وەحی وه یوحەنا 6 - کتاب مقدس به زبان کردی جنوبی - گویش کلهوری

واز کردن موریل

¹ وەختێ وەرکەگه یەکمین مور له ئەو هەفت گله موره واز کرد، مه خوەم نوڕستم و شنەفتم یەکیگ له ئەو چوار گیانەوەر زنیه وەگەرد دەنگێگ هەر جور هەورەتریقه ئویشێ: «بەو!»

² وەختێگ نوڕستم ئەسپ چەرمگیگ وه نوای چەوم دیار داد. ئەو کەسه که سوار ئەسپەگه بی، کەمانێگ داشت و تاجێگ دریاده پێ و ئەوه پێروزمەن هاته دەیشت تا بوێدەو.

³ وەختێ وەرکەرگه مور دویمەگه واز کرد، شنەفتم که دویمین گیانەوەر زنی ئویشێ: «بەو!»

⁴ جا یە ئەسپ تر هاته دەیشت که سویر ڕوشن بی، وه ئەوه که سوار ئەسپەگه بی، ئجازه دریاد تا ئاشتی و سڵامەتی له بان زەوی لا بوێد تا مەردم وه کوشتن یەکترەکی هەڵخزنێد. شمشێر گەوراێگ دریاده پێ.

⁵ وەختێ وەرکەرگه سێیەمین مورەگه واز کرد، شنەفتم که سێیەمین گیانەوەر زنی ئویشێ: «بەو!» وەختێ نوڕستم، ئەسپ سیەێگ وه نوای چەوم دیار دا و ئەوه که سوار ئەسپەگه بی تەرازوێگ له دەسیەو بی.

⁶ له ناوڕاس ئەو چوار گیانەوەر زنیه، چشتێگ جور دەنگێگ شنەفتم که وەتیا: «یەێ پەێمانه گەنم وه یەێ دینار، سێ پەێمانه جویه وه یەێ دینار؛ وەلێ وه روین و شراو زیان مەرەسن!»

⁷ وەختێ وەرکەرگه چوارمین مورەگه واز کرد، شنەفتم که چوارمین گیانەوەر زنی ئویشێ: «بەو!»

⁸ وەختێ نوڕستم، ئەسپ رەنگ ڕوی پەڕیاێگ وه نوای چەوم دیار داد و ئەوه که سوار ئەسپەگه بی مەرگ ناوێ بی و جهان مردگیل وەشونیەو هاتیان. جا وه ئەوانه دەسڵات دریاد تا چواریەکی زەوی وەگەرد شمشێر و قاتوقڕی و نەخوەشی خراو و دڕنەێیل بان زەوی، بکوشن.

⁹ وەختێ وەرکەرگه مور پەنجمەگه واز کرد، له ژێر قوروانگا، گیانیل کەسیلێگ دیم که له ڕێ کەڵام خودا و شاێەتیێگ که داوین، کوشریاوین.

¹⁰ ئیانه دەنگ بەرز هەڵ هاوردن که: «ئێ خوداوەندێگ که وه هەر چی چشته حاکمی، ئێ قودوس، ئێ که حەقی، تا کەی داوەری نیەکێ و ئنتقام خوین ئیمه له نیشتەجێیل زەوی نیەسینێد؟»

¹¹ ئمجا وه هەر کام له ئەوانه، بەتیەێ چەرمێگ دریاد و وەتریاده پێان که قێرێگ‎تر ئارام بگرن تا وەختێگ که ژمارەێ هاوخزمەتیل و برایلێان که باێه جور ئەوانه بکوشریەن، کامڵەو بود.

¹² وەختێ وەرکەرگه مور شەشمی واز کرد، مه خوەم نوڕستم که له ناکاوه زەوی لەرزەی فره گەوراێگ هەڵکەفت و خوەر جور پەڵاس، سیەوه بی و مانگ چوارده وه رەنگ خوین دەرهات.

¹³ جا هەسارەگان ئاسمان ڕشیانه مل زەویا، ئەوجوره که هەنجیریل نەرەسیای وه جویلەێ واهێڵانیگ له دار ڕشێینه خوار.

¹⁴ جا ئاسمان جور تومارێگ که پێچێیده ناو خوێەو نوقوم بی و هەر کویه و جەزیرەێگ له جێ خوەێ هەڵکەنیاد.

¹⁵ ئمجا پادشایل زەوی و گەورایل و سپاسالارێل و دەوڵەمەنیل و هێزداریل و هەرکەس، هەم خوڵام و هەم ڕزگار وەناو ئشکەفتیل و وەناو تاش کەمەریل، خوێان شاردنەو.

¹⁶ ئەوانه ڕوی کردیانه کویەیل و تاش کەمەریل و وەتیان: «بکەفنه مل ئیمه و له ڕوی ئەیو تەختنشین و له خەزە‎و وەرکەگه بشارنمانەو.

¹⁷ چوینکه ڕوژ گەوراێ خەزە‎و ئەوانه ڕەسیه، چ کەسێگ تویەناێ وساینی هەس؟»