai'aro bulapto yodupudo togai'aro kwonyalo yodupudo togai'aro a'mwo pworai romiyosodupudo togai'aro kuunano gooti toorai ilomoropiyodapudo togai'aro aki yiuwi'nokai a'mwo abolo kevnokwenyuro kuunano pasudo tovino ilaiyo winopi youkuu'nuudodupudo togai'aro yiuwi'nokai su ton wagwolago tovi kwa'mgu tomuu mujomwekovla'mwalpinogano.

¹⁶ Jisasol aro ikudodowodekono. “Nuu Jisasonyu moro ensel pwollu kemiyomno amekwopiyabonyugono. Ensel su tool kevu moro mollu'bwoto go'no go'nodo tobuurekullu kuuguudo akakwe kuu'maiyo toru dodoluvaikubweyo'moneyokwe amekwopiyabekono. Nuvnokwe toonyu a'mwo aguto kig Devitolluro iko tovasuda'ai sodolo to'busuko suruvonyugono. Aki nuu aguto kig Devitolluro jukweyago kwolaiyo toonyu gamoro aiko toru mallo'moneyokwenyugono. Aki nuu kabwo bako guureji pwopiyodowodo toolbusukonyugono.” Jisasol toro ikudodowodekono.

¹⁷ Gooti toolluro Kuullo tooke'aro aki Sipsip Muugunyo toolluro abolo nomallo'mo tokwe'aro toval aro dodubulovakono. “Oo kevu Krais toollomno dobogaulo.” Dodubulovakono. Aki yiuwi'nokai a'mwo abolo kuuguudo akavi kaduko kwipi kun kuruv aval'no aro neya adupuro. “Oo Krais toollomno dobogaulo.” Adupuro. Aki a'mwo kuuleyaluko kwino'ji tool Krais toollomno nokwo abwono. Aki yiuwi'nokai a'mwo abolo ton wonyo aiyo yiunokuudo mujomwekovlaiyo'moneyokwe lokabodowo'jure tovida'ai nonyo'mo kwinpi su ton wonyo su tovida'ai yasuwa'no nokwo abanupuro.

¹⁸ Toruda'ai Joonol adokaikono. “Kevu yiuwi'nokai a'mwo abolo buukiyo akavida'ai proofet yogalo wo'dowodo tonyu kuu'nupi togaikullu nuu duudapi yogalo aro ikudumo'monyugono. A'mwo pwol buukiyo akavida'ai yogalo sokwollosungiko tonyu muunyu toru yogalo muuduko pugai'aro nyulloulloso'jo. Toro sulloulloso'ji to'gwowi Gooti tool buukiyo akavida'ai kirumwallo'moneyokwe tabunyuwuulo dodowodo togai a'mwo su toollu nyulloullubweyonekono.

¹⁹ Aki a'mwo pwol buukiyo akavida'ai proofet yogalo sokwollosungiko tonyuro punyu nomodukwopiyo'jo. Toro amodukwopiyo'ji to'gwowi a'mwo su tool buukiyo akavida'ai noonyumwonyu sugumaluko dodowodo tonyu nomaro'jokwe Gooti tool nomoruudukwopiyonekono. Toro tool iko aiyo yiunokuudo mujomwekovlaiyo'moneyokwe toolluro ikulsulo tonyu nomuudano'jokwe Gooti tool nomoruudukwopiyonekono. Aki toro tool wagwolago sugumaluko tovi noulawo'jokwe Gooti tool nomodukwopiyonekono.

²⁰ Aguto Jisasol yiuwi'nokai yogalo akanyuno kuu'maiyo toru'no dodoluwosodowodekono. Toro tool aro adadopiyo. “Nebalokwono. Nuu wobo toga nobumo'mokwono.” Adadopiyo. Toro adoka toollu nuu Joononyu aro kuudumono. “Oo nebalokwono. Aguto Jisaseku nobubino'moneyokwe tovino ilaiyo anyunadopiyo.” Kuudumono.

²¹ Nemi Aguto Jisasol gamoro yasuwa'wino sugumaluko tov yiuwi'nokai Gooti toolluro a'mwo abolo togaikullu aikubwemovlavogawono. Nebalokwono.”