Adodolukuu'nosungiko 1 - Gooti Toolluro Yogalokwono

¹ Kuuguudo akav sumdomgu yiulo yogalo sumo'nyajuko kuvi kuruv lukomguno'gwowi Jisas Kraisol kuu'maiyo toru'no me'no adodolukuurosokakwono. Kuuguudo su tov noonyumwonyu pun wobo toga nyumo'nupino tonyunokwono. Toro te Gooti tool kuuguudo su tov malluno sumaiyokwe Jisasollu kwiyokaikono. Jisasol gamoro a'mwo abolo womdokwe tonyu kuu'maiyo toru'no wuuduuwallo'moneyokwe kuuguudo su tov gami ensel pwollu kwiyokaikono. Toro te ensel su tool kuuguudo tokwe mokabino sumaiyokwe nuvu Jisasolluro ki'nato womdokwe pwekwonyu anyabokaikono. Mino yovo tov Joonolonyugono.

² Toro toonyu aro tovalluno buukiyo akavi puukwollo sokwollosumwakono. Gooti toolluro yogalo tokwe'aro Jisas Kraisolluro kuuguudo dodoluwosodowodo tokwe'aro tovalluno sokwollosumwakono. Aki nuvnokwenyuro yiuwi'nokai wonodumdo kunyuno kuruv puukwollo sokwollosumwakono.

³ Toro te Gooti toolluro proofet yogalo akavi a'mwo mago tokwe amojagilo'ji tooke'aro aki a'mwo abolo wuu'nopi kaduko kwipi togai'aro yiuwi'nokai su ton ilaiyo bwotonyo nokwo ipinogano. Su tov aro tovinokwono. Proofet yogalo su ton kuvinono nyumo'nyo'mo tov wobo togakono.

Joonol Gooti toolluro 7-pela mollu'bwoto go'no go'nodo tonyomno pas akav sokwollapiyoka tovinokwono

⁴ Nuvu Joononyu kevu kwako Esiya tomuuda'ai Jisasolluro 7-pela mollu'bwoto go'no go'nodo togaikullu pas akav sokwollekwopiyamono. Toro togaikulluno nuvu aro nyunodowodonyugono. Gooti tool gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo ikubwemwalonekono. Agasuro Gooti mwalodowodo su tool aiyoga amjomwekelabiyajukekono. Aki lukomgu kuga kuruv kuuno mujomwekovla'mwalonekono. Aki Gooti toolluro Kuullo kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo aikubweyogawono. Gooti toolluro Kuullo su tool 7-pela kuullo toorobusuko imo'nodowodekono. Toro tool Gooti toolluro sia kig tovi sumdollu toru ilomwalodowodekono.

⁵ Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.

⁶ Aki toro tool aguto kig Gooti toolluro mido mollomwalo tovi nemi me'no aulomonekumwallokaikono. Aki nevu gami Ganumiyago toolluro pris womdo wimwalano'moneyokwe tov nemi me'no amonekudapiyokaikono. Krais su tool yiuwi'nokai tonyu mido momjomwekovla'mdowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.

⁷ Neya duu'nyulo. Jisas Kraisol sulu'wo tovi anakuuto tomuu yanekulo'nowo'ji noolabwonekono. Toro wolabodowo'jure toollu yiuwi'nokai a'mwo abolo ton sumdo noonpinekono. Aiyoga a'mwo mollurogudo pwol takubwopto tokwe Jisasolluro suumdo tovi juulowosoduke toga a'mwo abolo pun nokwo wonyapino to'no sopo su to kun kuruv noonpinekono. Toro kwonpi toga kwako akavida'ai yiuwi'nokai a'mwo abolo yovodolobunyo go'no go'nodo tonyuda'ai ton aro dupinogano. “Oo neronekumwallonoldeyo.” Su toro dopi kumdato dupinogano. Su tov kuvinono nyumo'nonokwono. Nebalokwono.

⁸ Gooti Aguto tool aga kuuno mujomwekovlaiyokwekono. Aki toro tool yiuwi'nokai aiyoga toga amjomwekelabiyajukekono. Aki toro tool lukomgu kuga kuruv yiunokuudo nomjomwekovla'mwalonekono. Aki Gooti su tool Jurogudo Kuunodekono. Toro tool aro dodowodekono. “Nuvu Muudu'no Kuunodolenyugono. Aki toro toonyu Aiyowo'mo Kuunodolenyugono.” Dodowodekono.

Joonol Krais toollu kwonoka tovinokwono

⁹ Nuvu Joononyu kemi telludai'yago toonyubusuko ikullumo'nodumdonyugono. Toro te nuu toonyuge'aro kevuge'aro nevu yiuwi'nokai tonol Jisasollu aval'no me'no kuuguro'mwonyowonogano. Aki aguto kig Gooti toolluro mido mollomwalo tovi dolago tomuu nevu yiuwi'nokai tonol aval'no me'no kuulomwalodowadonogano. Aki a'mwo abolo pun kaiyako yanekullugolodopure tovida'ai nevu yiuwi'nokai tonol danyu'nyuwuulo aval'no ibwosunodowadonogano. Toro ibwosunodowado kuvi kuruv nemi Gooti toollu muugollu'mo'mdowadonogano. Aki toro toollu guureji to'no gudupola'dowadonogano. Nuu Gooti toolluro yogalo tokwe'aro Jisasolluno nebal'no kuuguudo tokwe'aro tovake moruudomollodore tovino tov aku'momdo akawai ameranubweyoponyugono. Aku'momdo akavino yovo tov Patimoosovokwono.

¹⁰ Toro te Aguto toollu ilomoropiyo'moneyokwe iruko tollugwoji Gooti toolluro Kuullo tool jurogudo nubweyo'moneyokwe mi yiunokuudo aullo'movanuwopiyokaikono. Toro kuullo'movanuwopiyoduke kuga'gwo kuuno moro buulo tomuuda'ai yogaimaguurai puruv deko guureji doduke tovi kuu'nonyugono. Yogaimaguurai su tov biugel guureji ki'nodowodo to'busuko tovi kuu'nonyugono.

¹¹ Yogaimaguurai su tov aro adokakwono. “Guu yiuwi'nokai kwonbi tonyuno puukwollo yakwollo'bi Jisasolluro 7-pela mollu'bwoto ton wagwolago go'no go'no wo'dupudo tonyomno duuwapiyono. Mollu'bwoto su tonyuno yovo tov arogano. Efesosokwe Sumenakwe Pegamomokwe Taitairokwe Sadisokwe Filadelfiyakwe Leyadisiyakwe togano.” Yogaimaguurai tov toro adokakwono.

¹² Yogaimaguurai doduke su tovino nuu ala'mwol dukodadopiyokwe tovino wonomallo'mo toonyu gunyubwosumdo sonyugono. Toro ino sumoneyokwe kwono tov gool tovida'ai 7-pela gworeko gudupolallo'moneyokwe sakwollungiko punyu kwononyugono.

¹³ Aki 7-pela gworeko gudupolallo'moneyokwe su tonyu akuuto toru A'mwo Kwolaiyo Kuunodo tool noda'mduke toollu kwononyugono. Toro tool youro kumi'yago toul yesuno sumaiyokwe aki gool tovida'ai laiyo agubullungiko tobal gami kupolmdo toru sosoka toollu kwononyugono.

¹⁴ Gamoro mido tokwe'aro aki gamoro midoto tokwe'aro toval wiya'jo kuunodo yalo'nodole tovallu kwononyugono. Wiya'jo su tov sipsip pwolluro ato tokwe'aro sullumi buuruko tokwe'aro tovalbusuko wiya'jo yalo'nodole tovallu kwononyugono. Aki gamoro sumdo toval widuko bwotonyo pwopiyodowodo to'busuko kubalno yalo'nodole tovallu kwononyugono.

¹⁵ Aki gamoro suvlo toval aiyon sallukwa'jo tov duko tovi adovelogullumowopingiko to'busuko yalo'nodole tovallu kwononyugono. Aki gamoro yogaimaguurai tov wonyo allako deko bwotonyo ki'nodowodo to'busuko kubalno guureji doduke tovi kuu'nonyugono.

¹⁶ Toro tool gami anato tokwe 7-pela sullugabwo toorai amworarokaikono. Toro mwora'no sumaiyokwe gamoro mago tovida'ai molo'mo kwallu'mopto puul alokabokakwono. Kwallu'mopto su toul imgu amgu do'nyo do'nyo avairo'nyungiko tousi kwononyugono. Aki gamoro sumdomago tov kuujunapto togasuro kuujo tool guureji dodowodo to'busuko kubalno bwotonyo pwopiyoduke tovi kwononyugono.

¹⁷ Toro toollu wonyuno sumoneyokwe nuu a'mwo bwiyo pwolbusuko gamoro suvlo tovi dolago tomuu kwolomuulo'naronyugono. Toro wolomuulo'na'dore kuvi kuruv gamoro anato tov mi nubogai'nyuno sumaiyokwe aro anyudokaikono. “Guu luko mibinono. Nuu Muudu'no Kuunodolenyugono. Aki nuu Aiyowo'mo Kuunodolenyugono.

¹⁸ Aki nuu Aiyo Yiunokuudo Mujomwekovlaiyokweyolenyugono. Toro toonyu me'no abolo kwonyu kuruv aiyo yiunokuudo mujomwekovla'mdumdonyugono. Toro te guu mi neya donuwonono. Nuu bolnodo tokwe'aro a'mwo me'no bolodupudo tooravuro tomge'aro tovallu kudo'aiko kuusubweyo'moneyokwe ki tov mwora'dumdonyugono.

¹⁹ Toro te guu yiuwi'nokai me'no kwonbi tonyuno puukwollo neya jakwollono. Agasuro sumo'nadokwopo togai'aro lukomgu nyumo'nugobupino kugai'aro yiuwi'nokai tonyuno guu puukwollo neya jakwollono.

²⁰ Aki guu sumdo me'no kwonmado tovuro kavlo kuruv puukwollo neya jakwollono. Moro anato tovi 7-pela sullugabwo amworako tokwe'aro gool tovida'ai 7-pela gworeko gudupolallo'moneyokwe tokwe'aro tovalluno kavlo tov arokwono. Moro anato tovida'ai 7-pela sullugabwo amworako su tobuul 7-pela a'mwono moduvomwallokwe tooraino'busukogano. Su tooro ensel pworobusuko moro 7-pela mollu'bwoto tonyu moduvomwalodupudorogano. Aki 7-pela gworeko gudupolallo'moneyokwe su ton moro 7-pela mollu'bwoto go'no go'nodo tonyuno'busukogano.”