1 Timooti 2 - Gooti Toolluro Yogalokwono

Gooti tool yiuwi'nokai a'mwo abolo tonyu wiyo'mwojono'moneyokwe nevu subusu'nyogalo wuudumwalano tovinokwono

¹ To'no'gwowi muudu'nodo tov Jisasolluro a'mwo abolo ton aro tonyu neya imwalpino'moneyokwe anyunadopiyo. Yiuwi'nokai a'mwo abolo tonyu wiyo'mwojono'moneyokwe kevu Gooti toollu wuudoganopi subusu'nyogalo neya duudogaulo. Aki a'mwo abolo su ton subusu'nyogalo ku'nono muudodupudo tonyuro mago tovida'ai mollodavopi kevu Gooti toollu subusu'nyogalo neya duudogaulo. Aki toro tobuuraino Gooti toollu, “Nenoloo,” duudumovlavogaulo.

² Aki kevu a'mwo aguto kig toorogai'aro gavman a'mwo aguto toorogai'aro kworaino kuruv subusu'nyogalo neya duudogaulo. Kevu su toro kuudupi toga Gooti tool a'mwo aguto su toorai kuudo ilaiyo tov nokwo uubweyonekono. Toro kuubweyo'ji tokwe a'mwo aguto su tooro nemi mido ilaiyo nokwo mollonekumwalpinorogano. Su toro mollonekumwalodopure toga nevu ilaiyo to'no mwalowa'ji nemoro sumwoluko kun kuruv kavo wosunmwalanonogano. Aki nevu Gooti toollu dolago tomuu wiyowa'ji gamoro ilaiyo winodowo'jure tonyu kuvinono nokwo uumjungovla'mwalanonogano.

³ Aki kemoro subusu'nyogalo su toro kuudumovlapi tov nemi nekullo'mwojodowodo Gooti toolluro sumdo tovi ilaiyo wimo'nodowodokwono. Aki subusu'nyogalo su tov Gooti toollu ilaiyo igolodowodokwono.

⁴ Gooti su tool aro tovino ilaiyo winyokwekono. Yiuwi'nokai a'mwo abolo ton kemi ma'no ma'nodo tovuro kirumwallo tovida'ai neya abirolo'nugolokuupureyokwe tovino winyokwekono. Aki toro tool nebaikuuguudo tovino kavlo ton a'mwo abolo kuudo neya youromapureyokwe tovino ilaiyo winyokwekono.

⁵ Neya duu'nyulo. Gooti tool yiuno pwolnodekono. Aki Gooti tooke'aro a'mwo abolo togai'aro ton aki aiko te sumwoluko noullo wosunyo'moneyokwe tov yiuno pwolno momgurowosodowodogano. Su tool Krais Jisasekono.

⁶ Toro tool yiuwi'nokai a'mwo abolo tonyu biyomorabiyo'moneyokwe abolokaikono. Nemi biyonekumorabiyo'moneyokwe kuuguudo su tov Gooti toolluro me'no ajesungiko kuunodo toga kuu'maiyo toru'no kuvinono abomollolupto'nosokakwono.

⁷ Toro te nuu gamoro kuurotokwe imo'no'mi nebaikuuguudo tokwe moruudomollo'moneyokwe Krais tool mi me'no ajanubweyokaikono. Toro tovino tov nuu kuunano magudodumdo kuvi kuruv yiuno nebal'no agudumono. A'mwo abolo Juu tooravuro miyawosunodupudo tonyu yodubwaso'moneyokwe amonuwapiyokanyugono. Toro sodubwasumi tovi'aro Krais toolluno kuudo uubweyopi aki gamoro nebaikuuguudo pugai'aro tonyuno kuudo nokwo youromapinogano. Toro tovino'mo amonuwapiyokanyugono.

Jisasolluro a'mwo abolo tonyuro yomjomwekovla'mwalpino tovinokwono

⁸ Toro te nuu aro tovino nyunodowodonyugono. Kevu yiuwi'nokai tomuuda'ai a'mwo Gooti toolluro womdokwe toorekul su'bwo'nupi toga kemi ato sugudo su tousogai neya bomokailapi subusu'nyogalo duudumovlavogaulo. Aki subusu'nyogalo mujodumovlavopi toga surodo'mdeyo oo yogalo'mdeyo nyoullajunmwalpiyo.

⁹ Aki puruv aro tovino nyunodowodonyugono. Abolo ton youro po'dogalo tousogai neya amollosogapuro. Toro kun kuruv kemi kwa'mgu kulako tonyu guureji yovaisu'nyo'moneyokwe tovino to'no avorugwo'mo'napi ton youro sugumaluko bwotonyago tousogai nyovaisu'numwalpiyo. Aki abolo su ton kemi midoto tonyu rasta bwotonyago togai nyovaisu'nupiyo. Aki goolodeyo oo soolwara tovida'ai sulollovodeyo oo youro nuugwiyo bwotonyo tokwe biyoma'dupudo tousogaiyo'mdeyo noonyumwonyu su togai nyovaisu'numwalpiyo. Toro kun kuruv abolo ton kemi kulako tovi bu'duvoloso'moneyokwe youro po'dogalo touso neya mollosumwalpinogano.

¹⁰ Su tov aro tovinokwono. Abolo sugudo ton yiuno kwa'mgu kulako tovi yovaisu'nyo'mo to'no kuudo miyau'dupudogano. Toro kun kuruv kemi sugupasudo tollovogai to'gwowi youro tousobusuko mollosopi wuuduuwallo'mo winodupudogano. Abolo su tonyuro pun aro dupinogano. “Oo nevu Gooti toollu uumjunyokwenogano.” Su toro adupi ton a'mwo abolo punyu kuu'maiyo toru'no wuuduuwallunyo'moneyokwe kemi sugupasudo tollovai'aro neya wuuduuwallunumwalpinogano.

¹¹ Aki abolo ton a'mwo pworo Gooti toolluro yogalo tokwe yodubwasodopure toga yiuno kaduko to'no wiyopi kwako tomuu'aro neya amwalogapuro.

¹² Toro te abolo puruv a'mwo toorai nyubwaso'jo. Aki toro tov a'mwo toorai mido mollomwalokwe nuuwimo'no'jo. Toro kuvi kuruv kevu su'bwo'nomwalpi toga abolo ton yiuno kaduko to'no au'narogapuro.

¹³ Su tov aro tovinokwono. Gooti tool sumdomgu Adamollu sokwollosokaikono. Toro sokwollosoka su toolluda'ai lukomgu Iviyovi sokwollosokaikono.

¹⁴ Aki puruv Adamol Satanyolluro kuunano yogalo youkuu'nuudoduke tovi kaduko mwiyokaikono. Toro kuvi kuruv Iviyo'gwowi Satanyolluro kuunano yogalo youkuu'nuudoduke tovi kaduko wino sumaiyokwe ma'no ma'nodo tovi abwoloorokakwono.

¹⁵ Toro kuvi kuruv abolo su tobuuro kwoloraiyo tonyu yoma'mwalpino tobuuraino tov Gooti tool nuuwiyo'mwojumwalonogano. Toro ton Jisasolluno kuudo uubwemovlavopi kalo buuropino kwingovlapi tov Gooti tool nuuwiyo'mwojumwalonogano. Aki Gooti toolluro kuunodo wimo'nugovlavopi kevnokwe tobuuro po'dogalo amollomwalnupi kuruv Gooti tool nuuwiyo'mwojumwalonogano.