1 Samwel 31 - Gooti Toolluro Yogalokwono

Sooleke'aro gami kwolaiyo toorogai'aro tooro abolopo tovinokwono

¹ To'no'gwowi Filistiyada'ai tooro muumuudo Gilboowa toollu muunyu toru Isuraiyolda'ai toorai molo wiyo'mno bwotonyago toorai aromiyosoporogano. Toro romiyosodopure toga Isuraiyolda'ai bwotonyago pworo lukado avlavoporogano.

² Aki Sooleke'aro gami muugunyo pworapwol toorogai'aro kworo kuruv lukado avlavoporogano. Toro pla'mdopure toga Filistiyada'ai tooro povomjai'nyuno sumaveyokwe Soololluro muugunyo Joonataneke Abinadapeke Malkisuuwaike todorotai galamworaro'mno aromiyosoporogano.

³ Toro romiyosuno sumaveyokwe Soolollu avomjai'noporogano. Toro toollu wobo toru ai'movopo toga molo bwotonyo sunoporogano. Toro inyuno sumaveyokwe Filistiyada'ai mollurogudo pworo kemi iroka togai Soolollu abolovopo tovida'ai nobollo'mo sokaikono.

⁴ Toro tool gami molo'mo iro'mwomido tonyu mokavlaiyokwe toollu kuudokaikono. “Gooti toollu kisuvolo wiyodupudo su tooro kemi kwallu'mopto togai mi bopullumovanbweyopi mino ipa'nyo nomanyupiyo. Toro tovino tov guvnokwe tooku gumi kwallu'mopto tokwe neya dopullumovanubweyono.” Soolol toro kuudoka kuvi kuruv gami a'mwo iro'mwomido mokavlaiyokwe tool luko yo'no noromiyoso'mo mwinokaikono. Toro te Soolol gami kwallu'mopto tov momuulludapino sumaiyokwe gavnokwe tool kwallu'mopto su tovi'aro iloga'bwo'naro'no apullumo'narokaikono.

⁵ Toro apullumo'naroka toollu a'mwo iro'mwomido mokavlaiyokwe tool wonyuno sumaiyokwe adokaikono. “Oo Soolol me'no abolmokaikono.” Adokaikono. Toro juno sumaiyokwe gami kwallu'mopto tov momuulludapiyo'no nopullumo'nallo'mo tool kwallu'mopto su tovi muunyu toru suloga'bwo'narokaikono. Toro tool Sooleke aval'no abololekono.

⁶ Toro te Sooleke'aro gamoro muugunyo pworapwol toorogai'aro a'mwo iro'mwomido mokavlaiyokwe tooke'aro aki Sooleke mwalodupudo mollurogudo toorogai'aro yiuwi'nokai su tooro iruko avalo su tollugwoji yiuno'no aboloporogano.