Adodolukuu'nosungiko 18 - Gooti Toolluro Yogalokwono

Wagwolago Bebeloon tovi kaiyako mollounapiyono tovinokwono

¹ Su toro tovi me'no wonyuno sumoneyokwe aki nuu ensel gabovo pwol jurogudo kuunodokwe toollu kwononyugono. Toro tool Gooti toolluro ago muunyu kai'muuda'ai wolabino sumaiyokwe gamoro bako bwotonyo pwopiyodowodo tov kwako akavi yiuwi'nokai tomuu aluvomdolomarokakwono.

² Toro toollu muugona'dore toga ensel su tool deko guureji aro adelowo'narokaikono. “Oo wagwolago aguto Bebeloon tov nobwolollo'mo wobo togakono. Wagwolago su tovi mourodukwopiyodowo'jure toga kuvinono nobwolorawonokwono. Wagwolago su tov kuullo ma'no ma'nodo tooravuro ago me'no wimo'nodowodokwono. Aki yiuwi'nokai kuullo kaiya'nodo tooro wagwolago su to kuvi kuulomwalodupudorogano. Aki yiuwi'nokai dokato kaiya'nodo kworo kuruv wagwolago su tovi kuulomwalodupudorogano. Aki yiuwi'nokai ibesa'aiyo kaiya'nodo kworo kuruv wagwolago su tovi kuulomwalodupudorogano. Su toro tooro kwoda'mollunyo kuumwiyorogano.

³ Toro te wagwolago Bebeloon su tov kaiyako yiunokuudo nowo'dolopiyonokwono. Su tov aro tovinokwono. Wagwolago su tovuro a'mwo abolo ton Gooti toollu buulo uugunyumopiyodupudo su tov kwonyalo pasudo to'busuko yodupudogano. Aki toro ton yiuwi'nokai kantri go'no go'nodo tomuu mwalodupudo tonyu kwonyalo pasudo su tovi wuuduuwallodupudogano. Su toro wuuduuwallodupudo tov wain wonyo to'busuko wiyodupudogano. Toro te yiuwi'nokai kantri tomuuda'ai mwalodupudo ton wain wonyo bwotonyo nopi amomo to'busuko yodupudogano. Toro te yiuwi'nokai kwako akavida'ai a'mwo aguto kig tooro wagwolago su tokwe kwonyalo to'busuko me'no yomollodupudorogano. Aki wagwolago Bebeloonda'ai a'mwo abolo su tonyuro kwonyalo pasudo kiroungovla'mdupudo tovida'ai nuugwiyo bwotonyo ma'dupudogano. Toro te yiuwi'nokai kwako akavida'ai a'mwo bisnis womdokwe kworo kuruv Bebeloonda'ai tonyu buuguro'mwonyodupu avaiwomdo mujumovla'mdupudogano. Su toro mujumovla'mdopure tovida'ai nuugwiyo bwotonyago ki'noma'dupudogano.” Ensel tool su toro doduke tovi kuu'nonyugono.

⁴ Toruda'ai nuu yogaimaguurai puruv muunyu kai'muuda'ai ilodopiyaboduke tovi kuu'nonyugono. Yogaimaguurai su tov aro adokakwono. “Oo moro a'mwo abolo togaikul wagwolago Bebeloon tovuro ma'no ma'no pasudo toorai nuumjunpiyokwe kevu buugollu'mokalokwilo. Aro tovinokwono. Kevu wagwolago su tovuro ma'no ma'no pasudo toorai kuumjunpi tov nuu wagwolago su tovi airumwallumi toga kev kugaikullu kuruv aval'no nerekumwallumiyokwe tovinokwono.

⁵ Wagwolago su tovuro ma'no ma'no pasudo tooro womilo to'busuko youllumelno youllumelno yodowo yiuno sulugumdo tovi muunyu kai'muu ilai'mo'mdupudorogano. Ma'no ma'no pasudo su tooraino Gooti tool kuudo miyallulo'gwonodowodo tovino tov nerumwallonekono.

⁶ Toro te kevu wagwolago su tovi kirumwallo'moneyokwe aro neya jugollulo. Wagwolago su tov a'mwo abolo pubuurai kaiyako igolodowodo to'busuko kubalno kevu gami aval'nodo tomgu'aro neya jugollulo. Aki wagwolago su tov gamoro ma'no ma'no pasudo tooraino kirumwallo'mo mubiyo tov puruval tovallu neya maronokwono. Mubiyo su toval kapwo puuwasi wonyo jurogudo to'busuko me'no amolla'mo'nyungikokwono. Gamoro kapwo su tovi kirumwallo'mo mubiyo su tovake anoneyokwe duuwilo.

⁷ Aki wagwolago su tov gavnokwe tovino ilomoropunyu sajukokwono. Aki gami ilaiyo igollunyo'mo pasudo tonyuno to'no kuumjungovlaiyajukokwono. Toro te gavnokweyovuro pasudo pworogai sugollajuko tomgu'aro kevu danyu'nyuwuulo toorogai aval'no duubweyulo. Aki kumdaillo yo'moneyokwe tabunyuwuulo kugai'aro ton neya duubweyulo. Wagwolago su tov gami poowokalago tokwe aro ilomodomoropinodawodokwono. “Oo nuu abekanyo pubuulbusuko mimo'nodumdo'migono. Toro ku'mi kuruv nuu abolo aguto kwin tobalbusuko to'mi nuvnokweyo'muro sia kwin toru ilomwalodumde'gono. Toro to'mi kumdaillo yo'moneyokwe tabunyuwuulo tooro mama'mwalme'gono.” Wagwolago su tov toro ilomodomoropinodawodokwono.

⁸ Toro tovino tov wagwolago su tovi iruko pullugwoji yiuwi'nokai kirumwallo'moneyokwe tabunyuwuulo akan nomaronokwono. Bolnodo tokwe'aro kumdaillo yo'moneyokwe tabunyuwuulo togai'aro muju'wuulo tokwe'aro ton nomaronokwono. Aki toro tovi duko tov yiunokuudo nomonosonokwono. Gooti Aguto tool wagwolago Bebeloonda'ai a'mwo abolo su tonyu jainyubworonekono. Toro ajainyubworo'ji su tool jurogudo kuunodokwe toolluno tov a'mwo abolo su tonyu kuvinono nerumwallonekono.”

⁹ Aki kwako akavida'ai a'mwo aguto kig tooro wagwolago Bebeloonda'ai tovuro kwonyalo pasudo toorogai'aro noonyumwonyu ilaiyo igollunyo'mo pasudo toorogai'aro su tooraino to'no kiroungovla'mdupudorogano. A'mwo aguto kig su tooro wagwolago su tovida'ai mwalodupudo togai aval'no mujeroungovla'mdupudorogano. Toro te a'mwo aguto kig su tooro wagwolago tov duko me'no anopiyo'ji tovida'ai juto bilodowo'jure tovi wonopi kumdaillo mujumoulapinorogano.

¹⁰ A'mwo aguto kig su tooro wagwolago tovuro danyu'nyuwuulo bwotonyo su to'busuko nomara'jokwe luko yopi manyu tomuuda'ai muugonorabupinorogano. Su toro muugonorabopi toga aro dupinorogano. “Aiyoo, wagwolago aguto Bebeloonda'ai togaikul jurogudo kugaikul kuruv kemi kirekumwallo tov ama'mwakovoo. Aiyoo! Kemi yiuwi'nokai kirekumwallo ton yiuno kuujo sumdo pullugwonodo akallugwoji avalo toga ama'mwakovoo.” Dupinorogano.

¹¹ Aki yiuwi'nokai kwako akavida'ai a'mwo bisnis womdokwe tooro aro kuudo yaupinorogano. Oo aga'no'gwowi nemoro kuto ivito tonyu aki aiko te biyonekumallo'mo a'mwo pwolnodo kwol kuruv nonagutomuudeyo. Su toro kuudo yauropi toga kanyu tekwojobusuko kumdato jumwalpinorogano.

¹² Kumdato ajupi toga aro dupinorogano. “Oo nemoro kuto ivito sugumaluko go'no go'nodo akanyu aki aiko te manekubipinonogano. Nemoro gool togai'aro silva togai'aro sulo sugumaluko tollovogai'aro soolwara tovida'ai sulo sugumaluko tollovogai'aro youro sugumaluko tousogai'aro youro kwallujo tousogai'aro youro muja'jo tousogai'aro youro auloka nuugwiyo bwotonyo biyoma'dupudo tousogai'aro aki noonyumwonyu pun wobeya sudo kuunyokwe iko tovida'ai sakwollungiko togai'aro aki noonyumwonyu pun elefan mago tokwe sakwollungiko togai'aro aki noonyumwonyu pun iko tovida'ai sakwollungiko tonyu nuugwiyo bwotonyo biyoma'dupudo togai'aro aki aiyon togai'aro aiyon sallukwa'jo togai'aro sulo padopado'jokwe sugumaluko togai'aro tonyu abiyonekumallajuporogano.

¹³ Aki pauda puruv sunamoonovo dodupudo togai'aro wobeya sudo kuunyokwe pauda togai'aro aki duko nosodowo'jure tovida'ai wobeya sudo kuunyokwe pauda togai'aro wobeya sudo kuunyokwe wel mur dodupudo togai'aro wobeya sudo kuunyokwe i'mujako frenkinsensovo dodupudo togai'aro wain wonyo togai'aro oolip munyupto togai'aro flauwa sugudo togai'aro wit sulo togai'aro buulmokau toorogai'aro sipsip toorogai'aro hoos toorogai'aro hoos mokavlaptokwe karis togai'aro aki ki'nato womdo yo'moneyokwe a'mwo abolo togai'aro yiuwi'nokai su tonyu abiyonekumallajuporogano.”

¹⁴ Aki a'mwo bisnis womdokwe su tooro aro dupinorogano. “Oo wagwolago Bebeloon. Guu kuto ivito sugumaluko su tonyuno gumi poowokalago togai kalo buuropino agujunyajuko kuvi kuruv aga'no'gwowi yiuwi'nokai su ton gumi me'no agugollu'mo'mapogano. Gumoro yiuwi'nokai sugumaluko su tollovogai'aro nyovaisu'nyo'moneyokwe sugumaluko togai'aro ton gumi me'no gugollu'mo'mdupu yiunokuudo sounopimapogano. Yiunokuudo sounopimapo su tonyu guu aki aiko te ku'nono mama'bino'guugono. Aki aiko te mama'bino su tov yiunokuudo wo'mwalonokwono.” Adoporogano.

¹⁵ Toro te a'mwo bisnis womdokwe su tooravuro yiuwi'nokai kuto ivito su tonyu wagwolago Bebeloon tov abiyomallajukogano. Su toro biyoma'duke tovida'ai a'mwo bisnis womdokwe tooro nuugwiyo bwotonyo ma'dupu kuto ivito nuugwiyo bwotonyagokwe sumo'nyajuporogano. Toro tooro wagwolago su tovuro danyu'nyuwuulo bwotonyo to'busuko nomara'jokwe luko yopi manyu tomuuda'ai muugonorabupinorogano. Toro tooro kanyu tekwojobusuko kumdaillo aro dumwalpinorogano.

¹⁶ “Aiyoo, aiyoo, wagwolago aguto Bebeloon tov kirumwallo bwotonyo tovi ama'maiyoo. Wagwolago su tov youro kwallujo sugumaluko tousogai'aro youro muja'jo tousogai'aro tousogai mollosodowodokwono. Aki gool togai'aro sulo sugumaluko nuugwiyo bwotonyo biyoma'dupudo tollovogai'aro aki soolwara tovida'ai sulo sugumaluko pullovo nuugwiyo bwotonyo biyoma'dupudo tollovogai'aro su togai yovaisu'nodowodokwono.

¹⁷ Toro kuvi kuruv aga'no'gwowi kuujo sumdo yiuno pullugwonodo tollugwoji wagwolago su tovuro yiuwi'nokai noonyumwonyu kuto ivito ton kaiyako me'no su'nopimapogano.” Dupinorogano. Aki su toro toga kuto ivito mokavlaptokwe sip tooraida'ai a'mwo aguto gunyukullokwe toorogai'aro sip tovi womdokwe toorogai'aro aki yiuwi'nokai bisnis womdokwe a'mwo abolo sip toollu sulomwalpi togai'aro ton manyu tomuuda'ai wagwolago su tovi muugonorabupinogano.

¹⁸ A'mwo abolo su ton wagwolago Bebeloon tov duko anoso'ji tovida'ai juto bilodowo'jure tovi muugonorabopi deko aro dupinogano. “Oo wagwolago puru'monodo kuruv wagwolago aguto Bebeloon su tovi ku'nono muuwolo'mdowodokwono. Wagwolago su to'busuko puruv nonagutomuugonoo.” Dupinogano.

¹⁹ Aki toro ton kumdo dopi kemoro kalo kwinpi tovino duuwallo'moneyokwe tov kemi mido tonyu kwagupto togai luvobwosu'napinogano. Aki deko aro dupinogano. “Aiyoo, aiyoo, wagwolago aguto Bebeloon tov kirumwallo bwotonyo tovi ama'maiyoo. Yiuwi'nokai sip toorai mollomwalokwe tooro wagwolago su tovuro kuto ivito ton soolwara tovi'aro mokabino mokwino yodupudo tovida'ai nuugwiyo bwotonyagokwe imo'nodupudorogano. Toro kuvi kuruv kuujo sumdo yiuno pullugwonodo tollugwoji wagwolago su tovuro yiuwi'nokai kuto ivito nuugwiyo ton kaiyako me'no su'nopimapoganoo.” Dupinogano.

²⁰ Toro kuvi kuruv muunyu kai'muuda'ai yogaimaguurai puruv aro adokakwono. “Kevu sulugumdo muunyu kai'muuda'ai togaikike'aro Gooti toolluro a'mwo abolo togaikike'aro Jisasolluro kuurotokwe toorekike'aro proofet toorekike'aro yiuwi'nokai su togaikul wagwolago Bebeloon su tovi kwimo'nadopiko tovino kemi poowokalago togai ilaiyo domjumouloulo. Aro tovinokwono. Wagwolago su tov kemi kaiyako yaikullugolodowodo tovino kirumwallo'mo mubiyo tov Gooti tool kuubwemwallo. Toro tovino tov kevu ilaiyo jogaulo.” Adokakwono.

²¹ Aki toruda'ai ensel jurogudo pwol sulo bwotonyo pwollu bomokailno sumaiyokwe soolwara tovi kwolomowopiyokaikono. Sulo su tool wit sulo gurojodupudo sulo bwotonyo pwolbusukekono. Toro toollu wolomowopino sumaiyokwe aro adokaikono. “Sulo kwolomowopimo su toolbusuko kubalno wagwolago aguto Bebeloon tovi yere noolomogalowopiyawonokwono. Me'no kwolomogalowopiyawo'ji toga wagwolago su tov yiunokuudo sovlawo'ji tovi a'mwo abolo ton aki aiko te mwonpinokwono.

²² Aki wagwolago su tovi anakuuto tomuuda'ai dato ton aki aiko te yiunokuudo muu'nugovla'mwalpinogano. Gita tonbusuko harpovo dodupudo togai'aro dato daillo'moneyokwe togai'aro kuburoureyo to'busuko togai'aro biugel togai'aro yiuwi'nokai su tonyuro dato ton wagwolago su tov aki aiko te muu'nugovla'mwalpinogano. Aki a'mwo pi'mwo kuudokwe tooro yiuwi'nokai womdo judo'no judo'nodo tonyu yo'moneyokwe wagwolago su tovi aki aiko te yiunokuudo maulapinorogano. Aki wit sulo tollovai gurojodupudo tovuro deko ki'nugovla'mdowo'jure tonyu wagwolago su tov aki aiko te yiunokuudo muu'nugovla'mwalpinogano.

²³ Aki lamwo tovuro bako tov wagwolago su tovi anakuuto tomuu aki aiko te yiunokuudo mawopimwalonokwono. Aki a'mwo kwolabolo muudu'no yoma'nodubulo piyaulluro yogaimaguurai ilaiyo tov wagwolago su tovi akuuto tomuu aki aiko te yiunokuudo muu'nugovla'mwalpinokwono. Wagwolago su tov kirumwallo'mo bwotonyo marono su tov aro tovinokwono. Wagwolago su tovuro a'mwo bisnis womdokwe tooro yiuwi'nokai kwako akavi mwalodupudo gabovo toorai uuwolo'mdupudorogano. Toro tooro a'mwo abolo kwako akavi mwalodupudo tonyuro sumdo tovi yovo agutokwe imo'nodupudorogano. Aki wagwolago su tovuro bulapto to'busuko tov yiuwi'nokai kantri go'no go'nodo tomuu mwalodupudo tonyu molloguulludapiyodowodokwono.

²⁴ Aki wagwolago su tov proofet toorogai'aro Gooti toolluro a'mwo abolo togai'aro tonyu aromiyosajukokwono. Aki yiuwi'nokai kwako akavuro go'no go'nodo tomuuda'ai a'mwo abolo bwotonyago kunyu kuruv aromiyosajukokwono. Toro aromiyosajuko su tonyuro mujako tovuro jul'nyo tov wagwolago su to kuvi kuuwoso.”