Adodolukuu'nosungiko 19 - Gooti Toolluro Yogalokwono

Gooti toolluro ago muunyu kai'muu mwalodupudo ton ilaiyo sopo tovinokwono

¹ Toruda'ai lukomgu nuu a'mwo abolo kwolallo pun Gooti toolluro ago muunyu kai'muu mwalodupudo ton deko guureji aro delowo'na'dopure tonyu kuu'nonyugono. “Oo nevu Gooti toolluno yovo tovi ilomoropiyogawanoo! Gooti su tool nemi du'muudo tovida'ai amollurolovonekumaroka tool yovo aguto ma'dowo jurogudo kurukwekono.

² Toro tool yiuno nebal'no yogalo tovino to'no uumjunodowo a'mwo abolo tonyu kirumwallodowodekono. Su toro yodowodo tov yiuno sugudo to'no yokwekono. Aki toro tool kwonyalo abolo aguto tovi me'no kirumwallodowodekono. Su tov aro tovinokwono. Kwonyalo abolo su tov yiuwi'nokai a'mwo abolo kwako akavi mwalodupudo tonyu kaiyako amollugolameyajukokwono. Aki su tov Gooti toolluro womdokwe toorai aromiyosajukokwono. Su toro aromiyosajuko tovi mido mallo'moneyokwe tov Gooti tool me'no kirumwallodowodekono. Toro toolluno yovo tovi neya ilomoropiyogawanoo.” Adelowo'naropogano.

³ Aki a'mwo abolo su tonyuro yogaimaguurai tov aiko te aro delowo'na'dopure tonyu kuu'nonyugono. “Oo Gooti toolluno yovo tov ilomoropiyowanoo! Wagwolago Bebeloon tov duko kuuno mujonugovla'mdowo'jure tovida'ai juto tov muunyu kai'muu yiunokuudo kilovoubweyosumelmwolawonokwono.”

⁴ Toro juno sumaveyokwe 24-pela a'mwono moduvomwallokwe toorogai'aro aiyokwe aral aral toorogai'aro tooro Gooti tool gami sia kig tovi mwaloduke toolluno gamoro sumdollu toru wolomuulo'naro'mno aro sulomodomoropiyapogano. “Oo nebalokwono. Gooti toolluno yovo tov ilomoropiyowano!”

⁵ Toro juno sumaveyokwe aki sia kig su toruda'ai yogaimaguurai puruv aro sulodopiyabokakwono. “Kevu Gooti toolluro womdokwe togaikike'aro aki gami dolago tomuu mwalodupudo togaikike'aro aki yovo agutokwe togaikike'aro yovomaiyokwe togaikike'aro yiuwi'nokai su togaikul nemi Gooti toolluno julomoropiyogaulo!” Sulodopiyabokakwono.

Sipsip Muugunyo tool gami abolo tovi yolokuromallo'mo lubullu doto tovinokwono

⁶ Aki su toro toga nuu yogaimaguurai puruv kwolallo bwotonyago tonyuro delowo'nugoulodapudo to'busuko tovi kuu'nonyugono. Yogaimaguurai su tovuro deko tov wonyo allako tokwe'aro kuuloulo ki'nodowodo tokwe'aro tovalluro deko to'busuko kuu'nonyugono. Yogaimaguurai bwotonyo su tov aro adokakwono. “Oo Gooti Jurogudo Kuunodo tool kig mido mollomwalokwe kuunodekono. Toro te nemi Aguto Gooti su toolluno yovo tov ilomoropiyogawano!

⁷ Nemi poowokalago togai ilaiyo bwotonyo yanoo! Aki ilaiyo ibwosunowa'ji gamino yovo aguto neya wimwalanekono. Su tov aro tovinokwono. Aga Sipsip Muugunyo tool gami abolo tovi yolokuromallo'moneyokwe lubullu doto tovi yanyo'mo tov me'no abai'mo'mokogakono. Aki gamoro abolo tov me'no yovraimwonyodowo gami nuuma'nyo'moneyokwe kuunodo toga'no sogwollo kinodowodokwono.

⁸ Abolo su tov gami youro wiya'jo sugumaluko kuunodo kwingiko toul me'no mollosodowodokwono.” Yogaimaguurai tov toro adokakwono. Youro sugumaluko su toul aro tovino duuwallo'mokwono. Gooti gavnokwe toolluro a'mwo abolo tobuuravuro sugupasudo yodupudo tonyuno duuwallo'mokwono.

⁹ Aki ensel tool aro anyudokaikono. “Guu aro jakwollono. A'mwo abolo Gooti toolluro me'no doma'dowodo ton ilaiyo neya ipuro. Su tov aro tovinokwono. Sipsip Muugunyo tool gami abolo tovi yolokuromarowo'ji lubullu doto tov yonomwalonekono. Toro tooke yonomwallo'moneyokwe a'mwo abolo doma'dowodo su ton ilaiyo neya ipuro.” Ensel tool toro nyujuno sumaiyokwe aki aro anyudokaikono. “Yogalo akan Gooti toolluro yogalo nebal'nodogano.” Anyudokaikono.

¹⁰ Ensel toro anyudoka toollu ilomoropiyo'moneyokwe nuu gamoro suvlo dolago tomuu kwolomuulo'naronyugono. Toro wolomuulo'na'dore kuvi kuruv ensel su tool aro anyudokaikono. “Guu mino milomonuwopiyabinono. Nuu kwonyu kuruv guvuge'aro gumoro avaiwomdokwe tekwojogai'aro toorekulbusuko Gooti toolluro womdo tovi aval'no wiyodumdekwonyugono. Gumoro avaiwomdokwe su tooro Jisasolluro yogalo kuu'maiyo toru'no me'no adodoluwosajuko su tovi gudupola'dupudorogano. Toro te kevu yiuwi'nokai toorekul yiuno Gooti toolluno to'no neya julomoropiyogaulo.” Su tov aro tovinokwono. Proofet yogalo tonyuro womdo aguto tov Jisasolluno kuu'maiyo neya adodoluwosopureyokwe tovinokwono.

A'mwo hoos wiya'jo toollu muunyu toru ilomwalodowodo toollunokwono

¹¹ Toruda'ai nuu aro tovi kwononyugono. Gooti toolluro ago muunyu kai'muu kuusoda'mno sumaiyokwe hoos wiya'jo pwol da'mduke toollu kwononyugono. A'mwo hoos su toollu ilomwalodowodo toolluno yovo puruv arokwono. Gooti Toolluro Womdo Tonyu Pi'mwono Mollomwallokweyolekono. Aki a'mwo hoos toollu ilomwalodowodo su toolluno yovo puruv arokwono. Nebal'no Yogalo To'no Jokweyolekono. Toro tool kooti yogalo kwiyo'ji toga yiuno idopto'nodo to'no jainyubwollokwekono. Aki gami ikomago toorai molo kwiyo'ji kuga kuruv yiuno idopto'nodo to'no wiyokwekono.

¹² Hoos wiya'jo toollu muunyu toru ilomwalodowodo su toolluro sumdo tov du'wiyo to'busuko mdolopiyodowodokwono. Aki gamoro mido tovi aguto kig tooravuro miguto bwotonyago ton mollosodowodekono. Aki gamoro kulako tovi gavnokweyolluno yovo puruv sokwollosungikokwono. Yovo su tovino a'mwo pwolnodo kwol kuruv kuudo miyouroma'dowodokwono. Toro kuvi kuruv yiuno gavnokwe toolno yovo su tovino kuudo youroma'dowodekono.

¹³ Gamoro youro kumi'yago mollosodowodo tov mujako tovi me'no ajuulovoma'nyungikokwono. Aki toro toolluno yovo puruv aro dodupudekono. “Gooti Toolluro Yogalekono.” Dodupudekono.

¹⁴ Toro toollu Gooti toolluro ago muunyu kai'muuda'ai mollurogudo tooro kuumjunopekono. Mollurogudo su tooro youro sugumaluko wiya'jo tousogai mollosodupudorogano. Toro tooro hoos wiya'jo toorai muunyu toru ilomwalno sumaveyokwe kuumjunopekono.

¹⁵ Aki toro kuumjunopo su toolluro mago tovida'ai molo'mo kwallu'mopto puul alokabokakwono. Kwallu'mopto alokaboka su touke yiuwi'nokai kantri go'no go'nodo tomuuda'ai mwalodupudo tonyu iwago romiyo'mokwono. Aki toro tonyu aiyon iwanyiko amworaro'ji tokwe mido mollomwalo tov guureji to'no mollomwalonekono. Aki toro tool wain ikulsulo tonyu suvlo tokwe gurojodupudo to'busuko kubalno a'mwo abolo su tonyu suvlo tokwe gurojodawonekono. Su toro agurojodawo'ji toga Gooti Jurogudo Kuunodokwe toolluro surodo wuunodowodo tovino kuu'maiyo wuuduuwallonekono.

¹⁶ Gamoro youro kumi'yago mollosodowodo tovi su'muudo wobo toru yovo puruv aro sakwollungikokwono. Yiuwi'nokai a'mwo aguto kig toorai Aguto Kig wimo'nodowo aki yiuwi'nokai a'mwo aguto toorai Aguto wimo'nodowodolekono. Sakwollungikokwono.

¹⁷ Aki toruda'ai ensel pwol kuujo toollu muunyu toru da'mduke kwononyugono. Ensel su tool yiuwi'noka dokato tooro sulugumdo tovi muunyu kuunodo kai'muu plokavla'mdopure su toorai guureji aro kuudokaikono. “Kevu dobiloo. Gooti toolluro lubullu doto bwotonyo puruv me'no sovrowosadopiko tovi yanpino'moneyokwe kevu bi'bwo'nyulo.

¹⁸ Kevu bi'bwo'nopi a'mwo aguto kig toorogai'aro aki a'mwo mollurogudo toorai mido mollomwalokwe toorogai'aro aki a'mwo mollurogudo jurogudokwe toorogai'aro aki hoos toorogai'aro aki hoos ilomwalodupudo toorogai'aro aki yiuwi'nokai a'mwo abolo kwako akavi mwalodupudo togai'aro aki a'mwo ki'nato womdo tovida'ai me'no birolo'nugolokwodupudo togai'aro aki ki'nato womdo tovi kuuno yodupudo togai'aro aki a'mwo yovomaiyokwe toorogai'aro aki yovo agutokwe toorogai'aro yiuwi'nokai su tooravuro kulako tonyu nupino'moneyokwe kevu bi'bwo'nyulo.” Ensel tool dokato toorai toro kuudokaikono.

¹⁹ Su toro toga nuu ibesa'aiyo kaiya'no kuumwiyo toollu aiko te kwononyugono. Ibesa'aiyo kaiya'no kuumwiyo su tooke'aro kwako akavida'ai a'mwo aguto kig toorogai'aro aki kemoro a'mwo mollurogudo toorogai'aro tooro molo yo'moneyokwe su'bwo'noporogano. Toro tooro hoos wiya'jo toollu ilomwalodowodo tooke'aro gamoro mollurogudo toorogai'aro toorai molo wiyo'moneyokwe abi'bwo'noporogano.

²⁰ Su toro su'bwo'nopo kuvi kuruv hoos wiya'jo toollu ilomwalodowodo tool ibesa'aiyo kaiya'no kuumwiyo tooke'aro gami kuunano proofet tooke'aro toorallu agalomworarokaikono. Kuunano proofet su tool ibesa'aiyo kaiya'no kuumwiyo su toolluro sumdo tovi duuwallo jurogudo ton me'no kuuduuwallunokaikono. Gamoro duuwallo jurogudo kuuduuwallunoka su tovi'aro a'mwo abolo akanyu me'no amolloguulludapiyokaikono. Yiuwi'nokai a'mwo abolo ibesa'aiyo kaiya'no kuumwiyo su toolbusuko kula'noka sokwolludapingiko toollu ilomoropiyodapudo togai'aro aki gamoro nojeso'moneyokwe puukwollo tovi amaropo togai'aro su tonyu amolloguulludapiyokaikono. Toro te hoos wiya'jo toollu ilomwalodowodo su tool ibesa'aiyo kaiya'no kuumwiyo tooke'aro kuunano proofet tooke'aro su toorallu galomwora'no sumaiyokwe yere mabolodole toorallu du'muudo puruv wonyo buugo to'busuko sovomwollosungiko tovi kwolomogalowopiyokarakono. Du'muudo su tov dukworokakwe salfa sulo togai nugovla'mdowodokwono. Su toro tomuu ibesa'aiyo kaiya'no kuumwiyo tooke'aro gami kuunano proofet tooke'aro toorallu kwolomogalowopiyokarakono.

²¹ Aki toro tooralluro yiuwi'nokai a'mwo mollurogudo toorai a'mwo hoos wiya'jo toollu ilomwalodowodo su tool gamoro mago tovida'ai molo'mo kwallu'mopto do'nyo do'nyo lokabodowodo touke aromiyosokaikono. Toro aromiyosoka su tooravuro kulako abolopo ton yiuwi'nokai dokato tooro nyuno nyuno sumaveyokwe anyuto'noporogano.