Adodolukuu'nosungiko 20 - Gooti Toolluro Yogalokwono

Satanyol wan tausen kworomo tobuullu wuulo ki'narono tovinokwono

¹ Toruda'ai nuu ensel pwol Gooti toolluro ago muunyu kai'muuda'ai wolaboduke toollu kwononyugono. Ensel su tool kuuraibuuso daneyajokwe tovi kuuso'moneyokwe ki tokwe'aro senyo wuulo bwotonyo tokwe'aro tovallu gami ato tovi momwora'dowodekono.

² Toro tool aiyogasuro ilviyo bwotonyo toolbusuko gabakuto toollu senyo wuulo tokwe agalogullosokaikono. Gabakuto su toolluno yovo puruv “Kooti Yogalo Mojokuu'nosokweyolekono.” Aki yovo puruv “Satanyolo” dodupudekono. Toro toollu wan tausen kworomo tobuullu wuulo ki'narono'moneyokwe ensel tool senyo wuulo tokwe agalogullosokaikono.

³ Toro galogullosuno sumaiyokwe kuuraibuuso daneyajokwe tovi kwolomogalowopiyokaikono. Toro wolomogalowopino sumaiyokwe wan tausen kworomo tobuul yere muuwolo'mdowo'jure toga Satanyol yiuwi'nokai a'mwo abolo kantri go'no go'nodo tomuu mwalodupudo tonyu aki aiko te nyoukuu'nuudo'jokweyo'mo kuuraibuuso daneyajokwe su tovi yiunokuudo amoruuduugurokaikono. Lukomgu wan tausen kworomo su tobuul me'no abawo'ji toga Satanyol aiko te lokabowo'ji yiuno kula'nyo toga'gwono yomollono'moneyokwe Gooti tool nyurolowapiyonekono.

⁴ Toruda'ai nuu sia kig bwotonyago tonyu kwononyugono. Sia kig su tonyu a'mwo abolo pun sulomwalopogano. A'mwo abolo su tonyu Gooti tool womdo wimovla'mwalpino'moneyokwe tov me'no kuubweyokaikono. Womdo su tov a'mwo abolo punyu kooti yogalo duuwiyopi jainyubwollo'moneyokweyokwono. Aki toruda'ai nuu a'mwo abolo pubuuravuro kuullo tonyu kwononyugono. Kuullo su ton Jisasolluno kuuguudo tokwe'aro Gooti toolluro yogalo tokwe'aro tovalluno kuu'maiyo toru dodoluwosodopure tobuurai ikomago pworo kemi boruko tonyu adovolugulapiyopogano. A'mwo abolo su tobuuro ibesa'aiyo kaiya'no kuumwiyo tooke'aro kwolbusuko kula'noka sokwolludapingiko tooke'aro toorallu milomoropiyajupogano. Aki ibesa'aiyo kaiya'no kuumwiyo su toolluro nojeso'moneyokwe puukwollo kuruv kemi yomo'mdeyo oo ato'mdeyo tonyu mamallajupogano. Toro te yiuwi'nokai me'no adovolugulapiyopo su tobuuro aiyo aiko te adukavopogano. Toro dukaino sumaveyokwe Krais tool aguto kig mido mollomwallo yoduke tooke womdo aval'no amjumovlavopogano. Womdo su tov wan tausen kworomo tobuullu momjumovla'mwalpinogano.

⁵ Toro te a'mwo abolo adovolugulapiyopo su tobuuravuro adukavopo su tov aiyo aiko te dukaiyo'moneyokwe naba wan tokwono. Toro kuvi kuruv yiuwi'nokai a'mwo abolo me'no abolopo puno'gwowi yere madukavopogano. Toro tobuuro lukomgu wan tausen kworomo su tobuul me'no abawo'ji toga nodukapinogano.

⁶ Kuudo neya jaullulo. Aiyo dukaiyo'moneyokwe naba wan tovida'ai adukapi su ton Gooti gavnokwe toolluro kuunodo wimo'nyo'mo imo'nupinogano. Su toro ton kemi poowokalago togai ilaiyo ibwosunpinogano. Aki a'mwo abolo su ton lukomgu aki aiko te mabolpinogano. Aki bolnodo naba 2 su tov a'mwo abolo su tonyu kaiyako igollo'moneyokwe jurogudo nonagutokwono. Toro kun kuruv Gooti tooke'aro Krais tooke'aro tooralluro pris womdokwe wimo'nugovla'mwalpinogano. Aki toro ton wan tausen kworomo tobuullu Krais tooke aguto kig mido mollomwallo'moneyokwe womdo tov aval'no momjumovla'mwalpinogano.

Gooti tool Satanyollu du'muudo tomuu wolomogalowopiyawono tovinokwono

⁷ Yiuwi'nokai wan tausen kworomo tobuul me'no abawo'ji toga Gooti toolluro ensel tool Satanyollu kuuraibuuso daneyajokwe tovi ki'na'dowodo tomuuda'ai nomollurolowapiyonekono.

⁸ Toro amollurolowapiyo'ji toga Satanyol kuuraibuuso daneyajokwe tovida'ai lokabowo'ji yiuwi'nokai kwako akavida'ai kantri go'no go'nodo tonyu mwalodupudo toorai youkuu'nuujo'moneyokwe nomoruudomollonekono. Kantri su tonyuno yovo puruval aro dodupudogano. Gookovo dodupudokwono. Aki puruv Magookovo dodupudokwono. Satanyol su toro tomuu youkuu'nuudomollowo'ji molo yo'moneyokwe a'mwo bwotonyago toorai moju'bworomaronekono. A'mwo mollurogudo amollu'bworo'ji su tooro bwotonyago kuunodo imo'nupinorogano. Toro tooro soolwaravuro we'gullugulludo tollovai ku'nono majagilpino to'busuko kubalno a'mwo bwotonyago su'bwo'nupi su toorai ku'nono majagilpinorogano.

⁹ Aki a'mwo mollurogudo su'bwo'nupi su tooro kwako akavuro worato kuu'maiyo tomuu'aro bopi Gooti toolluro a'mwo abolo tobuuro wagwolago Jeruusalem tovi mwalodopure tobuurai molo wiyo'mo bomomwodovomapinorogano. Gooti tool wagwolago su tovino kalo buuropino winyokwekono. Wagwolago su tovi toro bomomwodovoma'dopure kuvi kuruv muunyu kai'muuda'ai duko tov kwolabwo'ji tovi yiuwi'nokai mollurogudo amomwodovomapi su toorai yiunokuudo mobwokulluroudapiyonorogano.

¹⁰ Aki Satanyol a'mwo mollurogudo su toorai soukuu'nuudoka su toollu Gooti toolluro ensel tool galomarowo'ji du'muudo tomuu noolomogalowopiyawonekono. Du'muudo su tov dukworokakwe salfa sulo tokwe nugovla'mdowodokwono. Toro tomuu ibesa'aiyo kaiya'no kuumwiyo tooke'aro gami kuunano proofet tooke'aro tooral mwalodubulomuugono. Toro tomuu ensel tool Satanyollu noolomogalowopiyawonekono. Toro wolomogalowopiyawo'ji yiuwi'nokai pworapwol su tooro iruko togake'aro surakuuto togake'aro yiuwi'nokai toga danyu'nyuwuulo to'no ibwosungovla'mno ibwosungovla'mno yopi yiunokuudo mujomwekovla'mwalpinorogano.

Gooti toolluro kooti yogalo aguto duuwiyono tovinokwono

¹¹ Toruda'ai nuu sia kig wiya'jo aguto tovi kwononyugono. Aki sia kig wiya'jo su tovi muunyu toru Gooti tool nyulomwaloduke kwononyugono. Toro mwaloduke su toolluda'ai kwako tokwe sulugumdo tokwe toval lukado plavolno yiunokuudo sounopiyolovakono.

¹² Su toro tovi wonyuno sumoneyokwe aki aro tovi kwononyugono. Gooti tool gami sia kig su tovi mwaloduke toolluro sumdollu toru a'mwo abolo yovo agutokwe togai'aro yovo maiyokwe togai'aro yiuwi'nokai me'no abollungopo su ton abodavopogano. Su toro da'mdopure toga ensel tool Buukiyo Aiyo Yiunokuudo Mujomwekovlaiyo'moneyokwe tovi ausokaikono. Aki buukiyo pugai'aro ausokaikono. Buukiyo su tonyu aro tovino sakwollungopogano. A'mwo abolo ton sumdomgu yere mabolodopure toga kemoro yiuwi'nokai pasudo mujumelabodupudo tonyuno buukiyo su tonyu me'no sokwollosumelabiyajupogano. Toro te ensel tool buukiyo su tonyu kuusuno sumaiyokwe yiuwi'nokai a'mwo abolo me'no abollungopo su tonyuro pasudo amjumelabiyajupo tonyuno buukiyo tonyuda'ai kuu'maiyo toru'no amojagilokaikono. Su toro mojagiloduke tovi'aro Gooti tool yiuwi'nokai a'mwo abolo me'no abollungopo su tonyu kooti yogalo aduuwiyokaikono.

¹³ Aki Gooti tool kooti yogalo duuwiyo'moneyokwe a'mwo abolo me'no abollungopo tobuuro aro tomuuda'ai aduko'mabopogano. Soolwara tovi anakuuto tomuu wo'dupudo ton aduko'mabopogano. Aki Bolnodo Tomge'aro A'mwo Me'no Abollungopo Tooravuro Tomge'aro tomuuda'ai adukavopogano. Toro adukavopo su ton sumdomgu kwako akavi kuuno mwalodupu kemoro yiuwi'nokai pasudo amjumelabiyajupo tonyuno Gooti tool kooti yogalo duuwiyo'no ajainyubworokaikono.

¹⁴ A'mwo abolo su ton Gooti toolluro kwoloraiyo kuunodo mwimo'nodupudogano. Su toro tonyu kooti yogalo jainyubwo'no sumaiyokwe yiuwi'nokai a'mwo abolo Bolnodo tomge'aro A'mwo Buuso tomge'aro tomuuda'ai mwalodupudo su tonyu du'muudo sovomwollosungiko tovi kwolomowopiyokagano. Du'muudo su tovino, naba 2 bolnodovo, dodupudokwono.

¹⁵ Aki yiuwi'nokai a'mwo abolo ton kemino yovo tov Aiyo Yiunokuudo Mujomwekovlaiyo'moneyokwe Buukiyo tovi miyokwollosungiko su tonyu du'muudo sovomwollosungiko tovi kwolomogalowopiyapogano.