Adodolukuu'nosungiko 13 - Gooti Toolluro Yogalokwono

Ibesa'aiyo kaiya'no kuumwiyo pwol abillumo'noka toollunokwono

¹ Toruda'ai nuu ibesa'aiyo kaiya'no kuumwiyo pwol soolwara tovi anakuuto tomuuda'ai ilaboduke toollu kwononyugono. Toro kwono su tool atousal koomwo ton kurukwekono. Yiuwi'nokai koomwo go'no go'nodo su tonyu a'mwo aguto kig tooravuro miguto pun kurukweyogano. Aki toro tool 7-pela mido toorogai'aro kurukwekono. Gamoro yiuwi'nokai mido go'no go'nodo su toorai Gooti toolluno bwolomorumwogapiyo'moneyokwe yovo pun kurukweyogano.

² Ibesa'aiyo kaiya'no kuumwiyo kwono su tool lepet toolbusukekono. Toro kwol kuruv gamoro suvlo tono'gwowi bea tooravuro suvlo to'busukogano. Aki gamoro mago tov laiyon tooravuro mago to'busukokwono. Ibesa'aiyo kaiya'no kuumwiyo su toro toollu kwononyugono. Toro kwono su toollu ilviyo bwotonyo tool gamoro jurogudo tov wino sumaiyokwe gavnokweyolluro sia kig toru amolludapiyokaikono. Toro molludapino sumaiyokwe a'mwo abolo bwotonyago tonyu mido mollomwallo'moneyokwe jurogudo tov kuubweyokaikono.

³ Ibesa'aiyo kaiya'no kuumwiyo su toolluro mido pwol kwa'dalo bwotonyo amaroka tovida'ai me'no abolowo'jujukekono. Toro kwol kuruv kwa'dalo bwotonyo su tov me'no sukulungikokwono. Toro sukulungiko tovi yiuwi'nokai a'mwo abolo kwako akavi mwalodupudo tonyuro sumdo tovi duuwallo jurogudo to'busuko wimo'nodowodokwono. Toro tovino tov a'mwo abolo ton luko morumoukuropino sumaveyokwe ibesa'aiyo kaiya'no kuumwiyo su toollu kuumjunopekono.

⁴ Toro te ilviyo bwotonyo tool ibesa'aiyo kaiya'no kuumwiyo su toollu jurogudo uubweyoduke tovino tov yiuwi'nokai a'mwo abolo ton ilviyo bwotonyo toollu sulomoropiyapogano. Aki ibesa'aiyo kaiya'no kuumwiyo kwollu kuruv sulomoropiyapogano. Toro ton aro sajunopogano. “Aiyoo, ibesa'aiyo kaiya'no kuumwiyo jurogudokwe su toolbusuko pwol nonagutomuugono. Aki pwol ibesa'aiyo kaiya'no kuumwiyo su toollu molo kwiyo'ji kwol kuruv ku'nono muuwolowonekono.” Sajunopogano.

⁵ Toro te ibesa'aiyo kaiya'no kuumwiyo su tool gavnokweyolluno ilomoropunyo'moneyokwe yogalo togai'aro aki Gooti toollu bwolomorumwogapiyo'moneyokwe yogalo togai'aro amoruujajukekono. Su toro moruudoduke toga Gooti tool nokwo wonyapino to'no sajukekono. Ibesa'aiyo kaiya'no kuumwiyo su tool gavnokweyol mido mollomwalmwallunyo'moneyokwe Gooti tool 42-pela lobako tobuullu nokwo wonyapino to'no sajukekono.

⁶ Toro te ibesa'aiyo kaiya'no kuumwiyo su tool gami mago tokwe Gooti toolluno bwolomorumwogapiyo'moneyokwe kaiya'no yogalo toorogai ajajukekono. Gooti toolluno yovo tokwe'aro gamoro ago toruke'aro aki gamoro ago toru kuulomwalodopudo togai'aro tonyuno bwolomorumwogapiyo'moneyokwe burolyogalo ton aduu'mwojajukekono.

⁷ Aki ibesa'aiyo kaiya'no kuumwiyo su tool Gooti toolluro a'mwo abolo kuunodo tonyu molo wiyodowo uuwolo'mduke kuga kuruv Gooti toolno'gwowi nokwo wonyapino to'no sajukekono. Yiuwi'nokai yovodolobunyo togai'aro yiuwi'nokai judo'no judo'no kula'nokakwe togai'aro yiuwi'nokai yogaljo dodupudo togai'aro yiuwi'nokai kantri togai'aro tonyu ibesa'aiyo kaiya'no kuumwiyo su tool mido mollomwaloduke toollu Gooti toolno'gwowi muumjukullajukekono.

⁸ Toro te yiuwi'nokai a'mwo abolo kwako akavi mwalodupudo ton ibesa'aiyo kaiya'no kuumwiyo su toollu sulomoropiyajupogano. Toro sulomoropiyajupo su ton aiyoga kwako akav yere mimo'nyoduke togada'ai kemino yovo ton Buukiyo Aiyo Yiunokuudo Mujomwekovlaiyo'moneyokwe tovi miyakwollungikogano. Buukiyo su tov Sipsip Muugunyo me'no aromiyosopo toollurokwono.

⁹ Neya duu'nyulo. A'mwo pwol kaduko nyabiyo'mo kwino'ji su tool yogalo akavi neya wuu'nowo'ji kuudo youromarono.

¹⁰ Gooti tool a'mwo pwollu wuulo killo'mo ago tovi kuulomeroso'mo me'no ajeso'ji su toollu wuulo killo'mo ago tovi kuvinono nomerosupinekono. Aki Gooti tool a'mwo pwollu molo'mo kwallu'mopto tovida'ai bolono'moneyokwe ajeso'ji su toollu kwallu'mopto tovida'ai kuvinono nobolonekono. Toro tovino tov Gooti gavnokwe toolluro a'mwo abolo ton buro'nyo buro'nyo kaiya'nodo tov abwi'mowo'ji toga jurogudo neya da'mwalpinogano. Toro davopi kemi Gooti toolluno kuudo uubweyodupudo tovi guureji neya gudupola'mwalpinogano.

Ibesa'aiyo kaiya'no kuumwiyo lukomguda'ai pwol abillumo'noka toollunokwono

¹¹ Toruda'ai ibesa'aiyo kaiya'no kuumwiyo gabovo pwol kwako tovi anakuuto tomuuda'ai ilaboduke toollu kwononyugono. Su tool sipsip pwolbusuko koomwo kula'nyo puruval kurukwekono. Toro kwol kuruv gamoro yogaimaguurai to'gwowi ilviyo bwotonyo toolluro yogaimaguurai to'busuko dodowodekono.

¹² Toro te ibesa'aiyo kaiya'no kuumwiyo lukomguda'ai sulaboka su tool sumdomguda'ai ibesa'aiyo kaiya'no kuumwiyo toolluro sumdollu toru abodavokaikono. Toro da'mduke toollu sumdomguda'ai tool gavnokweyolbusuko mido mollomwallo'moneyokwe jurogudo tov kuubweyokaikono. Toro kuubweyoka tokwe lukomguda'ai ibesa'aiyo kaiya'no kuumwiyo su tool yiuwi'nokai kwako akavida'ai tonyu sumdomguda'ai ibesa'aiyo kaiya'no kuumwiyo toollu neya ilomoropiyapino'moneyokwe adumuurolovokaikono. Sumdomguda'ai ibesa'aiyo kaiya'no kuumwiyo su tool kwa'dalo bwotonyo tovida'ai me'no abolowo'jujuko kwol kuruv aki aiko te sukulnoka tool kwekono.

¹³ Toro te lukomguda'ai ibesa'aiyo kaiya'no kuumwiyo tool duuwallo jurogudo aguto pun kuuduuwallunyajukekono. Toro tool a'mwo abolo ton muugona'dopure toga muunyu kai'muuda'ai widuko tov kwako tomuuno kwolomoropiyabokaikono.

¹⁴ Toro yoduke toollu Gooti tool nokwo wonyapino sokaikono. Aki toro yoduke toga lukomguda'ai ibesa'aiyo kaiya'no kuumwiyo su tool sumdomguda'ai ibesa'aiyo kaiya'no kuumwiyo toolluro sumdollu toru duuwallo jurogudo ton kuuduuwallunyajukekono. Su toro wuuduuwallunoduke tovi'aro a'mwo abolo kwako akavi mwalodupudo tonyu amolloguulludapiyajukekono. Toro molloguulludapiyodowo a'mwo abolo tonyu aro adumuuroleyajukekono. “Kevu sumdomguda'ai ibesa'aiyo kaiya'no kuumwiyo su toolbusuko kula'noka pwollu neya jokwolludapilo. Su tool kwa'dalo bwotonyo tovida'ai me'no abolowo'jujuko kwol kuruv aiyo aiko te adukavokaikono. Toro toolbusuko kula'noka pwollu yokwolludapiyopi julomoropiyogaulo.” Adumuuroleyajukekono.

¹⁵ Aki Gooti tool nokwo wonyapino yoduke toga lukomguda'ai ibesa'aiyo kaiya'no kuumwiyo tool sumdomguda'ai toolbusuko kula'noka sokwolludapiyopo toollu yogalo nokwo dono'moneyokwe aiyo tov kwiyokaikono. Toro kwiyoka tovida'ai sumdomguda'ai ibesa'aiyo kaiya'no kuumwiyo toolbusuko kula'nokakwe sokwolludapiyopo su tool sumuujudo yalomo'mno sumaiyokwe a'mwo pworai aro aduuwiyokaikono. “Kevu yiuwi'nokai a'mwo abolo mino milomonuwopiyapi tonyu neya doromiyosulo.” Aduuwiyokaikono.

¹⁶ Aki lukomguda'ai ibesa'aiyo kaiya'no kuumwiyo su tool gamoro womdokwe toorai aro aduuwiyokaikono. “Yiuwi'nokai a'mwo abolo yovo maiyokweyodeyo oo yovo agutokweyodeyo togai'aro aki nuugwiyo bwotonyagokweyodeyo oo apoo'nyaiyodeyo togai'aro aki ki'nato womdo tovida'ai me'no birolo'nugolokwodupudodeyo oo ki'nato womdo kuuno yodupudodeyo togai'aro yiuwi'nokai su tonyuro anato'mdeyo oo yomo'mdeyo tomuu nojeso'moneyokwe puukwollo tov neya mapinokwono.

¹⁷ Toro kuvi kuruv a'mwo pwol nojeso'moneyokwe puukwollo su tov nonagutoldeyokwe to'gwowi noonyumwonyu maket tovi wosodopure tonyu ku'nono mabiyoma'mwalonekono. Aki gamoro noonyumwonyu ton maket tovi ku'nono mwosumwalonekono. Nojeso'moneyokwe puukwollo su tov ibesa'aiyo kaiya'no kuumwiyo toolluno yovo tovino'mdukono oo gamoro yovo tovuro naba tovino'mdukono. Nojeso'moneyokwe puukwollo tov su toro tovinokwono.

¹⁸ Toro te a'mwo pwol naba su tovino kuudo po'dogalo neya youromarono. Aki a'mwo pi'mwo kuudokwe tool ibesa'aiyo kaiya'no kuumwiyo toolluro naba tovi neya jagilonekono. Naba su tov kwako akavida'ai a'mwo pwollurokwono. Gamoro naba tov arokwono, 666.”