Evvan 21 - Skolt Koltta Gospel of John 1988

Isõs čuäʹjtââtt

¹ Mâŋŋa tõʹst Isõs čuäʹjtõõđi eʹpet mättʼtõspäärnees Tiberiaazz jäuʹrr-reeddast. Tõt šõõddi nääiʹt:

² Semman Pietar, Fooma, koon koččuš Juuʹmǩen, Natanael Galilea Kaanast da Sebeteõõzz pääʹrn da veâl kuõʹhtt jeeʹres mättʼtõspäärna leʹjje õõutsââʹjest.

³ Semman Pietar cieʹlǩi: «Mon vuâlǥam kuõʹlid šeeʹlled.» «Mij še vueʹlǧǧep mieʹldd», jeärraz cieʹlǩǩe suʹnne. Sij vuõʹlǧǧe da lauʹǩǩee võnnsa, leša tõn iinn jiâ kåddam ni mâiʹd.

⁴ Leäi juʹn eeʹdääldõž, da Isõs čueǯǯai reeddast, leša mättʼtõspäärna jiâ tobddâm suu.

⁵ Isõs kõõjji seeʹst: «Päärna, ij-ǥo teeʹst leäkku ni mâiʹd poorrâd?» «Ij ni mii», sij vaʹsttee.

⁶ Son cieʹlǩi siʹjjid: «Suâppad sääiʹmid vuäʹljspeälla võnnâz, tâʹl kåʹddveʹted.» Sij suõppu, leša jiâ vuäittam teäʹnab väʹst sääiʹm ǩieʹssed, nuʹt leʹjje jiânnai kueʹl poppääm.

⁷ Tâʹl tõt mättʼtõspäärnaž, koon Isõs räʹǩsti, cieʹlki Pietara: «Tõt lij Šurr!» Ko Pietar kuuli, što tõt leäi Šurr, son nââʹǩǩti pihttsees oolâs, tõn diõtt ko son leäi peâutää, da njuiʹǩǩii jäurra.

⁸ Jeeʹres mättʼtõspäärna puõʹtte suuǥǥeeʹl, tõn diõtt ko sij jiâ leämmaš ko čueʹđ mettar ǩeeʹjjest reeddast. Sij ǩieʹsse mâʹŋŋlest sääiʹm kuõʹleesvuiʹm.

⁹ Ko sij lauʹǩǩee riddu, vuõiʹnne sij, što tåʹben leʹjje toolâst kueʹl di leeiʹb päšttjeʹmmen.

¹⁰ Isõs cieʹlǩi siʹjjid: «Puʹhtted tiiʹǩ tõiʹd kuõʹlid, koiʹd jeäskka kooʹddid.»

¹¹ Semman Pietar mõõni võnnsa da ǩieʹzzi sääiʹm riddu jõnn kuõʹlivuiʹm. Sääiʹmest leʹjje čueʹtt vittlo kolmm kueʹlled. Håʹt-i leʹjje jiânnai kueʹl, säiʹmm ij ni ǩeâškkjam.

¹² Isõs cieʹlǩi: «Pueʹtted poorrâd.» Ij ni õhtt mättʼtõspäärnain tuõsttâm kõõččâd, ǩii son leäi. Sij puk tiõʹtte, što son leäi Šurr jiõčč.

¹³ Isõs pueʹđi tollpeällsa, vaaʹldi leeiʹb da kuõʹlid da juõʹjji siʹjjid.

¹⁴ Nääiʹt Isõs kuälmad vuâra juʹn čuäʹjtõõđi mättʼtõspäärnees, mâŋŋa tõʹst ko leäi mårrnam jaaʹmmjest.

Isõs da Pietar

¹⁵ Ko sij leʹjje poorrâm, Isõs kõõjji Semman Pietarest: «Semman, Evvan âʹlǧǧ, räʹǩstak-a ton muu jeäʹnab ko täk jeärraz?» Tät vaʹsttii: «Šurr, ton teâđak, što räʹǩstam tuu.» Isõs cieʹlǩi: «Poorât muu läbbsään.»

¹⁶ Mâŋŋa son kõõjji oʹđđest: «Semman, Evvan âʹlǧǧ, räʹǩstak-a muu?» Pietar vaʹsttii: «Šurr, ton kâʹl teâđak, što räʹǩstam tuu.» Isõs cieʹlǩi suʹnne: «Peâmm muu saauʒään.»

¹⁷ Son kõõjji veâl kuälmad vuâra: «Semman, Evvan âʹlǧǧ, räʹǩstak-a muu?» Tâʹl Pietar samai täärmtõõvi, ko Isõs kuälmad vuâra kõõjji seämmanalla. «Šurr», son cieʹlǩi, «ton teâđak puk da tõn še, što mon räʹǩstam tuu.» Isõs cieʹlǩi: «Poorât muu saauʒään.

¹⁸ Tuõđi, tuõđi, mon ceälkam tuʹnne: ko leʹjjiǩ nuõrr, čõʹnniǩ jiõčč puäkknjad da mõʹnniǩ, koozz tattuk; leša ko puärsmak, vuäǯǯak ǩeeiʹjeed ǩiõđääd, da nuʹbb čâânn puäkknjad da veekk tuu tåk, koozz ton jiõk täätt.»

¹⁹ Nääiʹt Isõs čõõđti, måkam jäämmʼmõõžžin Pietar leäi puʹhtted Vuâsppååda ciist. Mâŋŋa son cieʹlǩi Pietara: «Jååʹđ muu mieʹldd.»

Mättʼtõspäärnaž, koon Isõs räʹǩsti

²⁰ Pietar poonnjlõõđi da vuõiʹni jiijjâs tueʹǩǩen tõn mättʼtõspäärna, koon Isõs räʹǩsti. Tät leäi leämmaž poorrmen Isõõzz ââlda da leäi kõõččâm: «Šurr, ǩii lij tuu ploott?»

²¹ Ko Pietar suu vuõiʹni, son kõõjji Isõõzzâst: «Šurr, mäʹhtt suu ååʹn ǩeävv?»

²² Isõs vaʹsttii: «Håʹt mon täättčem, što son jeäll nuʹt kuuʹǩǩ ko mon puäđam, mâiʹd tõt tuʹnne kooll? Jååʹđ ton muu mieʹldd.»

²³ Nåkam saakk liâvvni viillji kõʹsǩǩe, što tõt mättʼtõspäärnaž ij jäämče. Nuʹt Isõs iʹlleäm ceälkkam; son tåʹlǩ leäi ceälkkam: «Håʹt mon täättčem, što son jeäll nuʹt kuuʹǩǩ, ko mon puäđam, mâiʹd tõt tuʹnne kooll.»

²⁴ Son lij tõt mättʼtõspäärnaž, kååʹtt tuõđašt täʹst da lij ǩeeʹrjtam tän puk. Mij tieʹttep, što suu tuõđštõssʼses vuäitt naʹddjõõttâd.

²⁵ Jiânnai veâl jeeʹresnallšem tuâjaid Isõs tuejjii. Jõs tõiʹd puk ǩeeʹrjteʹččeš mušttu, mon joordam, što jiâ ni koozz tän maaiʹlme čaaǥǥče tõk ǩeeʹrj, mõõk õõlǥče ǩeeʹrjted.