Adodolukuu'nosungiko 21 - Gooti Toolluro Yogalokwono

Kwako muuduko tokwe'aro sulugumdo muuduko tokwe'aro toval nobai'mo'bulluno tovinokwono

¹ Toruda'ai nuu sulugumdo muuduko tokwe'aro kwako muuduko tokwe'aro tovallu kwononyugono. Kuudo neya jaullulo. Sulugumdo uumdo tokwe'aro kwako uumdo tokwe'aro toval me'no sounopiyolovakono. Aki soolwara kuruv me'no sounopiyoka tovino tov mworokakwono.

² Aki aro tovi kwononyugono. Gooti toolluro wagwolago tov gavnokweyolluro ago muunyu kai'muuda'ai wolaboduke tovi kwononyugono. Wagwolago su tovino yovo tov Jeruusalem Muudukoveyokwono. Wagwolago su tov yiuno sugumaluko to'nodo tovi kwononyugono. Su tov aro to'busukokwono. Abolo puruv gami kwolo toollu uuma'nyo'mo toga ilaiyo igollo'moneyokwe youro sugumaluko touso mollovaisu'nodowodo to'busuko kubalno wagwolago me'no sovaisu'nyungiko su tovi kwononyugono.

³ Aki nuu Gooti toolluro sia kig toruda'ai yogaimaguurai guureji doduke puvi kuu'nonyugono. Yogaimaguurai su tov aro adokakwono. “Kevu duu'nyulo. Aga'no'gwowi Gooti toolluro ago to'busuko mujomwekovlaiyo'moneyokwe tool gamoro a'mwo abolo tonyuro akuuto toru me'no abwolai'mo'mokaikono. Toro tool a'mwo abolo su togai mujomwekovla'mwalonekono. Aki a'mwo abolo su ton gamoro kuunodo wimo'numwalpinogano. Aki Gooti gavnokwe tool kemi Gooti kuunodo wimo'numwalonekono.

⁴ Aki Gooti su tool a'mwo abolo su tobuuravuro sumdo tovida'ai kumdaluko bwolodawodo tonyu nomollouropiyonekono. Aki bolnodo tokwe'aro kalo kalo'mo wuulo tokwe'aro kumda'wuulo tokwe'aro danyu'nyuwuulo tokwe'aro su tooro yiunokuudo younopiyopi mwo'movla'mwalpinorogano. Aro tovinokwono. Yiuwi'nokai uumdo su tooro yiunokuudo yovlapino tovinokwono.” Yogaimaguurai tov su toro adokakwono.

⁵ Lukomgu Gooti tool gami sia kig toru mwalno sumaiyokwe aro adokaikono. “Neya duu'nyulo. Nuu yiuwi'nokai tonyu aki aiko te muuduko sokwollosumwakono.” Adokaikono. Toro juno sumaiyokwe mi aro anyudokaikono. “Moro yogalo agudumo akan nebal'nodogano. Yogalo su tonyu a'mwo abolo ton kuudo neya uubwemwalpinogano. Toro tovino tov guu yogalo su tonyu puukwollo neya jakwollono.”

⁶ Toro juno sumaiyokwe aki yogalo puruv aro anyudokaikono. “Me'nogano. Nuu Muudu'nodo Kuunodolenyugono. Aki nuu Aiyowo'mo Kuunodolenyugono. Yiuwi'nokai muudu'no imo'nodupudo ton nuu kwonyuda'ai imo'nodupudogano. Aki yiuwi'nokai aiyowo'mo nyumwogapiyo'mo ton nuu kwonyuda'ai imwogapiyodupudogano. Toro toonyu yiuwi'nokai a'mwo abolo wonyo'mo kuuleyaluko kwinpi su tonyu aiyo yiunokuudo mujomwekovlaiyo'moneyokwe wonyo sumdo ilowilovabodowo'jure tovida'ai nuu wonyo tov yasuwa'no nuuwimonyugono.

⁷ Toro te yiuwi'nokai a'mwo abolo Satanyolluro molo tovi kuuwolopi tonyu moro yiuwi'nokai kwimi ton kuvinono nomapinogano. Aki nuvnokwe toonyu kemi Gooti wimo'numwalmonyugono. Aki toro ton moro kwoloraiyo kuunodo nyumo'numwalpinogano.

⁸ Toro kuvi kuruv a'mwo abolo puno'gwowi luko yodupudo su togai'aro kuudo muubweyodupudo togai'aro kaiyako igolamo'nodupudo togai'aro romiyosodupudo togai'aro kwonyalo yodupudo togai'aro bulapto yodupudo togai'aro kuunano gooti toorai ilomoropiyodapudo togai'aro kuunano yogalo youkuu'nuudodupudo togai'aro yiuwi'nokai su tonyuno'gwowi dukworokakwe salfa sulo tokwe du'muudo nugovla'mdowo'jure tovi noulapinogano. Du'muudo su tovino, naba 2 bolnodovo, dodupudokwono.”

Joonol wagwolago Jeruusalem muuduko tovi kwonoka tovinokwono

⁹ Toruda'ai 7-pela ensel tooraida'ai pwol miyomno abokaikono. 7-pela ensel su tooro Gooti toolluro aiyowo'mo 7-pela tabunyuwuulo surosungiko dis tonyu amworallajupo toorogano. Toro tooraida'ai ensel pwol miyomno bino sumaiyokwe aro anyudokaikono. “Guu dobono. Toro abubi tookuji nuu Sipsip Muugunyo toolluro abolo nomarono tovino guduuwallumonyugono.” Anyudokaikono.

¹⁰ Toro nyujuno sumaiyokwe Gooti toolluro Kuullo toollu uumjungovlaiyo'moneyokwe kuudo tov moro poowokalago tovi kuullo'movanuwopiyoduke toonyu ensel tool muumuudo kumi'yago kuunodo pwollu muunyu tomuuno amollubworonumokailokanyugono. Toro mollubworonumokailno sumaiyokwe Gooti toolluro wagwolago Jeruusalem sugumaluko tovi anyuduuwallokaikono. Wagwolago su tov Gooti toolluda'ai gamoro ago muunyu kai'muu kuuno wolaboduke tovi anyuduuwallokaikono.

¹¹ Wagwolago su toru Gooti jurogudokwe toolluro bako bwotonyo tov pwopiyodowodorukono. Aki sulo sugumaluko tollovobusuko pun bako lekuropiyodowodorukono. Sulo sugumaluko su tovino yovo tov jaspavo dodupudokwono. Sulo su tov gles to'busuko kuu'maiyo toru'no kilukuuropiyodowodokwono.

¹² Aki wagwolago su tovi kuurupto muugu'mullo kumi'yago tokwe airogabolosungikokwono. Aki kuurupto airogabolosungiko su tovi 12-pela noullo ton ausosungikokwono. Yiuwi'nokai noullo su tonyu 12-pela ensel tooro go'no go'nodo tonyu moduvomwalodupudorogano. Aki yiuwi'nokai noullo su tonyu Isuraiyololluro 12-pela yovodolobunyo tooraida'ai yovo go'no go'nodo ton sokwollosungikogano.

¹³ Aki kuurupto su tovuro yiuwi'nokai aval aval tomgu noullo puruvapuruv puruvapuruv ausosungikokwono. Kuujo sulopiyamoka is tomgu puruvapuruv ausosungikokwono. Aki wonyo sumdo tov alokamoka noot tomgu puruvapuruv ausosungikokwono. Aki wonyo kwolmoka saut tomgu puruvapuruv ausosungikokwono. Aki kuujo kwolmoka wes tomgu puruvapuruv ausosungikokwono. Kuurupto airogabolosungiko tovuro noullo ton su toro wo'dupudogano.

¹⁴ Aki kuurupto airogabolosungiko su tov 12-pela sulo jurogudo pworai muunyu toru airogabolosungikokwono. Aki 12-pela sulo su toorai Sipsip Muugunyo toolluro 12-pela a'mwo kuurotokwe tooraino yovo go'no go'nodo ton sokwollosungikogano.

¹⁵ Ensel anyudoka su tool wagwolago tokwe'aro noullo togai'aro kuurupto tokwe'aro tonyu jagillo'moneyokwe yamjiko pullugwo amomworarokaikono. Yamjiko su tollugwo gool tovida'ai sakwollungikokwono.

¹⁶ Ensel tool wagwolago su tovi yamjiko tokwe yoma'no sumaiyokwe aro ajagilokaikono. Wagwolago su tovuro ga'bwollo kumi'yago tokwe'aro supto tokwe'aro toval aval'nodovakono. Wagwolago tovuro kumi'yago su tov 2,200 kiloomita tomgu'arokwono. Aki gamoro ga'bwollo kumiko tokwe'aro gamoro ga'bwollo supto tokwe'aro gamoro ido'nyu kumi'yago tokwe'aro yiuwi'nokai su tonyuro kiloomita tov aval'nodogano.

¹⁷ Aki kuurupto tovi yamjiko tokwe yoma'no sumaiyokwe aro ajagilokaikono. Kuurupto su tovuro ido'nyu kumiko tov 66 mita tomgu'aro sumo'nokakwono. Toro te ensel tool yiuwi'nokai su tonyu jagillo'moneyokwe tov kwako akavida'ai a'mwo abolo tonolluro jagilodowado to'busuko aval'nodo tomgu'aro ajagilokaikono.

¹⁸ Aki kuurupto su tov sulo sugumaluko jaspavo dodupudo tokwe aluvogilowopingikokwono. Wagwolago to'gwowi gool yiuno sugudo to'nodo tokwe amodopingikokwono. Gool yiuno sugudo to'nodo su tov gles to'busuko lekuropiyodowodokwono.

¹⁹ Wagwolago tovuro kuurupto tov 12-pela sulo jurogudo toorai muunyu toru airogabolopingikokwono. 12-pela sulo jurogudo su toorai sulo sugumaluko nuugwiyo bwotonyo biyoma'dupudo tollovogai sovaisopiyoporogano. Sulo sugumaluko su tollovaino yovo tov arokwono. Sulo muudu'nodo tollugwojuno yovo tov jaspavokwono. Sulo naba 2 tollugwojuno yovo tov safairovokwono. Sulo naba 3 tollugwojuno yovo tov agetovokwono. Sulo naba 4 tollugwojuno yovo tov emeralovokwono.

²⁰ Aki sulo naba 5 tollugwojuno yovo tov sadooniksovokwono. Sulo naba 6 tollugwojuno yovo tov kooniliyonovokwono. Sulo naba 7 tollugwojuno yovo tov krisoolaitovokwono. Sulo naba 8 tollugwojuno yovo tov berilovokwono. Sulo naba 9 tollugwojuno yovo tov toopasovokwono. Sulo naba 10 tollugwojuno yovo tov krisoopresovokwono. Sulo naba 11 tollugwojuno yovo tov haiyasinovokwono. Sulo naba 12 tollugwojuno yovo tov ametisovokwono. 12-pela sulo sugumaluko su tollovaino yovo tov torokwono.

²¹ Aki kuurupto tovuro 12-pela noullo ton soolwara tovida'ai sulo sugumaluko nuugwiyo bwotonyo biyoma'dupudo tollovogai sokwollopingopogano. Yiuwi'nokai noullo go'no go'nodo tonyu sulo yiuno pwolnodo toolluda'ai sokwollopingopogano. Aki wagwolago su tovi akuuto toruda'ai puuto aguto tov gool yiuno sugudo to'nodo tokwe soulosungikokwono. Gool su tov gles sugudo tovi'aro kuu'maiyo kuuloonyopiyodapudo to'busukokwono.

²² Nuu wagwolago su tovi anakuuto tomuu Gooti toollu ilomoropiyo'moneyokwe ago puruv mwo'duke kwononyugono. Su tov aro tovinokwono. Gooti Aguto Jurogudo Kuunodokwe su tooke'aro Sipsip Muugunyo tooke'aro tooral wagwolago tovi kuulomwalodole tovino tov ilomoropiyo'moneyokwe ago puvino supto miyodowodokwono.

²³ Aki wagwolago su tov kuujo tooke lobako tooke kworalluno kuruv supto miyodowodokwono. Aro tovinokwono. Gooti toolluro jurogudo tovida'ai bako bwotonyo tov wagwolago su tovi aiyowomno pwopiyodowodokwono. Aki Sipsip Muugunyo tool wagwolago su tovuro gworeko wimo'nodowodekono.

²⁴ Toro te wagwolago su tovuro bako bwotonyo tov yiuwi'nokai kantri judo'no judo'nodo tonyu pwopimwalonokwono. Toro pwopiyodowo'jure su tovi anakuuto tomuu yiuwi'nokai kantri tonyuda'ai a'mwo abolo ton yomjomwekovla'mwalpinogano. Aki kwako aiyowomno tomuuda'ai a'mwo aguto kig kworo kuruv kemi noonyumwonyu sugumaluko tollovogai wagwolago su tovi nomokaulapinorogano.

²⁵ Wagwolago su toru surakuuto nonagutokwono. Surakuuto majunopiyodowodo toru'no tov wagwolago su tovuro noullo ton mamollukuropiyopi yiuwi'nokai toga nokwo kuusu'na'mwalpinogano.

²⁶ Aki wagwolago su tovi aulapi ton kemi kantri go'no go'nodo tonyuro noonyumwonyu sugumaluko togai'aro nuugwiyo bwotonyo biyoma'dupudo togai'aro ton nomokaulapinogano.

²⁷ Toro kuvi kuruv yiuwi'nokai kaiyako mollugolameyo'mo tooro wagwolago su tovi noulapiyokwe nuumjuku'mwalonorogano. Toro uumjuku'dowo'jure tovida'ai a'mwo kaiyako igolamo'nodowodo pwolnodo kwol kuruv ku'nono maulawonekono. Aki yiuwi'nokai kwoda'mollunyo pasudo yodupudo togai'aro kuunano youkuu'nuudodupudo togai'aro su to kun kuruv ku'nono maulapinogano. Toro kuvi kuruv yiuno a'mwo abolo kemino yovo tov Sipsip Muugunyo toolluro Aiyo Yiunokuudo Mujomwekovlaiyo'moneyokwe Buukiyo tovi me'no sokwollosungiko su tonyuno to'no wagwolago tovi nokwo kuulapinogano.