وەحی وه یوحەنا 9 - کتاب مقدس به زبان کردی جنوبی - گویش کلهوری

¹ فریشتەێ پەنجم پف کرده شیپورەگەێ و مه هەسارەێگ دیم که له ئاسمانەو کەفته بان زەویا. کلیل چاێ هاویه که بن نێری، دریاده ئی هەساره.

² ئەو هەساره چاێ هاویه واز کرد، دویکەڵیگ له چاگه هێز گرد هەر جور دویکەڵ کویرەێگ فره گەورا، ئەو جوره که خوەر و هەوا له دویکەڵ چاگه سیه و تیەریکەو بین.

³ جا له ناو دویکەڵەگه، کولەیڵی هاتنه بان زەوی و هێزێگ جور هێز دمارەکوڵیل بان زەوی دریاده پێان،

⁴ وەپێان وەتریا که وه گژگیای زەوی یا هویچ گیاێ سەوزێگ یا دارێگ زەرەر نەرەسنن، بەڵکەم تەنیا وه ئەو ئایەمیله زەرەر برەسنن که مور خودا له تەخت تێوێڵێانەو نێرن.

⁵ جا وەپێان ئجازه دریاد که پەنج مانگ ئی ئایەمیله عەزاو بێەن، بی ئەوه که بکوشنێان. عەزاوی که ئەو ئایەمیله کیشان هەر مینستیاد عەزاو چز دمارەکوڵ، ئەو وەخته که بێیده کەسێگەو.

⁶ وەناو ئەو ڕوژیله مەردم وەشون مردن گەردن، وەلێ پەێاێ نیەکەن؛ تاسەێ مردن کەن، وەلێ مردن له لێان دەرچود.

⁷ شێوەێ ئەو کولەیله هەر مینستیاده ئەسپیلێگ که ئەڕا شەڕ گورجەو بوینه. له بان سەریانەو چشتێگ بی که مینستیاده تاج تەڵا و دەمچەویان هەر جور دەمچەو ئنسان بی.

⁸ قژیلێگ جور قژ ژنيل داشتن و دگانیلیگ جور دگان شێریل.

⁹ سینەپوشێگ جور سینەپوش ئاسنی داشتن و دەنگ باڵیلێان جور قیڕەێ ئەسپیل و ئەرابەیل فرەێگ بی که ئەڕا شەڕ بدەون.

¹⁰ دمیل و چزیلێگ داشتن جور دم و چز دمارەکوڵ، وەناو دمیلیان هێز ئەوه بی که پەنج مانگ مەردم عەزاو بێەن.

¹¹ پادشاگەێان فریشتەێ چاێ هاویه بی که ناوێ وه زوان عبرانییل ’ئەبەدون‘ وه زوان یونانی ’ئاپولیون‘ یانێ خاپورکەره.

¹² ’وی‘ یەکم له سەر گوزەریاس. بنوڕ، دو ’وی‘ ترەک هێمراێ باێه باێ.

¹³ ئمجا فریشتەێ شەشم پف کرده شیپورەگەێ و مه دەنگێگ شنەفتم که له چوار شاخ قوروانگای تەڵایی که ها له نوای خودا، دەر هاتیاد؛

¹⁴ جا شنەفتم که وه ئەو فریشتەێ شەشمه که شەیپور داشت، وەت: «ئەو چوار فریشته که له لاێ چەم گەوراێ فورات بەسیانەسەو، وێڵێان بکه.»

¹⁵ جا ئەو چوار فریشته که ئەڕا هەر ئی ساته و هەر ئی ڕوژه و هەر ئی مانگه و هەر ئی ساڵه گورج نریاوینه لا، وێڵ کریان تا سێ کوتی ئایەمیزاێ بکوشن.

¹⁶ لەشکەریل ئەسپ سوار دویس ملیون کەس بین، ژمارەیان شنەفتم.

¹⁷ ئەسپیل و سواریلێگ که له رویای خوەم دیم، ئیجوره بین: سینەپوشێگ له وەرێان بی وه رەنگ سویر ئاگر و کەو پڕ رەنگ وه زەردی گوگرد. سەر ئەسپیل هەر جور سەر شێریل مینێستیاد و له دەمیان ئاگر و دویکەڵ و گوگرد هاتیاده دەیشت.

¹⁸ سێ کوتی ئایەمیزاێ له ئی سێ گله بەڵای ئاگر و دویکەڵ و گوگرد که له دەمیان هاتیاده دەیشت، کوشریان.

¹⁹ هێز ئەسپیل وەناو دەمیانەو بی و له ناو دمێانەو. چوینکه دمێان جور مار بی وەگەرد سەرێگ که وەگەردیەو زەرەر دیان.

²⁰ له ئایەمیزاێ، ئەوانه که له ئی بەڵایله نەکوشریان، نه له کاریل دەس خوێان توبه کردن. نه له پەرەسین دێویل دەس شوردن و نه له پەرەسین بتیل تەڵایی و نقرەیی و برنجه و کوچگین و چویی که نیەتویەنن بوینن یا بشنەفن یا ڕێ بکەن.

²¹ ئەوانه له ئایەم کوشییل و جادوکەرییل و خێزییل و دزییل خوێان توبه نەکردن.