وەحی وه یوحەنا 8 - کتاب مقدس به زبان کردی جنوبی - گویش کلهوری

مور هەفتم بوخور سوز تەڵا

¹ وەختێ وەرکەگه مور هەفتم واز کرد، نزیک نیم سات ئاسمان بێدەنگەو بی.

² جا ئەو هەفت فریشته که له نواێ خودا وسن، دیم که هەفت گله شەیپور دریاده پێان.

³ جا فریشتەێگتر هات که بوخورسزنێگ له تەڵا وەگەرد خوێەو داشت و وساده لاێ قوروانگا. بوخور فرەێگ دریاده پێ تا ئەوه وەگەرد دوعایل گشت ئیمانداریل وه مەسیح له بان قوروانگای تەڵایی که ها نوای تەخت، پیشکەشێ بکێد.

⁴ دویکەڵ بوخورەگه وەگەرد دوعایل ئیمانداریل وه مەسیح له دەس ئەو فریشته تا وه نوای خودا چیه بان.

⁵ ئمجا فریشته بوخورسزنەگه هەڵگرد و له ئاگر قوروانگا تەپان و خستەی بان زەوی. ئمجا هەورەتریقه و گرمەگرم و بڵاچه هەڵسیاد و زەوی که لەرزیاد.

هەفت شەیپور

⁶ ئمجا ئەو هەفت فریشته که ئەو هەفت گله شەیپوره داشتن، گورجەو بین تا پف بکەنه پێانەو.

⁷ فریشتەێ یەکم پف کرده شیپورەگەێ و تگر و ئاگر هامیته وه خوین بی که له ناکاوەو واریه مل زەویا و سێ کوتی زەوی سزیاد و سێ کوتی داریل سزیان و گشت گیایل سەوز سزیان.

⁸ فریشتەێ دویم پف کرده شیپورەگەێ و چشتێگ هەر جور کویەێ گەوراێگ که وه ئاگر گڕەێ هات، فڕه دریاده ناو دەریا و سێ کوتی دەریا بیه خوین.

⁹ جا سێ کوتی گیانەوەریل زنی دەریا مردن و سێ کوتی کەشتییل له بین چین.

¹⁰ فریشتەێ سێیەم پف کرده شیپورەگەێ و هەسارەێگ گەورا هەر جور مەشخەلیگ گڕان له ئاسمانەو کەفته بان سێ کوتی چەمیل و کیەنییل ئاو.

¹¹ ناو ئەو هەساره ’ئەفسەنتینه‘. سێ کوتی ئاویل له ئەفسەنتین تیەڵەو بین. جا مەردم فرەێگ وەبونەێ ئەو ئاویله مردن ئەڕا ئیه که ئەو ئاویله تیەڵەو بین.

¹² فریشتەێ چوارم پف کرده شیپورەگەێ و سێ کوتی خوەر و سێ کوتی مانگ و سێ کوتی هەسارەیلیش دریاده لێان، جورێ که سێ کوتی نویر ئەوانه تیەریکەو بین. جا سێ کوتی ڕوژ بێ نویر مەن و سێ کوتی شەویش.

¹³ جا نوڕسم و شنەفتم هەڵوێگ هەر ئەوجورە که له ‎ناوڕاس ئاسمان باڵەو گرێ، وه دەنگ بەرز هاوار کرد: «وی، وی، وی وه نیشتەجێیل زەوی، چشتێگ نەمنیه دەنگ شەیپورەگان ئەو سێ فریشتەێتریشه هەڵسێد.»