1 Koorin 14 - Gooti Toolluro Yogalokwono

Gooti toolluro yogalo tokwe kuurokado mollajo'mo womdo su tovi mallo'moneyokwe neya ikullunmwalono tovinokwono

¹ Kevu a'mwo abolo tonyu kalo buuropino winyo'moneyokwe pasudo su tovi guureji neya domovomjai'nogaulo. Aki aro kuudo neya jaurogaulo. Oo Gooti toolluro Kuullo tool yasuwa'wino judo'no judo'no nekullabodowodo tollovai neya amarogawano. Kuudo neya jaurogaulo. Gamoro yasuwa'wino nekullabodowodo aguto tollugwo Gooti toolluro yogalo tokwe kuurokado moruudomollo'moneyokwe womdo tokwono. Toro te kevu pugaikul Gooti toolluro yogalo tokwe kuurokado moruudomollo'mo tovino guureji aikulluno'ji tov ilaiyo kuunodokwono.

² Su tov aro tovinokwono. A'mwo pwol Gooti toollu yogaljo gabovo tovida'ai subusu'nyogalo kuudo'ji tov a'mwo abolo ton ku'nono muu'nodupudokwono. Toro kuvi kuruv yiuno Gooti toolluno'gwowi wuudodowodekono. Aki toro tool Gooti toolluro Kuullo tool jurogudo uubweyodowo'jure tokwe yiulo yogalo to'no wuudodowodekono. Yiulo yogalo su tovino kavlo tov a'mwo abolo ton kuudo ku'nono miyouroma'dupudogano. A'mwo gabovo yogaljo dodupudo tooraino su torokwono.

³ Toro kuvi kuruv a'mwo gabovo yogaljo madodupudo toorono'gwowi Gooti toolluro yogalo tokwe kuurokado amoruudomollupi tov a'mwo abolo ton jurogudo nokwo gullumwalpinogano. Aki kemoro poowokalago tonyu jurogudo nokwo duuwimwojonokwono. Aki yogalo su tov kemoro tagunyo tonyu dugoga nokwo wirovomokwolamwalonokwono.

⁴ A'mwo pwol gabovo yogaljo tovida'ai kuuguudo amoruudo'ji su tool gavnokweyolluro poowokalago tovi jurogudo duuwimwoju'nonekono. Toro kuvi kuruv a'mwo gabovo yogalo madodowodo pwolno'gwowi Gooti toolluro yogalo tokwe kuurokado mollajokwe su tool yiuwi'nokai Jisasolluro mollu'bwoto tobuurai jurogudo duuwimwojonekono.

⁵ Toro te kemino tov nuu aro nyunodowodonyugono. Kevu gabovo yogaljo tonyu neya adupureyokwe tovino nyunodowodonyugono. Toro kuvi kuruv kevu Gooti toolluro yogalo tokwe kuurokado mollajokwe imo'nyo'mo su to'gwowi uuwolo'mdowodokwono. Toro tovi kevu neya amapureyokwe guureji muunyu toru'aro nyunodowodonyugono. Toro te a'mwo pwol gabovo yogaljo tovida'ai kuuguudo amoruudo'ji tov a'mwo abolo i'bwo'nyago tovi aulomwalpi tobuuro noo'nookwo nyupiyo. Aki kuuguudo tovuro kavlo tovi mollovodo'mwojajo'moneyokwe a'mwo pwolluno supto nyupiyo. Toro kuvi kuruv a'mwo pwol Gooti toolluro yogalo tokwe kuurokado mollajokwe toolno'gwowi Jisasolluro mollu'bwoto tonyu jurogudo duuwimwojodowodekono. Toro tovino tov Gooti toolluro yogalo tokwe kuurokado mollajo'moneyokwe womdo su tov gabovo yogaljo tonyuda'ai jo'moneyokwe womdo tovi uuwolo'mdowodokwono.

⁶ Mi avalobuuravoo, nuvu kemi bekuru'maro'mi yogaljo gabovo puruv kevu kuudo miyau'dupudo tovida'ai abaikudumi tov kemi ku'nono maikullo'mwojumonyugono. Toro kwonyu kuruv kemi ikullo'mwojo'moneyokwe kuuguudo tono'gwowi arogano. Gooti toolluda'ai bomollolupto'nosodowodo kuuguudo'mdeyo oo kuudo aguto tonyuno kuuguudo'mdeyo oo Gooti toolluro kuurokado mollajo'moneyokwe kuuguudo'mdeyo oo Gooti toolluro yodekubwaso'moneyokwe kuuguudo'mdeyo togano. Su toro tonyuda'ai pugai nuu kemi aikudumi tov jurogudo nokwo daikullumwojumonyugono.

⁷ Aro to'busukokwono. Nogunyodeyo oo gitarodeyo tonyu pi'mwono maromipi tov kemoro deko tovi a'mwo abolo ton ilaiyo muu'nupinogano. Noonyumwonyu su ton aiyomaiyokwe kunyu kuruv pi'mwono aromi to'gwowi a'mwo abolo ton dato ilaiyo nokwo wuu'nupinogano.

⁸ Aki a'mwo pwol biugel tovi pwo'mi muujudo airapiyo'ji toga a'mwo mollurogudo tooro wuu'nopi molo'mo yovrowosunpinorogano. Toro kuvi kuruv biugel tovuro pwo'mi muujudo tov po'dogalo neya mai'nugovlawo'ji to'gwowi a'mwo mollurogudo tooro muumjunopi molo'mo miyovrowosunpinorogano.

⁹ Su toro to'busuko kubalno kevu yogaljo puruv a'mwo abolo ton kuudo miyau'dupudo su tovida'ai adupi tov a'mwo abolo su ton kuuguudo tovuro kavlo tovino miyouromapinogano. Toro tovino tov kemoro yogalo su tov yiuno yasuwa'no to'no dolobiyosupinogaikikono.

¹⁰ Yiuwi'nokai a'mwo abolo kwako akavi mwalodupudo ton kemi go'no go'no yogaljo su tov kurukweyogano. Yiuwi'nokai yogaljo su ton a'mwo abolo kevnokwe tonyu kavlo kurukwe wimo'nodupudogano.

¹¹ Toro kuvi kuruv nevno'gwowi a'mwo pwolluro yogaljo dodowo'jure tovi kuudo miyaura'ji tov aro dodowadonogano. “Oo a'mwo su tool pumuuda'aiyoldeyo,” danonogano. Aki a'mwo su to kwol kuruv nemino tov, “Pumuuda'aiyodeyo,” donekono.

¹² Toro te kevu Gooti toolluro Kuullo tool yasuwa'wino judo'no judo'no wiyodowodo tollovai mallo'mo guureji ikullunodowodogaikikono. Toro tovino tov kevu aro kuudo neya jaurogaulo. Oo nevu Jisasolluro mollu'bwoto tonyu jurogudo duuwimwojo'moneyokwe womdo tollovaino to'no neya amarogawano. Su toro kuudo yauropi Jisasolluro mollu'bwoto tonyu jurogudo neya doduuwimwojogaulo.

¹³ Toro tovino tov a'mwo yogaljo gabovo tovida'ai ado'ji tool Gooti toollu subusu'nyogalo aro neya wuudumwalonekono. “Oo nuu gabovo yogaljo adumi tovida'ai kavlo ton kuu'maiyo toru'no mollovodo'mwojajo'moneyokwe donyo'mwojono.” Neya wuudumwalonekono.

¹⁴ Su tov aro tovinokwono. Nuu moro kuullo tooke gabovo yogaljo tovida'ai Gooti toollu subusu'nyogalo kuudumi kuvi kuruv nuvnokwenyuro kuudo to'gwowi kavlo tovino miyouroma'monyugono.

¹⁵ Toro te aro neya imwalmonyugono. Moro kuullo tooke'aro kuudo nyouromallo'mo tokwe'aro tovake Gooti toollu subusu'nyogalo neya wuudumwalmonyugono. Aki Gooti toolluno yovo tovi ilomodomoropiyo'moneyokwe dato jo'mo toonyu moro kuullo tooke'aro kuudo nyouromallo'mo tokwe'aro tovake neya dumwalmonyugono.

¹⁶ Toro te kevu su toro mipi tov kemida'ai pweku Gooti toollu, “Nenyoo,” wuujo'mo tooku yiuno gumi kuullo tooke to'no gabovo yogaljo tovida'ai dubinekugono. Su toro adubi tov a'mwo abolo guvuge amwalpi ton kavlo tovino kuudo miyouromapinogano. Su toro miyouromapino tovino tov guvu Gooti toollu subusu'nyogalo wuudodo'bure toga, “Nebalokwono,” ku'nono madupinogano.

¹⁷ Guvu Gooti toollu, “Nenyoo,” subusu'nyogalo ilaiyo wuudodo'bure kuvi kuruv a'mwo abolo ton kuuguudo tovino kuudo po'dogalo miyouromapinogano. Aki gumoro kuuguudo adubiyo su tov kemoro poowokalago tonyu jurogudo ku'nono maduuwimwojonokwono.

¹⁸ Kevu yogaljo go'no go'nodo togai dodupudo kuvi kuruv nuvno'gwowi kemi ikuuwolo'mdum yogaljo go'no go'nodo bwotonyago togai dodumdonyugono. Su toro tovino mi Gooti toollu, “Nenyoo,” wuudodumdonyugono.

¹⁹ Toro kwonyu kuruv nuvu i'bwo'nyago puvi aulami toga yogaljo puruv a'mwo abolo ton muu'nyodupudo tovida'ai jo'mo manyunodowodonyugono. Nuvu yogaljo gabovo tovida'ai 10,000 yogalo togai amoruudo'mujuko kunyuno kuruv a'mwo abolo ton kuudo miyouromapinogano. Toro kuvi kuruv yogalo ilaiyo wuu'nodupudo tovida'ai to'gwowi ibwaso'mo toonyu yiuno atobuul yogalo tobuuke to'no amoruudumi kuruv kuudo ilaiyo youromapinogano. Toro te yogaljo nokwo wuu'nupino tokwe moruujo'mo tov ilaiyo nyunodowodonyugono.

²⁰ Mi avalobuuravoo, kevu gabovo yogaljo tonyuda'ai jo'moneyokwe tovino kwoloraiyo kula'nyo tobuurobusuko kuudo nyau'mwalpiyo. Toro kugaikul kuruv kevu aguto me'no gullodupudo tonbusuko kubalno kavlo su tonyuno kuudo po'dogalo neya jouromarogaulo. Toro kuvi kuruv kevu kirovanyuvanyu pasudo tooraino'gwowi kwolaiyo muudoga kuudo nonaguto tonbusuko to'no neya jumo'nogaulo.

²¹ Aiyoga Gooti toolluro yogalo puruv aro sakwollungikokwono. “Aguto tool aro adokaikono. “Nuvu moro Isuraiyolda'ai a'mwo abolo tonyu yogaljo gabovo tonyu'aro wuudumovla'mwalmonyugono. Aki a'mwo abolo bomwallo punyuro mago tovi'aro wuudumovla'monyugono. Su toro tomgu'aro duudapi yogalo wiyodo'mure kuvi kuruv moro yogalo tovino muu'nyubusuko to'no yopi kisuvolo nyumwalpinogano.” Adokaikono.” Toro sakwollungikokwono.

²² Toro te yogaljo go'no go'nodo togai moruujo'mo su tov Gooti toolluro jurogudo tovino bomollolupto'noso'mokwono. Su tov a'mwo abolo kuudo me'no uubweyodupudo tonyu wuuduuwallo'mo'maiyo. Toro kuvi kuruv a'mwo abolo kuudo muubweyodupudo tonyu Gooti toolluro jurogudo tovino wuuduuwallo'mokwono. Aki Gooti toolluro yogalo tokwe kuurokado mollajo'mo to'gwowi a'mwo abolo kuudo muubweyodupudo tonyo'mo'maiyo. Toro kuvi kuruv Gooti toolluro yogalo tokwe kuurokado mollajo'mo su tovi'aro a'mwo abolo kuudo me'no uubweyodupudo ton wuu'nopi Gooti toolluro jurogudo tovino wuuduuwallo'mokwono.

²³ Toro te kevu yiuwi'nokai togaikul kemi i'bwo'nyago tovi aullu'bwo'nupi toga yogaljo go'no go'nodo tonyuda'ai adupi tov a'mwo abolo kuudo muubweyodupudo pun kevuge aulomwalpi ton aro kuudo yaikuupinogano. Oo su ton amomo sadokwovo. Yaikuupinogano.

²⁴ Toro kuvi kuruv kevu Gooti toolluro kuurokado mokavlaiyo'moneyokwe yogalo tokwe amolladupi su to'gwowi a'mwo kuudo muubweyodowodo pwol kevuge aulomwalo'ji toga yogalo tovi wuu'nowo'ji gami yiuwi'nokai kuullutago tokwe nokwo uubweyonekono. Aki Gooti toolluro kooti yogalo nerumwallono kuvino kuruv kuudo nyouromaronekono.

²⁵ Kuurokado mokavlaiyo'moneyokwe yogalo su tov a'mwo toolluro yiulo kuudo yau'dowo'jure kunyu kuruv kuu'maiyo toru'no nobomollolupto'nosonokwono. Su toro bomollolupto'nosodowo'jure toga a'mwo su tool suduko inuguto'nowo'ji Gooti toolluno ilomodomoropiyawo'ji aro donekono. “Oo Gooti tool a'mwo abolo akanyu akuuto toru nebal'no domwallo.” Donekono.

Jisasolluro a'mwo abolo ton su'bwo'nupi toga po'dogalo tomgu'aro neya uumjunmwalpino tovinokwono

²⁶ Mi avalobuuravoo, kevu su'bwo'nupi toga adado imwalpinogaikuldukoneyokwe tovino ikudumo'mokwono. Kevu su'bwo'nupi toga pwolno pwolnodo toorekul aro neya imwalpinorekikono. Pwol Gooti toolluno ilomoropiyo'moneyokwe dato tokwe mokabwonekono. Aki pwol yodubwaso'moneyokwe kuuguudo tov mokabwonekono. Aki pwol Gooti toolluro me'no bomollolupto'nosodowo'jure tonyu mokabwonekono. Aki pwol gabovo yogaljo tokwe mokabwonekono. Aki pwol gabovo yogaljo tovi mollovodo'mwojajo'moneyokwe kavlo tov mokabwonekono. Yiuwi'nokai go'no go'nodo su ton mokabopi i'bwo'nomwalpinogaikikono. Kevu go'no go'nodo su tonyu toro mokabopi kuvi kuruv yiuno Jisasolluro mollu'bwoto tonyu jurogudo duuwimwojo'moneyokwe togai to'no neya doulomollogaulo.

²⁷ Toro te kemida'ai pworo gabovo yogaljo tovida'ai moruujo'mo kwinpi tov yiuno pworalo'mdeyo oo pworapwolorodeyo toorono to'no yowa'no dumwalpinorogano. Toro kuvi kuruv yiuwi'nokai tooro avalo toga nodupiyo. Pwol me'no dopiyowo'ji lukomgu pwol nokwo donekono. Aki gabovo yogaljo tonyuda'ai yogalo kavlo ton a'mwo pwol neya mollovodo'mwojadumwalonekono.

²⁸ Toro kuvi kuruv kevu aullu'bwo'nomwalpi toga a'mwo mollovodo'mwojajo'moneyokwe pwol nonaguto'mdeyokwe to'gwowi a'mwo gabovo yogaljokwe dodupudo tooro kemi yogaljo su tovida'ai puru'monodo kuruv nodupiyo. Toro kworo kuruv kevnokwe tooro lukomgu yiulo tomuu plavopi Gooti toollu kemi gabovo yogaljo tovida'ai nokwo wuudumwalpinorogano.

²⁹ Aki puruv kevu su'bwo'nupi toga Gooti toolluro yogalo tokwe kuurokado mollajo'moneyokwe yiuno a'mwo pworalo'mdeyo oo pworapwolorodeyo toorono to'no yodekubwasumwalpinorogano. Me'no sodekubwosupi toga kevu Jisasolluro a'mwo abolo aulomwalpi togaikul a'mwo su tooravuro yogalo tonyu pi'mwono neya jainyubwopinogaikikono.

³⁰ Aki puruv kevu i'bwo'nomwalopi Gooti toolluro yogalo tokwe kuurokado mollajokwe pwol kemi ikudumwalonekono. Su toro ikudodowo'jure avalo toga Gooti tool gamoro yogalo muuduko puruv a'mwo mollajokwe pwollu kuu'maiyo toru wuuduuwallonekono. Su toro kuuduuwallo'ji toga a'mwo kuuguudo ikudodowo'jure su tool neya yovo'bworodawonekono. Su toro sovo'bworodawo'ji toga a'mwo yogalo muudukokwe su tool kuu'maiyo toru'no bomollolupto'noso'moneyokwe kemi nokwo ikudonekono.

³¹ Su tov aro tovinokwono. A'mwo Gooti toolluro yogalo tokwe kuurokado mollajokwe su tooro pwolda'ai pwolda'ai amjodumovlapi tov kevu yiuwi'nokai su'bwo'nupi togaikul kuudo nokwo youromaropi kemoro poowokalago tonyu jurogudo nokwo daikullumwojonokwono.

³² Gooti toolluro yogalo tokwe kuurokado mollajokwe su tekwojo kevnokweravuro mago tonyu po'dogalo mollomwalnodupudorogano. Toro te kuurokado mollajokwe tooro pwol me'no adopiyo'ji tov lukomgu pwol nokwo donekono.

³³ Neya duu'nyulo. Kevu su'bwo'nupi toga paweyogalo aullajunpi tovino Gooti tool ilaiyo mwinyokwekono. Toro kwol kuruv kevu su'bwo'nupi toga yiuwi'nokai toga sumwoluko kavo wosungovla'mwalpino tovino'gwowi Gooti tool ilaiyo winodowodekono. Toro te yiuwi'nokai Gooti toolluro mollu'bwoto go'no go'nodo ton sugudo tomgu'aro i'bwo'nodupudo tonbusuko kubalno

³⁴ kev kugaikul kuruv aval'nodo tomgu'aro neya ju'bwo'nogaulo. Kevu su toro su'bwo'nupi toga kemoro abolo ton yogalo nodumwalpiyo. Toro kun kuruv a'mwo toorai dolago tomuu neya amwalogapuro. Aiyoga abolo ton kemi kwolo toorai dolago tomuu neya amwalogapureyokwe tovino Moosesolluro loowo puruv sakwollungikokwono. Su toro to'busuko kubalno aga kuga kuruv abolo ton kemi kwolo toorai dolago tomuu neya amwalogapuro.

³⁵ Kuudo neya jaullulo. Abolo puruv Jisasolluro mollu'bwoto ton i'bwo'nomwalodopure toru yogalo kuulajo'moneyokwe pasudo tov wogulo mallo'mokwono. Toro tovino tov abolo su ton yamuugojo kurukweyonoldeyo adupi tov kevnokwenyuro ago tomuuno plavopi kemi kwolo toorai neya yamuugojumwalpinogano.

³⁶ Kevu neya duu'nyulo. Gooti toolluro yogalo tov muudu'nodo toga wagwolago Koorinda'ai mabomje'nugoulokakwono. Aki Gooti toolluro yogalo su tov yiuno kevu judo togaikullo'mo aboka'maiyo. Su toro tovino kevu kuudo nyallulo'gwonmwalpiyo.

³⁷ Kemida'ai a'mwo pwol gavnokweyolluno aro kuudo sauro'ji tov, Nuvu Gooti toolluro yogalo tokwe kuurokado mollajokwenyugono. Su toro kuudo sauro'ji tool moro yogalo sokwollaikubwemo akavino donekono. “Oo Aguto toollu uumjunyo'moneyokwe yogalo'mdeyo.” Neya donekono. Aki a'mwo pwol gavnokweyolluno aro kuudo sauro'ji tov, Nuvu Gooti toolluro Kuullo toollu uumjunyokwenyugono. Su toro kuudo sauro'ji tool moro yogalo sokwollaikubwemo akavino donekono. “Oo Aguto toollu uumjunyo'moneyokwe yogalo'mdeyo.” Neya donekono.

³⁸ Toro kuvi kuruv kemida'ai a'mwo pwol moro kuuguudo su tovino su toro kuudo miyauro'ji toolno'gwowi kevu a'mwo su toolluro kuuguudo ikudodowo'jure tovi kaduko nuuwimwalpiyo.

³⁹ Toro tovino tov miyobuuravoo, kevu Gooti toolluro yogalo tokwe kuurokado momjodumovlaiyo'moneyokwe guureji aikulluno'ji tov ilaiyokwono. Aki gabovo yogaljo tonyuda'ai jo'mo tovino kevu kudo'aiko yiunokuudo nollukurosumwalpiyo.

⁴⁰ Toro kugaikul kuruv kevu su'bwo'nupi toga Gooti toolluro yogalo tokwe kuurokado mollajo'mo tokwe'aro gabovo yogaljo tokwe'aro yiuwi'nokai buro'nyo buro'nyo supi su ton po'dogalo tomgu'aro mollubimowapiyopi duumjungovlavogaulo.