وەحی وه یوحەنا 10 - کتاب مقدس به زبان کردی جنوبی - گویش کلهوری

فریشته و تومار بویچگ

¹ ئەو وەخته فریشتەێ هێزدارێگ‎تر دیم که له ئاسمانەو هاتیاده خوار و هەورێگ وه دەوریەو پێچیاوی و سیمینەوزەرینەێگ له بان سەرێ. دەمچەوێ جور خوەر بی و پایلێ جور کوڵەکەیل ئاگر.

² تومار بویچگ واز کریاێگ له دەسیەو بی. پاێ ڕاسی ناده ناو دەریا و پاێ چەپی ناده بان وشکای.

³ جا ئەوجورە هاوار بەرزێگ هەڵ هاورد که مینستیاده قیڕەێ شیر. وەختێ کردی هاوار، ئەو هەفت گله هەورەتریقه هاتنه دەنگ و قسیه کردن.

⁴ جا وەختێ ئەو هەفت گله هەورەتریقه قسیه کردن، تواسم بنویسم وەلێ شنەفتم دەنگێگ له ئاسمانەو وەت: «ئەو چشتێ که ئەو هەفت گله هەورەتریقه وەتنه، مورێ بکه و مەنویس.»

⁵ ئەو فریشتەێگ که دیم وه مل دەریا و وشکای وساوی، دەس ڕاسی وەرەو ئاسمان هێز دا و

⁶ وه ئەیو که تا ئەبەد و تا ئەبەد زنیه قەسەم خوارد؛ هەر ئەیو که ئاسمان و هەر چێ ها ناوێ و زەوی و هەر چێ ها ناوێ و دەریا و هەر چێ ها ناوێ وەدی هاورد. ئەیو قەسەم خوارد و وەت که دیتر فرەتر وه ئیه ماتەڵی وه کار نیه.

⁷ بەڵکەم وه ئەو ڕوژیلی که فریشتەێ هەفتم پف بکێده شیپورەگەێ، راز خودا وه دی تێد، ئەوجورە که وه خزمەتکاریل خوەێ یانێ پەێخەمەریل، جار دا.»

⁸ ئمجا ئەو دەنگه که له ئاسمانەو شنەفتویم یەێ جارتر وەگەردمەو قسیه کرد که: «بچو و ئەو تومار واز کریاێگ که ها دەس ئەو فریشته که وه مل دەریا و وشکای وساس، بگر.»

⁹ جا چیمه ئەڕا لاێ ئەو فریشته و له لێ تواسم ئەو تومار بویچگه بێیده پێم. فریشتەگه وەپێم وەت: «ئیه بگر و بوخوه! ناوزگد تیەڵەو کەێد، وەلێ وەناو دەمد هەر جور هەسەڵ شیرنەو بود.»

¹⁰ جا ئەو تومار بویچگه له دەس فریشتەگه گردم و خواردم. له ناو دەمم هەر جور هەسەڵ شیرن بی، وەلێ وەختێ که خواردمەێ، ناوزگم تیەڵەو بی.

¹¹ ئمجا وه مه وەتریا: «توی وه دواره باێه له باوەت قەومیل فرەێگ و ملەتیل فرەێگ و زوانیل فرەێگ و پادشایل فرەێگ نەبوەت بکێد.»