Adodolukuu'nosungiko 10 - Gooti Toolluro Yogalokwono

Ensel pwol puukwollikwiyo aweyogunyugolowosungiko kula'nyo tovi amworaroka tovinokwono

¹ Toruda'ai nuu ensel jurogudo pwol Gooti toolluro ago muunyu kai'muuda'ai wolaboduke toollu kwononyugono. Toro wolaboduke toollu sulu'wo tov aiyowomno momwodovoma'no sumaiyokwe aki daboomuulo puruv gamoro mido tovi muunyu toru airovokakwono. Ensel su toolluro sumdomago tov kuujo toolbusuko bako awopiyokaikono. Aki gamoro suvlo toval anyutuko widuko nugovla'mdubulo to'busukovakono.

² Toro tool puukwollikwiyo aweyogunyugolowosungiko kula'nyo puruv me'no ausosungiko tovi gami ato tokwe amomworarokaikono. Toro momwora'no sumaiyokwe ensel su tool aro tomgu'aro sodavokaikono. Gamoro anato tomguda'ai suvlo tov soolwara tovi muunyu toru sulovekurodavokaikono. Aki gamoro kwonamo tomguda'ai suvlo tov kwako tovi sulovekurodavokaikono.

³ Su toro tomgu'aro yovekuroda'mno sumaiyokwe yogaimaguurai bwotonyo tokwe laiyon deko guureji dodowodo pwolbusuko deko adokaikono. Su toro doduke toga 7-pela kuuloulo go'no go'nodo ton guureji ki'nugolokabino sumaveyokwe yogalo ton adopogano.

⁴ Kuuloulo su tonyuro yogalo tov me'no dopino sumaveyokwe nuu yogalo kuu'no su tonyu puukwollo yakwollo'mo yodore toga yogaimaguurai puruv Gooti toolluro ago muunyu kai'muuda'ai guureji aro adanumjukurokakwono. “Kuuloulo tonyuro yogalo su tov jupweyo kuuguudogano. Toro tonyu guu yiulo kupuuroso'bi puukwollo miyakwollubinono.” Adanumjukurokakwono.

⁵ Toro nyujuno sumaiyokwe soolwara tokwe kwako tokwe tovallu ensel da'mduke kwono su tool gami ato tov Gooti toolluro ago muunyu tomuuno abomokailokaikono.

⁶ Toro bomokailno sumaiyokwe Gooti aiyo yiunokuudo mujomwekovla'mdowodo toolluro yovo tovida'ai subuu'yamju aduuwiyokaikono. Gooti su tool sulugumdo tokwe'aro kwako tokwe'aro soolwara tokwe'aro yiuwi'nokai su tomuu mwalodupudo kugai'aro tonyu sokwollosokaikono. Toro sokwollosoka toolluro yovo tovida'ai ensel tool subuu'yamju aro aduuwiyokaikono. “Gooti toolluro nyo'moneyokwe tovino sogwollo kinyo'moga'maiyo. Aga kuvinono nyumo'nono'mogakono.

⁷ Ensel naba 7 tool gami biugel tovi pwo'mi muujudo airapiyo'ji toga Gooti tool aiyoga gami womdokwe proofet toorai me'no kuujajuko tomgu'aro kuvinono uumjunonekono. Su toro uumjunodowo'jure toga gamoro nyo'moneyokwe yiulo kupuu'na'dowodo su tov kuvinono nyumo'nonokwono.” Aduuwiyokaikono.

⁸ Aki yogaimaguurai tov Gooti toolluro ago muunyu kai'muuda'ai aki aiko te aro anyudokakwono. “Ensel soolwara tokwe kwako tokwe tovallu adapsuko su tool gamoro ato tovi puukwollikwiyo aweyogunyugolowosungiko tov me'no ausomworasuko su tovi domarono.” Anyudokakwono.

⁹ Toro anyudoka toonyu ensel toollomno wino sumoneyokwe kuudonyugono. “Guu puukwollikwiyo aweyogunyugolowosungiko kula'nyo su tovi donyabono.” Toro wuujuno sumoneyokwe ensel tool aro anyudokaikono. “Ma, guu domanono. Guu amanbi toga gumoro mago tovi tamwallugwolamdo podopto to'busuko wuullo gujonokwono. Toro kuvi kuruv gumoro sumwoluko tovi anakuuto tomuu kwolomnorawo'ji toga'no'gwowi pollo gudowonokwono.” Anyudokaikono.

¹⁰ Toro te nuu puukwollikwiyo aweyogunyugolowosungiko kula'nyo su tovi ensel toolluro ato tovida'ai malluno sumoneyokwe amanonyugono. Toro manyuno sumoneyokwe moro mago tovi wuullo anyokakwono. Toro kuvi kuruv me'nyudapino sumoneyokwe moro sumwoluko tovi anakuuto tomuu kwolomnoroka toga'no'gwowi pollo anyudovokakwono.

¹¹ Su toro nodore toga ensel tool aro anyudokaikono. “Guu a'mwo abolo judo'no judo'no kula'nokakwe togai'aro kantri togai'aro judo'no judo'no yogaljo dodupudo togai'aro a'mwo aguto kig toorogai'aro tonyu lukomgu nuuwimo'nono tovino proofet yogalo tov aki aiko te kuu'maiyo toru'no neya domoruudogawono.” Anyudokaikono.