Evvan 4 - Skolt Koltta Gospel of John 1988

Isõs da Samaria neezzan

¹ Ko ååʹn Šurr vuäǯǯai tieʹtted farisõõzzid kuullâm, što Isõs raaji mättʼtõspäärnžen da riisti jeäʹnbõõzzid ko Evvan

² — håʹt-i Isõs ij jiõčč risttâm pâi suu mättʼtõspäärna —

³ son kuõʹđi Juudea da mõõni eʹpet Galilea.

⁴ Leša son õõlǥi jååʹtted Samaria pääiʹǩ.

⁵ Nuʹt son pueʹđi Sykar-nõmmsaž Samaria gåårda, kååʹtt lij ââlda tõn mäddkuuʹsǩ, koon Jääkk leäi ouddam pärnnses Jooʹsfa.

⁶ Da tåʹben leäi Jakku käivv. Ko ååʹn Isõs leäi määʹtǩest levvjam, iišti son käivvriddu. Da leäi nuʹt kõskkpeiʹvvpodd.

⁷ Pueʹđi måtam Samaria neezzan čääʹʒʒ viǯǯâd. Isõs cieʹlǩi suʹnne: «Uuʹd mon juuǥǥam.»

⁸ Mättʼtõspäärna leʹjje vuâlggam gåårda porrmõõžž vuäʹstted.

⁹ Näʹde Samaria neezzan cieʹlǩi suʹnne: «Mäʹhtt ton, kååʹtt leäk juudlažneǩ, raaukak juukkâd čääʹʒʒ muʹst, Samaria neezznest?» Ko juudlažneeʹǩǩ jiâ juuǥǥ seämma leeʹttest samarianiiʹǩǩivuiʹm.

¹⁰ Isõs vaʹsttii da cieʹlǩi suʹnne: «Ko ton teâđčiǩ Vuâsppååʹd sǩiâŋk da ǩii tõt lij, kååʹtt tuʹnne ceälkk: ’Uuʹd mon juuǥǥam’, ton leʹččiǩ jiõčč raukkâm suʹst, da son leʹčči ouddam tuʹnne jieʹlli čääʹʒʒ.»

¹¹ Neezzan cieʹlǩi suʹnne: «Šurr, ij-ba tuʹst leäkku kuäivvamleʹtt, da käivv lij čiŋŋâl; koʹst tuʹst tâʹl lij tõt jieʹlli čääʹcc?

¹² Jiõk tâma ton leäkku šoorab ko mij eččam Jääkk, kååʹtt uuʹdi miʹjjid tän kääiv da juuǥǥi tõʹst, son jiõčč, suu päärna da žeeʹvet?»

¹³ Isõs vaʹsttii da cieʹlǩi suʹnne: «Jueʹǩǩkaž, kååʹtt jookk tän čääʹʒʒ, juǥstââvv oʹđđest,

¹⁴ leša kååʹtt jookk tõn čääʹʒʒ, koon mon suʹnne ooudam, tõt ij ni kuäʹss juǥstõõv. Pâi tõt čääʹcc, koon mon suʹnne ooudam, šâdd suʹst tõn čääʹʒʒ läddan, kååʹtt kålgg âʹǩǩpâjjsaž jieʹllma.»

¹⁵ Neezzan cieʹlǩi suʹnne: «Šurr, uuʹd muʹnne tõn čääʹʒʒ, što ij muu juǥstââttče ij-ǥa muu taarbšeʹčče jååʹtted tääiʹben kuäivvmen.»

¹⁶ Isõs cieʹlǩi suʹnne: «Mõõn, kååčč åummad da puäʹđ tiiʹǩ.»

¹⁷ Neezzan vaʹsttii da cieʹlǩi: «Ij muʹst leäkku ååum.» Isõs cieʹlǩi suʹnne: «Vuõiʹǧǧest ton cieʹlǩǩiǩ: ’Ij muʹst leäkku ååum.’

¹⁸ Tâʹl vitt åumma tuʹst liâ leämma, da tõt, kååʹtt tuʹst ååʹn lij, iʹlleäkku tuu ååum. Tõʹst cieʹlǩǩiǩ tuõđ.»

¹⁹ Neezzan cieʹlǩi suʹnne: «Šurr, mon vuäinam, što leäk profeʹtt.

²⁰ Mij eʹččem liâ kåʹmrdeeʹl moʹlidvâsttam tän vääʹrest; da tij juudlažneeʹǩǩ ceäʹlǩǩveʹted, što pâi Jerusaaʹlmest lij päiʹǩǩ, koʹst âlgg kåʹmrdeeʹl moʹlidvâʹstted.»

²¹ Isõs cieʹlǩi suʹnne: «Kaav, ååsk muu. Šâdd veâl äiʹǧǧ, kuäʹss jeäʹped moʹlidvââʹst Ečča tän vääʹrest jeäʹped-ǥa Jerusaaʹlmest.

²² Tij kåʹmrdeʹped tõn, mõõn jeäʹped toobd, leša mij kåʹmrdep tõn, mõõn mij tobddâp. Tâʹl kaʹjjõs lij juudlažniiʹǩǩin.

²³ Leša puätt äiʹǧǧ — da lij juʹn puättam — kuäʹss tuõđâš moʹlidvõõʹsti reʹstte čõõʹlmeez Eeʹjj Jiõggâst da tuõđšvuõđâst: tõnnallšem moʹlidvõõʹstjid Eʹčč še tätt.

²⁴ Vuâsppåʹd lij Jiõgg, da suʹnne âlgg moʹlidvâʹstted tuõđšvuõđ Jiõggâst.»

²⁵ Neezzan cieʹlǩi: «Kâʹl mon teâđam, što Messias puätt — tõt koon cieʹlǩet Kristõssân — da son iʹlmmat miʹjjid puk.»

²⁶ Isõs cieʹlǩi suʹnne: «Tõt leäm mon. Son maainast tuin.»

²⁷ Tâʹl suʹst mättʼtõspäärna puõʹtte da sij õõmtõʹšše tõn, što son mainsti neezznin. Leša ij ni ǩii ceälkkam: «Mâiʹd raaukak?» leʹbe: «Mâiʹd mainstak suin?»

²⁸ Da neezzan kuõʹđi čääʹccleeʹttes da mõõni gåårda da cieʹlǩi oummid:

²⁹ «Pueʹtted ǩiččâd åumma, kååʹtt lij särnnam muʹnne puk, mâiʹd mon leäm tuejjääm. Ij tâma tõt leäkku Kristõs?»

³⁰ Oummu vuõʹlǧǧe gåårdest da mõʹnne suu årra.

³¹ Tän kõõskâst mättʼtõspäärna rauʹǩǩe suu cieʹlǩeeʹl: «Rabbi, poor!»

³² Leša son cieʹlǩi siʹjjid: «Muʹst lij poorrâmnalla porrmõš, mâʹst tij jeäʹped tieʹđ.»

³³ De mättʼtõspäärna cieʹlǩǩe kõskkneez: «Leežž-ǥo ǩii-ne pohttam suʹnne porrmõõžž?»

³⁴ Isõs cieʹlǩi siʹjjid: «Muu porrmõššam lij tõt, što mon tuejjääm, mâiʹd vuõltteejam tätt, da teâudam tõn tuâj, koon son lij alttääm.

³⁵ Jeäʹped-ǥo cieʹlǩ: ’Veâl lie nellj mannu da jeällpeäld čuõppâmäiʹǧǧ puätt’? Ǩiõčč, mon ceälkam tiʹjjid: Kaggâd čõõʹlmeed da ǩiččâd peäldaid, mäʹhtt tõk liâ šõddâm čuõppâmnalla.

³⁶ Juʹn ååʹn vuäǯǯ čuõppi pääʹlǩ da nåårr šââddaid âʹkkpâjjsaž jieʹllma, što kõʹlvvi da čuõppi vuäǯǯče õõutsââʹjest rämmšed.

³⁷ Tät sääʹnn lij tuõtt: nuʹbb kâlvv leša nuʹbb čuâpp.

³⁸ Mon leäm vuõlttääm tiʹjjid nåkam šââdd koʹrjjeed, mõõn diõtt jeäʹped leäkku vääiv vuäinnam; jeärraz liâ vääiv vuäinnam, da tij leäʹped vuäǯǯam sij vääivai šââddaid.»

³⁹ Da määŋgas samarianeeʹǩǩ tõn gåårdest oskku suʹnne neezzan saaǥǥi diõtt, ko tät tuõđšti: «Son lij särnnam muʹnne puk, mâiʹd mon leäm tuejjääm.»

⁴⁰ Ko ååʹn samarianeeʹǩǩ puõʹtte suu årra, rauʹǩǩe sij suu pääʹcced sij årra; da son paaʹʒʒi tõk kueiʹt peeivas.

⁴¹ Veâl määŋgas oskku Isõõzz suu jiijjâs saaǥǥi diõtt.

⁴² Da sij cieʹlǩǩe neezzna: «Jeäʹp teäʹnab ååsk tuu saaǥǥi diõtt, ko mij jiijj leäʹp kuullâm da tieʹttep, što son tuõđi lij maaiʹlm kaʹjjeeja.»

Isõs pueʹrad veʹrǧǧåumma pääʹrn

⁴³ Leša tõn kueiʹt peeiʹv ǩeeʹjjest son vuõʹlji tåʹben Galilea.

⁴⁴ Tâʹl Isõs jiõčč tuõđšti, što jeät profeeʹtt ciʹsttjuku jiijjâs šâddgåårdest.

⁴⁵ Ko son âʹtte pueʹđi Galilea, vaʹldde galileaneeʹǩǩ suu vuâstta ciʹsttjeeʹl. Sij jiijj še leʹjje leämmaž Jerusaaʹlmest eʹjjpeeiʹv prääʹznǩi ääiʹj da leʹjje vuäinnam puk, mâiʹd Isõs tåʹben tuejjii.

⁴⁶ Isõs pueʹđi eʹpet Galilea Kaanaǥa, koʹst son leäi mottam čääʹʒʒ viin smakkân. Kapernaaumâst leäi halltõõzz veʹrǧǧååum, koon päʹrnn leäi puõccmen.

⁴⁷ Ko son kuuli, što Isõs leäi puättam Juudeast Galilea, son vuõʹlji ǩirrsest tän årra da kååččai pueʹtted Kapernauʹmme pueʹreed suʹst pääʹrn, kååʹtt leäi jääʹmmʼmen.

⁴⁸ Isõs cieʹlǩi suʹnne: «Tij ko jeäʹped vueiʹn tuõđštõstuâjaid da õmmsid, tij jeäʹped ååsk.»

⁴⁹ Veʹrǧǧååum cieʹlǩi: «Šurr, puäʹđ sõõrǥab, ouʹddelgo pärnnam jäämm.»

⁵⁰ Isõs cieʹlǩi: «Mõõn, pärnnad jeäll.» Da ååum ååskai, mâiʹd Isõs cieʹlǩi da vuõʹlji.

⁵¹ Son ko leäi jååʹttmen, suu kääzzaǩ puõʹtte suu vuâstta da sarnnu, što päʹrnn lij jieʹllmen.

⁵² Ååum kõõjji, koon poodd päʹrnn puârrneškueʹđi. «Žaar luõʹšti jåhtta õõut ääiʹj jeäʹǩǩespeeiʹv, sij vaʹsttee.»

⁵³ Eʹčč muuʹšti, što sami tõn poodd Isõs leäi särnnam, što päʹrnn jeäll. Son da puk suu piâr oskku Isõʹsse.

⁵⁴ Tät leäi Isõõzz nuʹbb tuõđštõstuâjj, da son tuejjii tõn tâʹl, ko leäi puättam Juudeast Galilea.