1 Pita 3 - Gooti Toolluro Yogalokwono

A'mwo kwolabolo me'no yoma'nodupudo tonyuro yomjomwekovla'mwalpino tovinokwono

¹ Su to'busuko kubalno kevu abolo togaikul kemi kwolo tooravuro mido mollomwalodopure tovi kwako tomuu'aro neya duuwimovlavogaulo. Kevu kwako tomuu'aro su toro kwipi toga kemoro kwolo pworo kuuguudo sugudo tovino kuudo muubweyodupudorodeyokwe kevu abolo togaikulluro sugupasudo su togai nokwo wuuduuwallumwalpinogaikikono. Kevu kemi kwolo su toorai kuuguudo sugudo tovino kuu'maiyo toru mamoruudupi kuvi kuruv yiuno kemoro sugupasudo mujumovla'mdopure su tonyu wonekumaropi kuuguudo sugudo tovino, Oo nebalo'mdeyo, kuudo nokwo uubwepinorogano.

² A'mwo su tooro kevu abolo togaikulluro pasudo idopto'nodo togai'aro kemoro kwako tomuu'aro pi'mwono wimovla'mdopure togai'aro tonyu amuugonaikwopi toga kuuguudo sugudo tovino kuudo nokwo uubwepino'moneyokwe puuto youlubwepinogaikikono.

³ Toro te kevu abolo togaikul sugumaluko imo'nyo'moneyokwe tov yiuno kwa'mgu kulako tonyuno to'no nyovaisu'numwalpiyo. Kevu sugumaluko imo'nyo'moneyokwe kemi midoto ton rasta bwotonyago togaiyo'mdeyo oo mabidoga gool tokwe sakwollungiko togaiyo'mdeyo oo youro nuugwiyo bwotonyo tokwe biyoma'dupudo tousogaiyo'mdeyo noonyumwonyu kwa'mgu kulako tovi yovaisu'nyo'moneyokwe su togai to'no nyovaisu'numwalpiyo.

⁴ Toro kugaikul kuruv kevu sugumaluko imo'nyo'moneyokwe to'gwowi kemi poowokalago anakuuto tomuuda'ai togai neya jovaisu'nogaulo. Kwa'mgu kulako tovi yovaisu'nodupudo su ton yere buuropiyodupudogano. Toro kuvi kuruv poowokalago anakuuto tomuuda'ai yovaisu'nyo'moneyokwe su tono'gwowi mabuuropiyodupudogano. Toro te kemi poowokalago sugumaluko imo'nyo'moneyokwe pasudo aro toval neya domjumovlavogaulo. Puruv kevu kavo bemwojopi to'no jumo'nogaulo. Aki puruv kemi sumwoluko ton dugoga to'no neya domwalogaulo. Kevu abolo togaikulluro pasudo su toval Gooti toolluro sumdo tovi sugumaluko kuunodo wimo'nodubulovakono.

⁵ Kuudo neya jaullulo. Aiyogasuro abolo pun Gooti toollu guureji agudupolallajupogano. Toro ton aro sovaisu'nyajupogano. Kemi kwolo toorai kwako tomuu'aro kwiyajupogano. Aki toro ton Gooti toolluro subuu'yamju ton kuvinono nyumo'nyo'mo su tonyuno sogwollo to'no ainyajupogano.

⁶ Sarav su toro tomgu'aro gami kwolo Eburaiyamolluro yogalo tonyu kuvinono kuumjunyajukokwono. Toro uumjunodowo gami kwolo Eburaiyamollu, “Mi agutoloo,” kuujajukokwono. Toro te kevu abolo togaikul Sara'busuko kemi kwolo tooravuro yogalo daikurugolodopure tovino luko miyopi yiuno sugupasudo to'no domjumovlavogaulo. Toro amjumovlapi togaikul Saravuro taiyo kuvinono nyumo'numwalpinogaikikono.

⁷ Aki kevu kwolo kworekul kuruv kemi abolo tonyuno yovo aguto to'no neya duuwiyogaulo. Abolo su tobuuravuro kulako ton kemoro kulako to'busukonmaiyo. Kemoro abolo su tobuuravuro kulako ton wollainyunodogano. Su toro imo'nodupudo tobuurai kevu neya denodokwopiyomarogaulo. Kevu toro tobuurogai po'dogalo mujomwekovlavopi ilaiyo to'no jugologaulo. Su tov aro tovinokwono. Gooti toolluro aiyo yiunokuudo mujomwekovlaiyo'moneyokwe tovino yasuwa'wino ikullabwono su tov kevuge'aro kemi abolo kugai'aro yiuwi'nokai togaikul yiuno avalousuno mapinokwono. Toro te kevu a'mwo toorekul kemi abolo tonyu kaiyako sugolpi tov kaiya'no pasudo su tov kemoro subusu'nyogalo wuujo'moneyokwe tonyu nuumjukuro'jo. Toro nuumjukuro'jokweyo'mo tov kemi abolo tonyu ilaiyo to'no neya jugologaulo.

Nevu yiuwi'nokai toga Jisasolluro a'mwo abolo pubuurai sugupasudo neya wimovla'mwalano tovinokwono

⁸ Aiyowo'mo yogalo pun ikudumo'mokwono. Kevu yiuwi'nokai tobuurekul avaikuudo to'no neya jou'movlavogaulo. Kemida'ai go'no go'nodo pubuuraino kalo neya ikullunowo'ji aki Jisasolluro a'mwo abolo kemi avalo ikullumo'nodupudo su tobuuraino kalo buuropino neya domollogaulo. Aki kemoro poowokalago ton iroto neya duubweyogaulo. Aki kevnokweyogaikulluro kuudo ton neya bwolomoropinogaulo.

⁹ A'mwo pworo kemi kaiyako saikullugolpi toga kevu su toorai aikomgu kaiyako nyugolmwalpiyo. Aki a'mwo abolo pun kemino kaiya'no yogalo abwolomekumwogapiyapi tov kevu su tonyuno kaiya'no yogalo nobwolomorumwogapimwolapiyo. Toro kuvi kuruv kevu a'mwo abolo kaiyako saikullugolpi su tonyuno Gooti tool ilaiyo igoloneyokwe yogalo sugudo puno'gwowi neya dodubweyogaulo. Gooti tool kemi adekumaroka tov kevu a'mwo abolo tonyu yogalo sugudo tokwe neya duubwemwalpino'moneyokwe adekomarokaikono. Toro te kevu yogalo sugudo adubwepi su tovi'aro kev kugaikul kuruv Gooti toolluro yogalo sugudo daikubweyodowo'jure pun kuvinono nomapinogaikikono.

¹⁰ Gooti toolluro yogalo puruv aro sakwollungikokwono. “A'mwo pwol kwako akavi aiyo mwalowo'ji toga ilaiyo ibwosunyo'mo winmwalonekono. Toro tool ilaiyo to'no mujomwekovlaiyo'mo kwino'ji su tool aro imwalonekono. Gamoro kwavlolo tokwe kaiya'no yogalo ton nodumwalo'jo. Aki gami mollo tokwe kuunano yogalo ton nyoukuu'nadumwalo'jo.

¹¹ A'mwo su tool ma'no ma'no pasudo toorai buulo uugunyumopiyowo'ji yiuno sugupasudo tokwe to'gwowi neya yomjomwekovlavogawono. Aki a'mwo abolo togai sumwoluko noullo wosungovlaiyo'moneyokwe womdo bwotonyo neya yogawono. Aki a'mwo abolo togai sumwoluko noullo wosungovlaiyo'moneyokwe pasudo su tovi yiuwi'nokai toga neya amovomjai'nogawono.

¹² Su tov aro tovinokwono. Aguto tool a'mwo abolo sugupasudo yodupudo tonyu pi'mwono moduvomwalodowodekono. Aki gamoro sumdo tovi sugudo me'no wimo'nodupudo su tonyuro subusu'nyogalo wuudodopure tonyu wuu'nyo'moneyokwe gamoro kaduko ton kuusubweyodowodekono. Toro kuvi kuruv a'mwo abolo puno'gwowi kirovanyuvanyu kiroungovla'mdupudo su tonyu Aguto tool ikomago wimo'nyokwekono.”

Nevu sugupasudo yodowa'jure tovida'ai dado pun noma'mwalano tovinokwono

¹³ Aki kevu sugupasudo guureji amjumovlapi tov a'mwo pworo kemi kaiyako miyaikullugolpinorogano.

¹⁴ Toro kuvi kuruv puga kevu sugupasudo mujumovla'mdopure kuruv a'mwo pworo kaiyako nyaikullugolpinorogano. Toro te kevu sugupasudo mujumovla'mdopure tovida'ai jul'nyo amapi su tovino ilaiyo nokwo imwalpinogaikikono. Aki puga a'mwo pworo kemi luko daikuro'gwolpinorogano. Toro tooravuro yogalo su tooraino kevu luko mipinono. Su toro tovida'ai jul'nyo subwosunpi kuvi kuruv jul'nyo su tooro kemoro kuudo tovi aguto nekullumo'numwalpiyo.

¹⁵ Toro kuvi kuruv Krais toolno'gwowi kemoro poowokalago tonyu aguto neya aikullumo'nogawono. Aki kemi Aguto Krais su toolluno yovo tovi neya julomoropiyogaulo. Krais su tool gami a'mwo abolo togaikullu gamoro sugudo ton ikullabwonekono. Toro ikullabwono tonyuno kevu sogwollo to'no kinodupudogaikikono. Toro togaikullu a'mwo abolo pun aro ikudoganpinogano. “Kevu burowo'nyo tovino sogwollo kinodupudogaikuldeyo?” Ikudoganpinogano. Toro aikudoganpi toga kevu a'mwo abolo su tonyu kemoro sogwollo kinodupudo tovuro kavlo tovino po'dogalo delukuulludapiyo'moneyokwe yiuwi'nokai toga neya jovraimwonyogaulo.

¹⁶ Sugupasudo su tov kemoro poowokalago tovi me'no kuulaikwo'dowodokwono. Toro tovi kuvinono neya duumjunogaulo. Toro togaikul kavo bemwojopiyopi kevnokwe togaikul kwako tomuu'aro bwolomorumwogapinogaulo. Su toro tomgu'aro kemoro sogwollo kinodupudo tovino kavlo tov kuu'maiyo toru neya dodelukuulludapiyogaulo. Toro te kevu Krais toollu me'no uuguro'mwonyodupudo togaikulluro sugupasudo yomjomwekovla'mdopure su tovino a'mwo abolo pun nobwolomekumwogapiyapinogano. Toro abwolomekumwogapiyapi kuvi kuruv kevnokwe ton wogulo to'no yowo'gallunmwalpinogano.

¹⁷ Kuudo neya jaullulo. Puga Gooti tool aro kuudo yauronekono. Moro a'mwo abolo ton tabunyuwuulo pun neya amapuro. Kuudo yauronekono. Toro te kevu gamoro ilaiyo winodowo'jure tovi kuumjunpi tovida'ai tabunyuwuulo pun mapinogaikikono. Su tov ilaiyokwono. Toro kuvi kuruv kevnokwe togaikulluro kaiya'no pasudo tooraida'ai tabunyuwuulo amapi to'gwowi ilaiyo'maiyo.

Krais toolluro aboloka tov nemi Gooti toollomno nekumokailodawodo tovinokwono

¹⁸ Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.

¹⁹ Krais tool Kuullo imo'nyuno sumaiyokwe kuullo pworo wuulo killo'mo ago tovi kuule'na'dopure toorai gavnokweyolluro me'no kuuwolovoka tovino yagwoto amoruujogalokaikono.

²⁰ Wuulo aule'nallajupo kuullo su tooro aiyoga Noowalluro togasuro a'mwo abolo amwallajupo tonyurogano. Aiyoga Noowal sip toollu mododuke toga Gooti tool a'mwo abolo su tonyu kemi ma'no ma'no pasudo tonyuno yere mairumwallajukekono. Toro te a'mwo abolo su ton Gooti toollu kisuvolo to'no kwiyajupogano. Toro kuvi kuruv yiuno 8-pela a'mwo abolo tobuurono'gwowi sip toollu aulomwalopogano. A'mwo abolo pwolno puru'monodo aulomwalopo su tobuurai wonyo tov nome'nyudapiyo'jokweyo'mo Gooti tool wonyo tovida'ai luvomato to'busuko amollurolowapiyokaikono.

²¹ Gooti tool wonyo tovida'ai luvomato to'busuko amollurolowapiyoka su tov a'mwo abolo wonyo uuvollunodupudo tovino yovekurajo'mokwono. Wonyo mogaluvollo'moneyokwe pasudo su tov kulako tovida'ai guru'mopiko tonyu mollol'movodukwopiyo'mo'maiyo. Toro kuvi kuruv wonyo galuvollodupudo pasudo su to'gwowi Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodo tovino wuuduuwallo'mokwono. Aki Jisas Kraisolluro aiyo aiko te adukavoka tovi'aro kemoro poowokalago ton Gooti toolluro sumdo tovi sugudo me'no wimo'nodupudogaikikono. Toro te kevu wonyo kuuvollunpi toga Gooti toollomno me'no souragunyumo'nopo tovino kuu'maiyo toru'no wuuduuwallunodupudogaikikono.

²² Aki Jisas Kraisol Gooti toolluro ago muunyu kai'muuno me'no ilomwalno sumaiyokwe Gooti toolluro anato toru mwalo'no mido mollomwalokwe imo'nodowodekono. Toro toolluro mido mollomwalo tovi dolago tomuu yiuwi'nokai ensel toorogai'aro kuullo mido mollomwalokwe toorogai'aro kuullo jurogudokwe toorogai'aro tooro kuulomwalodupudorogano.