مەرقوس 14 - کتاب مقدس به زبان کردی جنوبی - گویش کلهوری

نەخشەێ کوشتن عیسا

¹ دو ڕوژ مەنویه جەشن پسەخ و فەتیره. سەران کاهنیل و ماموستایل تەورات وەشون ئیه بینه که چوی وه فێڵێگ عیسا بگرن و بکوشنێ،

² چوینکه وەتیان: «با وه ڕوژەیل جەشن نود، نەخواێ ئاژاوە بکەفێه ناو مەردم.»

³ وەختێ عیسا وەناو ئاوایی بەیت‌عەنیا وه ماڵ شەمعون جوزامی وه سەر سفره نیشتوی، ژنێگ وەگەرد قاو مەرمەریگ وه ئەتر فره گران قیمەتی، له سونبول خاڵس، هاته ئەڕا لاێ عیسا و قاوەگه شکان و ئەترەگه ڕشانه مل سەری.

⁴ وەلێ بڕێگ له ئەوانه که وه ئەوره بین توڕه بین، وه یەکترەکی وەتن: «ئەڕا باێه ئی ئەترە ئیجوره وه کیس بچود؟

⁵ ئەوه فرەتر له سێسەد دینار بویا بفروشیدێ و پویلەگەێ بێیده کەمدەسیل.» ئەو ژنه فره سەرزنشت کردن.

⁶ وەلێ عیسا وەپێان وەت: «کارێ وەپێ نیاشتون. ئەڕا رەنجنینێ؟ ئەوه له حەق مه کار خاسێ کردێه.

⁷ چوینکه ئیوه هەمویشه کەمدەسیل وەگەرد خوەدانەو دێرین، هەر وەختیش بتواین تویەنين مەیەتیان بیەین، وەلێ مه ئەڕا هەمویشه نێرین.

⁸ ئی ژنه هەر چی وه دەسێ هات، کرد. ئەوه وەگەرد ئی کاره، جەسەێ مه ئەڕا وەرجه وه قەور ناین، ئەتر ماڵی کرد.

⁹ وه ڕاسی، وه ئیوه ئویشم، وه گشت جهان وه هەر کوره ئینجیل بانگەوازی بکرێی، کار ئی ژنیشه وه یادێ ئویشنێ.»

خێانەت یەهودا

¹⁰ ئمجا یەهوداێ ئەسخەریوتی که یەکی له ئەو دوانزه شاگرده بی، چیه ئەڕا لاێ سەران کاهنیل تا عیسا بێیده دەس ئەوانه.

¹¹ ئەوانه وەختێ قسیەیل یەهودا شنەفتن، شادەو بین و وەپێ وادەێ پویل دان. جا یەهودا وەشون دەرفەتێگ بی تا عیسا بێیده دەسێان.

نان ئێوارەێ ئاخر

¹² وه یەکمین ڕوژ جەشن فەتیره که وەرک پسەخ قوروانی کەن، شاگردەگان عیسا له لێ پرسین: «تواێ ئەڕا کوره بچیم، تا ئەڕاد نان ئێوارەێ پسەخ گورجەو بکێم تا بخوێ؟»

¹³ ئەیو دو نەفەر له شاگردەگانێ کل کرد و وەپێان وەت: «بچنه ئەڕا شار؛ وه ئەوره پیاێگ وەگەرد کویزەێگ ئاو تەقێده پێدان. وەشونیەو بچن.

¹⁴ وه هەر کوره چیه ناو، وه ساێو ماڵەگه بویشن، ”ماموستا وەتیه، مێوانخانەگەێ مه ها کوره تا نان ئێوارەێ پسەخ وەگەرد شاگردەگانم بخوەم؟“

¹⁵ ئەوه وه پوش بان وتاخێگ گەورا و داخریاێ و گورج وەپێدان نیشان دەێ. ئەوره ئەڕا ئیمه گورجەو بکەن.»

¹⁶ ئمجا شاگردەگان چينه ئەڕا شار و گشت چشتێگ هەر ئەوجورە که وەپێان وەتوی دین و نان ئێوارەێ پسەخ گورجەو کردن.

¹⁷ وەختێ بیه شەو عیسا وەگەرد دوانزه شاگردەگەێ چیه ئەڕا ئەوره.

¹⁸ وەختێ نیشتوینه سەر سفره و نان خواردیان، عیسا وەت: «وه ڕاسی، وه ئیوه ئویشم یەکی له ئیوه که وەگەردمەو نان خوەێ مه دەێده دەس دشمەنەو.»

¹⁹ ئەوانه خەمبار بین و گله وه گلەێان له لێ پرسیان: «ئەوه منم؟»

²⁰ عیسا وەپێان وەت: «یەکی له ئی دوانزه شاگردەسه، هەر ئەوه که نانەگەێ وەگەردمەو ژەنیه ناو جام.

²¹ کوڕ ئنسان هەر ئەوجورە که لەباوەتێ نویسریاس، چود، وەلێ وای وه حاڵ ئەو کەسه که کوڕ ئنسان دەێده دەس دشمەنەو. ئەڕاێ خاستر ئیه بی هەراێهەر ناتیاده دنیا.»

²² هێمراێ خەریک خواردن بین که عیسا نانەگه هەڵگرد و وەشون ئیه که سپاس خودا کرد، لەتی کرد و دادەێ شاگردەگانێ و وەت: «بگرن، ئیه جەسەێ منه.»

²³ ئمجا جامەگه هەڵگرد و وەشون شوکر کردن، دادەێ پێان و گشت له لێ خواردن.

²⁴ وەپێان وەت: «ئیەسه خوین مه ئەڕا پەێمان تازه که وەبونەێ فره له کەسیل ڕشێی.

²⁵ وه ڕاسی، وەپێدان ئویشم دی وه بەر مەیو نیەخوەم تا ڕوژی که وه پادشایی خودا، وه تازەێ بخوەم.»

²⁶ ئمجا وەشون ئیه که بەیت خوەنین، کەفتنه ڕێ وەرەو کویەێ زیتون.

پێشگویی حاشا کردن پتروس

²⁷ عیسا وەپێان وەت: «گشتدان پشت کینه پێم، چوینکه وەناو کتاو موقەدەس نویسریاس، «”دەمه شوانەگه و پەسیل دا تویچیەن.“

²⁸ وەلێ وەشون ئیه که زنیەو بوم، وەرجه ئیوه چمه ئەڕا جەلیل.»

²⁹ پتروس وەپێ وەت: «تەنانەت ئەگەر گشتیەکی پشت بکەنه پێد، مه هەراێهەر پشت نیەکەمه پێد.»

³⁰ عیسا وەپێ وەت: «وه ڕاسی، وه تو ئویشم، هەر ئیمشەو، وەرجه ئیه که کەڵەشیر دو جار بقویلنێ، سێ جار مه حاشا کەی!»

³¹ وەلێ پتروس فره پامل بی و وەت: «ئەگەر تەنانەت وەگەردیشەو بمرم، حاشاد نیەکەم.» ئەو باقی شاگردەگانیش هەر ئیجوره وەتیان.

باخ جتسیمانی

³² ئمجا چینه ئەڕا شونێ که جتسیمانی ناوێ بی، وه ئەوره عیسا وه شاگردەگانێ وەت: وه ئێرا بنیشن، تا مه دوعا بکەم.»

³³ ئمجا عیسا، پتروس و یاقوب و یوحەنا وەگەرد خوەێ برد، جا فره پەشێو و بێقرار بی، وەپێان وەت:

³⁴ «له ویشت خەم و خوسه، نزیکه بمرم. وه ئێرا بمینن و وەخەوەر بون.»

³⁵ ئمجا قێرێ دویرەو کەفت، خوەێ خسته مل زەوی دوعا کرد که ئەگەر بود ئەو وەخته وه سەری ڕەد بکرێ.

³⁶ ئەوه ئیجوره وەت: «ئەبا، باوگه، گشت چشتێ ئەڕا تو بود. ئی جامه له لێم دویرەو که، وەلێ نه وه خاست مه بەڵکەم وه خاست خوەد.»

³⁷ وەختێ هاتەو، دی ئەوانه هانه ناو خەو. جا وه پتروس وەت: «شەمعون، خەفتیدە؟ نەتویەنستی ساتێگ وەخەوەر بمینێ؟

³⁸ وەخەوەر بون و دوعا بکەن تا وەناو ئەزمون نەکەفین. روح وه ئەزرەته وەلێ جەسه بی هازه.»

³⁹ عیسا یەێ جارتر چی و هەر ئەو دوعا کرد.

⁴⁰ وەختێ هاتەو، دی ئەوانه هێمراێ هانه ناو خەو، چوینکه چەویلیان فره سەنگینەو بوی. ئەوانه نەزانستیان چه وەپێ بویشن.

⁴¹ ئمجا عیسا ئەڕا سێیەم جار هاته ئەڕا لاێ شاگردەگان و وەپێان وەت: «هێمراێ خەفتین و شەکەتی دەر کین؟ بەسه دی! ئێرنگه ئەو وەخته ڕەسیه. ئێرنگه کوڕ ئنسان درێیده دەس گوناکاریل.

⁴² هەڵسن، بچیمن. بنوڕن ئەوەسه ئەوه که دەێدەمە دەسەو له ڕێ رەسێ.»

تویش هاتن عیسا

⁴³ عیسا هێمراێ داشت قسیه کردیا که لەناکاوا یەهودا، یەکی له ئەو دوانزه شاگرده، وەگەرد قێرێ که شمشێر و کوتەک له دەسێان بی، له لاێ سەران کاهنیل و ماموستایل تەورات و شێخیل هاتن.

⁴⁴ یەهودا که عیسا داده گیر، نیشانەێگ وه هاوڕێیلی داوید و وەتوی: «ئەو کەسه که ماچێ کەم، هەر ئەوەسه؛ ئەوه بگرنەێ و هوشدانه پێەو بود و بوەنێ.»

⁴⁵ جا وەختێ وه ئەو شونه رەسێ، زویزی نزیک عیسا بی و وەت: «ماموستا!» جا ماچێ کرد.

⁴⁶ ئمجا ئەوانه ڕشیانه مل سەر عیسا و دەسگیری کردن.

⁴⁷ وەلێ یەکی له ئەوانه که وه ئەوره وساوی شمشێر کیشا و دا خوڵام کاهن گەورا و گوشێ بڕێ.

⁴⁸ عیسا وەپێان وەت: «مەر مه ڕێگرم وەگەرد کوتەک و شمشێر هاتینه بگرینەم؟

⁴⁹ هەر ڕوژ وه لاێ ئیوه وەناو مابەد تالیم دیام و نەگەردینەم. وەلێ نویسریای کتاو موقەدەس باێه باێده دی.»

⁵⁰ ئمجا گشت شاگردەگان هیشتنەێ جێ و دەر چین.

⁵¹ جوانێگ که تەنیا پارچەێگ کەتان پێچانویه دەور خوەێ، وەشون عیسا کەفته ڕێ. ئەویش گردنەێ،

⁵² وەلێ ئەوه، پارچه کەتانەگه خستەی و وه ڕویتی دەرچی.

بازخواز وه نوای شوراێ جویلەکە

⁵³ عیسا بردنه ئەڕا لاێ کاهن گەورا. وه ئەوره گشت سەران کاهنیل و شێخیل و ماموستایل تەورات گردەو بوین.

⁵⁴ پتروسیش له دویرەو وەشون عیسا چیا تا ڕەسیه ناو حسار ماڵ کاهن گەورا. جا وه ئەوره، وەگەرد نگابانەگان دانیشت تا له لاێ ئاگرەگه خوەێ گەرمەو بکێ.

⁵⁵ سەران کاهنیل و گشت ئاڵ شوراێ جویلەکە وەشون پەێا کردن شاێەتێگ وه زد عیسا بین تا بکوشنێ، وەلێ هویچ پەێا نەکردن.

⁵⁶ چوینکه فره له کەسیل شاێەتییل درو وه زد عیسا دان، وەلێ شاێەتییلێان جور یەک نوی.

⁵⁷ ئمجا چەن نەفەر هاتنه نوا و وه زد عیسا شاێەتی درو دان، وەتن:

⁵⁸ «ئیمه خوەمان شنەفتیمنه که وەتیا، ”ئی مابەده که وه دەس بەشەر درس کریاس خراوی کەم و وەناو سێ ڕوژ، مابەدێگ تر درس کەم که وه دەس بەشەر درس نەکریاوی“»

⁵⁹ وەلێ شاێەتییلێان جور یەک نوی.

⁶⁰ ئمجا کاهن گەورا وه ناوڕاس جەماێەت وساد و وه نوای گشت له عیسا پرسی: «هویچ جواوی نێری بێی؟ ئیه چ شاێەتیێگه وه زد تو دەن؟»

⁶¹ وەلێ عیسا هەر بێدەنگ مەن و جواوی نیاد. یەێ جارتر کاهن گەورا له لێ پرسی: «تو مەسیحی، کوڕ خوداێ بمارک؟»

⁶² عیسا وەپێ وەت: «من ئەوەم، کوڕ ئنسانیش دوینین که وه دەس ڕاس خوداێ تویەنا نیشتیه و وەگەرد هەوریل ئاسمانەو تێی.»

⁶³ ئمجا کاهن گەورا یەخەێ خوەێ دڕان و وەت: «دی چ هەوەجی وه شاێەتیدەره؟

⁶⁴ کفرەگەێ شنەفتین. حوکمدان چەس؟» ئەوانه گشتێان حوکم دان که ئیه شایسەێ مردنه.

⁶⁵ ئمجا بڕێگ شرو کردنه تف کردن وه عیسا؛ ئەوانه بان چەويلی بەسان و دیانه لێ و وەتیان: «نەبوەت بکه!» نگابانیلیش گردنەێ و دانه لێ.

حاشا کردن پتروس

⁶⁶ وەختێ پتروس هێمراێ وه خوار، وەناو حسار بی، یەکی له کەنیزیل کاهن گەورا هاته ئەڕا ئەوره

⁶⁷ دیەێ له لاێ ئاگرەگه خوەێ گەرمەو کردیا. ئەو ژنه خاس نوڕیه پێ و وەت: «تنیش وەگەرد عیساێ ناسری بيد.»

⁶⁸ وەلێ پتروس دا ژێرێ و وەت: «نه زانم و نه حالی بوم چه ئویشێ!» ئیه وەت و چیه وەرەو دەروازەێ ماڵەگه. جا هەر ئەو وەخته کەڵەشیر قویلان.

⁶⁹ یەێ جارتر، کەنیزەگه چەوێ کەفته لێ و وه ئەوانه که وه ئەوره وساوین، وەت: «ئی پیا یەکی له ئەوانەسه.»

⁷⁰ وەلێ پتروس وه دواره دا ژێرێ. قێرێ تر، کەسیلێ که وه ئەوره وساوین، یەێ جارتر وه پتروس وەتن: «بێ گومان تنیش یەکی له ئەوانەێ، چوینکه جەلیلید.»

⁷¹ وەلێ پتروس شرو کرده لانەت کردن وه خوەێ و قەسەم خوارد، وەت: «ئی پیا که ئویشین، نیەناسمێ!»

⁷² هەر ئەو ئانه، کەڵەشیر ئەڕا دویم جار قویلان. ئمجا پتروس قسیەیل عیسا هاورده هویر که وەپێ وەتوی: «وەرجه ئەوەکه کەڵەشیر دو جار بقویلنێ، سێ جار مه حاشا کەی». جا دڵی ئاگر گرد و دەس نا گیره.