2 Timooti 1 - Gooti Toolluro Yogalokwono

¹ Nuvu Poolonyugono. Toro toonyu Krais Jisasolluro kuurotokwe wimo'nyo'moneyokwe Gooti gavnokwe tool ilaiyo wino'no mi me'no ajanubweyokanyugono. Toro ajanubweyoka tov aro'mokwono. Gooti tool yiuwi'nokai a'mwo abolo Krais Jisasolluno kuudo kuubwepi tonyu aiyo yiunokuudo mujomwekovla'mwalpino tovino subuu'yamju me'no kwiyokaikono. Su toro tonyuno moruujo'moneyokwe Gooti tool mi me'no ajanubweyokanyugono.

² Toro toonyu pas akav Timootiyekujomno saguukwollumono. Guu moro kwolaiyo kuunodo tookubusuko nyumo'nodumdo tookujuno kalo buuropino nyunodowodekugono. Toro tookuji nemi Nellunumiyago Gooti tooke'aro nemi Aguto Krais Jisaseke'aro tonumdalluro yasuwa'wino sugumaluko tokwe'aro gumino kalo mamwonyodubulo tokwe'aro sumwoluko kavo wosunyo'mo tokwe'aro su ton nokwo gubwemwalbullunekugono.

Nevu Jisasolluno kuuguudo sugudo tokwe moruujo'mo tovino wogulo nyumwala'jokwe tovinokwono

³ Nuu Gooti toollu womdo wiyodumdonyugono. Toro toollu yiuwi'nokai lomwo togake'aro sulato togake'aro toga gumino tov, “Nenyoo,” wuudodumdonyugono. Aiyoga mi nyukweyago tooro Gooti toolluro womdo tovi wiyo'mo tov kemi poowokalago tovi me'no kuuluuwo'dopure tonyu kuvinono uumjunodupu subusu'nyogalo kuujajuporogano. Su toro to'busuko kubalno nuu kwonyu kuruv mi poowokalago tovi me'no kuulanuwo'dowodo tovi kuvinono uumjunodum Gooti toollu gumiyo'moneyokwe subusu'nyogalo wuudodumdonyugono.

⁴ Sumdomgu nuu gumi nogugollu'meyo'mo yodore toga guu kumdo adodekugono. Toro te nuu gumoro kumdaluko abwoloka su tovino aiko te kuudo you'movla'mdumdo tovino tov gumi gwonyo'mo nyunodowodonyugono. Nuu gumi me'no agwonmi toga ilaiyo bwotonyo tov moro poowokalago tovi noullo'mowopiyonokwono.

⁵ Aki nuu gumoro Krais toolluno kuudo kuunodo uubweyodumdo tovino aro kuudo you'movla'mdumdonyugono. Muudu'nodo toga gumi jukeyago Loowisokwe'aro gumi juneyago Yiunisokwe'aro tonal Krais toolluno kuudo kuunodo kuubweyolonakono. Su toro tonalbusuko aga guu kweku kuruv Krais toolluno kuudo aval'no uubweyodumdo tov gumoro poowokalago tovi me'no kuullo'mowopiyodowodokwono. Nuu su toro kuudo yaguu'dumdonyugono.

⁶ Toro tovino tov guu aro tovino aki aiko te kuudo neya jou'movlavogawono. Sumdomgu guu Gooti toolluro womdo tovi imwalbino'moneyokwe nuu ato tokwe agubogai'nekugono. Toro agubogai'no toga Gooti tool gamoro womdo tovi imwalbino'moneyokwe yasuwa'wino me'no agujabokaikugono. Toro te guu Gooti toolluro yasuwa'wino agujaboka su tovi pwo'miyo yamjuro'mdo'bure toga yasuwa'wino su tov widuko to'busuko guureji neya abomjengelogawono.

⁷ Kuudo neya jaurono. Gooti tool gamoro Kuullo toollu nekullabodowodo tov nevu luko imwalano'moneyokwe nekullabodowodolmaiyo. Toro kuvi kuruv nevu jurogudo imo'nyo'mo tokwe'aro kalo buuropino mollo'mo tokwe'aro nevnokwenolluro pasudo tonyu pi'mwono mollomwallunyo'mo tokwe'aro su tonyuno'gwowi neya mujumovla'mwalano'moneyokwe Gooti tool gamoro Kuullo toollu nekullabodowodekono.

⁸ Toro tovino tov guu a'mwo abolo punyu nemi Aguto toolluno kuu'maiyo toru moruujo'moneyokwe tovino wogulo mibinono. Aki nuu Aguto toollu uumjunodumdo tovida'ai wuulo killo'mo ago tovi kuule'na'dumdo kwonyuno kuruv kuu'maiyo toru moruujo'mo tovino wogulo mibinono. Nuu Krais toolluno kuuguudo sugudo tokwe moruudodore tovida'ai tagunyo ama'mwakonyugono. Toro ama'mwako toonyuge guu kweku kuruv Gooti toolluro jurogudo gubweyodowo'jure tokwe Krais toolluno kuuguudo sugudo tov amoruudubi tovida'ai jul'nyo pun nokwo ma'binekugono. Su toro ama'bi tovino'mo guu neya jovrowosunogawono.

⁹ Kuudo neya jaurono. Gooti tool nemi ma'no ma'nodo tovuro kirumwallo tovida'ai me'no abomollurolovonekumokalokwokanogano. Aki nevu gamoro pasudo idopto'nodo tonyu uumjungovla'mwalano'moneyokwe adonekumarokanogano. Gooti toolluro su toro adonekumaroka tov nevnokwenolluro womdo yodowore tovida'aiyo'maiyo. Toro kuvi kuruv Gooti gavnokwe toolluro ilaiyo winodowodo tokwe'aro gamoro yasuwa'wino sugumaluko tokwe'aro toval nekullabodowodo tovida'aiyokwono. Gooti toolluro yasuwa'wino sugumaluko su tov aiyoga yiuwi'nokai ton yere mimo'nyodopure togada'ai Krais Jisasollu'aro nonekullabiyo'moneyokwe me'no sovrovanekubweyajukokwono.

¹⁰ Toro te aga nemi bomollurolovonekumokalokwiyo'moneyokwe Krais Jisasol biyanekulo'nodowo gamoro yasuwa'wino sugumaluko su tovino kuu'maiyo toru bomollolupto'nanekubweyodowodekono. Toro tool bolnodo tovuro jurogudo tovi kaiyako me'no amollounapiyokaikono. Toro mollounapino sumaiyokwe aga'no'gwowi gamoro kuuguudo sugudo tov bako to'busuko imo'nodowodokwono. Toro tovi'aro aiyo yiunokuudo mujomwekovlaiyo'moneyokwe tovi kuu'maiyo toru me'no bomollolupto'nosodowodekono.

¹¹ Gooti tool gamoro womdo aro tonyu yo'moneyokwe mi ajanubweyokanyugono. Nuu a'mwo abolo punyu kuuguudo sugudo tokwe moruudomollo'mo tokwe'aro kuurotokwe wimo'nyo'mo tokwe'aro aki yodubwosomollo'moneyokwe womdo tokwe'aro su toro womdo tonyu yo'moneyokwe Gooti tool mi me'no ajanubweyokanyugono.

¹² Toro te nuu womdo su tonyu yodore tovida'ai jul'nyo akan ama'mwakonyugono. Toro kuvi kuruv nuu jul'nyo ama'mwako tovino wogulo mibwosunmwakonyugono. Su tov aro tovinokwono. Nuu kuudo uubweyodumdo Krais Jisasolluno aro kuudo me'no youroma'dumdonyugono. Oo su toolluro iruko aguto tollugwo yere mabai'mo'mdowo'jure akaga moro womdo yomjumovla'mdo'mure tonyu Krais tool pi'mwono nokwo mollonumwalmwalonekono. Tono tono mollonumwalowo'ji yiuno gamoro iruko aguto tollugwo abai'mowo'ji toga'no pi'mwono nokwo yellukuromollonumwalmwalonekono. Kuudo yau'dumdonyugono.

¹³ Toro te guu moro Krais Jisasolluno kuuguudo idopto'nodo sodogubwasajo tonyu me'no kuu'nyajudekugono. Kuuguudo idopto'nodo su ton a'mwo abolo punyu sodubwasubi toga yiuno aval'nodo tomgu'aro neya yodubwasumwalbinekugono. Guu Krais Jisasollu me'no kuuguro'mwonyajudekugono. Toro kuuguro'mwonyajudo tovida'ai gumoro kuudo uubweyodumdo tokwe'aro aki kalo buuropino gujunodowodo tokwe'aro pasudo su tovallu guureji neya dogudupolarogawono.

¹⁴ Aki guu kuuguudo sugudo me'no agubwengiko su tollugwoji Gooti toolluro Kuullo kuulonekumwalodowodo toolluro jurogudo tokwe neya domoduvomwalogawono.

¹⁵ Aki guu aro tovino kuudo nyau'mwakuno. Yiuwi'nokai kwako Esiyada'ai Jisasolluro a'mwo abolo ton mi buulo anuugunyumopiyopogano. Aki su toro anuugunyumopiyopo tonyuda'ai a'mwo pworalluno yovo tov Fijeloseke Hermoogeneseke toorakono. A'mwo su to kworal kuruv mi buulo anuugunyumopiyolorakono.

¹⁶ Toro kuvi kuruv Aguto tool a'mwo Oonesifoorosolluno kalo mamwonyono'moneyokwe tovino nyunodowodonyugono. Su tov aro tovinokwono. A'mwo su tool bwotonyago toga mi ilaiyo yanyugolodowodekono. Aki toro tool nuu senyo wuulo tokwe ki'na'dore toonyuno wogulo mibwosunyajukekono.

^17-18 Guu kweku kuruv a'mwo Oonesifoorosolluno kuudo me'no youroma'dumdekono. A'mwo su tool wagwolago Efesosda'ai Jisasolluro mollu'bwoto tobuurai akuuto toru womdo bwotonyo sajukekono. Su toro toolluno guu kuudo me'no youroma'dumdekono. Toro tool wagwolago Room akavi abai'movoka toga mi nuwonyo'moneyokwe yiuwi'nokai tomuu a'mgono so'mgonomollokaikono. Toro yo'mgonomolluno yo'mgonomolluno sumaiyokwe kuvinono so'mgononumarokaikono. Toro toolluno nuu subusu'nyogalo aro dodumdonyugono. “Oo Krais Jisasolluro kooti yogalo jainyubwollo'moneyokwe iruko aguto tollugwoji Aguto tool a'mwo su toolluno kalo neya amamwonyono.” Dodumdonyugono.