Adodolukuu'nosungiko 14 - Gooti Toolluro Yogalokwono

144,000 a'mwo pworo Sipsip Muugunyo tooke davo'mno dato muuduko puruv adomwalopo tovinokwono

¹ Toruda'ai nuu Sipsip Muugunyo tool muumuudo Saiyoon toollu muunyu toru da'mduke kwononyugono. Aki 144,000 a'mwo tooro kweke avalo toru da'mdopure toorai kwononyugono. A'mwo su tooravuro yomo tonyu Sipsip Muugunyo toolluro yovo tokwe'aro gami Ganumiyago toolluro yovo tokwe'aro toval me'no sokwollubwengikorogano.

² Toro toorai wonyuno sumoneyokwe Gooti toolluro ago muunyu kai'muuda'ai yogaimaguurai puruv kuu'nonyugono. Yogaimaguurai su tov wonyo taulo bwotonyo tokwe'aro kuuloulo ki'nodowodo tokwe'aro tovalluro deko to'busuko tovi kuu'nonyugono. Aki yogaimaguurai su tov gita bwotonyago pun, harpovo, dodupudo tonyu avalo toga romiyodopure tovida'ai deko to'busukokwono.

³ Aki 144,000 a'mwo su tooro dato muuduko puruv adoporogano. A'mwo su tooro Gooti toolluro sia kig tovi sumdollu toru davo'mno aiyokwe aral aral toorogai'aro 24-pela a'mwono moduvomwallokwe toorogai'aro tooravuro sumdollu toru davo'mno dato muuduko tov adoporogano. Dato su tovi yiuwi'nokai a'mwo abolo yasuwa'nodo ton ku'nono madupinokwono. Toro kuvi kuruv yiuno 144,000 a'mwo su toorono'gwowi nokwo dupinokwono. Gooti tool a'mwo su toorai yiuwi'nokai a'mwo abolo kwako akavi mwalodupudo tonyu akuuto tomuuda'ai me'no abiyomarokarogano.

⁴ A'mwo su tooro abolo puru'monodo kurukwe kuruv sumwonyo miyodupudorogano. Toro tooraino tov kaiyako migolamo'nodupudorogano. Aki toro tooro Sipsip Muugunyo tool buro'nyo buro'nyomdeyo tomuu yomolloduke toollu uumjunodupudorogano. Toro toorai Gooti tool yiuwi'nokai a'mwo abolo kwako akavi mwalodupudo tonyuro akuuto tomuuda'ai me'no abiyomarokarogano. Toro abiyomaroka su tov aro tovino'mokwono. Wosa kuto sumdomguda'ai mulodupudo to'busuko kubalno a'mwo su tooro Gooti tooke'aro Sipsip Muugunyo tooke'aro tooralluro sumdomguda'ai wimo'nupino tovino'mokwono.

⁵ Toro tooro kuunano yogalo puru'monodo kuruv miyoukuu'nuudodupudorogano. Aki kirovanyuvanyu pasudo puru'monodo kuruv miyodupudorogano.

Ensel pworapwol tooravuro kuuguudo amoruudopo tovinokwono

⁶ Aki toruda'ai nuu ensel pwol muunyu kai'muu sulugumdo tovi akuuto toru'aro pla'mduke toollu kwononyugono. Ensel su tool a'mwo abolo kwako akavi mwalodupudo tonyu moruujo'moneyokwe kuuguudo sugudo tokwe amokavlavokaikono. Kuuguudo sugudo su tov yiunokuudo mujo'movla'mdowodokwono. Toro tokwe momwora'no sumaiyokwe yiuwi'nokai kantri togai'aro yovodolobunyo togai'aro yogaljo go'no go'no dodupudo togai'aro judo'no judo'no kula'nokakwe togai'aro tonyu moruujo'moneyokwe amokavlavokaikono.

⁷ Ensel su tool toro mokavla'mno sumaiyokwe deko aro amjodumovlavokaikono. “Oo Gooti tool a'mwo abolo tonyu kooti yogalo wiyowo'ji nerumwallono'mo tov aga me'no abai'mopso. Toro tovino tov kevu gamoro dolago tomuu mwalopi yovo aguto neya duuwilo. Gooti su tool sulugumdo tokwe'aro kwako tokwe'aro soolwara tokwe'aro wonyo sumdo ilowilovabodupudo togai'aro tonyu sokwollosokaikono. Toro toolluno kevu neya julomoropiyogaulo.” Amjodumovlavokaikono.

⁸ Aki lukomguda'ai ensel pwol sumdomguda'ai ensel toollu sulugumdo tovi akuuto toru'aro uumjunyuno sumaiyokwe deko aro amjodumovlavokaikono. “Oo abolo puruv kwonyalo'mo tov gami kwolo toollu wuugollu'mo'mdowodo to'busuko kubalno wagwolago Bebeloonda'ai ton Gooti toollu me'no kuugollu'meyajupogano. Toro tonyu kwako akavuro yiuwi'nokai kantri tonyuda'ai a'mwo abolo gabovo ton uumjunodupu Gooti toollu me'no kuugollu'meyajupogano. Su toro sajupo tov wain wonyo tovida'ai amomo pasudo to'busukokwono. Aki kwonyalo pasudo bwotonyo to'busuko sajupogano. Bebeloonda'ai a'mwo abolo tonyuro su toro sajupo tovino tov kemi wagwolago su tov me'no abwoloorokakwono. Nebalokwono, wagwolago Bebeloon su tov aguto sumo'nyajuko kuvi kuruv Gooti toolluro kirumwalloduke tovida'ai me'no abwoloorokakwono.” Amjodumovlavokaikono.

⁹ Aki lukomgu ensel gabovo pwol sumdomguda'ai toorallu uumjungobino sumaiyokwe deko guureji aro adokaikono. “Yiuwi'nokai a'mwo abolo ton ibesa'aiyo kaiya'no kuumwiyo tooke'aro aki kwolbusuko kula'noka sokwolludapingiko tooke'aro toorallu ilomoropiyapi aki gamoro nojeso'moneyokwe puukwollo tov kemi yomo'mdeyo oo ato'mdeyo tovi amapi su ton

¹⁰ Gooti toolluro suroulo tov kapwo tovida'ai wain wonyo nodupudo to'busuko kubalno nomapinogano. Suroulo su tov pwekwonodo'maiyo. Toro kuvi kuruv Gooti toolluro yiuwi'nokai surodo wuunodowodo tov mapinogano. Suroulo su tov duko tokwe'aro dukworokakwe salfa sulo tokwe'aro toval monosodowo'jure tovida'ai a'mwo abolo su tobuuro danyu'nyuwuulo nyubwosungovla'mwalpinobuurogano. Su tov Gooti gavnokwe toolluro ensel toorogai'aro Sipsip Muugunyo tooke'aro tooravuro sumdo muugona'dopure toru nuuwimo'nonogano.

¹¹ Aki a'mwo abolo danyu'nyuwuulo ibwosunodopure su tobuurai duko amano'ji su tovuro juto ton muunyu kai'muu bwotonyo kilovoubweyosumovlawonokwono. Aki danyu'nyuwuulo ibwosungovla'mwalpino su tov dugoga puru'monodo kuruv mirovomokwolabowo'ji yiuwi'nokai iruko togake'aro surakuuto togake'aro kuga kuruv yiunokuudo ibwosungovla'mwalpinogano. Toro ibwosungovla'mwalpino su tobuuro ibesa'aiyo kaiya'no kuumwiyo tooke'aro aki kwolbusuko kula'noka sokwolludapingiko tooke'aro toorallu ilomoropiyapinogano. Aki toro tobuuro gamoro nojeso'moneyokwe puukwollo amapi tobuuraino tov danyu'nyuwuulo su toro wimo'nonobuurogano.

¹² Su tov kuvinono nyumo'nonokwono. Toro te Gooti toolluro a'mwo abolo ton buro'nyo buro'nyo kaiyako igolodopure kuga kuruv yiuno Gooti toolluno to'no neya porugwo'mo'na'mwalpinogano. A'mwo abolo su ton Gooti toolluro yogalo duuwiyodowodo'jure tonyu uumjungovla'mwalpinogano. Aki toro ton Jisasolluno kuudo uubweyodupudo tovi guureji neya gudupola'mwalpinogano.

¹³ Toruda'ai nuu Gooti toolluro ago muunyu kai'muuda'ai yogaimaguurai puruv doduke tovi kuu'nonyugono. Yogaimaguurai su tov aro adokakwono. “Guu puukwollo aro jakwollono. Aga togada'ai yiuwi'nokai a'mwo abolo Gooti Aguto toollu me'no uuguro'mwonyopi abolpi su ton kemi poowokalago togai ilaiyo nokwo ibwosunmwalpinogano.” Adokakwono. Aki Gooti toolluro Kuullo kwol kuruv aro adadopiyo. “Tadeyoo, a'mwo abolo su ton kemi poowokalago togai ilaiyo ibwosunmwalpino tov aro tovinokwono. A'mwo abolo su ton womdo guureji mujumelabodupudo kuvi kuruv abolpi toga'no'gwowi kemoro womdo yodupudo tovida'ai iruko nokwo mwalmwalpinobuurogano. Aki su toro abolpi tobuuravuro sugupasudo mujumelabodupudo tovino mubiyo sugudo kuruv nuumjungovlapinogano.” Adadopiyo.”

Kwako akavida'ai wosamujuko suuwiyo tonyu amodovomullosoka tovinokwono

¹⁴ Toruda'ai nuu sumdo yenomolluno sumoneyokwe sulu'wo wiya'jo puvi kwononyugono. Sulu'wo su tovi muunyu toru A'mwo Kwolaiyo Kuunodo toolbusuko imo'nodowodo tool nyulomwaloduke kwononyugono. Toro tool a'mwo aguto kig pwolluro miguto gool tovida'ai sakwollungiko tokwe gami mido tovi amollosokaikono. Aki wosamujuko tonyu dovomallo'moneyokwe sallupe nodukwaiyo puuke'aro amomworarokaikono.

¹⁵ Aki ensel pwol Gooti toolluro muunyu kai'muu ilomoropiyo'moneyokwe ago tovida'ai alokabokaikono. Toro lokabino sumaiyokwe sulu'wo tovi muunyu toru ilomwaloduke toollu deko guureji aro kuudokaikono. “Kwako tovida'ai wosamujuko ton suuwiyogano. Toro tovino tov aga wosamujuko su tonyu mulomallo'moneyokwe togakono. Toro te gumi sallupe nodukwaiyo touke neya dodovono.” Kuudokaikono.

¹⁶ Toro wuujuno sumaiyokwe sulu'wo tovi muunyu toru sulomwaloka su tool yiuwi'nokai kwako akavida'ai wosamujuko tonyu wolodovomullomorabiyo'mo kwinokaikono. Toro tool muunyu kai'muu kuuno amwallajukekono. Toro mwalno sumaiyokwe yiuno gami ato tokwe sallupe nodukwaiyo tousi mwora'no sumaiyokwe yiuwi'nokai kwako akavida'ai wosamujuko suuwiyo tonyu amodovomullosokaikono.

¹⁷ Toruda'ai lukomgu ensel gabovo pwol muunyu kai'muuda'ai Gooti toollu ilomoropiyo'moneyokwe ago tovida'ai alokabokaikono. Ensel su to kwol kuruv sallupe nodukwaiyo do'nyo do'nyo puuke amokalobokaikono.

¹⁸ Aki lukomgu ensel gabovo pwol Gooti toollu romiroudapiyo'moneyokwe dukwagupto tomuuda'ai alokabokaikono. Ensel alokaboka su tool dukwagupto tovuro duko tovi mollomwalodowodekono. Toro tool lokabino sumaiyokwe ensel sallupe nodukwaiyo do'nyo do'nyo tousi mwora'duke toollu deko guureji aro kuudokaikono. “Kwako akavida'ai yiuwi'nokai wain ikulsulo ton miko me'no ailopigovoo. Toro tonyu dovo'bi domollu'bworosono.” Kuudokaikono.

¹⁹ Toro wuujuno sumaiyokwe ensel sallupe nodukwaiyo tousi amworallajuko su tool yiuwi'nokai kwako tomuu adovogu'gullopiyokaikono. Toro dovogu'gullopino sumaiyokwe wain ikulsulo tonyu amollu'bworosokaikono. Toro mollu'bworoso'no wain ikulsulo su tonyu malluno sumaiyokwe buuso puvi kwolomobwokuropiyokaikono. Buuso su tov aro tovino wuuduuwallo'mokwono. Gooti tool ma'no ma'no pasudo tonyuno surodo bwotonyo wuunodowodo tool nerumwallono tovino wuuduuwallo'mokwono.

²⁰ Aki buuso su tov wagwolago Jeruusalem tovi kwa'mgu tomuu wo'dowodokwono. Toro te wain ikulsulo kwolomobwokuropiyapo su tonyu sulo togai gurojodopure tovida'ai wonyo to'busuko abwoloorokakwono. Yovekurajo su to'busuko kubalno a'mwo abollungopo tonyuro mujako tov bwotonyago abwollajukokwono. Mujako su tov bwolno bwolno sumaiyokwe muja'buugo bwotonyo tov abwolovomwonokakwono. Muja'buugo su tovuro i'numdo tov hoos toolluro mago tovida'ai aiyon duuguurosodupudo su tovuro kumiko to'busuko abwolovomwonokakwono. Aki muja'buugo su tovuro kumi'yago avomwonugolokwoka tov 300 kiloomita tomgu'aro so'mowopiyokakwono.