Evvan 5 - Skolt Koltta Gospel of John 1988

Isõs pueʹrad Beetsata läädd åʹrnn

¹ Mâŋŋa tõʹst Isõs mõõni Jerusaaʹlma måtam juudlažniiʹǩǩi prääʹznka.

² Jerusaaʹlmest lij Sauʒʒuustõõǥǥ luʹnn lädd, koon hebreaǩiõllsaž nõmm lij Beetsata, di tõn kuâŋŋsest liâ vitt väʹʒʒemčuõkku, kooi peällsin liâ pääʹʒʒelm.

³ Päʹʒlmi kuâŋŋsin lieʹšše jiânnai puõʒʒi, čââʹlmteeʹm, rääʹmb da viõmmšõõvvâm oummu, kook vuõʹrdde čääʹʒʒ likkâm.

⁴ Aaiʹji mieʹldd luâšttõõđi vuäinak aʹŋǧǧel vuâlas laddu da joorti čääʹʒʒ. Mâŋŋa čääʹʒʒ joorteeʹmest kååʹtt vuõssmõssân lauʹǩǩii tõzz, son šõõddi tiõrvâs, puõʒʒi-ba muʹvddem kõõv täättas.

⁵ Da tåʹben leäi ååum, kååʹtt leäi puõccâm kolmmlokääuʹc eeʹǩǩed.

⁶ Ko Isõs vuõiʹni suu liâššâm da tiõʹđi suu, što son leäi puõccâm juʹn kuuʹǩǩ ääiʹj, cieʹlǩi son suʹnne: «Täättak-a puârrned?»

⁷ Puõcci vaʹsttii suʹnne: «Šurr, muʹst iʹlla ni ǩii, kååʹtt viiǥǥči muu laddu, ko čääʹcc lij koolǥtum, da mon ǥo leäm mõõnnmen, lauʹǩǩad nuʹbb tõõzz ooudbeäʹlnn muʹst.»

⁸ Isõs cieʹlǩi suʹnne: «Kaggõõđ, vääʹld assjääd da väʹʒʒel.»

⁹ Ååum tâʹles puârrni, ǩiõzzi assjees da aaʹlji väʹʒʒed. Leša tõt leäi pâʹsspeiʹvv.

¹⁰ Tõn diõtt juudlažneeʹǩǩ cieʹlǩǩe pueʹruum ooumže: «Ååʹn lij pâʹsspeiʹvv, ij tuʹst leäkku lååʹpp kueʹdded assjääd.»

¹¹ Son vaʹsttii siʹjjid: «Leša tõt, kååʹtt pueʹrii muu, cieʹlǩi: ’Vääʹld assjääd da väʹʒʒel’.»

¹² Sij kõʹčče suʹst: «Ǩii lij tõt ååum, kååʹtt cieʹlǩi tuʹnne: ’Vääʹld assjääd da väʹʒʒel’?»

¹³ Leša puârrnam ååum ij teâttam, ǩii tõt leäi, tõnt ko Isõs leäi vuâlggam, ko tõʹst leäi jiânnai narod.

¹⁴ Mâŋŋa tõʹst Isõs vuõiʹni suu ceerkvest da cieʹlǩi suʹnne: «Ǩiõčč, ton leäk puârrnammaž; jeäʹl teäʹnab rieʹǩǩ tuõjju, što ij tuʹnne mii-ne veâl hueʹnben šõõddče.»

¹⁵ De ååum mõõni meädda da cieʹlǩi juudlažniiʹǩǩid, što Isõs leäi suu pueʹrääm.

Vuâsppååʹd Pääʹrn viõkk

¹⁶ Da tõn diõtt juudlažneeʹǩǩ aʹlǧǧe vâjjeed Isõõzz, ko son pueʹrii pâʹsspeeiʹv.

¹⁷ Leša Isõs cieʹlǩi siʹjjid: «Muu Eʹčč tuejjad pâi tuâj, da nuʹt še mon tuejjääm.»

¹⁸ Tõn diõtt juudlažneeʹǩǩ veâl jeäʹnab viõǥǥtõʹlle suu kåʹddem diõtt, ko son ij pâi kååʹmtam pâʹsspeeiʹv, leša še Vuâsppååʹd cieʹlǩi jiijjâs Eʹččen da nuʹt raaji jiijjâs Vuâsppååʹden.

¹⁹ De Isõs vaʹsttii da cieʹlǩi siʹjjid: «Mon ceälkam tiʹjjid, što Päʹrnn ij vueiʹt ni mâiʹd tuejjeed jiijjâs täättast, pâi tõn, mõõn son vuäinn, što mâiʹd Eʹččes tuejjad. Mâiʹd Eʹččes tuejjad, tõn Päʹrnn še tuejjad.

²⁰ Eʹčč rääʹǩǩast Pääʹrn da čuäʹjat suʹnne puk, mâiʹd son jiõčč tuejjad. Son čuäʹjat Pärnnses veâl šoorbid tuâjaid, koiʹd tij vuäǯǯveʹted õõmtõõššâd.

²¹ Seämmanalla ko Eʹčč cåunn jaaʹmjid da rääjj jieʹllʼjen, de nuʹt še Päʹrnn rääjj jieʹllʼjen, ǩeäiʹd son tätt.

²² Eʹčč ij suud ni ǩeän, son lij ouddam puk suudâmvääʹld Pärnnses,

²³ što puk ciʹsttjeʹčče Pääʹrn seämmanalla, ko sij ciʹsttje Eeʹjj. Kååʹtt ij ciʹstte Pääʹrn ij ciʹstte ni Eeʹjj, kååʹtt lij suu vuõlttääm.

²⁴ Mon ceälkam tiʹjjid, što tõt, kååʹtt kooll muu saaʹnään da åskk suu, kååʹtt lij muu vuõlttääm, vuäǯǯ âʹǩǩpâjjsaž jieʹllem. Suu jeät suudu, pâi son lij piâssâm jaaʹmmjest jieʹllma.

²⁵ Tuõđi, tuõđi mon ceälkam tiʹjjid, što puätt äiʹǧǧ da lij juʹn puättam, kuäʹss jaaʹmi koʹlle Vuâsppååʹd Pääʹrn jiõn, da kook tõn koʹlle, vuäǯǯa jieʹlled.

²⁶ Eʹčč lij ouddam Pärnna seämma jieʹllemuʹvddi viõǥǥ, mii suʹst jijstes lij.

²⁷ Son lij ouddam Pärnna suudâmvääʹld, ko tät lij Oummu Päʹrnn.

²⁸ Jeäʹlled õõmtõššu: puätt veâl podd, kuäʹss puk jaaʹmi, kook liâ aauʹdin, koʹlle suu jiõnâs.

²⁹ Siʹjjid coounât, da sij puäʹtte åålǥas, tõk, kook liâ tuejjääm pueʹr, vuäǯǯa jieʹlled, leša tõk, kook liâ tuejjääm ǩeähn, jåuʹdde suud vuâlla.

Isõõzz tuõđšteei

³⁰ Jiõm mon vueiʹt tuejjeed ni mâiʹd jiõččan täättast. Mon suudam tõn mieʹldd, mäʹhtt Eččam ceälkk. Tõk liâ vuõiggâd, ko mon jiõm tuejjad jiõččan täätt mieʹldd, pâi suu täätt mieʹldd, kååʹtt lij muu vuõlttääm.

³¹ Jõs mon jiõčč tuõđštam jiõččan peäʹlnn, ij muu tuõđštõs tuõʹlle.

³² Leša muu peäʹlnn lij nuʹbb, da teâđam, što suu tuõđštõs lij tuõʹllʼjeei.

³³ Tij vuõltteem oummu jiõʹlle kuullmen Evvan, da son tuõđšti tuõđšvuõđâst.

³⁴ Jiõm mon taarbâž ni ǩeän tuõđštõõzz, leša ceälkam tän, što tij vuäitčid vuäǯǯad kaʹjjõõzz.

³⁵ Evvan leäi mâʹte čuõvvânji puõʹlli läämpa, koon čuõvâst tij täättaid pâi occnja ääiʹj vuässõõttâd.

³⁶ Leša muʹst lij jijstan ravvsab tuõđštõs ko Evvnest. Tuâj, mâiʹd Eʹčč lij ouddam muʹnne tuejjeem diõtt, tuõđšte, što Eʹčč lij muu vuõlttääm.

³⁷ Seämmanalla še Eʹčč, kååʹtt lij muu vuõlttääm, tuõđašt muu peäʹlest. Tij jeäʹped leäkku ni kuäʹss kuullâm suu jiõn, jeäʹped-ǥa vuäinnam suu muâđaid.

³⁸ Suu sääʹn tij jeäʹped vääʹld vuâstta, ko tij jeäʹped ååsk suu, koon Eʹčč lij vuõlttääm.

³⁹ Tij tuʹtǩǩeʹped Pââʹss ǩeeʹrj ǩeeʹrjtõõzzid da juʹrddveʹted, što kaunnveʹted tõin âʹǩǩpâjjsaž jieʹllem, da sami tõk tuõđšte muʹst.

⁴⁰ Tij jeäʹped täätt pueʹtted muu årra, što vuäǯǯčid jieʹllem.

⁴¹ Jiõm mon ooʒʒ oummi späʹssebvuõđ.

⁴² Toobdam seâža tiʹjjid: tij jeäʹped rääʹǩǩest Vuâsppååʹd.

⁴³ Mon leäm puättam Eččan nõõmâst, leša tij jeäʹped vääʹld muu vuâstta; ko mâka ǩii-ne nuʹbb puätt jiijjâs nõõmâst, suu tij kâʹl väʹlddveʹted vuâstta.

⁴⁴ Mäʹhtt tij vuäitčid åskkad, ko väʹlddveʹted ciist kueiʹmm kueiʹmsteed, leša jeäʹped ooʒʒ tõn ciist, kååʹtt puätt pâi Vuâsppååʹdest.

⁴⁵ Jeäʹlled jurddu, što mon tiʹjjid viârtam Eeʹjj ooudâst. Tij viârteei lij Moʹssai, ǩeäzz leäʹped naʹddjõõttâm.

⁴⁶ Ko mâka tij leeiʹd åskkad Moʹssja, leeiʹd åskkad muʹnne še, tõn diõtt, što sami muʹst son lij ǩeeʹrjtam.

⁴⁷ Leša ko jeäʹped ååsk suu ǩeeʹrjtõõzzid, mäʹhtt vuäitčid åskkad muu saaʹnään?»