2 Koorin 9 - Gooti Toolluro Yogalokwono

Jeruusalemda'ai Jisasolluro a'mwo abolo supto yodopure tobuurai wiyo'mwojo'mo nuugwiyo su'bworosopo tovinokwono

¹ Nuvu kemi aki aiko te aro sokwollaikubweyo'mujukonyugono. “Oo kevu kwako Juudiyada'ai Gooti toolluro a'mwo abolo supto yodopure tobuurai wiyo'mwojo'mo nuugwiyo tov domollu'bworosogaulo.” Su toro sokwollaikubweyo'mujuko kuvi kuruv kevnokwe togaikulno'gwowi yogalo su tovino supto mimwakopogaikikono.

² Su tov aro tovinokwono. Kevu kwako Juudiyada'ai Jisasolluro a'mwo abolo tonyu wiyo'mwojo'mo guureji me'no yovraimwonyodupudogaikikono. Su toro tovino nuu kuudo me'no yaikuu'dumdonyugono. Aki nuu Masedooniyada'ai Jisasolluro a'mwo abolo tonyu kemino aro wuudodumdonyugono. “Oo kwako Akaiya tomuu wagwolago Koorinda'ai Jisasolluro a'mwo abolo ton kworomo pullu me'no avlavoka togada'ai a'mwo abolo supto yodopure tobuurai wiyo'mwojo'mo me'no sovraimwonyajupogano. Aki toro ton aga kuga kuruv wiyo'mwojo'mo kuuno yovraimwonyodupudogano.” Kemino su toro me'no wuudodumdonyugono. Toro te kevu kwako Juudiyada'ai supto yodopure tobuurai wiyo'mwojo'mo me'no sovraimwonyajupo su tov Masedooniyada'ai bwotonyago tonyu me'no agaluguunyumwojokakwono. Toro te Masedooniyada'ai Jisasolluro a'mwo abolo kun kuruv kwako Juudiyada'ai a'mwo abolo supto yodopure tobuurai wiyo'mwojo'mo winodupudogano.

³ Toro te nevu kuuguudo aro wuudodowadonogano. “Oo Koorinda'ai ton kwako Juudiyada'ai tobuurai wiyo'mwojo'mo me'no sovraimwonyumwakopogano.” Nemoro su toro wuudodowado tov yasuwa'yogalo to'no nyumo'no'jo. Toro tovino tov nuvu nemi nellugwai'yago toorobusuko nonekullumo'nodupudo a'mwo pworapwol su toorai kemiyomno amekwopiyamonyugono. Sumdomgu nuu subuu'yamju aro me'no kwiyajonyugono. “Oo Koorinda'ai Jisasolluro a'mwo abolo ton nuugwiyo i'bworoso'mo me'no sovraimwonyumwakopogano.” Moro subuu'yamju me'no kwiyajo su tov kemino yovo tovi muunyu toru'aro sulomodomorekwopiyajonyugono. Toro te kevu subuu'yamju su tovi sukwo nyupiyokwe tov nuugwiyo ton i'bworoso'moneyokwe neya jovraimwonyogaulo.

⁴ Toro kuvi kuruv kevu miyovraimwonyupi to'gwowi nuuge'aro a'mwo Masedooniyada'ai toorogai'aro toonol kemi nobekuru'maranonogano. Su toro abekuru'mara'ji toga kevu nuugwiyo i'bworoso'mo miyovraimwonyodopure togaikullu aikwona'ji tov wogulo ibwosunanonogano. Aki wogulo su tov yiuno nevnokwe toonolno mibwosunanokwono. Neya duu'nyulo. Kev kugaikul kuruv wogulo bwotonyo nyubwosunpinogaikikono.

⁵ Toro tovino tov nuu kuudo sauronyugono. Oo mi nyugwai'yago toorobusuko nonyumo'nodupudo Jisasolluro a'mwo pworai aro wuudumonyugono. “Nevu wagwolago Koorin toru yere mai'mo'mdowa'jure toga kevu wagwolago su tovi sumdomgu wanopi neya ki'movapinorekikono. Toro ki'movapi toga wagwolago su tovida'ai Jisasolluro a'mwo abolo ton nuugwiyo yasuwa'wiyo'mo tov i'bworosupureyokwe kevu neya yovo'dogalpinorekikono.” Nuvu su toro modapimonyudeyo. Kuudo sauronyugono. Toro te kevu Koorinda'ai Jisasolluro a'mwo abolo togaikul nuugwiyo yasuwa'wiyo'mo su tovino subuu'yamju me'no sajupo tov kuvinono neya yovraimwonyupinogaikikono. Su tov aro tovinokwono. Nevu kemi abekuru'mara'ji toga yere mi'bworosodopure togaikulluda'ai nuugwiyo dodoluvekumallo'mo manekullunadopiyo. Toro kuvi kuruv kevnokwe togaikul ilaiyo kuunodo ibwosunopi nuugwiyo tov yasuwa'no wiyo'moneyokwe neya i'bworosumwalpinogaikikono. Su toro tovinokwono.

⁶ Kevu a'mwo abolo pubuurai yasuwa'no wiyo'mwojo'mo tovino kavlo puvi neya jouromallulo. Kavlo su tov arokwono. A'mwo pwol sulo pwekwono pwekwonodo tollovo avlolloso'ji su tool wosamujuko tov yiuno pwekwono pwekwonodo to'no mulomaronekono. Toro kuvi kuruv a'mwo pwol sulo bwotonyago ton avlolloso'ji su toolno'gwowi wosamujuko kuruv bwotonyago mulomaronekono.

⁷ Toro to'busuko kubalno kevu yiuwi'nokai pwolno puru'monodo togaikul a'mwo abolo pubuurai wiyo'mwojo'mo tovino kevnokwe togaikulluro poowokalago tonyu neya duumjunogaulo. Kevu a'mwo abolo tonyu nuugwiyo wiyo'mo maikulluno'ji tov mwipinono. Aki a'mwo pworavuro daikumuurolo'mdopure tovida'ai to'no nuugwiyo tov nuuwimwalpiyo. Su tov aro tovinokwono. A'mwo pwol gami poowokalago tokwe ilaiyo ibwosunowo'ji nuugwiyo tov kwiyo'ji su toolluno Gooti tool kalo buuropino winyokwekono. Su toro tovinokwono.

⁸ Aki Gooti tool noonyumwonyu sugudo togai kemi nokwo ikullamwalonekono. Gooti toolluro su toro ikullamwalono tov aro tovino'mokwono. Buro'nyo buro'nyodeyo pun kemi abaiki'mowo'ji toga kevu noonyumwonyu punyuno supto mipinogaikikono. Aki yiuwi'nokai sugupasudo go'no go'nodo kun kuruv nokwo molludo'movla'mwalpinogaikikono.

⁹ Gooti toolluro yogalo puruv aro sakwollungikokwono. “A'mwo pwol a'mwo abolo supto yodopure tobuurai yasuwa'no uumwodeyodowodekono. Aki toro tool a'mwo abolo apoo'nyaiyo tobuurai wiyo'mwojo'moneyokwe wiyodowodekono. Aki gamoro sugupasudo su tollovo yiunokuudo mujo'movla'mwalpinollovogano.” Sakwollungikokwono.

¹⁰ A'mwo pwol Gooti toolluro ikulwiyo wiyodowo'jure tokwe marowo'ji gami womdo tovi movlollosodowodekono. Aki Gooti tool a'mwo su toollu wosamujuko nonyo'moneyokwe bret tov wiyodowodekono. Toro te Gooti su tool kemoro ikulwiyo pulolloso'moneyokwe tov bwotonyago youllosumelawo'ji ikullamwalonekono. Toro to'busuko kubalno Gooti toolluro ikullabodowo'jure tovida'ai kemoro sugupasudo amolludo'movlapi ton sulo bwotonyago ki'nugovla'mwalpinogano. Toro ki'nugovla'mdopure tonyu bwotonyago mollu'bworosumwalpinogaikikono.

¹¹ Oo kevu Gooti toolluro a'mwo abolo pubuurai yiuwi'nokai go'no go'nodo tomgu'aro yado wimwalpino'moneyokwe ton Gooti tool nokwo ikullamwalonekono. Yiuwi'nokai su toro aikullabwo'ji togai kevu kuto ivito nuugwiyo bwotonyagokwe togaikulbusuko imo'nupinogaikikono. Gooti toolluro toro ikullabodowo'jure tonyuda'ai kevu su'bworosupi su tonyu nevu mokavlavowa'ji Gooti toolluro a'mwo abolo supto yodopure pubuurai nokwo wiyanonogano. A'mwo abolo su tobuuro nemi'aro amapi toga Gooti toollu, Nenoloo, wuudumwalpinogano.

¹² Neya duu'nyulo. Kevu Gooti toolluro a'mwo abolo tobuurai wiyo'mwojo'mo womdo su tovi kuvinono sopipi tov aro toval nyumo'nubullunovakono. Puruv Gooti toolluro a'mwo abolo su tobuuro kemi supto yodupudo tonyu kuvinono nomapinogano. Aki aguto kuunodo puru'gwowi a'mwo abolo amapi su ton Gooti toollu, Nenoloo, bwotonyo wuudumovla'mwalpinogano. Kemoro womdo sopipi tovida'ai su toro toval nyumo'nubullunovakono.

¹³ Kevu womdo su tovi toro sopipi tov kwako Juudiyada'ai a'mwo abolo ton kemi kamwoga yaikworopi aro kuudo yaupinogano. Oo Koorinda'ai a'mwo abolo su ton Krais toolluno kuuguudo sugudo tovi duumjunmwakovo. Toro ton nuugwiyo bwotonyo i'bworosodupu nevuge'aro yiuwi'nokai Jisasolluro a'mwo abolo pugai'aro tonollu donekullo'mwojumwakovoo. Su toro kuudo yaikuuropi Gooti toolluno yovo tov nyulomoropiyapinogano.

¹⁴ Aki kemino aro kuudo yaikuupinogano. Oo Gooti toolluro yasuwa'wino sugumaluko kuunodo tov wagwolago Koorinda'ai Jisasolluro a'mwo abolo su tonyu wo'dowodo'mdeyo. Kuudo yaikuupinogano. Toro tovino tov kemi ikuru'mallo'mo winpinogano. Aki toro ton Gooti tool kemi aikullo'mwojoneyokwe subusu'nyogalo wuudumwalpinogano.

¹⁵ Gooti toolluro yasuwa'wino nekullabodowodo tov bwotonyo kuunodokwono. Nevu su tovino kuu'maiyo bomollolupto'noso'moneyokwe yiuwi'nokai yogalo ton ku'nono majenyubworopiyanonogano. Toro tovino tov nevu Gooti toollu gavnokweyolluro yasuwa'wino nekullabodowodo su tovino, “Nenoloo,” to'no neya wuudumwalanonogano.