Evvan 6 - Skolt Koltta Gospel of John 1988

Isõs poorat vittdohat ooumžed

¹ Mâŋŋa tõʹst Isõs mõõni Galilea leʹbe Tiberiaazz jääuʹr tunbeälla.

² Suu viõǥǥte jiânnai oummu, kook leʹjje vuäinnam suu õõmâstuâjaid, ko son pueʹrii puõʒʒjid.

³ Isõs kuärŋai värra da iišti tåk mättʼtõspäärneesvuiʹm.

⁴ Juudlažniiʹǩǩi eʹjjpeeiʹvprääʹzneǩ leäi sami ââlda.

⁵ Ko Isõs ǩiʹcsti, son vuõiʹni, što jiânnai oummu puäʹtte suu årra. Son cieʹlǩi Iʹllpa: «Koʹst vuäitčep vuäʹstted porrmõõžž pukid täiʹd oummid?»

⁶ Son kõõjji tõn pâi Iʹllep ǩiččlõddâm diõtt. Son kâʹl tiõʹđi, mâiʹd tuejjeʹči.

⁷ Iʹllep vaʹsttii suʹnne: «Håʹt vuästčep leeiʹb kuõiʹtin čuõʹđin denaarin, ij tõʹst faattče ni jueʹǩǩkeʹžže håʹt siõm kooskaž.»

⁸ De nuʹbb suu mättʼtõspäärnain, Andreas Pietar villj, cieʹlǩi Isõʹsse:

⁹ «Tääiʹben lij Päʹrnn, ǩeäʹst liâ vitt leeiʹb da kuõʹhtt kueʹl, leša mõõk tõk liâ nääiʹt jiânnʼjõʹsse?»

¹⁰ «Päkkad oummid išttâd maddu», Isõs cieʹlǩi. Nuʹt vittdohat ooumžed iʹštte maddu, koʹst šõõddi jiânnai rääʹss. Tâʹl åumma, kook leʹjje nuʹt vittdohat, luâšttõʹtte maddu.

¹¹ Isõs vaaʹldi leeiʹbid, späʹssbõõžži Vuâsppååʹd da juõʹjji åummaid tõiʹd; seämma kuõʹlid, da puk vuåǯǯu poorrâd nuʹt jiânnai ko vuõiʹtte.

¹² Ko puk leʹjje kââllas poorrâm, Isõs cieʹlǩi mättʼtõspäärnees: «Noorrâd, mõõk liâ kuâđđjam, što ij ni mii mõõnče tuʹššen.»

¹³ Sij tuejjee nuʹt, da tõiʹn, mõõk leʹjje kuâđđjam poorkâni vittân leeiʹbest, noʹrre kuâtmlo tiudd čuʹǩǩed.

¹⁴ Ko oummu vuõiʹnne tõn õõmâstuâj, sij cieʹlǩǩe: «Tõt lij tuõđi tõt profeʹtt, koon pueʹttem lij vuõrddum maaiʹlme.»

¹⁵ Isõs tiõʹđi, što oummu juʹrdde pâiʹlviõǥǥ raajjâd suʹst koonǥõõzz, son ǩeässõõđi meädda värra jiõččines.

Isõs väʒʒ čääʹʒʒ mieʹldd

¹⁶ Leša ko jeäʹǩǩääž šõõddi, mõʹnne suu mättʼtõspäärna vuâlas jäuʹrr-riddu,

¹⁷ mõʹnne võnnsa da sollee rââst jääuʹr Kapernauʹmme. Jeäʹǩǩääž seuʹnnjni ij-ǥa Isõs veâl leämma puättam sij årra.

¹⁸ Šõõddi kõrr piõgg da kaaggi jõnn parruid.

¹⁹ Ko leʹjje suukkâm nuʹt vitt ǩilomettred, vuõiʹnne mättʼtõspäärna Isõõzz väʹʒʒem čääʹʒʒ âʹlnn da pueʹttem ââlda võnnâz. Sij suõrggne.

²⁰ Leša Isõs cieʹlǩi: «Jeäʹlled põllu, mon-i leäm.»

²¹ Sij juʹrdde väʹldded suu võnnsa, leša võõnâs pueʹđi juʹn tõn riddu, koozz sij leʹjje jååʹttmen.

Oummu åʹcce Isõõzz

²² Nuuʹbb peeiʹv oummu, kook leʹjje kuâđđjam jääuʹr tun peälla, hoʹhssje, što mättʼtõspäärna leʹjje vuâlggam võnnsin, da tõn reeddast iʹlleäm teäʹnab võõnâs, da što Isõs iʹlleäm mõõnnâm tõõi võnnsa.

²³ Tiberiaazzâst puõʹtte jeeʹres võnnâz ââlda tõn pääiʹǩ, koʹst oummu leʹjje poorrâm Šuur bloouslõõvvâm leeiʹbid.

²⁴ Ko oummu vuõiʹnne, što Isõs da suu mättʼtõspäärna jeäʹleämma tåʹben, sij mõʹnne võnnsid da maʹcce Kapernauʹmme ooccâd Isõõzz.

Jieʹllem leiʹbb

²⁵ Sij kauʹnne Isõõzz jääuʹr nuuʹbb peäʹlnn da kõʹčče: «Uʹčteeʹl, kuäʹss puõʹttiǩ tiiʹǩ?»

²⁶ Isõs vaʹsttii: «Tuõđi, tuõđi mon ceälkam tiʹjjid: tij jeäʹped ooʒʒ muu tõn diõtt, što leäʹped vuäinnam õõmâstuâjaid. Tij pueʹttveʹted muu mieʹldd tõn diõtt, ko vuäǯǯaid poorrâd kââllas.

²⁷ Jeäʹlled kuõzztõllu leeiʹb, kååʹtt läppai, pâi tõn leeiʹb, kååʹtt peštt âʹǩǩpâjjsaž jieʹllma. Oummu Päʹrnn oudd tõn tiʹjjid, ko Eʹčč Vuâsppåʹd lij ouddam tõõzz suʹnne vääʹld.»

²⁸ «Muʹvddem tuâjaid Vuâsppåʹd meeʹst vuârdd?», sij kõʹčče.

²⁹ «Vuâsppåʹd vuârdd, što tij åskkveʹted suu, koon Vuâsppåʹd lij vuõlttääm», Isõs vaʹsttii.

³⁰ «Muʹvddem õõmâstuâj tuejjääk, što mij vuäinčep tuu?», sij kõʹčče. «Mâiʹd joordak tuejjeed?

³¹ Mij maaddârääʹjj poʹrre poostaijânnmest manna, mäʹhtt juʹn Pââʹss ǩeeʹrjest cieʹlǩet; Vuâsppåʹd uuʹdi siʹjjid ââʹlmest leeiʹb poorrâm diõtt.»

³² «Ceälkam tiʹjjid», Isõs vaʹsttii, «Moʹssai ij ouddam tiʹjjid ââlmlaž leeiʹb, pâi muu Eččam oudd tiʹjjid tuõđi ââlmlaž leeiʹb.

³³ Vuâsppååʹd leiʹbb lij son, kååʹtt puätt vuâlas ââʹlmest da oudd maaiʹlme jieʹllem.»

³⁴ «Šurr, uuʹd miʹjjid pâi tõn leeiʹb», sij cieʹlǩǩe.

³⁵ Isõs cieʹlǩi: «Mon leäm jieʹllem leiʹbb: kååʹtt puätt muu årra, ij ni kuäʹss vueiʹn nieʹlj, da kååʹtt muu åskk, ij ni kuäʹss juǥstõõv.

³⁶ Leša mäʹhtt juʹn leäm ceälkkam tiʹjjid: tij leäʹped vuäinnam muu, jeäʹped-ǥa seâža ååsk muu.

³⁷ Jueʹǩǩkaž, koon Eččam muʹnne oudd, puätt muu årrsan, jiõm-ǥa jåårǥlââʹtt meädda ni ǩeän, kååʹtt årrsan puätt.

³⁸ Jiõm mon puättam ââʹlmest tuejjeed mâiʹd jiõčč täättam, pâi suu täätt, kååʹtt lij muu vuõlttääm.

³⁹ Son tätt, što jiõm mõõnteʹčče ni õõut tõiʹn, koiʹd son lij muʹnne ouddam, pâi coounčem siʹjjid mââimõs peeiʹv.

⁴⁰ Eččam tätt, što jueʹǩǩkast, kååʹtt vuäinn Pääʹrn da åskk suu, lij âʹǩǩpâjjsaž jieʹllem, da mon coounam suu mââimõs peeiʹv.»

⁴¹ Juudlažneeʹǩǩ aʹlǧǧe päʹnneed Isõõzz vuâstta, ko son cieʹlǩi: «Mon leäm leiʹbb, kååʹtt lij puättam ââʹlmest vuâlas».

⁴² Sij cieʹlǩǩe: «Ij-ǥo tät leäkku Isõs Jooʹsef päʹrnn, koon eeʹjj da jieʹnn mij tobddâp? Mäʹhtt son vuäitt ceäʹlǩǩed, što lij puättam ââʹlmest?»

⁴³ Isõs vaʹsttii: «Jeäʹlled päʹnnuku.

⁴⁴ Ij ni ǩii vueiʹt pueʹtted muu årrsan, ko ij Eččam, kååʹtt lij muu vuõlttääm, ǩieʹzzʼže suu. Tõt, kååʹtt puätt, suu mon coounam mââimõs peeiʹv.

⁴⁵ Profeeʹtti ǩeeʹrjtõõzzin lij ǩeeʹrjtum: ’Vuâsppåʹd mättat pukid siʹjjid.’ Jueʹǩǩkaž, kååʹtt kooll Eeʹjj da mättai suʹst, puätt muu årrsan.

⁴⁶ Ij nuʹt, što ni ǩii leʹčče vuäinnam Eeʹjj; õhttu Päʹrnn, kååʹtt lij puättam Vuâsppååʹd åʹrnn, lij vuäinnam Eeʹjj.

⁴⁷ Tuõđi, tuõđi ceälkam tiʹjjid: kååʹtt åskk, vuäǯǯ âʹǩǩpâjjsaž jieʹllem.

⁴⁸ Mon leäm jieʹllem leiʹbb.

⁴⁹ Tij eeʹjjediʹʒʒe poʹrre poostaijânnmest manna da tõn diõtt liâ jäämmam.

⁵⁰ A ǥo ǩii-ne påårr tän ââʹlmest puättam leeiʹb, son ij ni kuäʹss jääʹm.

⁵¹ Mon leäm ââʹlmest puättam jieʹllem leiʹbb. Tõt, kååʹtt påårr tän leiʹbb, jeäll âʹǩǩpââjas. Jieʹllem leiʹbb, koon mon ooudam, lij muu råʹpp. Mon ooudam tõn, što maaiʹlm vuäǯǯči jieʹlled.»

⁵² Juudlažneeʹǩǩ aʹlǧǧe reeidčõõttâd kõskkneez: «Mäʹhtt son vuäitt uʹvdded rååʹppes miʹjjid poorrâm diõtt?»

⁵³ Isõs cieʹlǩi: «Mon ceälkam tiʹjjid: jõs jeäʹped poor Oummu Pääʹrn vueʹǯǯ da juuǥǥ suu võõr, tij jeäʹped vueiʹt jieʹlled.

⁵⁴ Tõt, kååʹtt påårr muu vueʹǯǯ da jookk muu võõr, vuäǯǯ âʹǩǩpâjjsaž jieʹllem. Mon coounam suu mââimõs peeiʹv.

⁵⁵ Muu råʹpp lij tuõđi porrmõš da muu võrr lij tuõđi juukkmõš.

⁵⁶ Kååʹtt påårr muu vueʹǯǯ da jookk muu võõr, pââšš muʹst da mon suʹst.

⁵⁷ Eʹčč, kååʹtt jeäll, lij muu vuõlttääm, da suʹst mon še leäm vuäǯǯam jieʹllem. Nuʹt še tõt, kååʹtt påårr muu, jeäll âʹǩǩpââjas.

⁵⁸ Tät lij tõt leiʹbb, kååʹtt lij puättam ââʹlmest. Tõt lij nuuʹbbnallšem ko leiʹbb, mõõn tij eeʹjjediʹʒʒe poʹrre vieʹltkâni jääʹmmem. Kååʹtt påårr tän leeiʹb, jeäll âʹǩǩpââjas.»

Âʹǩǩpâjjsa jieʹllem sääʹn

⁵⁹ Nääiʹt Isõs säärnai ko mättʼti Kapernaaum synagogast.

⁶⁰ Määŋgas suu mättʼtõspäärnain cieʹlǩǩe, täiʹd saaʹnid ko kuʹlle: «Tät lij čuuʹt kõrr maainâs.»

⁶¹ Isõs tiõʹđi, što mättʼtõspäärna päʹnnee suu mainnâz diõtt, da kõõjji: «Čuõʒʒat-a tät tiʹjjid?

⁶² Na ko mâka vueiʹnnveʹted Oummu Pääʹrn pâjjnem mååusat tåk, koʹst son leäi ouddâl?

⁶³ Jiõgg rääjj jieʹllʼjen, oummu jurddjin iʹlla ni mii aauʹǩid. Sääʹn, koiʹd sarnnum tiʹjjid, liâ Jiõgg da jieʹllem.

⁶⁴ Leša tij jooukâst liâ måtam, kook jiâ ååsk.» Isõs tiõʹđi aalǥâst juʹn, ǩeäk jiâ åskkam da ǩii suu ooudči õõlmâs.

⁶⁵ Son jueʹtǩi: «Tõn diõtt ceälkam mon še tiʹjjid, što ij ni ǩii vueiʹt pueʹtted muu årra muđoiǥo Eččan täättast.»

⁶⁶ Tõn diõtt måtam Isõõzz mättʼtõspäärnain vuõʹlǧǧe meädda jiâ-ǥa teäʹnab jååttam suu mieʹldd.

⁶⁷ «Tättveʹted-a tij še mõõnnâd meädda?», Isõs kõõjji tõn kuâtmlåkksest.

⁶⁸ Semman Pietar vaʹsttii suʹnne: «Šurr, ǩeän årra mij vuäitčep mõõnnâd? Tuʹst liâ âʹǩǩpâjjsaž jieʹllem sääʹn.

⁶⁹ Mij åskkap da tieʹttep, što ton leäk Vuâsppååʹd Pââʹss.»

⁷⁰ Isõs vaʹsttii: «Mon vaʹlljeem tij kuâtmlåkkaz, da tõn diõtt õhtt teeʹst lij piârgglõk.»

⁷¹ Isõs säärnai Juudaazzâst, Semman Iskariot pääʹrnest. Håʹt-i tät še kuuli tõn kuâtmlåkkaz jouʹǩǩe, son ääiǥai uʹvdded Isõõzz õlmmsa.