یاقوب 3 - کتاب مقدس به زبان کردی جنوبی - گویش کلهوری

بەڵای زوان

¹ برایلم، نەخواێ که قێر فرەێگ له لێدان بتواین بوینه ماموستا، چوینکه زانين وه مل ئیمه ماموستایل، داوەری سەختترەو بود.

² چوینکه گشتمان وەناو چشتیل فرەێگ خەتا کیم. ئەگەر کەسێگ له قسیه کردن خەتا نەکێ، ئنسان کامڵێگه و تویەنێ هەوسار گشت جەسەێ خویشێ بگرێه دەس.

³ ئەگەر ئیمه لەقاو خیمه ناو دەم ئەسپیل، وه بونەێ ئیەسه که گوشە لێمان بتەکنن و ئمجا تویەنيمن گشت جەسەێ ئەسپیل وه هەر لاێگەو که توایم، بویم.

⁴ بنوڕنه کەشتییل: هەرچەن فره گەوران و وەگەرد واێیل هێزداره که وەرەو نوا چن، وەلێ وەگەرد سوکان فره بویچگیگ وه هەر لاێگەو که ناخودا بتواێ، بریەن.

⁵ وه ئیجوره، زوانیش ئەنامێگ بویچگه، وەلێ قوڕاتیل قویێگ دێرێ. ترویسکەێ بویچگیگ چ دارسانیل گەوراێگ ئاگر دەێ.

⁶ زوانیش ئاگره؛ یە دنیا خراویه. زوان یەکی له ئەنامیل جەسەمانه که گشت جەسه ناپاکەو کەێد و گشت دەورەیل زنەیی ئیمه ئاگر دەێ، ئاگرێگ که له جەهەنم سەرچاوه گرید.

⁷ ئنسان گشت جور گیانەوەر دڕنه و باڵەنده و خزنه‎ و گیانەوەریل دەریایی تویەنێ رام بکێ و رامیش کردێه،

⁸ وەلێ هویچ ئنسانێگ تویەناێ رام کردن زوان نێرید. زوان شەڕئاشوێگه ملهوڕ و پڕ له ژارێگه که کوشێد!

⁹ وەگەرد ئی زوانه خوداوەندمان و باوگ ئاسمانیمان ستایش کەیمن و وەگەرد هەر ئی زوانه ئایەمیلێگ نووڕ کیم که وێنەێ خودا درس کریان.

¹⁰ له یە دەم، هەم ستایش تێده دەیشت، هەم نووڕ! ئێ برایلم، خاس نیه ئی چشتیله ئیجوره بود.

¹¹ ئێ مەگەر بود له کیەنیێگ هەم ئاو شیرن باێده دەیشت و هەم ئاو سوڵ؟

¹² برایلم، ئێ مەگەر بود دار هەنجیر، زیتون بێیده دەس؟ یا دار مەیو، هەنجیر بەر بێید؟ هەر ئیجوریشه کیەنی سوڵ نیەتویەنێ ئاو شیرن بخێده ڕێ.

دو جور زانیاری

¹³ وەناو ئیوه کامدان زانیاره و فام دێرێ؟ بیلێن تا ئەوه وەگەرد ڕێ رەوشت خاس خوەێ، نیشان بێید، وەگەرد کاریل هامیته وه بێ فیسی که له زانیاری سەرچاوه گری.

¹⁴ وەلێ ئەگەر وەناو دڵ خوەدان حەسویی تیەڵ و جێخوازی دێرین، وه خوەدان شانازی مەکەن و وه پێچەوانەێ ڕاسی قسیه نەکێن.

¹⁵ ئیجور زانیاریگ له ئاسمان ناتیەسه خوار، بەڵکەم هن زەویه و نەفسانی و شەیتانیه.

¹⁶ چوینکه هەر کوره حەسویی و جێخوازی بود، وه ئەوره بەلبەشو و هەر جور کردەوه ناپەسەنگیش هەس.

¹⁷ وەلێ ئەو زانیاری که له ئاسمانه، یەکم جار پاکه، ئمجا ئاشتیخوازه، نەرم و ئاموژیاری گوشدەره، نیقەڵتوز له بەزەیی و بەریل خاسه، دویر له دوچەوەکی و دوڕوییه!

¹⁸ سالح بوین، خەڵەێگه که وەناو ئاشتی و سڵامەتی و وه دەس ئاشتیخوازیل کاڵێید.