2 Kuuguudo 5 - Gooti Toolluro Yogalokwono

Subuu'yamjo'mo Bookis tov Gooti Yawellu ilomoropiyo'moneyokwe ago tovi aulomorosopo tovinokwono

¹ To'no'gwowi a'mwo aguto kig Sooloomoneke'aro gami a'mwo womdokwe toorogai'aro tooro Gooti Yawellu ilomoropiyo'moneyokwe ago tov amodopiyoporogano. Toro modopino sumaveyokwe Sooloomonol silva togai'aro gool togai'aro dis togai'aro tonyu momworaro'no ago amodosopo tovi anakuuto tomuuno amokaulokaikono. Yiuwi'nokai amokauloka su ton aiyoga gami ganumiyago Devitol aiyo kuuno mwaloduke toga Gooti Yawello'moneyokwe me'no ajesajukogano. Toro tonyu ago tovi anakuuto tomuu go'no adovorojosungiko toru aulomorosokaikono. Toro aulomorosoka su toru yiuno Gooti Yawello'moneyokwe tonyuno to'no woso'morukono.

² Toruda'ai Sooloomonol Subuu'yamjo'mo Bookis tov Devitolluro wagwolago Saiyoon toru wo'duke tovino aro kuudo saurokaikono. Subuu'yamjo'mo Bookis su tovi mokailabopi Gooti Yawellu ilomoropiyo'moneyokwe ago tovi neya abilomorosupuro. Kuudo saurokaikono. Toro kuudo sauroka tovino tov Isuraiyolda'ai a'mwo aguto yovokwe toorogai'aro go'no go'no iko tovasuda'ai a'mwo mido mollomwalokwe toorogai'aro toorai wagwolago Jeruusalem toru i'bwo'nupureyokweyo'mo adomarokaikono.

³ Toro doma'no sumaiyokwe yiuwi'nokai Isuraiyolda'ai tooro lobako naba 7 toollu a'mwo aguto kig Sooloomonollu abuuru'maroporogano. Toro abuuru'maropo su toga lubullu doto puruv yanyo'moneyokweyogakono. Lubullu doto su tov aro tovinokwono. Aiyoga kemi kwikweyago tooro sel ago tonyu amjo'mabiyajupo toga'no aki aiko te kuudo yaullo'moneyokweyokwono.

⁴ Toro te Isuraiyolda'ai mido mollomwalokwe su tooro i'bwo'nyuno sumaveyokwe toga Livaiyolluro iko tovasuda'ai pworo Subuu'yamjo'mo Bookis tovi kwolomoraporogano.

⁵ Toro te Livaiyolluro iko tovasuda'ai pris tooro Subuu'yamjo'mo Bookis su tokwe'aro ilomoropiyo'moneyokwe sel ago tokwe'aro yiuwi'nokai sel ago tovi kuula'dupudo togai'aro tonyu mokailabo'mno Gooti Yawellu ilomoropiyo'moneyokwe ago tovi abilomorosoporogano.

⁶ Toro bilomorosodopure toga a'mwo aguto kig Sooloomoneke'aro yiuwi'nokai Isuraiyolda'ai a'mwo abolo togai'aro ton Subuu'yamjo'mo Bookis tovi sumdollu toru su'bwo'nopogano. Toro i'bwo'nyuno sumaveyokwe sipsip toorogai'aro buulmokau toorogai'aro bwotonyago kuunodo toorai aromiroudapiyopogano. Toro aromiroudapiyopo toorai a'mwo pwolnodo kwol kuruv ku'nono majagilokarogano.

⁷ Toro me'no romiroudapino sumaveyokwe pris tooro Subuu'yamjo'mo Bookis tov Gooti Yawellu ilomoropiyo'moneyokwe ago tovi anakuuto tomuu mokaulno sumaveyokwe Gooti toolluro pwekwapto kuunodo toru aulosoporogano. Toro aulosopo tov seruubim ensel sokwolludapiyopo tooralluro puviyo tovi dolago tomuu kworokakwono.

⁸ Seruubim ensel tooralluro puviyo awiyoku'bworapingiko su ton Subuu'yamjo'mo Bookis tokwe'aro ikwovomokavlaiyo'mo iko tovake'aro tonyu bu'duvoloma'dowodokwono.

⁹ Bookis tovi ikwovomokavlaiyo'moneyokwe iko su toval bwotonyo kumi'yago tovalluno tov a'mwo pwol Gooti toolluro pwekwapto kuunodo tovi sumdollu toru boda'mduke toolno nokwo aulounyopiyajukekono. Toro kuvi kuruv kwa'mgu tomguda'ai to'gwowi ku'nono mwonyajupogano. Toro te iko su toval yiunokuudo tono kwollajulovakono.

¹⁰ Aki Subuu'yamjo'mo Bookis tovi anakuuto tomuu yiuno loowokwe sulbweko tovalno aulallajulokwono. Aiyoga Isuraiyolda'ai ton Ijupda'ai bolokwo'mno muumuudo Sainai toollu tomuu mwalodopure toga Gooti Yawel a'mwo abolo su togai subuu'yamju sajunopogano. Toro sajunopo togada'ai Moosesol loowokwe sulbweko su tovallu Subuu'yamjo'mo Bookis tovi anakuuto tomuu aulomollurosokavakono. Toro aulomollurosoka togada'ai wo'dubulovakono.

¹¹ Aki pris tooro Subuu'yamjo'mo Bookis tov me'no kuulomoroso'mno Gooti toolluro pwekwapto toruda'ai alokaboporogano. Yiuwi'nokai pris su towa kemi poowokalago ton Gooti toolluro sumdo tovi me'no sovraimwonyopo tovino tov Gooti toolluro pwekwapto toru nokwo aullomolloporogano.

¹² Aki Livaiyolluro iko tovasuda'ai pris su tooravuro pworo ilomoropiyo'moneyokwe dato dodupudorogano. Toro tooraino yovo tov Asapeke Hemaneke Jeduutuuneke toorogano. A'mwo pworapwol su toorogai'aro kemoro kwolaiyo toorogai'aro kevuge avalo pworogai'aro tooro youro kunaikwoljo ton molloso'mno romiroudapiyo'moneyokwe dukwagupto tovi kuujo tool sulopiyamoka tomgu adavoporogano. Toro adavopo su tooro pworo dato daillo'moneyokwe gita judo'no judo'no kula'nokai togai'aro kapa pleto to'busuko togai'aro tonyu momworaro'mno dato adairoporogano. Aki pris su tooraida'ai 120 pworo biugel togai dato adairoporogano.

¹³ Toro tooro Gooti Yawellu ilomoropiyo'moneyokwe dato ton pi'mwono adaillajuporogano. Toro dai'dupu a'mwo dato jokwe toorogai'aro biugel killokwe toorogai'aro tooravuro deko ton yiuno avalo puru'mono sumo'nyajupogano. Toro te pris pworo Subuu'yamjo'mo Bookis tov Gooti toollu ilomoropiyo'moneyokwe ago tovi me'no kuuloso'mno lokabodopure toga a'mwo gabovo tooro ilomoropiyo'moneyokwe dato tov amoderomaroporogano. Aki su tooraida'ai pworo kemi biugel togai airapiyoporogano. Aki su tooraida'ai pworo kemi kapa plet to'busuko togai iwago adairoporogano. Yiuwi'nokai su tooro Gooti Yawellu ilomoropiyo'moneyokwe dato aro adairoporogano. “Nemi Gooti Yawelluno ilomoropiyowano. Toro tool nemi ilaiyo monekullodowo yiuwi'nokai toga nemino kalo buuropino winyokwekonoo.” Adairoporogano. Toro dai'dopure kuga'gwo kuuno Gooti Yawellu ilomoropiyo'moneyokwe ago tovi anakuuto tomuu sulu'wo puruv aullo'mowopiyokakwono.

¹⁴ Toro kuullo'mowopiyoduke tovi anakuuto tomuuda'ai Gooti Yawelluro bako bwotonyo tov pwopiyoduke tovino tov pris tooro kemi womdo ton ku'nono mabomjumoulaporogano.