Adodolukuu'nosungiko 11 - Gooti Toolluro Yogalokwono

Proofet pworal kuu'maiyo toru dodoluwosubulluno toorallunokwono

¹ Toruda'ai ensel pwol noonyumwonyu tonyu yamju yomallo'moneyokwe iko puruv mi anyabokaikono. Toro nyabino sumaiyokwe aro anyudokaikono. “Guu wagwolago Jeruusalemda'ai Gooti toollu ilomoropiyo'moneyokwe ago toru'no dovlavono. Toro plavo'bi romiroudapiyo'moneyokwe dukwagupto tovi yamjiko su tollugwogai yamju yomaro'bi dojagilono. Aki a'mwo abolo ago su tovi Gooti toolluno ilomoropiyodopure kunyu kuruv adadobuul dukomwakoveyokwe tovino dojagilono.

² Toro kweku kuruv agwapto kwa'mguda'ai tovino'gwowi a'mwo abolo Juu tooravuro miyawosunodupudo tonyu me'no kwingiko torukono. Toro tovino tov agwapto kwa'mguda'ai su tovi yamjiko tokwe majagilbinono. A'mwo abolo Juu tooravuro miyawosunodupudo su ton Gooti toolluro wagwolago Jeruusalem tovi suvlo nyulomavekupinogano. Toro ilomavekuropi molo kwipi toga uuwolovopi mido mollomwalmwalpinogano. Mido mollomwalo su tov 42-pela lobako toorai momjomwekovla'mwalpinogano. 42-pela lobako su tooro iruko 1,260 tollovogano.

³ Aki a'mwo pworal moro kuuguudo tokwe kuu'maiyo toru'no dodoluwosumwalbulluno'moneyokwe nuu a'mwo su toorallu jurogudo tov nuubwemonyugono. Toro tooral kalo winodo'bule tovino tov kalo'mo youro togai yeso'bullu iruko 1,260 su tobuullu proofet kuuguudo tokwe moruudumwalbullunorakono.” Anyudokaikono.

⁴ A'mwo su tooral iko oolip pworake'aro gworeko gudupolallo'moneyokwe pworake'aro toorobusukorakono. Toro toorobusuko su tooral yiuwi'nokai kwako akavi mido mollomwalokwe Aguto su toolluro sumdollu toru da'mdubulorakono.

⁵ Toro te a'mwo pwol su toorallu kaiyako igollo'mo so'ji tov kemoro mago tovalluda'ai noromiyoso'moneyokwe du'wiyo tov lokabowo'ji a'mwo ikomago kwimo'no'ji su toollu yiuno'no nomonosonokwono. A'mwo pwol proofet su toorallu kaiyako igollo'mo so'ji toollu yiuno su toro tomgu'aro to'no romiyosubullunorakono.

⁶ Toro tooral kuuguudo tokwe kuu'maiyo toru'no moruudodo'bule toga buuruko tov nowo'jokwe sulugumdo tovi kudo'aiko wuullukullo'moneyokwe jurogudo tov kurukweyorakono. Aki toro tooral wonyo togai'aro wonyo buugo togai'aro tonyu yiuno mujakuumwiyo to'no imo'noneyokweyo'mo jurogudo tov kurukweyorakono. Aki toro tooral yiuwi'nokai a'mwo abolo kwako akavi mwalodupudo tonyu buro'nyo buro'nyo toga nobolluwuulo go'no go'nodo togai kaiyako igollo'mo kwinbullu kuruv jurogudo kurukweyorakono.

⁷ Toro tooral Gooti toolluno kuuguudo tov kuu'maiyo toru'no dodoluwosodubulo su tovi me'no abimwogapibullu toga ibesa'aiyo kaiya'no kuumwiyo pwol kuuraibuuso daneyajokwe tovida'ai biloda'mdowodo su tool nyulabwonekono. Toro ilabowo'ji proofet toorallu molo kwiyo'ji toga uuwolowo'ji noromiyosonorakono.

⁸ Me'no aromiyoso'ji su tooralluro kulako bwiyo toval wagwolago aguto Jeruusalem tovuro puuto tovi wo'bullunovakono. Wagwolago su tovida'ai a'mwo abolo mwalodupudo ton kirovanyuvanyu imo'nodupudo tovino tov wagwolago su tovino yovekurajo'mo yovo puruval Soodoomovo dodupudokwono. Aki puruv Ijupovo dodupudokwono. Wagwolago su to kuru kemi Aguto toollu i'noguropte tovi amovoromiyoguroptowosoporukono.

⁹ Toro te a'mwo bwiyo aromiyoso'ji tooralluro kulako wo'do'bule tovallu yiuwi'nokai a'mwo abolo go'no go'no kula'nokakwe togai'aro yovodolobunyo go'no go'nodo togai'aro yogaljo go'no go'nodo togai'aro kantri go'no go'nodo togai'aro yiuwi'nokai su tomuuda'ai a'mwo abolo ton sumdo nomuugonapinorakono. A'mwo bwiyo su toorallu nomollusosupiyokwe a'mwo pworo uumjuku'dopure tovida'ai a'mwo bwiyo su toorallu ku'nono mamollusosupinorakono. Toro te iruko pullapullu tobuuke'aro iruko pullugwojuda'ai pwekwonodo tokwe'aro toga yiuwi'nokai a'mwo abolo ton bwiyo su toorallu sumdo wonmwalpinorakono.

¹⁰ Kwako akavida'ai a'mwo abolo ton toro muugonaropi dupinogano. “Oo me'no abololoraldeyo,” dopi ilaiyo ipinogano. Aki ilaiyo kuuno mujomwekovlaiyo'moneyokwe tov kemi ibwoto'nyo togai yasuwa'wino pun imgu amgu yodalopto yonomwalpinogano. A'mwo abolo su tonyuro ilaiyo ipino tov aro tovinokwono. Sumdomgu proofet su tooral Gooti toolluro yogalo tokwe yodubwasodubulo toga nobolluwuulo togai kuubweyajulorakono. Toro uubweyodole tovida'ai a'mwo abolo ton danyu'nyuwuulo bwotonyo ton amallajupogano. Toro tovino tov proofet su tooral abolbullu toga a'mwo abolo ton ilaiyo ipinogano.

¹¹ Toro kuvi kuruv iruko pullapullu tobuuke'aro iruko pullugwojuda'ai pwekwonodo tokwe'aro me'no abawo'ji su toga'no'gwowi a'mwo bwiyo su toorallu Gooti tool kuullumuujudo tov nuubweyonorakono. Toro uubweyodowo'jure tovida'ai a'mwo su tooral aki aiko te aiyo noduka'bullunorakono. Aki toro tooral nyuloda'bullunorakono. Su toro iloda'mdo'bullure toorallu yiuwi'nokai a'mwo abolo sumdo kwonpi ton luko bwotonyo morumoukuropipinogano.

¹² Su toro morumoukuropiyodopure toga Gooti toolluro ago muunyu kai'muuda'ai yogaimaguurai bwotonyo puruv a'mwo proofet toorallu aro wuudonokwono. “Kev toorakul akawai'no julabilo.” Yogaimaguurai tov su toro me'no kuudo'ji toga proofet su tooral sulu'wo tovi anakuuto tomuu'aro Gooti toolluro ago muunyu kai'muuno ilabullunorakono. Toro ilodo'bullure toga proofet su tooralluro ikomago tooro sumdo nomuugonapinorakono.

¹³ Toro muugona'dopure avalo toga wunyu wunyu bwotonyo puruv nyonokwono. Wunyu wunyu su tov wagwolago aguto tovida'ai punyu kaiyako nyugolonokwono. Wagwolago aguto su tov jopolapinowo'ji atousal tonbusuko sumo'no'ji tonyuda'ai yiuno puru'monodo tovi kaiyako nyugolonokwono. Wunyu wunyu su toro so'ji toga 7,000 a'mwo abolo wagwolago puru'monodo tomuuda'ai mwalodupudo ton nobolopipinogano. Toro te a'mwo abolo mabolpi ton wonopi luko morumoukuropipinogano. Yopi muunyu kai'muuda'ai Gooti toollu yovo aguto nuuwipinekono.

¹⁴ Tabunyu bwotonyo naba 2 tov su toro tomgu'aro nyumo'nonokwono. Aki tabunyu bwotonyo naba 3 tov wobo toga nobai'mowono tovino tov kevu wako neya dou'nogaulo.

Ensel naba 7 tool gamoro biugel tovi pwo'mi muujudo airapiyoka tovinokwono

¹⁵ Toruda'ai ensel naba 7 tool gami biugel tovi pwo'mi muujudo airapiyokaikono. Toro kirapino sumaiyokwe Gooti toolluro ago muunyu kai'muuda'ai yogaimaguurai bwotonyago pun deko aro adelowo'naroporogano. “Oo aga yiuwi'nokai kwako akavi aguto kig mido mollomwallo'moneyokwe jurogudo tov nemi Aguto tooke'aro gamoro Krais ajesoka tooke'aro tooralluro ato tovi kuuwoso. Aki Gooti su toolluro aguto kig mido mollomwalono tov yiunokuudo mujo'movla'mwalonokwono.” Yogaimaguurai ton su toro adelowo'naropogano.

¹⁶ Toro delowo'na'no sumaveyokwe toga 24-pela a'mwono moduvomwallokwe tooro kemi sia kig Gooti toolluro sumdollu mwalodupudo su toruda'ai kwako tomuu'aro wolomuulo'na'no sumaveyokwe Gooti toolluno sulomoropiyaporogano.

¹⁷ Toro tooro Gooti toollu ilomoropiyo'moneyokwe aro adoporogano. “Oo guu Gooti Aguto tooku Jurogudo Kuunodekugono. Guu judo tooku aiyoga yiuwi'nokai toga mwalno mwalno sajudo su tooku aki aga kuga kuruv kuuno mujomwekovla'mdumdekugono. Toro tookujuno, Nenoloo, agudumawono. Gumino su toro agudumawo tov aro tovinokwono. Aga gumi jurogudo aguto tov me'no ma'dum guu aguto kig tookujuro mido mollomwalo tov kuvinono amomjomwekovla'mwakudekugono.

¹⁸ Kwako akavida'ai a'mwo abolo gumino kuudo magubwemwakopo ton gumino surodo wuunodupudogano. Toro kuvi kuruv a'mwo abolo su tonyuno gumoro surodo wuunyo'moneyokwe toga'no'gwowi me'no abai'movokakwono. Toro te a'mwo abolo me'no bolodupudo tonyu kooti yogalo duuwibino'moneyokwe tov aga abai'mo'mwallo. Aki gumoro womdokwe proofet toorogai'aro guvnokwekujuro a'mwo abolo kuunodo togai'aro aki gumi kwako tomuu'aro mwalodupudo togai'aro yovo maiyokwe tobuurogai'aro yovo agutokwe tovosogai'aro yiuwi'nokai su tonyu mubiyo tov uubibino'mogakono. Aki a'mwo abolo kwako akavi mwalodupudo pubuurai kaiyako igolodupudo su to kworai kuruv guu kaiyako mollounapibino'mogakono.” Toro adoporogano.

¹⁹ Toro dodopure tovi wuu'nyuno sumoneyokwe aro tovi kwononyugono. Muunyu kai'muuda'ai Gooti toollu ilomoropiyo'moneyokwe ago tovuro kudo'aiko tov ausokakwono. Toro kuusuno sumaiyokwe Subuu'yamjo'mo Bookis tov ago su tovi anakuuto tomuu wo'duke tovi kwononyugono. Su toro toga molamopto tokwe'aro yaudo yaudo tokwe'aro kuuloulo tokwe'aro wunyu wunyu tokwe'aro sullumi buuruko bwotonyo tokwe'aro ton sumo'nopogano. Toro tovi kwononyugono.