Adodolukuu'nosungiko 15 - Gooti Toolluro Yogalokwono

Ensel tooro 7-pela tabunyuwuulokwe dis togai sukolomworaropo tovinokwono

¹ Toruda'ai nuu duuwallo jurogudo puruv sulugumdo muunyu kai'muu yalo'noduke tovi kwononyugono. Duuwallo jurogudo su tov agutokwono. Aki toro yalo'noduke tovino kuudo kwolallo sourukwapiyonyugono. Toro te duuwallo su tovi 7-pela ensel tooro 7-pela tabunyuwuulo togai ikolomwora'dopure toorai kwononyugono. Tabunyuwuulo su ton aiyowo'mogano. Su tov aro tovinokwono. Gooti tool gamoro surodo bwotonyo wuunodowodo tovi wuugollu'meyo'mo tool aiyowo'mo 7-pela tabunyuwuulo su togai kirumwallonekono.

² Aki nuu soolwara buugo puruv gles tovida'ai sakwollungiko tovi kwononyugono. Wonyo buugo su tovi anakuuto tomuu widuko tov kuuloowopiyoduke tovi kwononyugono. Aki wonyo buugo su tovi wobo toru a'mwo abolo pun noda'mdopure kwononyugono. A'mwo abolo su ton ibesa'aiyo kaiya'no kuumwiyo toollu milomoropiyajupogano. Toro kun kuruv su toollu uuwoleno sumaveyokwe aki ibesa'aiyo kaiya'no kuumwiyo su to kwolbusuko kula'noka sokwolludapiyopo kwollu kuruv milomoropiyajupogano. Aki gamoro naba kuruv mamaropogano. Toro te yiuwi'nokai a'mwo abolo su ton soolwara buugo tovi wobo toru daino sumaveyokwe gita to'busuko, harpovo, dodupudo tonyu amworaropogano. Gita amworaropo su ton Gooti toolluro me'no kwiyokagano.

³ Toro togai mwora'no sumaveyokwe dato puruv adopogano. Dato su tov aiyoga Gooti toolluro womdokwe Moosesolluro ajajupokwono. Aki dato su tov Sipsip Muugunyo toollunokwono. Toro te dato tov aro adopokwono. “Oo Gooti Aguto tooku guu Jurogudo Kuunodekugono. Gumoro yiuwi'nokai womdo yodumdo ton judo pumgu'aro aguto kuunodogano. Toro tonyuno kuudo kwolallo yourukwapiyodowadonogano. Oo Gooti Aguto tooku guu yiuwi'nokai kantri tomuuda'ai a'mwo abolo mwalodupudo tonyuro aguto kig wimo'nodumdekugono. Toro tooku yiuno pasudo sugudo tokwe'aro nebal'nodo tokwe'aro tovake yomjomwekovla'mdumdekugono.

⁴ Agutoloo, guvu yiuno pwolnodo tooku judo pumgu'aro imo'nodumdekugono. Toro tookujuno tov yiuwi'nokai a'mwo abolo ton gumi dolago tomuu neya mwalopi yovo aguto agujabupuro. Gumoro sugupasudo tollovo kuu'maiyo toru'no abomollolupto'nosungiko tonyu yiuwi'nokai kantri tomuuda'ai mwalodupudo ton me'no wonopiyodupudogano. Toro tovino tov yiuwi'nokai a'mwo abolo ton gumiyomno bopi gumoro sumdollu toru ilomogwopimwolapinekugono.” Dato tov su toro adopogano.

⁵ Lukomgu nuu Gooti toollu ilomoropiyo'moneyokwe sel ago tov gamoro ago muunyu kai'muu wo'dowodo tovi kwononyugono. Sel ago su tov kuu'maiyo toru me'no ausosungiko tovi kwononyugono. Aki sel ago su tovi anakuuto tomuu Gooti toolluro pwekwapto kuunodo to'busuko tovi kwononyugono.

⁶ Toro te 7-pela ensel pworo 7-pela tabunyuwuulo togai momwora'no sumaveyokwe sel ago su tomuuda'ai amokaloboporogano. Ensel su tooro youro sugumaluko kaiya'no puru'monodo kuruv migolamo'nyungiko tousogai sesumolokaboporogano. Aki laiyo puboro gool tovida'ai sakwollungiko toborogai kemi kupolmdo toru amollosoporogano.

⁷ Su toro toorai wonyuno sumoneyokwe aiyokwe aral aral tooravuro pwol yiuwi'nokai 7-pela ensel go'no go'nodo su toorai gool tovida'ai dis sakwollungiko pun kwiyokaikono. Dis su tonyu wain tov surosungikogano. Wain su ton aro tovino yovekurajo'mokwono. Gooti aiyo yiunokuudo mujomwekovla'mdowodo su toolluro surodo bwotonyo wuunodowodo tovino yovekurajo'mokwono.

⁸ Aki Gooti toollu ilomoropiyo'moneyokwe ago tovi juto tov aiyowomno aullo'mowopiyokakwono. Juto su tov Gooti toolluro bako bwotonyo tokwe'aro gamoro jurogudo tokwe'aro tovalluda'aiyokwono. Juto su tov kuullo'mowopiyoduke toga a'mwo pwolnodo kwol kuruv Gooti toolluro ilomoropiyo'moneyokwe ago su tovi yere maulokaikono. Toro kuvi kuruv yiuno 7-pela ensel tooro yiuwi'nokai 7-pela tabunyuwuulo su ton me'no aimowopiyopo toga'no'gwowi Gooti toolluro ilomoropiyo'moneyokwe ago su tovi nokwo aulapokwono.