نامه وە غەلاتییل 2 - کتاب مقدس به زبان کردی جنوبی - گویش کلهوری

قەبوڵ بوین پولوس له لاێ ئەوباقی ڕەسولەیل

¹ جا وەشون چوارده ساڵ، وەگەرد بەرنابا یەێ جارتر چیمه ئەڕا شار ئورشەلیم و تیتوسیش وەگەرد خوەمەو بردم.

² مه وەبونەێ وەحیێگ که گردوێم، چیم و ئەو ئینجیله که وەناو ناجویلەکەیل جار دەم، وەتمه پێان تا دڵنیا بوم که وه هویچ پەتی نەدەویام یا نەدەویمه هەر چەن که ئيه وه تەنیایی، وەتمه ئەوانه که چماێ ئایەمیل بەناوبانگێگ بین.

³ وەلێ تەنانەت تیتوس که وەگەردمەو بی، هەرچەن یونانی بی، زوره لێ نەکردن تا خەتەنه بود.

⁴ ئیه له ئەو باوەتەو پێش هات که بڕێگ له برایل دروەکانی وه دزیەو هاوردوینه ناومان و ئەوانه سڕ خواردنه ناومان تا ئەو ڕزگاریه که وەناو مەسیح عیسا دێریم جاسوسی بکەن و وه خوڵامی بکیشنەمان.

⁵ ئیمه تەنانەت یەێ ئانیش مل ئەڕاێان نەخەفانیم تا ڕاسی ئینجیل وه تەمامی ئەڕادان بپارێزیەد.

⁶ وەلێ ئەو ئایەمیله که چماێ بەناوبانگن - ئەوانه هەر کەسێگ بین ئەڕام فەرقێگ نیەکێ، خودا دوچەوەکی نیەکەید - بەڵێ، وه پێدان ئویشم ئەو ئایەمیل بەناوبانگه چشتێگ وه مه فرەترەو نەکردن،

⁷ بەڵکەم وه چەواشه، ئەوانه دین که کار رەسانن ئینجیل وه خەتەنه نەکریایل یانێ ناجویلەکەیل وه مه سپاریاس، هەر ئەوجورە که کار رەسانن ئینجیل وه خەتەنه کریایل یانێ جویلەکەیل سپاریاویده پتروس.

⁸ چوینکه خوداێگ که هێز داده پتروس تا ڕەسول خەتەنه کریایل بود وه منیش هێز دا تا بومه ڕەسول ناجویلەکەیل.

⁹ جا وەختێگ یاقوب و کیفا و یوحەنا که چماێ کوڵەکەیل کلیسان، فیزێگ که نسیو مه بوی دین، دەس دوسی وەگە‎رد من و بەرنابا دان تا ئیمه بچیمنه ئەڕا لاێ ناجویلەکەیل و ئەوانیش بچنه ئەڕا لاێ خەتەنه کریایل.

¹⁰ تەنیا له ئیمه تواسن که دەستەنگیل وه یاێ بیاشتویمن، هەر ئەو کاره که خوەم تاسەێ وه جێ هاوردنی داشتم.

موخالفەت پولوس وەگرد پتروس

¹¹ وەلێ وەختێ کیفا هاته شار ئەنتاکیه، له نوای وسام، ئەڕا ئیه که ئاشکرا تاوانبار بی.

¹² چوینکه وەرجه ئەوه که کەسیلێگ لەلاێ یاقوب بان، کیفا وەگەرد ناجویلەکەیل نان خواردیان، وەلێ هەر ئیه که ئەو دەسه هاتن چوینکه ڕخێه له ئەوانه که پامل خەتەنه کردن بین چیاد، پا کیشاده دویاوه و خوەێ جیاوه کرد.

¹³ ئەوباقی جویلەکەیش وه ئی دوڕوییه وەگەردیەو بینه یەکی، ئەو جوره که تەنانەت بەرنابایش وەبونەێ دوڕویی ئەوانه له ڕێ دەر چی.

¹⁴ وەلێ وەختێ دیم کردەوەێان وه پێ ڕێەگەێ ڕاسەکانی ئینجیل نیه، له نوای گشتێان وه کیفا وەتم: «ئەگەر تو هەرچەن که جویلەکەێ وەلێ جور ناجویلەکەیل زنەیی کەی نه جور جویلەکەیل، چوی تویەنێ ناجویلەکەیل وادار بکێ تا جور جویلەکەیل زنەیی بکەن؟»

¹⁵ ئیمه خوەمان جویلەکە هاتیمنەسه دنیا و ’ناجویلەکەێ گوناکار‘ نیمن،

¹⁶ وه ئی حاڵەو زانیمن که ئایەم وەگەرد کردەوەێ شەریعەت سالحان وه حساو نیەتێ، بەڵکەم وه پێ ئیمان وه عیسا مەسیح سالحان وه حساو تێ. جا خوەمانیش وه مەسیح عیسا ئیمان هاوردیمنه تا وەگەرد ئیمان وه مەسیح، سالحان وه حساو بایمن نه وەگەرد کردەوەێ شەریعەت، چوینکه وەگەرد وه جێ هاوردن کردەوەێ شەریعەت کەسێگ سالحان وه حساو نیەتێد.

¹⁷ وەلێ ئەگەر هەر ئەوجورە که وەشون سالحان وه حساو هاتن وه وەسلەێ مەسیحیم، مالوم بود که ئیمیش گوناکاریم، ئی ئیه وه ئەو ماناسه که مەسیح خزمەتکار گوناس؟ هەڵبەت نەخیر!

¹⁸ چوینکه ئەگەر ئەو چشته که خوەم خاپور کردمه وەدواره بنیادێ بنەم، ئەو وەخته نیشان دەم که خەتاکارم.

¹⁹ چوینکه مه له ڕێ شەریعەت، وەپاوداین وه شەریعەت مردم تا ئەڕا خودا زنەیی بکەم.

²⁰ وەگەرد مەسیحەو وه سەلیب کیشریامه. دیتر مه نیم که زنەیی کەم، بەڵکەم مەسیحه که وەناو منەو زنەیی کەی؛ ئێرنگه زنەیی که له جەسەوه کەم، وەگەرد ئیمان وه کوڕ خوداس که مابەتم کرد و گیان خوەێ ئەڕا مه دا.

²¹ فیز خودا وه هویچ حساو نیەکەم، چوینکه ئەگەر سالح بوین له ڕێ شەریعەتەو وه دەس باتیاد، ئێ دی مەسیح وه هویچ پەتی مرد.