Adodolukuu'nosungiko 17 - Gooti Toolluro Yogalokwono

Kwonyalo abolo tokwe'aro ibesa'aiyo kaiya'no kuumwiyo tooke'aro tovallunokwono

¹ Toruda'ai 7-pela ensel tooro wain wonyo surosungikokwe dis tonyu amworallajupo su tooravuro pwol miyomno bino sumaiyokwe aro anyudokaikono. “Guu bo'bi nuuge avlawolo. Toro plavowosi nuu gumi aro tovino guduuwallumo'mokwono. Kwonyalo abolo puruv wonyo bwotonyago tonyu muunyu tomuu mwalodowodokwono. Gooti tool kwonyalo abolo su tovi nerumwallodowo'jure tovino guduuwallumo'mokwono.” Anyudokaikono.

² Toro juno sumaiyokwe aki aro anyudokaikono. “Kwako akavida'ai a'mwo aguto kig tooro abolo su tokwe kwonyalo yodupudorogano. Aki abolo su tovuro kwonyalpasudo yodowodo su toorai yiuwi'nokai a'mwo abolo kwako akavi mwalodupudo kun kuruv wain wonyo to'busuko bwotonyago nodupu amomo imovla'mdupudogano.” Anyudokaikono.

³ Toro te Gooti toolluro Kuullo tool mollubworonumokavla'mduke tovi uumjunodore toonyu ensel tool kwako yalukullo kuu'maiyo tomuuno amogaibworonumokavlavokanyugono. Toro mogaibworonumokavla'mno sumaiyokwe nuu abolo puvi kwononyugono. Abolo su tov ibesa'aiyo kaiya'no kuumwiyo pwollu muunyu toru ilomwaloduke tovi kwononyugono. Ibesa'aiyo kaiya'no kuumwiyo su tool muja'jekono. Toro toolluro kulako tovi Gooti toolluno bwolomorumwogapiyo'moneyokwe burolyovo pun aiyowomno sokwollo'mowopingikekono. Aki toro tool 7-pela mido toorogai'aro atousal koomwo toorogai'aro kurukwekono.

⁴ Toro te abolo tov ibesa'aiyo kaiya'no kuumwiyo su toollu muunyu toru ilomwalno sumaiyokwe youro kwabi'muullujo togai'aro muja'jo togai'aro sullosomwalokakwono. Aki gool tovida'ai mabidoga sugumaluko sakwollungiko togai'aro sulo nuugwiyo bwotonyo tokwe abiyoma'nyungiko tollovogai'aro aki soolwara tovida'ai sulo pullovo nuugwiyo bwotonyo tokwe biyoma'dupudo tollovogai'aro togai arubiyomwalokakwono. Abolo su tov gami ato tokwe gool tovida'ai kapwo sakwollungiko puuwa amworarokakwono. Kapwo su towasi wonyo tov yiuno muju tovino sutowosungikokwono. Wonyo surosungiko su tov aro tonyuno yovekurajo'mokwono. Abolo su tovuro kwoda'mollunyo pasudo toorogai'aro aki gamoro kwonyalo pasudo kaiyako igolamo'nyokwe toorogai'aro su tooraino yovekurajo'mokwono.

⁵ Aki abolo su tovuro yomo tovi yovo puruv sokwollosungikokwono. Yovo su tovino kavlo tov yiulo apuu'nallajukokwono. Yovo su tov arokwono. “Mino yovo tov wagwolago aguto Bebeloonoveyo'migono. Toro to'mi kwako akavida'ai kwonyalo abolo tonyu kuuneyago'migono. Aki yiuwi'nokai kwako akavida'ai kwoda'mollunyo pasudo toorai kuuneyago'migono.” Sakwollungikokwono.

⁶ Abolo su tov aro yoduke tovi souromuugonaronyugono. Gooti toolluro a'mwo abolo pubuuro Jisasolluno kuu'maiyo dodowiyoku'bworosodopure tobuurai aromiyosajukokwono. Toro aromiyosajuko tonyuro mujako tov anokakwono. Toro nyuno sumaiyokwe amomo sokakwono. Toro yoduke tovi wonyuno sumoneyokwe nuu mollolokurosi bwotonyo sonyugono.

⁷ Toro yodore toonyu ensel tool anyudokaikono. “Guu mollolokurosi mibinono. Abolo su tokwe'aro ibesa'aiyo kaiya'no kuumwiyo sulomwalluko su tooke'aro tovalluno kavlo tov yiulo sumo'nyajukokwono. Ibesa'aiyo kaiya'no kuumwiyo su tool 7-pela mido togai'aro atousal koomwo togai'aro kurukwekono. Toro tovalluno kavlo tov yiulo sumo'nyajuko tovino gudumo'mokwono.

⁸ Ibesa'aiyo kaiya'no kuumwiyo kwonmodo su tool aiyoga amwallajuko kwol kuruv aga'no'gwowi mamwallo. Toro kwol kuruv wobo toga kuuraibuuso puruv daneyajokwe tovida'ai nyulabiyo'mo sadopiyo. Toro sulabwo'ji su toollu Gooti tool kaiyako yiunokuudo mollounapiyo'moneyokwe du'muudo tovi noolomovodukwopiyawonekono. Toro te ibesa'aiyo kaiya'no kuumwiyo tool sulabwo'ji toga a'mwo abolo ton luko morumoukuropipinogano. A'mwo abolo su ton aiyoga kwako akav yere mimo'nyoduke togada'ai kemi yovo ton Buukiyo Aiyo Yiunokuudo Mujomwekovlaiyo'moneyokwe tovi miyokwollosungikogano. Toro tonyuro luko morumoukuropipino tov aro tovinokwono. Sumdomgu ibesa'aiyo kaiya'no kuumwiyo amwallajuko su tool aga mamwallo. Toro kwol kuruv lukomgu kuuraibuuso daneyajokwe tovida'ai aki aiko te nobillalo'nonekono. Su toro tovino luko morumoukuropipinogano.

⁹ Toro te a'mwo pwol ibesa'aiyo kaiya'no kuumwiyo su toolluno kuudo youromallo'mo kwino'ji tool pi'mwo kuudo tokwe neya youromarono. Ibesa'aiyo toolluro 7-pela mido tobuul 7-pela muumuudo pworaino duuwallo'morogano. Muumuudo su toorai muunyu toru abolo tov ilomwalodowodokwono.

¹⁰ Aki ibesa'aiyo kaiya'no kuumwiyo su toolluro 7-pela mido avalo su tobuul 7-pela a'mwo aguto kig pworaino duuwallo'morogano. 7-pela a'mwo aguto kig su tooraida'ai atobuul tooro me'no aboloporogano. Aki 7-pela su tooraida'ai a'mwo aguto kig naba 6 tool aga kuuno amwallo. Aki 7-pela a'mwo aguto kig su tooraida'ai naba 7 tool lukomgu nobwonekono. Toro abwo'ji su tool yiuno kula'nyo toga'gwono mido mollomwalowo'ji gamoro mido mollomwalo tov yere nyumwogapiyonokwono.

¹¹ Aki Ibesa'aiyo kaiya'no kuumwiyo toolluno kuudo neya jaullulo. Su tool aiyoga amwallajuko kwol kuruv aga'no'gwowi mamwallo. Ibesa'aiyo kaiya'no kuumwiyo su tool 7-pela a'mwo aguto kig sumdomguda'ai tooraida'ai bwonekono. Toro abwo'ji su tool naba 8 toolbusuko imo'nonekono. Toro tool lukomgu kaiyako i'nallo'moneyokwe tomuuno plawonekono.

¹² Aki ibesa'aiyo kaiya'no kuumwiyo toolluro atousal koomwo tooro a'mwo aguto kig atousal gabovo pworaino duuwallo'morogano. A'mwo aguto kig su tooro kemoro mido mollomwallo'moneyokwe jurogudo tov yere mama'mwakoporogano. Kemoro mido mollomwallo'moneyokwe jurogudo su tov kuvinono me'no amapi toga ibesa'aiyo kaiya'no kuumwiyo tooke aval'no mido mollomwalpinorogano. Toro kworo kuruv yiuno kuujo sumdo pullugwonodo toga'gwono mollomwalopi kemoro mido mollomwallo'mo jurogudo su tov yere nuugollu'mowonokwono.

¹³ Yiuwi'nokai a'mwo aguto kig atousal su tooro kuudo aval'no wosopi aro domdukuurusupinorogano. “Nevu pwolno pwolnodo toonolluro jurogudo togai'aro nemoro aguto kig mido mollomwalodowado togai'aro ton ibesa'aiyo kaiya'no kuumwiyo toolluro ato tovi neya amorubweyano.” Su toro adomdukuurosupi tovi kuvinono uumjunpinorogano.

¹⁴ A'mwo aguto kig atousal su tooro Sipsip Muugunyo toollu molo nuuwipinorogano. Toro kwipi kworai kuruv Sipsip Muugunyo su toolno'gwowi nuuwolowonekono. Su tov aro tovinokwono. Sipsip Muugunyo su tool yiuwi'nokai a'mwo aguto toorai kemi Aguto kuunodo wimo'nodowodekono. Aki yiuwi'nokai a'mwo aguto kig toorai kemi Aguto Kig kuunodo wimo'nodowodekono. Toro toolluno tov a'mwo aguto kig atousal molo kwipi su toorai nuuwolowonekono. Toro kuuwolowo'ji toga gamoro a'mwo abolo ton kweke mwalpinogano. A'mwo abolo su tonyu me'no doma'no sumaiyokwe gamiyo'moneyokwe ajesokagano. Aki a'mwo abolo su ton Sipsip Muugunyo su toollu pi'mwono uumjunodupudogano. Toro ton kweke nomwalpinogano.” Ensel tool toro anyudokaikono.

¹⁵ Aki toruda'ai ensel tool aro anyudokaikono. “Kwonyalo abolo su tov wonyo aguto tonyu ilomwaloduke kwonmodo su tov aro tovino duuwallo'mogano. Yiuwi'nokai a'mwo abolo go'no go'nodo togai'aro judo'no judo'no kula'nokakwe togai'aro kantri go'no go'nodo togai'aro yogaljo go'no go'nodo dodupudo togai'aro yiuwi'nokai a'mwo abolo su toro tonyuno duuwallo'mogano.

¹⁶ Aki ibesa'aiyo kaiya'no kuumwiyo muja'jo tooke'aro aki atousal koomwo toorogai'aro tooro kwonyalo abolo su tovino surodo bwotonyo wuunodupudorogano. Toro tooro abolo tovi kaiyako igolmovlavopi abolo tov muukanyulmaiyo to'busuko imo'nonokwono. Aki a'mwo aguto kig su tooro kuulludaiyo pworobusuko abolo su tovuro kulako tovida'ai muugupto ton nodovollu'mulonopipinorogano. Aki abolo su tovuro muugupto pun anugollu'mopi tonyu duko tovi monoso'moneyokwe nomolluroudapipinokwono.

¹⁷ Su toro ipino tov aro tovinokwono. Gooti tool toro tooravuro kuudo tonyu mollubworomokavla'mdowo'jure tovi uumjunopi Gooti toolluro kuudo tovida'ai imo'noneyokweyo'mo kuvinono nyumo'nonokwono. Toro te kuvinono imo'nyo'moneyokwe a'mwo aguto kig atousal su tooro kemoro mido mollomwalo jurogudo ton ibesa'aiyo kaiya'no kuumwiyo toollu wipinorogano. Su toro tomgu'aro Gooti toolluro yogalo tovi suuwiyo kuvinono imwojonokwono.

¹⁸ Aki kwonyalo abolo su tov aro tovino duuwallo'mokwono. Wagwolago kirovanyuvanyu kuumwiyo tovino duuwallo'mokwono. Wagwolago su tov kwako akavida'ai a'mwo aguto kig toorai mido mollomwalodowodokwono.”