1 Samwel 8 - Gooti Toolluro Yogalokwono

Isuraiyolda'ai ton a'mwo aguto kig pwollu molludapiyo'mo kwinopo tovinokwono

¹ To'no'gwowi Samwelol yadaiyo sumo'noka toga gami muugunyo toorallu Isuraiyolda'ai a'mwo abolo tonyu mido mollomwallo'moneyokwe ajesokarakono.

² Muugunyo su tooralluno yovo tov muudu'nodo tool Joowelolekono. Lukomguda'ai tool Abija'wolekono. Toro todoral Biyasiba towai mwalodole toga Isuraiyolda'ai a'mwo abolo ton kemi jul'nyo tago togai mokabodopure tonyu kooti yogalo tovida'ai adomdukuurubweyajulorakono.

³ Toro sajulo kworal kuruv kemi kuunumiyago toolluro sajuko kubalno miyajulorakono. Aki toro tooral kemi kuunumiyago toolluro kuumjunyajuko tomgu'aro buulo uugunyumopiyodubul nuugwiyo mallo'mo to'no kwinyajulorakono. Toro toorallu a'mwo abolo jul'nyokwe ton yiulo tomuu nuugwiyo uubiyodopure tovino tov kooti yogalo tonyu kaiyako amollugolameyajulorakono.

⁴ Toro mollugolamo'mdole tooralluno tov yiuwi'nokai Isuraiyolda'ai a'mwo aguto yovokwe tooro i'bwo'no'mno wagwolago Rama'no plaino sumaveyokwe Samwelollu kuuru'maroporogano.

⁵ Toro wuuru'ma'no sumaveyokwe aro kuudoporogano. “Kaduko neya donekuu'nono. Guu yadaiyokwogugano. Aki gumoro muugunyo tooral guu kuunumiyago tookujuro kuumjunyajudo tomgu'aro muumjunodubulorakono. Toro tovino tov nemi mido mollonekumwallo imwalono'moneyokwe guu a'mwo aguto kig pwollu dojesono. Toro ajesubi su tool kantri pumuuda'ai a'mwo abolo tonyu mido mollomwalo yodupudo kig toorobusuko kubalno nemi mido mollonekumwalmwalonekono.” Kuudoporogano.

⁶ Toro te Isuraiyolda'ai tonyuro yogalo aro kuudopo tovi, “Nemi mido mollonekumwallo'moneyokwe a'mwo aguto kig pwollu dojesono,” toro kuudopo tovi Samwelol wuu'no'no ilaiyo mibwosunokaikono. Toro tool Gooti Yawellu subusu'nyogalo kuudokaikono.

⁷ Toro kuudoka tovi Gooti Yawel wuu'no'no Samwelollu aro kuudokaikono. “Guu a'mwo abolo su tonyuro yiuwi'nokai agudadokwopo tonyu kaduko wiyo'bi neya duumjunono. A'mwo abolo su ton gumi kisuvolo magujodopure kuvi kuruv nuu aguto kig mido mollomwalodumdo toonyuno'gwowi kisuvolo anyadokwovo.

⁸ Toro te guu neya duu'nono. A'mwo abolo su ton muudu'no Ijupda'ai amollurolovomokabo togada'ai yiuno aga'no mino buulo uugunyumopiyodupu kemi kuunano gooti pworai uumjungelabodupudogano. Toro yodupudo ton aga guu kwekuji kuruv aval'no agujadokwovo.

⁹ Toro agujadokwopo kuvi kuruv kemoro yogalo agudadokwopo tovi kuvinono uumjuno'bi kemiyo'mo a'mwo aguto kig pwollu nokwo jesubinekugono. Toro jeso'bi kweku kuruv duudapi yogalo neya doduuwiyono. “Kevu aro tovino wako neya dou'nogaulo. Kemi mido mollekumwallo'mo a'mwo aguto kig ajesumi su tool kaiyako yekullugolmovla'mwalonekono.” Doduuwiyono.” Gooti Yawel Samwelollu tooro kuudokaikono.

¹⁰ Toro te Samwelol a'mwo aguto kig pwollu jeso'mo abuudopo su toorai Gooti Yawelluro yiuwi'nokai kuuguudo ton amadokaikono.