2 Kuuguudo 2 - Gooti Toolluro Yogalokwono

Sooloomonol Gooti Yawellu ilomoropiyo'moneyokwe ago tovi mojo'mo ton sovrowosoka tovinokwono

¹ To'no'gwowi Sooloomonol aro kuudo saurokaikono. Nuu Gooti Yawelluro yovo tovi ilomoropiyo'moneyokwe ago bwotonyo puruv modumonyugono. Toro tovi me'no modopiyo'mi nuvnokwenyo'mo ago puul modumonyugono. Kuudo saurokaikono.

² Sooloomonol toro kuudo yau'no sumaiyokwe Gooti Yawellu ilomoropiyo'moneyokwe ago tovi mojo'mo toorai aro ajesokaikono. 80,000 a'mwo pworo ago tovi mojo'moneyokwe sulo ton luvamunyudeyo'moneyokwe toorai muumuudo tooraiyomno amorapiyokaikono. Toro morapino sumaiyokwe aki 70,000 a'mwo pworo sulo ton mokamwalpino'moneyokwe toorai amorapiyokaikono. Aki womdo su tovi moduvomwallo'moneyokwe 3,600 a'mwo toorai amorapiyokaikono.

³ Toro morapino sumaiyokwe Sooloomonol Tairuda'ai a'mwo aguto kig Hiramolluno kuuguudo aro adapiyokaikono. “Aiyoga mi nyunumiyago Devitol gami ago mojo'moneyokwe iko sida ton gumi abiyogumallajukekono. Toro te aga nuu kwonyu kuruv iko pun biyogumallo'mo anyunadopiyo.

⁴ Mi Gooti Yawelluro yovo tovi ilomoropiyo'moneyokwe ago puruv modumo'monyugono. Ago amodumi su tov Gooti Yawello'mo kuunodo imo'nonokwono. Ago su tovi nuuge'aro moro a'mwo abolo togai'aro tonol Gooti toollu ilomoropiyo'moneyokwe kuulowa'ji wobeya sudo kuunyokwe pun wiroudapiyodowa'jure toga juto tov muunyu tomuuno mokailmwolawonokwono. Aki yiuwi'nokai toga bret pun Gooti toolluro sumdollu toru wosumwalanonogano. Aki nevu Gooti toollu romiroudapiyo'moneyokwe pworai wimwalanonogano. Su toorai duko tov yiunokuudo nopiyono'moneyokwerogano. Aki yiuwi'nokai lomwo togake'aro sulato togake'aro Sabat togake'aro lobako aiyo wuudabodowo'jure togake'aro aki yiuwi'nokai Gooti Yawelluro lubullu doto yanyo'moneyokwe go'no go'no ajesungiko togake'aro toga yiunokuudo wiroudapimovla'mwalanonogano.

⁵ Toro imovla'mwalano tonolluro Gooti jurogudo su tool yovo agutokwekono. Toro toolluro yovo tov noonyumwonyu gooti pworavuro yovo tonyu kuuwolo'mwallo. Toro toollo'mo nuu ago bwotonyo puul modumo'monyugono.” Adapiyokaikono.