2 Samwel 7 - Gooti Toolluro Yogalokwono

Yogalo mollajokwe proofet Netenol Gooti Yawelluro yogalo tov Devitollu kuubweyoka tovinokwono

¹ Toruda'ai Gooti Yawel Isuraiyolda'ai tonyu ikomago tooro molo nobwipiyokweyo'mo uumjuku'duke toga ilaiyo to'no amwallajupogano. Toro te a'mwo aguto kig Devitol gami ago toru kavo to'no amwallajukekono.

² A'mwo aguto kig su tool proofet Netenollu aro kuudoganokaikono. “Guu neya doonono. Nuu ago sugumaluko iko sida tokwe amojungiko akavi mwalodumdonyugono. Toro kuvi kuruv Gooti toolluro Subuu'yamjo'mo Bookis to'gwowi yiuno sel ago tovino kuula'dowodokwono. Toro tovino tov nuu ago kuunodo puruv nokwo modumonyudeyo?” Kuudoganokaikono.

³ Toro kuudoganoka tovi Netenol a'mwo aguto kig toollu kuudokaikono. “Gooti Yawel guuge amwakulo. Toro tovino tov gumoro yiuwi'nokai yo'mo kuudo sau'mwakudo ton nokwo ibinekugono.” Kuudokaikono.

⁴ Toro kuudoka kuvi kuruv surakuuto su tollugwoji Gooti Yawel gamoro kuuguudo tov Netenollu aro kuudokaikono.

⁵ “Guu moro yogalo agudumi akakwe mokavlavo'bi moro womdokwe Devitollu aro duudono. “Moro ago tovi mojo'moneyokwe tool guu kwekumaiyo. Toro kuvi kuruv moro ago tovi mojo'moneyokwe toolno'gwowi gumoro muugunyo tookono.” Toro wuudo'bi aki aro duudono.

⁶ “Nuu Gooti Yawenyu aiyoga Isuraiyolda'ai tonyu Ijupda'ai amollurolovomokabo togada'ai yiuno aga'no ago bwotonyo puvi mamwalodumdonyugono. Toro kwonyu kuruv yiuno sel ago tovino to'no mujomwekobodumdonyugono.

⁷ Toro toonyu Isuraiyolda'ai togai yiuwi'nokai ga tomuu ga tomuu yomollodowado toga a'mwo abolo judo'no judo'no iko tovasuda'ai tonyu moduvomwallo'moneyokwe a'mwo mido mollomwalokwe pworai ajesajonyugono. Toro ajesajo su toorai pwolnodo kwollu kuruv aro muudoganyajonyugono. “Guu miyo'mo ago bwotonyo puruv iko sida tokwe mamodumwakudo tov buro'nyo'mo'mdeyo?” Muudoganyajonyugono.”

⁸ Aki nuu Jurogudo Kuunodo Gooti Yawenyuro yogalo agudumi akavi Devitollu duudono. “Nuvnokwe toonyu guu sipsip toorai gwo'gwo'womdo tomuu moduvomwalodore tekwoguji gumarono moro Isuraiyolda'ai a'mwo abolo tonyu a'mwo aguto yovokwe wimo'nyo'moneyokwe ajagubweyekugono.

⁹ Toro tooku yiuwi'nokai yomollodore tomuu nuu kwonyuge yomollodowolokwono. Toro yomollodowolo toga gumi ikomago toorai nuu kaiyako mollugolamo'mdumdonyugono. Toro toonyu aga gumi yovo agutokwe imo'nyo'mo gubwemekugono. Kwako akavida'ai mwalodupudo a'mwo aguto yovokwe pworaino dodupudo to'busuko kubalno gumino aval'no gudupinekugono.

^10-11 Aki guu neya duu'nono. Aiyoga nuu a'mwo judo'no judo'no toorai kemi mido mollekumwallo'moneyokwe amolludapiyajorogano. Toro toorai ikomago pworo molo bwiyodupu kaiyako amollugolameyajuporogano. Toro kuvi kuruv aga'no'gwowi a'mwo magu'nyokwe pworo kemi kaiyako bomollugolaikumeyo'mo bodopure toorai nuumjuku'mwalmonyugono. Toro tovino tov moro Isuraiyol a'mwo abolo togaikullu mekumwallo'mo kwako su tovi me'no ajesonyugono. Toro towai kuulomwalodopure togaikullu pworo kaiyako miyaikullugolmwalpinorogano. Toro yodo'mure tovida'ai guu Deviteku kavo mwalo'bi gumoro jukweyago kwoloraiyo ton bwotonyago yowosungovla'mwalpinogano. Nuu Gooti Yawel toonyu subuu'yamju toro adagujumono.

¹² Aki toro tooku yomjomwekovlavo'bi abolbi toga gumoro kwolaiyo kuunodo pwol ganumiyago tookujuro aiko toru marowo'ji a'mwo aguto kig imo'nonekono. Toro sumo'no'ji toolluro mido mollomwalo yodowo'jure tovi kaiyako nyugolpiyokweyo'mo nuvnokwe toonyu mollomwalmekono. Toro mollomwalodo'mure toga gamoro mido mollomwalo tov jurogudo imo'nugovlawonokwono.

¹³ Toro sumo'no'ji su tool mino yovo tovi ilomonuwopiyo'moneyokwe ago tovi modonekono. Aki yiuno su toolluro iko tovasuda'ai toorono a'mwo aguto kig yiunokuudo imo'nugovla'mwalpinorogano.

¹⁴ Aki toro toollu nuu ganumiyago wimo'no'mi aki su tool moro kwolaiyo nyumo'nonekono. Toro nyumo'nowo'ji ma'no ma'no yodowo'jure toollu a'mwo kuunumiyago tooro kemi kwolaiyo toorai movagu'mwojodupudo to'busuko kubalno nuu nomovagu'mwojumekono.

¹⁵ Toro kwonyu kuruv kalo buuropino mollo'mi yiunokuudo mamovomjapimekono. Nuu aiyoga Soolollu movomjapiyono guu gamoro aiko toru amarodo to'busuko kubalno aki aiko te aval'no mimonyugono.

¹⁶ Gumoro jukweyago toorai mamovomjapimwalmo tovino tov yiuwi'nokai toga yiuno gumoro iko tovasuda'ai toorono a'mwo aguto kig imo'nopi kemoro mido mollomwalo tov yiunokuudo mujo'movla'mwalonokwono.” Devitollu toro duudono.” Gooti Yawel Netenollu toro kuudokaikono.

¹⁷ Toro kuudoka tovi Netenol Devitollomno plaino sumaiyokwe Gooti Yawelluro yiuwi'nokai kuuguudo kuudoka tonyu kuvinono kuudokaikono.