Adodolukuu'nosungiko 16 - Gooti Toolluro Yogalokwono

Gooti toolluro suroulokwe 7-pela dis tonyuda'ai aimowosopo tovinokwono

¹ Toruda'ai nuu yogaimaguurai guureji puruv muunyu kai'muu Gooti toollu ilomoropiyo'moneyokwe ago tovi anakuuto tomuuda'ai bilodopiyoduke tovi kuu'nonyugono. Yogaimaguurai su tov 7-pela ensel tabunyuwuulo mwora'dopure toorai aro kuudokakwono. “Kevu plavopi kwako tovi yiuwi'nokai tomuu Gooti toolluro surodo tovino wuuduuwallo'moneyokwe dis tovida'ai wain wonyo surosungiko su tonyu demowapilo.” Kuudokakwono.

² Toro kuudoka tovi ensel naba 1 tool plaino sumaiyokwe kwako tovi gamoro dis tovida'ai wain wonyo surosungiko tov aimowapiyokaikono. Toro aimowapiyoka toga a'mwo abolo ibesa'aiyo kaiya'no kuumwiyo toolbusuko kula'noka sokwolludapingiko toollu ilomoropiyodapu gamoro nojeso'moneyokwe puukwollo tovi me'no ama'nyungopo ton dado'mo sokwovanyo kaiya'no kuumwiyo tooro amaropogano.

³ Aki ensel naba 2 tool gamoro dis tovida'ai wain wonyo surosungiko tov soolwara tovi aimowapiyokaikono. Toro kimowapino sumaiyokwe soolwara tov a'mwo bwiyo pwolluro muja'buugo to'busuko sumo'nokakwono. Toro imo'noduke toga yiuwi'nokai soolwara tovi anakuuto tomuuda'ai aiyo mwalodupudo tooro abolopiyoporogano.

⁴ Aki ensel naba 3 tool gamoro dis tovida'ai wain wonyo surosungiko tov wonyo togai'aro wonyo sumdo ilowilovabodupudo togai'aro tonyu aimowapiyokaikono. Toro kimowapino sumaiyokwe wonyo su ton mujako sumo'nopogano.

⁵ Toro imo'nyuno sumaveyokwe nuu ensel pwol yiuwi'nokai wonyo tonyu mollomwalodowodo toollu kwononyugono. Toro toolluro deko tov aro doduke tovi kuu'nonyugono. “Oo Gooti sugumaluko to'nodo tooku aiyoga yiuwi'nokai toga amjomwekelabiyajudekugono. Toro tooku aga kuga kuruv kuuno mujomwekovla'mdumdekugono. Guu a'mwo abolo kaiya'no kuumwiyo tonyu kirumwallo'moneyokwe tabunyuwuulo amorapimado su tov yiuno sugudo to'no sumodekugono.

⁶ Sugudo sumodo su tov aro tovinokwono. Kwako akavida'ai a'mwo abolo kaiya'no kuumwiyo mwalodupudo su ton guvnokwekujuro a'mwo abolo tobuurogai'aro gumoro proofet toorogai'aro tobuurai aromiyosopogano. Su toro aromiyosopo tovida'ai kemoro mujako ton abwoloorokakwono. Toro tovino tov a'mwo abolo kaiya'no kuumwiyo su ton mujako neya nupino'moneyokwe guu mujakokwe wonyo tov kwimodekugono. Kemi kirumwallo'moneyokwe mubiyo tov kuvi kuuno ama'mapokwono.” Kuudokaikono.

⁷ Toro wuujuno sumaiyokwe aki yogaimaguurai puruv Gooti toollu romiroudapiyo'mo dukwagupto tomuuda'ai aro doduke tovi kuu'nonyugono. “Oo nebalokwono. Gooti Aguto tooku Jurogudo Kuunodekugono. Toro tooku a'mwo abolo kaiya'no kuumwiyo tonyu yiuno nebal'nodo tomgu'aro kirumwallodumdekugono. Aki toro tonyu yiuno sugudo tomgu'aro to'no kirumwallodumdekugono.” Toro doduke tovi kuu'nonyugono.

⁸ Aki ensel naba 4 tool gamoro dis tovida'ai wain wonyo surosungiko tov kuujo toollu aimowosokaikono. Toro kimowosuno sumaiyokwe kuujo toolluro dukuullo tov a'mwo abolo tonyu abekuromarokakwono. Kuujo toolluro dukuullo su tovi Gooti tool muumjukurokaikono. Toro te kuujo toolluro dukuullo bwotonyo su tov a'mwo abolo tonyu abekuromarokakwono.

⁹ Toro bekuroma'duke kuvi kuruv a'mwo abolo su ton Gooti toollomno kuudo youragunyumo'nyo'mo mwinyajupogano. Aki tabunyuwuulo su tonyu moropiyabiyo'moneyokwe jurogudo tov yiuno Gooti toollu uuwo'duke kuvi kuruv a'mwo abolo ton Gooti su toolluno yovo aguto mwiyajupekono. Aki gamino yovo tovi bwolomorumwogapiyo'moneyokwe kaiya'no yogalo dodupu kemi ma'no ma'nodo pasudo toorai kuuno kuumjungovlaiyajupogano.

¹⁰ Toruda'ai aki ensel naba 5 tool gamoro dis tovida'ai wain wonyo surosungiko tov ibesa'aiyo kaiya'no kuumwiyo toolluro sia kig toru aimowosokaikono. Toro kimowosuno sumaiyokwe ibesa'aiyo kaiya'no kuumwiyo su toolluro mido mollomwalodowodo yiuwi'nokai tomuu dugumwuulo aimwonyokakwono. Toro kimwonyopino sumaiyokwe yiuwi'nokai a'mwo abolo ibesa'aiyo kaiya'no kuumwiyo su toolluro mido mollomwalo tovi dolago tomuu mwalodupudo ton danyu'nyuwuulo tovi ibwosunyuno sumaveyokwe kemi kwavlolo tonyu tuko adovosuku'nallajupogano.

¹¹ Aki danyu'nyuwuulo toorogai'aro sokwovanyo toorogai'aro toorai me'no amaropo tovino tov Gooti muunyu kai'muuda'ai toolluno bwolomorumwogapiyo'moneyokwe kaiya'no yogalo to'no ajajupogano. A'mwo abolo su ton kemi ma'no ma'no pasudo toorai buulo muugunyumopiyajupogano.

¹² Toruda'ai aki ensel naba 6 tool gamoro dis tovida'ai wain wonyo surosungiko tov wonyo bwotonyo Yiufretisovi aimowosokaikono. Su toro kimowosuno sumaiyokwe wonyo bwotonyo su tov yaluko amelopiyokakwono. Wonyo su tov yaluko amelopiyoka tov aro tovino puuto kuusubweyo'mokwono. Kuujo sulopiyamoka is tomuuda'ai a'mwo aguto kig toorogai'aro kemi mollurogudo toorogai'aro tooro abupi toorai wonyo su tov nuumjukuro'jokwe yaluko amelopiyokakwono.

¹³ Su toro kilopiyoduke toga nuu kuullo ma'no ma'nodo pworapwol pworo nabuulo toorobusuko toorai kwononyugono. Kuullo ma'no ma'nodo su tooravuro pwol ilviyo bwotonyo toolbusuko toolluro mago tovida'ai lokaboduke kwononyugono. Aki kuullo pwol ibesa'aiyo kaiya'no kuumwiyo toolluro mago tovida'ai lokaboduke toollu kwononyugono. Aki kuullo pwol kuunano proofet toolluro mago tovida'ai lokaboduke toollu kwononyugono.

¹⁴ Kuullo ma'no ma'nodo su tooro duuwallo jurogudo pun wuuduuwallunodupu aki yiuwi'nokai kwako akavida'ai a'mwo aguto kig mido mollomwalokwe tooraiyomno avlaiyajuporogano. Su toro avlaiyajupo tov aro tovino'mokwono. Gooti toollu molo wiyo'moneyokwe kuullo ma'no ma'nodo su tooro a'mwo aguto kig toorai mollu'bworoso'mo avlaiyajuporogano. Molo ipino su tov Gooti Jurogudo Kuunodo toolluro kirumwallo'mo iruko ajesoka tollugwoji bai'mowonokwono.

^15-16 Toro te kuullo ma'no ma'nodo su tooro yiuwi'nokai kwako akavida'ai a'mwo aguto kig mido mollomwalokwe toorogai'aro kemoro a'mwo mollurogudo toorogai'aro toorai amollu'bworosoporogano. Kwako amollu'bworosopo su toru'no yovo tov Hibruu yogaljo tovida'ai Amagedonovo dodupudorukono. Toruda'ai Krais Jisasol aro adokaikono. “Neya duu'nyulo. A'mwo kuuko pwol a'mwo abolo miworovoma'dopure tonyu bwiyalo'nodowodo to'busuko kubalno a'mwo abolo ton mino kuudo miyanuupinogano. Toro kuudo miyanuu'dopure toga nuu nobiyalo'numonyugono. Toro te a'mwo abolo ton muukanyulmaiyo tonbusuko wogulo'mo nyubwosunpiyokwe youro neya mollosopi sumdo kinomwalpinogano. Yiuwi'nokai a'mwo abolo mino sumdo ainmwalpi su ton kemi poowokalago togai ilaiyo nokwo ibwosunpinogano.” Adokaikono.

¹⁷ Toruda'ai ensel naba 7 tool gamoro dis tovida'ai wain wonyo surosungiko tov sulugumdo tovi aimowapiyokaikono. Toro kimowapino sumaiyokwe Gooti toollu ilomoropiyo'moneyokwe ago tovi anakuuto tomuu sia kig tov wo'dowodo toruda'ai yogaimaguurai puruv guureji aro sulodopiyabokakwono. “Me'noganoo.” Adokakwono.

¹⁸ Yogaimaguurai tov toro juno sumaiyokwe molamopto tov mdolopiyo'no yaudo yaudo tokwe'aro kuuloulo tovuro deko tokwe'aro ai'nugolokabokakwono. Aki wunyu wunyu bwotonyo puruv sokakwono. Wunyu wunyu su tov aiyoga muudo'nodo toga a'mwo abolo tonyu yokwolloso'no kwako akavi muudu'no kuumwalloka togada'ai yiuwi'nokai wunyu wunyu mujumelabodupudo tonyu kuuwolovokakwono.

¹⁹ Toro te wunyu wunyu bwotonyo su tov yoduke tovida'ai wagwolago Bebeloon tov kirowo'dolopiyo'no puruvapuruv sumo'nopogano. Aki kantri bwotonyago tonyuro wagwolago kun kuruv kaiyako yiunokuudo airowo'dolopiyopogano. Su toro toga Gooti tool wagwolago Bebeloonda'ai a'mwo abolo tonyu gamoro surodo bwotonyo tov wuuduuwallo'mo aki aiko te kuudo saurokaikono. Gooti tool su toro kuudo yau'no sumaiyokwe gamoro surodo wuunodowodo tovino wuuduuwallo'mo wain wonyo tov Bebeloonda'ai ton anupureyokwe kwiyokaikono.

²⁰ Aki su toro toga yiuwi'nokai aku'momdo soolwara tovi wo'dupudo ton yiunokuudo sounopiyopogano. Aki yiuwi'nokai muumuudo kworo kuruv ajo'mowopiyoporogano. Toro ajo'mowopiyopo tovida'ai kwako tov yiuno worato to'no sumo'nokakwono.

²¹ Aki sulugumdo tomuuda'ai ais sullumiyo bwotonyo tooro a'mwo abolo tonyu buuruko to'busuko avobuuku'noporogano. Yiuwi'nokai ais sullumiyo pwolno pwolnodo su tooravuro jul'nyo tov 50 kiloo tomgu'arorogano. Toro tooro a'mwo abolo tonyu muunyu toru abwolallajuporogano. Toro te Gooti toolluro tabunyuwuulo su tov bwotonyo kuunodo tov kuubweyokaikono. Su toro kuubweyoka tovino tov a'mwo abolo ton Gooti toollu bwolomorumwogapiyo'moneyokwe kaiya'no yogalo adopogano.