Adodolukuu'nosungiko 12 - Gooti Toolluro Yogalokwono

Abolo purukwe'aro ilviyo bwotonyo toolbusuko pweke'aro tovallunokwono

¹ Aki toruda'ai sulugumdo tovi muunyu kai'muu duuwallo aguto puruv sumo'nokakwono. Duuwallo sumo'noka su tov aro tovi kwononyugono. Abolo puruv kuujo tooke youro to'busuko amoweyomgu'nomwalokakwono. Aki abolo su tovuro suvlo dolago tomuu lobako tool kworokakwono. Aki gamoro mido tovi 12-pela sullugabwo ton miguto to'busuko sulomwalopogano.

² Abolo su tov kwolaiyo sumwoluko kurukweyokwono. Toro tov gami kwolaiyo su toollu yomallo'mo wobo toru sumo'noka tovino tov guno amollokakwono. Toro yoduke tovida'ai danyu'nyuwuulo ibwosuno'no deko adokakwono.

³ Aki sulugumdo tovi muunyu kai'muu duuwallo aguto purukwe'aro sumo'nokakwono. Duuwallo su tov ilviyo bwotonyo kuunodo toolbusuko pwollu kwononyugono. Ilviyo su tool muja'jekono. Aki toro tool 7-pela mido toorogai'aro atousal koomwo toorogai'aro kurukwekono. Toro toolluro mido toorai 7-pela a'mwo aguto kig tooravuro miguto ton wo'dupudogano.

⁴ Ilviyo su toolluro suwiyo bwotonyo tokwe sulugumdo tomuuda'ai sullugabwo pwekwonodo tonyu amobwokurodukwopiyokaikono. Yiuwi'nokai sullugabwo ton jopolapino'mno puruvapuruv tonbusuko imo'nodopure tonyuda'ai puru'monodo tovi mobwokurodukwopino sumaiyokwe sullugabwo su ton kwako tovi abwolaropogano. Toro bwola'no sumaveyokwe ilviyo su tool abolo kwolaiyo nyomallo'mo yoduke tovuro sumdollu toru adavokaikono. Toro daino sumaiyokwe abolo tovuro kwolaiyo somaro'ji toollu dovanyo'mo sogwollo ainodavokaikono.

⁵ Toruda'ai abolo tov kwolaiyo muudoga pwollu somarokakwono. Kwolaiyo su tool yiuwi'nokai kantri go'no go'nodo tonyu aguto kig wimo'nowo'ji aiyon yodeko tokwe mido mollomwalo tov jurogudo momjomwekovlawonekono. Toro toollu yoma'no sumaiyokwe ilviyo bwotonyo tool kwolaiyo muudoga su toollu kaiyako migolokaikono. Toro kwollu kuruv Gooti toolno'gwowi gavnokweyollomno amokailokaikono. Aki gamoro sia kig kumuuno kuruv amogaibworomokailokaikono.

⁶ Toro gaibworomokailno sumaiyokwe abolo tov a'mwomaiyo kuu'maiyo tomuuno lukado avlavokakwono. A'mwomaiyo kuu'maiyo su tomuu Gooti tool abolo tovi mollomwallo'moneyokwe me'no sovrowosokarukono. Toro te abolo su tovi 1,260 iruko tobuullu wosamujuko togai wiyopi po'dogalo mollomwalmwalpinokwono.

⁷ Toruda'ai aki Gooti toolluro ago muunyu kai'muu molo puruv sumo'nokakwono. Ensel pwolluno yovo tov Maikololekono. Toro tool gami ensel avalo toorogai'aro tooro ilviyo bwotonyo toolbusuko toollu molo kwiyopekono. Aki ilviyo bwotonyo su tool gami dolago tomuuda'ai ensel mwalodupudo kworo kuruv molo aikomgu kwiyoporogano.

⁸ Molo su toro kwiyopo kworo kuruv ilviyo bwotonyo su tool molo tovi ku'nono muuwolovokaikono. Toro muuwolovoka su tooke'aro gami dolago tomuuda'ai ensel mwalodupudo toorogai'aro toorai Gooti toolluro ago muunyu kai'muu nomwalpiyokwe kwa'mgu tomuuno amovomjapiyoporogano.

⁹ Toro movomjapino sumaveyokwe Maikoleke'aro gami ensel avalo toorogai'aro tooro ilviyo bwotonyo su toollu kwako akavino kwolomowopiyabopekono. Aiyogasuro gabakuto sumo'nyajuko su tool ilviyo bwotonyo toolbusuko tool kwekono. Toro toolluno yovo aro sowallajupekono. “Kooti Yogalo Mojokuu'nosokweyolekono.” Aki toro toolluno yovo puruv “Satanyolo” dodupudekono. Toro toollu kwako akavino kwolomowopiyabopo toga yiuwi'nokai Satanyolluro ensel kworogai'aro toorai kwolomowopiyaboporogano. Toro te Satanyol yiuwi'nokai a'mwo abolo kwako akavi mwalodupudo tonyu kuunano youkuu'nuujokwekono.

¹⁰ Aki toruda'ai yogaimaguurai bwotonyo puruv Gooti toolluro ago anakuuto tomuuda'ai deko aro doduke tovi kuu'nonyugono. “Oo nemi Gooti tool gamoro a'mwo abolo tonollu ma'no ma'nodo tovuro kirumwallo tovida'ai bomollurolovonekumokalokwiyo'moneyokwe tov aga me'no abai'mopso. Aki gamoro jurogudo kuruv aga me'no abai'mopso. Aki aguto kig Gooti toolluro mido mollomwalo kurukwe'aro aga me'no abai'mopso. Aki gamoro amonekwopiyaboka Krais su toolluro jurogudo tov aga kuu'maiyo toru abomollolupto'nosadopiyo. Su tov aro tovinokwono. Krais su tool Satanyollu me'no kwolomowopiyabingikekono. Satanyol nevuge avalo Jisasolluro a'mwo abolo tobuurai kaiyako igollo'moneyokwekono. Aki toro tool yiuwi'nokai iruko togake'aro surakuuto togake'aro toga Gooti toolluro sumdollu toru da'mdowo kooti yogalo mojokuu'nosokwekono.

¹¹ Aki toro toollu Jisasolluro a'mwo abolo tobuuro me'no kuuwolovopogano. A'mwo abolo su tobuuro kwako akavida'ai mujomwekovla'mdupudo tovino biyolsumdo sajupogano. Toro yodupudo tobuuro kemoro bollo'mo kuvino kuruv me'no sovrowosunyajupogano. A'mwo abolo su tobuuro Sipsip Muugunyo toolluro mujako abwoloka tokwe'aro aki Krais Jisasolluno kuu'maiyo toru dodoluwosodupudo tokwe'aro tovalluro jurogudo tokwe Satanyollu me'no kuuwolovopogano.

¹² Toro tovino tov kevu yiuwi'nokai Gooti toolluro ago muunyu kai'muu mwalodupudo togaikul kemi poowokalago togai ilaiyo neya jogaulo. Toro kuvi kuruv kevu yiuwi'nokai kwako akakwe soolwara tokwe tovallu mwalodupudo togaikulno'gwowi tabunyuwuulo bwotonyo tov nomapino'mo togakono. Toro tovino tov kevu kalo buurekikonoo. Su tov aro tovinokwono. Satanyol kemiyomno wolabino sumaiyokwe me'no abwolekuru'marokaikono. Toro abwolekuru'maroka su tool aro kuudo yau'dowodekono. Oo moro womdo yodumdo tov yiuno kula'nyo toga'gwono imwalmonyudeyo. Su toro kuudo yau'dowodo tool kemino surodo bwotonyo wuunyokwekono. Kemino su toro winodowodo tovino tov kevu kalo buurekikonoo.”

¹³ Yogaimaguurai tov su toro juno sumaiyokwe ilviyo bwotonyo toolbusuko tool aro souroonoka tov, Oo mi kwako akavino me'no kwolomonuwopiyaboponyudeyo. Su toro tovi youroonyuno sumaiyokwe toga abolo kwolaiyo pwollu me'no somaroka tovi amovomjai'nokaikono.

¹⁴ Toro kuvi kuruv abolo su tov Gooti toolluro me'no sovroubweyoka kwako yalukullo kuu'maiyo tomuuno plokavlaiyo'moneyokwe Gooti toolluro ensel pwol puviyo puruval kwiyokaikono. Puviyo su toval bwajo bwotonyo pwolluro to'busukovakono. Toro te abolo tov puviyo su tovake plokavlavowo'ji kwako yalukullo kuu'maiyo tomuu mwalodowo'jure tovi Gooti toolluro ensel tooro pi'mwono mollomwalmwalpinokwono. Toro mollomwalodopure tomuu gabakuto toolbusuko Satanyol abolo su tovi ku'nono miyo'mgonomaronekono. Su toro tomuu ensel tooro mollomwalno mollomwalno yopi kworomo tov yiuno pullapullu tobuuke'aro 6-pela lobako toorogai'aro to'no uuwolo'nonokwono.

¹⁵ Toruda'ai gabakuto toolluro mago tovida'ai wonyo allako bwotonyo puruv alokabokakwono. Wonyo allako alokaboka su tov abolo tovi mobwokuruvollo'moneyokwe alokabokakwono.

¹⁶ Toro alokaboka kuvi kuruv abolo su tovi wiyo'mwojo'moneyokwe kwako tov ausodavokakwono. Toro kuusoda'mno sumaiyokwe ilviyo bwotonyo toolluro mago tovida'ai wonyo allako alokaboka su tovi ame'nyudapiyokakwono. Gooti toolluro yoduke tovida'ai kwako tov abolo tovi su toro kwiyo'mwojokakwono.

¹⁷ Toro te ilviyo bwotonyo su tool abolo tovino surodo bwotonyo kuunokaikono. Toro wuunyuno sumaiyokwe abolo su tovuro jukweyago kwoloraiyo yowosungelabodupudo tonyu molo wiyo'moneyokwe avlavokaikono. Abolo tovuro jukweyago kwoloraiyo su ton Gooti toolluro yogalo duuwiyodowodo tonyu uumjunopi aki Jisasolluno kuu'maiyo toru dodoluwosodupudogano. Toro te ilviyo bwotonyo tool kwoloraiyo su tonyu molo wiyo'moneyokwe avlavokaikono.

¹⁸ Toro plaino sumaiyokwe ilviyo bwotonyo su tool soolwaravuro wolo tomuuda'ai weko towai ki'movo'no adavokaikono.