مەرقوس 16 - کتاب مقدس به زبان کردی جنوبی - گویش کلهوری

زنیەو بین عیسا

¹ وەختێ ڕوژ شەبات که هەر ئەو شەمەێ موقەدەس جویلەکەیله تەمام بی، مریەم مەجدەلیه و سالومه و مریەم، داڵگ یاقوب، چشتیل خوەش بویگ سەنن تا بچن بماڵنی جنازەێ عیسا.

² جا وه یەکمین ڕوژ هەفته، شەوەکی شەفەق، وەخت هەڵاتن خوەر، کەفتنه ڕێ وەرەو مەقبەره.

³ ئەوانه وه یەکترەکی وەتیان: «کی کوچگەگه ئەڕا ئیمه وه نوای مەقبەرەگه پلێ دەێده لا؟»

⁴ وەلێ وەختێ نوڕین، دین ئەو کوچگه که فره گەورا بی، وه نوای مەقبەرەگه پل دریاسه لا.

⁵ وەختێ چینه ناو مەقبەرەگه، جوانێگ دین که وه لاێ ڕاس نیشتوی، بەتیەێ چەرمێگ له وەرێ بی. جا ئەوانه زاورێان چی.

⁶ جوانەگه وەپێان وەت: «زاوردان نەچود. ئیوه مینێ عیساێ ناسری کین که کیشانێ سەلیب. ئەوه زنیەو بیه؛ وه ئێرا نیه. بنوڕنه ئەو شونه که جنازەگەێ ناوین.

⁷ ئێرنگه، بچن وه شاگردەگانێ و وه پتروس بویشن ئەوه وەرجه ئیوه چوده ئەڕا جەلیل؛ وه ئەوره دوینینێ، هەر ئەوجورە که وەرجەوە وەتویه پێدان.»

⁸ جا ژنەگان هاتنه دەیشت و له مەقبەرەگه دەر چین، چوینکه لەرز کەفتویه کوڵێان و سەریان سڕ مەنوی. ئەوانه وه هویچکەس چشتێ نەوەتن، چوینکه زاورێان چیاد.

⁹ وەختێ عیسا وه دەم شەوەکی یەکمین ڕوژ هەفته زنیەو بی، یەکم جار وه مریەم مەجدەلیه که هەفت دێو له لێ کردویه دەیشت، ئاشکرا بی.

¹⁰ مریەمیش چی و وه هاوڕێیل عیسا که وەناو ئازیەت و گیره بین، خەوەر دا.

¹¹ وەلێ وەختێ ئەوانه شنەفتن که عیسا زنیەو بیه و مریەم دیەسێ، باوەڕ نەکردن.

¹² وەشون ئەوه، عیسا وه شێوەێگ تر وه دو نەفەر له ئیانه که چیانه ئەڕا ناو ئاوایێگ، ئاشکرا بی.

¹³ ئەو دو نەفەره هاتنەوه و باقیان وه ئی ئەمرە ئاگادار کردن، وەلێ قسیەێ ئیانیشه باوەڕ نەکردن.

¹⁴ ئمجا عیسا وه ئەو یانزه نەفەره، وەختێ داشتن نان خواردیان، ئاشکرا بی و ئەوانه وەبونەێ بی ئیمانی و دڵڕەقێان سەرزنشتێان کرد، چوینکه قسیەێ کەسیلێ که وەشون مردن و زنیەو بینی دوینەی، باوەڕ نەکردن.

¹⁵ جا وەپێان وەت: «وه سەرئانسەر دنیا بچن و ئینجیل ئەڕا گشت دنیا بانگەوازی بکەن.

¹⁶ هەر کەس ئیمان هاورد و خوسڵ تەعمید گرد، نجات پەێا کێ. وەلێ هەر کەس ئیمان نارێ، ماکوم بود.

¹⁷ ئەوانه که ئیمان تیەرن، ئی نیشانەیله ها گەردیان: وه ناو من دێویل کەنه دەیشت و وه زوانیل تازه قسیه کەن،

¹⁸ وەگەرد دەسیلێان مار گرن، ئەگەر ژار کوشەندەیش بخوەن، زەرەرێگ وەپێان نیەرەسێ، دەس نەنه مل نەخوەشیل و ئەوانه شەفا پەێا کەن.»

¹⁹ خوداوەند عیسا وەشون ئیه که ئی قسیەیله وەپێان وەت، بڕیاده ئاسمان بەرز و نیشته دەس ڕاس خودا.

²⁰ جا ئیانیشه چینه دەیشت و وه گشت جاێ بانگەوازی کردیان، خوداوەندیش له ڕێ ئەوانه کار کردیا و کەڵام خوەێ وەگەرد نیشانەیلێ که وەگەرد ئیانەوه بی، مور کردیاد.