رومیەگان 2 - کتاب مقدس به زبان کردی جنوبی - گویش کلهوری

داوەری دادپەروەرانەێ خودا

¹ ئمجا تو ئێ ئایەم که یەکیگ تر ماکوم کەی، هەر کەسێگ که هید، هویچ دەسپێچکێگ نێری. چوینکه وه هەر باوەتێ که یەکیگ تر ماکوم کەی، خوەد ماکوم کردیده؛ چوینکه تو که داوەری کەی، خوەد هەر ئەو کاریله کەی.

² ئیمه زانیمن که داوەری خودا وه سەر کەسیلێ که ئیجور کاریلێ کەن، حەقه.

³ جا تو ئێ ئایەمێ که کەسیلێ که ئیجور کاریلێ کەن داوەری کەی وەلێ خوەدیش هەر ئەو کاریله کەی، ئێ گومان کەی له داوەری خودا تویەنێ دەر بچید؟

⁴ یا دەوڵەمەنی مێرەبانی و سەور و تاموڵ خودا سوکەو کەێد و نیەزانێ که مێرەبانی خودا له ئەو باوەتەسه که تو وەرەو توبه بوێد؟

⁵ وەلێ تو وەبونەێ کەلەڕەقی و دڵ توبه نەکەرد، خەزەو ئەڕا خوەد، ئەڕا ڕوژ خەزەو گردەو کەی، ڕوژیگ که داوەری دادپەروەرانەێ خودا ئاشکراوه بود.

⁶ خودا «سزاێ هەر کەس وه پێ کردەوەێ دەێده پێ.»

⁷ ئەیو زنەیی ئەبەدی بەخشێده کەسیلێ که وەگەرد سەور، کاریل خاس وەجێ تیەرن و هانه شون جەڵاڵ و حرمەت و نەمری؛

⁸ وەلێ وه خودپەسەنیل و ئەوانه که له ڕاسی گوش نیەتەکەنن بەڵکەم گوش له نادرسێ تەکنن، توڕەیی و خەزەو ڕشنێ.

⁹ هەر ئایەمێگ که خراوی بکێ تویش بەرد و پەشێوی تێ، یەکم جار جویلەکە و لەشونی یونانی.

¹⁰ وەلێ هەر کەسێگ که خاسێ بکێ، جەڵاڵ و حرمەت و ئاشتی و سڵامەتی بوده نسیوێ، یەکم جار جویلەکە و لەشونی یونانی.

¹¹ چوینکه خودا دوچەوەکی نیەکێ.

¹² ئەڕا ئیه که گشت کەسیلێ که بی ئیه که شەریعەت داشتوین گونا کردنه، بی شەریعەتیش له بین چن و گشت کەسیلێ که له ژێر شەریعەت گونا کردنه، له ڕێ شەریعەت داوەری بون.

¹³ چوینکه تەنیا ئەوانەێ که شەریعەت شنەفن لەلاێ خوداوه سالحان نین، بەڵکەم کەسیلێ سالحان وه حساو تیەن که شەریعەت وه کار بەن.

¹⁴ ئەڕا ئیه که هناێ ناجویلەکەیل که شەریعەت نێرن، له ڕوی سریشتێان حوکمیل شەریعەت وه جا تیەرن، ئەوانه هەر چەن شەریعەت نێرن، وەلێ خویان ئەڕا خویان شەریعەتێگن.

¹⁵ ئەوانه نیشان دەن که کار شەریعەت وه بان دڵیان نویسریاس، هەر ئەوجورە که وژدانێانیش وه ئیه شاێەتی دێ و فکریلێان وه نوای یەکترەکی یا تاوانبارێان کەێ یا بێتاوان.

¹⁶ ئیه ڕوژیگ هەڵکەفێ که خودا وه پێ ئینجیلێگ که من جار دەم، رازیل دڵ ئایەمیل له ڕێ مەسیح عیسا داوەری کەێ.

جویلەکەیل و شەریعەت خودا

¹⁷ وەلێ ئەگەر تو خوەد وه جویلەکە زانید و پاڵەو دایدەسه شەریعەت و ئەڕا ئیه که خودا ناسی وه خوەد شانازی کەی و

¹⁸ خاست ئەیو زانید و چوینکه له شەریعەت تالیم گردیده، ئەو چشته که له گشت خاستره مور کەی و

¹⁹ ئەگەر دڵنیایدن که تو خوەد ڕێنمای کوریلید و نویریگید ئەڕا ئەوانه که هانه ناو تیەریکی و

²⁰ مالم نەزانیل و ماموستاێ مناڵیل و ساێو شەریعەتێگید و ماریفەت و ڕاسی ها نوای چەود،

²¹ جا تو که ئەو باقی مەردمه تالیم دەێ، ئێ خوەد تالیم نێید؟ تو که وه زد دزی تالیم دەێ، ئێ خوەد دزی کەی؟

²² تو که ئویشێ نەبایه داوانپێسی کرد، ئێ خوەد داوانپێسی کەی؟ تو که قیند له بتیل تێ، ئێ خوەد مابەدیل تاڵان کەی؟

²³ تو که وه شەریعەت شانازی کەی، ئێ وەگەرد ژێر پا ناین شەریعەت، خودا بی حرمەتەو کەی؟

²⁴ چوینکه هەر ئەوجورە که وەناو کتاو پەێخەمەریل نویسریاس: «وەبونەێ ئیوه، لەناو ناجویلەکەیل وه ناو خودا کفر کەن.»

²⁵ چوینکه خەتەنه وه ڕاسی ئەو وەخته تیەرزێ که شەریعەت وه جێ باری، وەلێ ئەگەر شەریعەت بنێدی ژێر پا، چماێ خەتەنه نەکریایده.

²⁶ جا ئەگەر پیاێگ که خەتەنه نویه، حوکمیل شەریعەت وه جێ بارێ، ئێ خەتەنه کریا وه حساو نیەتێد؟

²⁷ جا ئەوه که وەناو جەسەوه خەتەنه نویه، وەلێ شەریعەت پارێزنێ، تنێ که حوکمیل نویسریای وەناو شەریعەت دێرێ و خەتەنه بویده وەلێ شەریعەت نێده ژێر پا، ماکوم کەێ.

²⁸ چوینکه جویلەکەێ ڕاسەکانی ئەوه نیه که وه شێوه جویلەکە بود و خەتەنەێ ڕاسەکانییش کارێگ وه شێوه و جەسەی نیه.

²⁹ بەڵکەم جویلەکە ئەوەسه که له ناخەو جویلەکە بود و خەتەنەیش کارێگه دڵی که له ڕێ روح خودا ئەنجام گرێ، نه له ڕێ شەریعەت نویسریای. ئیجور کەسێگ تاریف خوەێ له خودا گرێ، نه له ئایەم.