1 Koorin 3 - Gooti Toolluro Yogalokwono

Gooti toolluro womdokwe tooro kweke womdo mujumovla'mdupudo tovinokwono

¹ Mi avalobuuravoo, sumdomgu kevuge mwalodum Gooti toolluro yogalo tov sodekubwasajonyugono. Su toro toga kevu Gooti toolluro Kuullo toollu kuumjunopujuko'mno'juki nuu guureji nokwo sodekubwaso'mujukonyugono. Toro kuvi kuruv kevu a'mwo abolo yiuno kulako tokwe to'no uumjunodupudo togaikullubusuko sodekubwasajonyugono. Su tov aro tovinokwono. Kevu Krais toollu uumjunyo'moneyokwe tov kwolaiyo muudoga tobuurekulbusuko to'no sumo'nyajupogaikikono.

² Toro te moro kuuguudo aikullabiyajo su tov wosamujuko jurogudo to'busuko maikullabiyajonyugono. Toro kuvi kuruv kuuguudo aikullabiyajo su tov yiuno amuunallo to'busuko to'no aikullabiyajonyugono. Su toro toga kevu wosamujuko jurogudo to'busuko kuuguudo tov ku'nono mamaropujukogaikikono. Toro tovino tov yiuno amuunallo to'busuko kuuguudo to'no aikullabiyajonyugono. Aki aga kuga kuruv kevu wosamujuko jurogudo to'busuko kuuguudo tov ku'nono mamapinogaikikono.

³ Su tov aro tovinokwono. Kevu kemi kulako tovuro kuudo uumdo toorai kuuno uumjungovla'mdupudogaikikono. Toro togaikul kwekuullu kuudo yau'dupu aki kevnokwe togaikul yogalo youllajunodupudogaikikono. Kemoro pasudo su toro yodupudo tov kuuno amjo'movlawo'ji tov kemino aro tovino nekuduuwallonokwono. “Oo a'mwo abolo su ton yiuno kemi kulako tovuro kuudo uumdo tooraino to'no uumjunodupu kwako akavida'ai a'mwo abolo tonbusuko imo'nodupudodeyo.”

⁴ Kevnokwe togaikulluda'ai pworo aro dodupudorogano. “Oo nuvu Poololluronyugono.” Dodupudorogano. Aki pworo, “Oo nuvu Apoolosolluronyugono.” Dodupudorogano. Kevnokwe togaikulluda'ai pworo su toro dodupudo tov aro tovino kuu'maiyo toru'no nekuduuwallodowodokwono. Kemoro pasudo yodupudo su tov kwako akavida'ai pworavuro yodupudo to'busukokwono.

⁵ Kevu kuudo neya jaullulo. Apoolosol ala'mwoldukono? Aki nuvu Poolonyu ala'mwonyudukono? Yiuwi'nokai toonal yiuno Aguto toolluro womdo tovi wiyokwe tekwojonakono. Toro tekwojonalluno kevu yogalo youllajunodupudo tov navu ilaiyo mimwakuuwolo. Yiuwi'nokai toonal Aguto toolluro womdo tovi wiyo'moneyokwe gavnokwe tool ajonakubweyokanakono. Womdo su tovi yodowole tovida'ai kevu Krais toolluno kuudo kuubweyopogaikikono.

⁶ Su tov aro to'busukokwono. A'mwo pwol womdo tovi ikulwiyo kuudodowodo to'busuko kubalno Gooti toolluro yogalo tokwe nuvu kemoro kuudo tovi ikulwiyo to'busuko audaikubweyonyugono. Aki a'mwo pwol ikulwiyo bila'dowo'jure tonyu wonyo kimowosodowodo to'busuko kubalno Apoolosol Gooti toolluro kuuguudo tokwe kemi wonyo to'busuko aimovaikubweyokaikono. Toro kuvi kuruv ikulwiyo su ton bilawogullo'moneyokwe womdo bwotonyo to'gwowi Gooti gavnokwe toolluro yodowodokwono.

⁷ Toro te a'mwo Gooti toolluro yogalo tokwe sumdomgu moruudodowodo tooke'aro Gooti toolluro yogalo tokwe lukomgu ibwasodowodo tooke'aro tooral womdo bwotonyo miyodubulorakono. Toro kuvi kuruv womdo bwotonyo to'gwowi Gooti gavnokwe tool yodowodokwono. Gooti tool gavnokweyolluro kuuguudo tokwe a'mwo abolo tonyu aguto yogullumwojapiyodowodekono.

⁸ Toro te a'mwo Gooti toolluro yogalo tokwe sumdomgu moruudodowodo tooke'aro lukomgu ibwasodowodo tooke'aro tooral womdokwe aval'no imo'nodubulorakono. Aki lukomgu yiuwi'nokai tooral kemi womdo yodubulo tovino mubiyo tov noma'bullunorakono.

⁹ Toro te navu Gooti toolluro womdo tovi wiyodowolonakono. Toro tekwojonal Gooti tooke womdo aval'no mujumovla'mdowolonakono. Kev kugaikul kuruv Gooti toolluro a'mwo abolo me'no wimo'nodupudogaikikono. Toro togaikul gamoro wosamuju'womdo to'busuko wimo'nodupudogaikikono. Aki puruv kevu gamoro ago to'busuko wimo'nodupudogaikikono.

¹⁰ Gooti tool gamoro yasuwa'wino sugumaluko anyaboka tovida'ai nuvu a'mwo sulago pi'mwono mojokwe pwolbusuko sumo'nonyugono. Toro toonyu sulo pwol kwako tomuu aluvogiloudapiyonyugono. Aki moro sulo aluvogiloudapiyo su toollu muunyu toru a'mwo pworo amodumelabadokwovo. Yiuwi'nokai a'mwo pwolno pwolno ago mojokwe su tooro moro sulo aluvogiloudapiyo su toollu muunyu toru po'dogalo modumelabiyo'moneyokwe wako neya kuu'numwalpinorogano.

¹¹ Nuvu ago mojudapiyo'moneyokwe sulo tool me'no kuudapiyonyugono. Sulo su tool Jisas Kraisekono. Toro te Krais Jisasolbusuko ago mojudapiyo'moneyokwe sulo gabovo pwol nonagutomuugono. Aki a'mwo pwolnodo kwol kuruv sulo su toolbusuko muuduko pwollu ku'nono maluvogiloudapipinorogano.

¹² Toro te a'mwo pworo ago mojudapiyo'mo sulo su toollu muunyu toru kemi go'no go'nodo togai neya modumelabumwalpinorogano. A'mwo pworo ikodeyo oo kwoptodeyo oo wit yogudodeyo wollainyo su tobuurogai modumelabupinorogano. Toro kuvi kuruv a'mwo pworo pi'mwono mojo'mo kwinpi toorono'gwowi kemi goolodeyo oo silvadeyo oo sulo sugumalukollovodeyo tollovogai modumelabupinorogano.

¹³ Toro tooravuro womdo mujumelabodupudo ton sugudo'mdukono oo kaiya'nodo'mdukoneyokwe tovino lukomgu kuu'maiyo toru nobomollolupto'nosonokwono. Iruko pullugwoji Krais tool a'mwo abolo tonollu kooti yogalo adanekullo'ji su toga yiuwi'nokai pwolno puru'monodo tonolluro womdo mujumelabodowado tov duko tokwe yamju wiyoganonekono. Duko tovi toro amollurowo'ji toga a'mwo abolo tonolluro womdo go'no go'no yodowado ton sugudo'mdukono oo kaiya'nodo'mdukoneyokwe tovino kuu'maiyo toru bomollolupto'nosonokwono.

¹⁴ Womdo tonyu duko tovi su toro amollurowo'ji toga a'mwo pwol gamoro ago tov sulo su toollu muunyu toru modumelodawodo tovi duko amollurowo'ji toga yiunokuudo mamonosonokwono. Ago su toul kuuno dawonoukono. Toro te a'mwo womdokwe su tool Gooti toolluro mubiyo sugudo puruv nomaronekono.

¹⁵ Toro kuvi kuruv a'mwo pwekwo gamoro womdo yodowodo tovi duko tov yiunokuudo amonoso'ji to'gwowi a'mwo womdokwe su tekwojuro mubiyo tov yiunokuudo imagwo'nonokwono. Toro kuvi kuruv Gooti tool a'mwo su tekwojuno'gwowi du'muudo tovida'ai nomollurolovomaronekono. Toro tekwo duko tov nonopiyo'mo yodowo'jure kuunodo toga du'wiyo tovi akuuto toru'aro birolo'nugolokwono toolbusuko imo'nonekono. A'mwo su tekwo Gooti toolluro ago toru ki'movowo'ji kwol kuruv noonyumwonyu kuto ivito'maiyo pwolbusuko imo'numwalonekono.

Gooti toolluro a'mwo abolo ton gamino ilomoropiyo'moneyokwe ago to'busuko imo'nodupudo tovinokwono

¹⁶ Kevu aro kuudo me'no youroma'dupudogaikikono. Kevu Gooti toollu ilomoropiyo'moneyokwe ago to'busuko imo'nodupudogaikikono. Toro togaikullu Gooti gavnokwe toolluro Kuullo tool me'no kuulekumwalodowodekono.

¹⁷ Toro te a'mwo pwol Gooti toolluro ilomoropiyo'moneyokwe ago wimo'nodupudo su togaikullu kaiyako saikullugolo'ji tov Gooti tool a'mwo su toollu kaiyako nyugolonekono. Su tov aro tovinokwono. Gooti toolluro ilomoropiyo'moneyokwe ago tov gavnokweyolluro ago kuunodo wimo'nodowodokwono. Aki ilomoropiyo'moneyokwe ago su tov kevu Jisasolluro a'mwo abolo togaikul imo'nodupudokwono.

Nevu a'mwo pworavuro yovo tovi nyulomodomoropimwolowa'jokwe tovinokwono

¹⁸ Neya duu'nyulo. Kevu pugaikul aro kuudo yau'dupudogaikikono. Oo nevu kwako akavida'ai noonyumwonyu tonyuno pi'mwo kuudo kurukweyonogano. Su toro tovino kevnokwe togaikul kuunano nyoukuu'najunmwalpiyo. Toro kuvi kuruv kevu pi'mwo kuudokwe imo'nyo'mo aikulluno'ji tov kwako akavida'ai a'mwo tooravuro sumdo tovi kevu kuudo maiyokwe to'no neya jumo'nogaulo. Yiuno su toro tomgu'aro sumo'nupi to'gwowi Gooti toolluro sumdo tovi pi'mwo kuudokwe imo'nupinogaikikono.

¹⁹ Su tov aro tovinokwono. Kwako akavida'ai a'mwo pi'mwo kuudokwe tooro Gooti toolluro sumdo tovino'gwowi a'mwo junoruko toorobusuko wimo'nodupudorogano. Su toro tovino Gooti toolluro yogalo puruv aro sakwollungikokwono. “A'mwo abolo pun, Pi'mwo kuudokwenogano, dodupudo su tonyu Gooti tool kevnokweyonyuro pi'mwo kuudo yau'dopure tovi'aro wuulo kuurowabwo'dowodekono.”

²⁰ Aki Gooti toolluro yogalo su to'busuko puruv aro sakwollungikokwono. “Aguto tool a'mwo abolo pi'mwo kuudokwe tonyuro kuudo yau'dopure tonyu youroonowo'ji aro dodowodekono. Oo kemoro kuudo su tooro yasuwa'no younopipinorogano. Jokwekono.” Gooti toolluro yogalo puruv su toro sakwollungikokwono.

²¹ Toro tovino tov kevu Jisasolluro a'mwo mido mollomwalokwe pwolluno yovo tovino aro milomodomoropiyapinono. “Oo nevu a'mwo akallu uumjunodowadonogano.” Milomodomoropiyapinono. Neya duu'nyulo. Yiuwi'nokai ton kemiyogano.

²² Pooleke'aro Apooloseke'aro Pitaike'aro kworo kuruv kemiyorogano. Aki kwako akakwe'aro aiyo mujomwekovla'mdupudo tokwe'aro bolnodo tokwe'aro kun kuruv kemiyogano. Aki aga sumo'nadokwopo togai'aro lukomgu nyumo'nupino kugai'aro yiuwi'nokai su ton kemiyogano.

²³ Aki kevu Krais toollurogaikikono. Krais su tool Gooti toollurekono.