دویم قورنتییل 6 - کتاب مقدس به زبان کردی جنوبی - گویش کلهوری

¹ وه جیگەێ هاوکاریل خودا، لاڵکییمنه پێدانەو که فیز خودا وەناو زنەییدان پویچەو نەکێن.

² چوینکه خودا وەناو کتاو ئەشعەیاێ پەێخەمەر فەرمایش کێ: «له وەخت پەسەن خوەم، گوشە لێد دام وەناو ڕوژ نجات، مەیەتد دام.» ئەوەسه، ئێرنگه وەخت پەسەن خوداس؛ ئەوەسه، ئیمڕو ڕوژ نجاته.

زامەتیل پولوس

³ ئیمه کوچگ نیەخیمنه نوای ڕێ کەسێگ، تا هەله له خزمەتمان نەگرن،

⁴ بەڵکەم وه گشت چشتێ نیشان دیم که خزمەتکاریل خودایم، یانێ وه تاموڵ فره وەناو بەردیل، سەختییل، بەڵاێیل،

⁵ له وەخت فەڵەکه بینیل، وەناو زندانیل، وەناو ئاژاوەێیل، وەناو کاریل سەخت، وەناو شەونەخەفی، وەناو ورسیایی؛

⁶ وه پاکێ، وه ماریفەت، وه سەور، وه مێرەبانی، وەگەرد روح‌القودوس، وه مابەتێگ که دوڕویی وەناوێ نیه،

⁷ وه قسیەێ ڕاس و وه هێز خودا، وه چەکیل سالح بوین وه دەس ڕاس و چەپ؛

⁸ چ حرمەتمان بگرن چ سوکمان بکەن، چ بەێ ناومان بکەن چ وه خاسێ ناومان بوەن. وەگەرد ئیمه جور فێڵبازیل ڕێ رەوشت کریەێ، وەلێ ڕاسەگەێ ئویشیم؛

⁹ وەگەردمان هێمرای جور بی ناونیشانەیل ڕێ رەوشت کریەێ وەئیحالەو ناسیاریم؛ وەگەردمان جور ئایەمیلێ که دێرن مرن ڕێ رەوشت کریەێ، وەلێ هێمراێ زنەیمن؛ وەگەردمان جور ئایەمیل سزا دریاێ ڕێ رەوشت کریەێ، وەلێ هێمراێ نەکوشریایمنه؛

¹⁰ وەگەردمان جور ئایەمیل خەمبار ڕێ رەوشت کریەێ، وەئی حاڵەو هەمویشه دڵشادیم؛ وەگەردمان جور دەستەنگیل ڕێ رەوشت کریەێ، وەئیحالەو فره کەس دەوڵەمەنەو کیم؛ وەگەردمان جور کەسێگ که هویچ نێری ڕێ رەوشت کریەێ، وەئیحالەو خاون گشت چشتێگیم.

¹¹ ئێ قورەنتییل، ئیمه بی پەرده وەگەرددانەو قسیه کردیم و سفرەێ دڵمان ئەڕادان واز کردیم.

¹² ئیمه مابەت خوەمان لەلێدان دریخ نیەکیم. ئیوەین که مابەتدان له ئیمه دریخ کین.

¹³ له جێ - وەگەرددانەو جور مناڵیلم قسیه کەم؛ ئیوەیش سفرەێ دڵدان ئەڕامان واز بکێن.

مابەد خوداێ زنی

¹⁴ وەگەرد بی ئیمانیل وه ژێر هویەێ نابەرابەر نەچن، چوینکه چ هاوبەشیێگ ها له بین سالح بوین و شەرئاشویی؟ یا چ دوسیێگ ها له بین نویر و تیەریکی؟

¹⁵ یا چ وه یەکەو کەفتنێگ ها له بین مەسیح و بلیعال که هەر ئەو شەیتانەسه؟ یا ئیماندار چ هاوبەشیێگ وەگەرد بی ئیمان دێرێ؟

¹⁶ یا چ وه یەکەو کەفتنێگ ها له بین مابەد خودا و بتیل؟ چوینکه ئیمه مابەد خوداێ زنەیمن. هەر ئەوجورە که خودا وەناو تەورات و کتاویل پەێخەمەریل فەرمایش کێ: «وەناوێان نیشتەجێ بوم و وەناوێان ڕێ کەم و مه بومه خوداێ ئەوانه و ئەوانه بونه قەوم من.»

¹⁷ جا، خوداوەند فەرمایش کێ: «له ناوێان بچنه دەیشت و جیاوه بون. دەسه قێ هویچ چشت ناپاکێگ مەێه‌ن جا مه قەبوڵدان کەم.»

¹⁸ «من بومه باوگدان و ئیوەیش بوینه کوڕ و دویەت من. خوداوەند هەر وه تویەنا ئیه فەرمایش کێ.»